Mendizle 4

Mbulum a vəl ndzəɗa a Musa aà megeye gà dukw mene aà mburma pampam

1 Musa a gwaɗa a BATSAH kwa ŋa: « Ama na i de a a təv gà Isərayel, i tsik a ter a bazlam ata ka, ta gis a ahəm gà tsa. Ta gweɗiŋ a ka, BATSAH kwa ŋa aka pàtak à ba tsa, dzena, meme na i gweɗe a ter a ya?» 2 I fata ya ka, BATSAH kwa ŋa a tsam ahər, a gwaɗar: « Naha ana, dukùla na i ahər yak a?» Musa a gwaɗar aaka: « Naha ka, zəva.» 3 I dəba ŋa ya, BATSAH kwa ŋa a gwaɗar: « Yà a bəɗ kwaŋ.» Aləka a yà zəva ŋgar ata a bəɗ ka, a ne mesiwiɗ. Musa a samata kataya ka, a val ihər a. 4 Ama BATSAH kwa ŋa a gwaɗar: « Daha, gəs nda ahər i dzimir a.» Musa a daha, a gəs nda ahər ka, aka ne zəva i ahər ŋgar asa.

5 I dəba ŋa ya asa ka, BATSAH kwa ŋa a gwaɗar: « Na kàa daha, kàa ge dər kamala taŋa ya ka, ta gweɗe a, Batsah yak ŋa aka pàtak à ba. Iye ka, Mbulum gà tsir tar, i gà Abəraham nda Izak, nda gà Zakup ana tə zàmbaɗawa dər a kaɗəŋ.» 6 I dəba ŋa ya, BATSAH kwa ŋa a fàfəl a Musa asa, a gwaɗar: « Dzak ahər a kìywa yak kwaŋ.» Musa a tsaraka kataya ka, a dzak ahər a kìywa. Aləka a mà dərra iɗəm a ka, batsah mbəlak ba aà ahər ŋgar hinne, herrè kamala slewize ya. 7 I dəba ŋa ya ka, BATSAH kwa ŋa a gwaɗar asa: « Mà à ahər yak a kìywa asa.» Tsam ka, a mà dər aɗəm a kìywa ŋgar ata. Aləka a mà dərra iɗəm a ka, ahər ŋgar lele kamala ba ŋgar a dukw ŋgar.

8 Kamala taŋa ya, BATSAH kwa ŋa a gwaɗar asa mbaŋa: « Na bəla ta gis a dukw ana ki tsik a ter a ya tsa, nda gà bəla ta gis a dukw mene aà mburma malahalah ŋa aaha tsəka, ta gis a masula ŋana. 9 Na bəla tàa gəs gà dukw ata sula ya tsa fit məma ka, kà tə̀f yam ana i dula Nil a, dite kà dzaya dər a bəɗ aka ahəɗ ana makula ŋa ya. Tsam ka, yam ata a ne a kamala məmbəz a.»

Mbulum a zla Haruna kamala mala sik Musa ya

10 Ama Musa a gwaɗar aaka: « Awaŋ, kataya tsa, ºbay Mbulum, aɗaba iye ka, mala mifefile ana bìrek bìrek a tsa, ku mege mendze ndavana ilik, ku mege ndavana, daga aà gər ana kər riŋ ihər kà tsikiŋ a tekeɗe ka, a ge a ŋgulum tsa. Aɗaba iye ka, mala zìrwe, i sle aà mifefile tsidze.» 11 I dəba ŋa ya, BATSAH kwa ŋa a gwaɗar asa: « Weke na a vəl bazlam a mburma ya? Dite weke asa ya na a vəl a tar mazlaɓara, kige tsa a ge a ter a mandakazləm, nda gà bəla ta ŋget a a vatwa lele, kige tsa ti ne a gà guluf ŋa ya? Iye Batsah kurum ŋa tsiye na mala megeye gà dukw ata ya?» 12 A tsiker aba ya kataya ka, a gwaɗar asa: « Da kuɗa, iye na a vilek a bazlam aà mifefile ya. I ɗifek a à dukw ana ki ti tsik a ya.» 13 Musa a gwaɗar asa: « Awaŋ, əbay Mbulum. Kamkam slər ka, misle ŋgiɗ pam, tsəka, iye tsa.» 14 BATSAH kwa ŋa a tsaraka kataya ka, a ge matsəɓatsəɓ nda təv Musa hinne. A gwaɗar: « Haruna, gwala gà Levi ana, damər yak tsiye? Aɗaba i sər ŋgat ka, a sle aà mifefile a lele. Samata, araka a riŋ a dere a a təv yak a, ki limwimiŋa. Na aka dara, aka ŋgatak tsara ka, gəzləŋ ŋgar a ŋgeye a ba hinne. 15 Kər ka, ki tsiker a bazlam ana iye, i tsikik a ya. Iye ka, i ndzewe a i təv kurum sula məma, i ɗif a kurum a à dukw ana ki gwim a ya. 16 ŋgat ka, a ndze a avukw kər, à mèwe a à bazlam ana ki tsiker a ya a mburma. ŋgat a ne a kamala bazlam yak a. Kər tekeɗe, ki ne aaka a kamala Mbulum a mbaŋa. 17 I təv ana ki dwim a ya ka, zla dər zəva yak aaha aà ahər mbaŋa. Aɗaba ki ta ge a gà dukw mene aà mburma ata pampam a ka, nda zəva yak aaha.»

