Gà Musa nda Haruna ika miɗ Firawna
5
1 I dəba ŋa ya ka, gà Musa nda Haruna tə da a təv Firawna ata. Tə daha, ta gwaɗar: « Batsah mə̀r ŋa, Mbulum gà Isərayel a gwaɗak ka, vəl vatwa a gà mburma gà, tə da a dala a kusak diriŋ, ti ta gìrìviŋ a riŋ aà mezlibe à iye i fata.»2 Firawna a tsaraka kataya ka, a gwaɗa a tar aaka: « Batsah kurum ŋa ata dzena, weke na i tsereke a bazlam ŋgar ka, dite i vile a vatwa a gà Isərayel, ti de a ya? Iye ka, i sər Batsah kurum ŋa ata tsa, dite ka, i vile a vatwa a gà Isərayel a tsa asa mbaŋa.»
3 Gà Musa nda Haruna ta gwaɗar: « Mbulum ata ka, Mbulum mə̀r gà Ibəranikwa na aka pàt a mə̀r aba ya. Vəl a mə̀r vatwa, mìi de a a dala a kusak diriŋ, mìi ge a aà vatwa mehinne makər, mìi ta bets a duwa a Batsah mə̀r ŋa a fata. Mìi ge a kataya ka, na dite a bets a mə̀r nda dukw məməta ana ŋgwala tsiye, kige tsa nda masalama ika miɗ guvəl asa tsiye.»
4 I dəba ŋa ya, Əbay gà Ezipt ata a gwaɗa a tar: « A kurum gà Musa nda Haruna, aàmala na ki digizwim a gà mburma aaha ika megemir tar a dziye? Mbəɗum gər aka megemir kurum.» 5 I dəba ŋa ya, a gwaɗa a tar asa: « I samata kinehe ka, gà mburma aaha tàa wa ɗa ba ika ahəɗ aaha ka, hinne, dite kurum ka, kà wayum madə̀gə̀zà tar ika megemir tar a dzena, meme?»
Firawna a səkah à mesewere are gà Isərayel ana tì sèwèr a ya
6 A pat ata ka, Firawna a gwaɗa a gà ɓəzla meslire ŋgar nda gà bàba gà Isərayel ana ti ɗif à megemir a mburma ya: 7 « Kinehe ka, kà ndàyum a tar gwastak ana ta həlaɓawa dər dwaɗwa aà mege dzelèp a asa tsa, say ti dewe a aà mayaha ŋa nda ahər tar ŋa.» 8 Ama mege dzelèp ata ta ge a ya tekeɗe, mà nikiɗ ihər a tsa, say ta geye a ka, kalkal, kamala ana ta gewa piŋŋe ya. Aɗaba tar ka, gà ɓəzla màsar. Agəra taŋa na tar riŋ ihər ti tiwe a aba, ta gwa, say mìi de a, mìi ta bets a duwa a Mbulum tar a. 9 Mege megemir mà za a tar ndzəɗa hinne, na dite a wise a ter a gər, tì dze a zləm a bazlam pàrsa tar ata asa tsiye.»
10 Gà ɓəzla meslire ŋgar nda gà bàba gà Isərayel ana ti ɗif à megemir a mburma ya, tə tsaraka kataya ka, ta mah ba tsara, tə daha, ti tsik a gà Isərayel. Firawna a gwa ka: « Wura a kurəs a kurumara gwastak ana kà həlaɓawum dər dwaɗwa ya asa tsa. 11 Say kurum ŋa ki deywim a makùrə̀sà ŋa nda ahər kurum ŋa, a təv ana kà lewwim ahər a pəra. Ama mege dzelèp ana ki gwim a ya kəla ka, kalkal, wura à nikiɗ a kurum a dər ihər a tsidze.»
12 Gà Isərayel ata tə tsaraka kataya ka, tə dzàyaba vatwa ika ahəɗ Ezipt tserdze, aà mayaha gwastak mege dzelèp ata. 13 Ama gà ɓəzla meslire Əbay ata ti tike aka tar ndzəɗa, ta gwaɗa a tar: « Gwim megemir ŋa ka, kalkal kamala ana piŋŋe gà mburma ta kurəsawa a kurumara gwastak aà ahər a ya.» 14 I fata ya ka, gà ɓəzla meslire Əbay Ezipt ata tə dzàba aà magàzlà gà bàba gà Isərayel ana ti ɗif a tar à megemir ŋa a ahər a. Tə tsam aà tar, ta gwaɗa a tar: « Aàla na kàa ndə̀vum à megemir mege dzelèp ana, ndavana ya, ndəna mbakum a ka, kamala ana ki gewim a tsiye?»
15 I fata ya ka, gà bàba gà Isərayel tə da a təv Firawna. Tə daha, tə tuwa aba ika miɗ ŋgar, ta gwaɗar: « ºbay, aàla na ki ge à mə̀r a gà ɓele yak kataya ya? 16 Aɗaba kinehe ka, wura a kurəsawa a mə̀rra gwastak a asa tsa, dite ta gwaɗa a mə̀r asa ka, say ki gwim a dzelèp ka, nda ndzəɗa, dite tar ihər ta gezle a dər akaba mə̀r gà ɓele yak asa dzena, meme? Ama gà mburma yak aaha ta ge a mə̀r a taŋa ka, dukw ana ŋgwala tsiye.»
17 Firawna a tsaraka bazlam tar ata ka, a gwaɗa a tar: « Kurum ka, gà ɓəzla màsar tserdze. A sàs a kurum megemir tsidze. Aɗaba taŋa na ku gwaɗum ka, mìi de a, mìi ta bets a duwa a Batsah mə̀r ŋa ya. 18 Ama kinehe ka, mbəɗum gər aka megemir kurum. Wura a kurəs a kurumaha gwastak a tsa, say ki gwim a dzelèp ka, kalkal kamala ana kì gewim piŋŋe ya.» 19 I fata ya ka, gà mburma gà bàba gà Isərayel ata tə samata ka, tar riŋ ihər tì sèwèr a are kaɗəŋ, aɗaba ana ta gwaɗa a tar ka: « Say ki gwim a dzelèp kəla pat, me nikiɗ ihər a tsidze, kalkal kamala ana kì gewim piŋŋe ya.»
20 I təv ana gà Isərayel tə dara i ga i bəra Firawna ya ka, tə lə̀ma nda gà Musa nda Haruna. Tar riŋ mehìtsè ŋa, ta veve a tar. 21 Ta gwaɗa a tar: « BATSAH kwa ŋa mə̀ fə̀r aà dukw ana kì gwim a mə̀r a, dite mə̀ mà a kurum à bakal ŋa dukw kurum. Aɗaba ana kà nwim à mə̀r gà ɓəzla mene are ika miɗ gà Firawna nda gà ɓəzla megemir ŋgar a. A ne ka, kamala ana kà dzàyum a tar masalama a ahər aà məbatsa dər mə̀r a pəra.»
Musa a hama a Mbulum
22 I dəba ŋa ya, Musa a tsaraka kataya ka, a mbəɗ aba a təv BATSAH kwa ŋa asa, a gwaɗar: « ºbay Mbulum, aàmala na ki ge a dukw ana ŋgwala tsiye a gà mburma yak aaha ya? Dite aɗaba la na kà slərra iye a təv tar a ya, na ki ge à ter a kataya ya? 23 Taŋa, ku mege ndeɗime, i dawa a təv Firawna aà mifefile nda zləm yak ka, a ge a ter a dər akaba dukw ana ŋgwala tsiye a gà mburma yak aaha. Ama kər tekeɗe, kàa be à tar i ahər ŋgar a tsidzena, meme?»