Mbulum a zla Musa ka, aà mibe à gà Isərayel
3
1 I dəba ŋa ya ka, Musa a kə̀vawa gà təmaŋ nda gà awak Yetiru i malpa ŋgar ata, mala mandəva kuɗa a Mbulum ata ika ahəɗ Madiyan a. A pat duwa ka, a kə̀v gà duwa a dala. A da à tar aà sik kwite duwa, tə zalawar Hureb. Kwite ata ka, kwite Mbulum. 2 I fata ka, gawla Mbulum BATSAH kwa ŋa a daha, a patar à ba i huɗ arah akwa duwa i gà bagwar, i liwiŋ gà adak a. Musa a fə̀r ahəraha ka, akwa a riŋ məvata ŋa i gà bagwar ata. Ama ka, a wene a tsa. 3 A dzala i gər ŋgar ka, a gwa: « Say i de a, i sèmete a dukw mene aà mburma ata dzekwiŋ, aɗaba la na gà bagwar ata a wene a tsiye?» 4 Aləka Mbulum BATSAH kwa ŋa a samata Musa ana a riŋ à sìrìkehe a aà məfə̀rà ahər a ka, a zalarra i gà bagwar adak ata ya. A zalar: « Musa, Musa. « A ̀tsaraka ka, a ŋgamar aakaha. 5 Mbulum a gwaɗar: « Kà sirikara a faha ya tsa. Ndzək tsapà ika sik a, aɗaba təv aaha kər mehìtsè ŋa iɗəm a ka, tsəɗaŋŋa.« 6 A gwaɗar asa: « Iye ka, Mbulum gà bàba gà tsir yak, i gà Abəraham nda Izak nda gà Zakup ana ti dzèwiŋ gurmits a bəɗ a. « Musa a ̀tsaraka kataya ka, a kaha are ŋgar, aɗaba magəɗa a ger, na à fir a aà Mbulum a. 7 I dəba ŋa ya, BATSAH kwa ŋa a gwa: « Yàa ŋgat a mesewere are gà mburma gà ana tì sèwèr a ika ahəɗ Ezipt ya. Yàa ̀tsaraka tuwa tar ana ti tiwe a agəra gà mburma gà Ezipt ana tə sawar a tar are ya. I sər mesewere are tar ata tì sèwèr a ya. 8 I tarəra ka, aà mibeyè à tar i ahər gà Ezipt ya. I dzik a tar ika ahəɗ aaha ya. I de à ter a aka ahəɗ ana batsah ŋa, ŋgwal ŋa lele ya. Ama ahəɗ ata ka, gà awah nda amum iɗəm i fata hinne. Na i fata ka, gà Kananiya, nda gà Hittiya, nda gà Amuriya, nda gà Perizziya, nda gà Hivviya, dite nda gà Yebusiya, tar mandza ŋa iɗəm tə̀ma. 9 Mewideye gà mburma gà, gà Isərayel ana ti tiwe aàba a ya ka, aka ɗeha aà iye, dite Yàa ŋgat mesewere are tar ana gà Ezipt ta ge a ter a matawak a asa mbaŋa. 10 Kinehe ka, i slir a kər a təv Firawna. Da, kà ndzikiŋara iɗəm gà mburma gà, gà Isərayel, ika ahəɗ Ezipt ya.« 11 Musa a tsaraka kataya ka, a tsam aà Mbulum, a gwaɗar: « Iye ana, weke, na i de a a təv Firawna ka, dite i ndzikere a gà Isərayel ika ahəɗ Ezipt ya dze ya?» 12 Mbulum a gwaɗar aaka: « Iye, i ndze a nda kər. Araha na ki sir a dər ka, iye na a slər kər a ya. Na kàa daha, kàa ndzikiŋara gà mburma gà, gà Isərayel ika ahəɗ Ezipt ya ka, ki dwimera tserdze. Ki ti dzwimiŋ a gurmits a bəɗ ka, i gər kwite aaha kinehe ya.