Musa a mbəɗ gər aka ahəɗ Ezipt

18 I dəba ŋa ya ka, Musa a mbəɗ gər a təv malpa ŋgar Yetiru. A daha, a gwaɗar: « Kamkam, viliŋ vatwa, i mbìɗ a gər a təv gà gwala gà aka ahəɗ Ezipt, i ta fir aka teriŋa, wànà tar riŋ ana, nda mesife lele beya?» Yetiru a gwaɗar: « Daba nda zay lele.» 19 I dəba ŋa ya, BATSAH kwa ŋa a gwaɗa a Musa ika ahəɗ Madiyan i fata asa ka: « Mbəɗ gər aka ahəɗ Ezipt, aɗaba gà na ta waya medzeye à mesife yak a ka, tar riŋ asa tsa, tàa mata.» 20 Musa a tsaraka kataya ka, a ndzək gà məkəs ŋgar nda gà ɓəza ŋgar, tə tsala aka gà hezweŋe tar. Dite ta mbəɗ gər aka ahəɗ Ezipt kuɗa. I təv ana ti de a ya ka, a zla dər zəva ata Mbulum a vəlar a ahər a. 21 I dəba ŋa ya, BATSAH kwa ŋa a gwaɗa a Musa asa: « Kinehe ka, ki mbìɗ a gər aka ahəɗ Ezipt. Na kàa daha ka, da aka miɗ Firawna, dite ki ge gà dukw mene aà mburma ata pampam tserdze, i vəlak ahər ndzəɗa ya. Ama ka, i viler a segeme a gər ŋgar, na dite a vile a vatwa a gà Isərayel aà mada ika ahəɗ ŋgar a tsiye. 22 Kamala taŋa ya, ki gweɗere a ka, Batsah mə̀r ŋa a gwa: « Gà mburma gà Isərayel ka, gà malùkwara gà ɓəza gà. 23 Iye ihər i gweɗekiŋa, vəl vatwa a gà ɓəza gà, dite tə daha, ti ti dziŋ a gurmits a bəɗ. Ama na kàa niw bazlam gà, ki vile a ter a vatwa tsəka, i kiɗ a malùkwara kəla yak.» 24 I təv ana tə dza ba aà mede, ti ndze a aà vatwa ya ka, həvəɗ aka ge aka tar. Aɗaba taŋa, ta kiriw ga petek aà mesifike aɗəm ba a fata. Tsam ka, BATSAH kwa ŋa a sə̀rə̀kaha a təv Musa, a waya makə̀ɗà ŋgat, 25 aɗaba kəla ŋgar a riŋ ka, masasa ŋa tsa. Tsam ka, Dzifura a zla kur ana a zəm hèpèppe lele ya, a sàs dər kəla ŋgar. Dite a daha, a ləm dər aà dukw gà tsir a Musa, a gwaɗar: « Kà ne aka iye ka, zal məmbəz.» 26 Dzifura a tsikar kataya ka, aɗaba mesèse ata a sàs kəla ŋgar a. Ama i fata ya ka, BATSAH kwa ŋa a miyak à Musa.

Gà Musa nda Haruna ti ne gà ɓəzla meɗìfè à vatwa a gà Isərayel

27 Akahər ata ka, BATSAH kwa ŋa a gwaɗa a Haruna: « Da a kusak a dala, ki ti limwim a nda Musa.» A tsaraka kataya ka, a mah ba, a da aà melime nda Musa a gər kwite ata tə zalar kwite Mbulum a. Aləka tə lə̀ma ka, a gəs aba ŋgat lele. 28 I fata ka, Musa a màr à bazlam ana BATSAH kwa ŋa a slər dərraha ŋgat a, nda gà dukw mene aà mburma ana a gwaɗar, ki ge a ya tserdze mbaŋa. 29 Kamala taŋa ya, gà Musa nda Haruna tə da akaba məma aka ahəɗ Ezipt. Tə daha, ti yaha gər a gà bàba gà Isərayel tserdze. 30 Dite Haruna a màwa a tar à dukw ana BATSAH kwa ŋa a tsik a Musa ya tserdze mbaŋa. I dəba ŋa ya, Musa tekeɗe, a geye gà dukw mene aà mburma ata Mbulum a gwaɗar, ki ta geye a ika miɗ gà Isərayel tserdze ya. 31 Gà mburma ata tə tsaraka Batsah tar ŋa a riŋ a ge a metsehe agəra tar gà Isərayel, a riŋ à fir a aà mesewere are tar ana tì sèwèr a ya ka, ta gəs nda gəzləŋ tar, tə dzàyar gurmits a bəɗ aà mazlə̀bà à ŋgat.