« 13 Musa a gwaɗa a Mbulum: « Kaɗəŋ. Ama na bəla i de a a təv gà Isərayel, i gweɗe a ter a, Mbulum gà bàba gà tsir kurum na a slərra iye a təv kurum a ka, tar tì ti tsèm aà iye a, ta gweɗiŋ a, zləm ŋgar dzena, weke? Dite iye, i gweɗe a ter a dzena, weke?» 14 Mbulum a gwaɗar aaka: « Iye ka, wur ana mandza ŋa ɗa aà biybiy a. « A gwaɗar aaka asa: « Araha na ki gweɗe a a gà Isərayel a, ‘iye ŋa mandza ŋa ɗa aà biybiy a na a sləraha mburma a təv kurum a.«« 15 I dəba ŋa ya, Mbulum a sə̀kàhar dər aaka asa, a gwaɗar: « Araha asa na ki gweɗe a a gà Isərayel a, ‘iye Batsah kurum ŋa, Mbulum gà bàba gà tsir kurum i gà Abəraham nda Izak, nda gà Zakup ana ti dzèwiŋ gurmits a bəɗ a, iye ŋa na a slərra ŋgat a təv kurum a ya. Taŋa na a ne zləm gà ana gà ɓəza gà ɓəza kurum ti zelewiŋ a dər a, ku mege ndeɗime.« 16 Kinehe ka, da, ka yaha gər a gà bàba gà Isərayel tserdze, gwaɗa a tar ka: ‘BATSAH kwa ŋa, Mbulum gà bàba gà tsir kurum aka pètiŋ aba. ŋgat ka, Mbulum ana gà Abəraham nda Izak nda gà Zakup ta gəsawa ahər ahəm a. A gweɗiŋ asa: Yàa dzala gà gər aka dukw ana ta ge a kurum a ŋgwala tsa ika ahəɗ Ezipt ya. 17 I dzala ka, i gwa, i dzik a kurum a i təv mesewere are kurum aaha tì sèwèr a kurum a ika ahəɗ Ezipt ya. I de à kurum a ka, aka ahəɗ gà Kananiya, nda gà Hittiya, nda gà Amuriya, nda gà Perizziya, nda gà Hivviya, dite nda gà Yebusiya, aka ahəɗ ana gà awah nda amum iɗəm hinne ya.« 18 Gà Isərayel ti dze a zləm a dukw ana ki tsik a ter a ya. Dite i dəba ŋa ya ka, ki de a a təv Əbay gà Ezipt, kurum nda gà bàba gà Isərayel tserdze. Gwaɗumar ka, ‘Batsah mə̀r ŋa, Mbulum gà Ibəranikwa na a pat a mə̀r à ba ya. Aɗaba taŋa na mì dara ya. Vəl a mə̀r vatwa, dite mìi de a a dala diriŋ. I huɗ mehinne makər a, mìi ta betse a duwa a Mbulum Batsah mə̀r ŋa.« 19 Ama kəla ka, i sər ndzer, Əbay ata ka, à pìl a kurum a tsa, say na wura aka tike aka ŋgat ndzəɗa ya dzekwiŋ. 20 Aɗaba taŋa, iye ŋa nda ahər gà ŋa na i tètìk a a gà mburma gà Ezipt ya. I ge a gà dukw mene aà mburma ŋgiɗ pampam hinne i fata, na dite i dəba ŋa ya ka, a vile a kurum a vatwa kuɗa ya. 21 I ge a kataya ka, na dite gà mburma gà Ezipt ti zlibe a à kurum a. I təv ana ki dwim a ya ka, ki dwim a ze ahər taf masakəŋa tsa. 22 Ku mege weke gà məkəs kurum ti yehe a gà dukw maduwaya ba i təv gà Ezipt ana tar i ga ilik ŋa ya, dite aà gà ɓəzla biye hərmaga tar ana bise ya, kamala gà gura, nda gà matsərəɗ gura nda gà petek a. Gà dukw ata ka, ki ti dzèywim a dər a gà ɓəza kurum gà asləka ŋana, nda gà dəm ŋana mbaŋa, ki ti zlwim a Əbay aà gà Ezipt ya fit kweleŋ.«