6
1 BATSAH kwa ŋa a tsaraka kataya ka, a gwaɗa a Musa: « Kinehe ka, ki ŋget a a dukw ana i ge a a Firawna ya. I ŋgèr ahər a balari nda ahər gà ana ndzəɗa ŋa ya, dite à pìl a a gà Isərayel a. Yàa tike aaka ndzəɗa ka, a delewe a tar ika ahəɗ ŋgar a nda ndzer kaɗəŋ.Mbulum a zal a Musa masula ŋa
2 I dəba ŋa ya, Mbulum a fàfəl a Musa, a gwaɗar: « Iye ka, Batsah kurum ŋa. 3 I pàtawa aba a gà bàba gà tsir kurum, a gà Abəraham nda Izak, nda gà Zakup piŋŋe ya. Iye ka, Mbulum ana i sle aà duwa tserdze ya. Ama kəla ka, tàa sər zləm gà ka, Batsah tar ŋa kamala taŋa ya ka, tə sər tsa. 4 I gəs masəra ba nda gà tar, i tsik a tar i sida ya, i vəl a tar ahəɗ Kanana. Ahəɗ ata ka, tə ndzawa iɗəm kamala ana tar gà slele ya. 5 Ama kinehe i tsaraka tuwa gà mburma gà, gà Isərayel ana ti ŋgìrze aàba a ya. Tàa ne gà ɓele gà Ezipt ka, dukw ana i tsik a gà bàba gà tsir tar ata i sida ya, a mìŋara a gər a. 6 Aɗaba taŋa, say ki gweɗe a a gà Isərayel ka: ‘Iye ka, Batsah kurum ŋa, i beye à kurum a i mesewere are ana gà Ezipt tì sèwère a kurum a are nda megemir a. I beye à kurum a i daŋgay a, i beye à kurum a i ahər tar a ka, i ge a ter a gà bàba gà seriye pampam nda ahər gà ŋa. Aɗaba ndzəɗa gà ana a za duwa tserdze ya ka, ti sle a aà mibeyè i ahər ga ya tsa. 7 I gis a kurum gà mburma gà lele. Iye i ne a Mbulum kurum, dite kurum ki sirwim a dər ka, iye na Mbulum Bàtsah kurum ŋa. I beye à kurum a i ahər gà Ezipt ana ta fàrawa aka kurum ndzəɗa nda təv megemir tar a. 8 Yàa beye à kurum ka, i de à kurum a aka ahəɗ ata i mbaɗa i sida ya, i vəl a gà Abəraham nda Izak, nda gà Zakup ya. I vile a kurum a ahəɗ ata ka, a ne a biy kurum. Iye ka, Batsah kurum ŋa na a tsik a kurum a.««
9 Musa a tsaraka kataya ka, a mah ba, a da. A daha ka, a mà à bazlam ata a gà Isərayel. Ama ka, tàa dza zləm a bazlam ŋgar ata tsa, aɗaba megemir ana ta ge a nda mawura ba ŋa ya ka, aka zla aà tar metsehe ya. 10 I dəba ŋa ya asa ka, BATSAH kwa ŋa a gwaɗa a Musa: 11 « Da a təv Firawna Əbay gà Ezipt. Na kàa daha ka, gwaɗar, vəl vatwa a gà Isərayel, tə da ika ahəɗ yak a.» 12 Ama Musa a tsaraka kataya ka, a gwaɗa a Mbulum: « I de a tsa, Batsah ga ŋa, aɗaba ku mege gà mburma gà, gà Isərayel tekeɗe ka, tàa dza zləm a dukw ana i tsik a tar a tsəna, dite meme na mìi dze akaba a ahəm nda Firawna ɓav a? Kamkam taŋa ka, i sle a tsa, aɗaba i sir a mifefile ara ika arah a tsa.»
13 Kamala taŋa ya, BATSAH kwa ŋa a fàfəl a gà Musa nda Haruna asa, a gwaɗa a tar: « Dum akaba akaba sula məma a təv gà Isərayel nda gà Firawna mbaŋa. Gwaɗum a tar ka, iye na i slir a kurumaha a təv tar a, aà mibeyè à gà Isərayel ika ahəɗ Ezipt ya ya.»
Zləm gà gwala Musa nda Haruna
14 Araha na gà bàba gà tsir tar ana ti ne gà mala ga ya. Gà ɓəza Ruben i batsah kəla Zakup ka, faɗ: Gà Hanukw nda Palu, nda gà Hesruna nda Karmi. Gà taŋa na gà bàba gwala gà Ruben a. 15 Gà ɓəza Simeyun ka, ndilik: Gà Yemuyel nda Yamin, nda gà Uhaɗ, nda Yakin nda gà Zuhar, dite nda gà Sewul. Na a war Sewul ata ka, dəm gà Kananiya. Taŋa na gà gwala Simeyun a. 16 Gà ɓəza Levi ka, makər. Araha na zləm tar a: Gà Gersun nda Kehat, nda gà Merari. Levi aka ndza aà bəra ka, mive dərməka nda dzik makər gəra təsela. 17 Gà ɓəza Gersun ka, sula: Gà Libini nda Simi, tar gà ɓəzla ga. 18 Gà ɓəza Kehat ka, faɗ: Gà Amram nda Yesihar, nda gà Hevrun, dite nda gà Usiyel. Kehat aka ndza aà bəra ka, mive dərməka nda dzik makər gəra makər. 19 Gà ɓəza Merari ka, sula: Gà Makili nda Musi. Gà taŋa tserdze ya ka, gà gwala Levi ana tar gà ɓəzla ga ya.
20 Amram ka, a zla Yuket damər tsir ŋgar aà daala. Dəm ata a war gà ɓəza sula: Gà Haruna nda Musa. Amram ata aka ndza aà bəra ka, mive dərməka nda dzik makər gəra təsəla. 21 Gà ɓəza Yesihar ka, makər: Gà Kurah nda Nefek, nda gà Zikiri. 22 Gà ɓəza Usiyel ibam, makər: Gà Misayel nda Ilisafa nda gà Setiri.
23 Haruna a zla dəm Aminadab, zləm ŋa Eliseba damər Nasum. ŋgat a wayar gà ɓəza faɗ. Zləm gà ɓəza ata ka, gà Nadab nda Abihuw, nda gà Eliyazar, nda gà Itamar. 24 Gà ɓəza Kurah ka, makər: Gà Asir nda Alkana nda gà Abiyasaf. Gà taŋa na gà ɓəza ŋgar ana tar gà ɓəzla ga ya. 25 Eliyazar kəla Haruna ata a zla daala ilik aà gà dəm Putiyel a. Daala ata a war kəla ilik, zləm ŋa Pinihas. Gà tar ata tserdze ya ka, gà bàba gà tsir gà gwala Levi.
26 Gà Haruna nda Musa na BATSAH kwa ŋa a gwaɗa a tar: « Da ndzìkwimiŋera gà mburma gà, gà Isərayel, ika ahəɗ Ezipt ya fit a, ku weke a de a ndaka vatwa ŋa lele.» 27 Tar na tə da a təv Əbay Ezipt, tə daha, ti tsiker bazlam mibeyè à gà Isərayel ata, ti de a ika ahəɗ Ezipt ya ya.
Dukw ana Mbulum a tsik a gà Haruna nda Musa ya
28 A pat ana BATSAH kwa ŋa a fàfəl a Musa ika ahəɗ Ezipt ya ka, 29 a gwaɗar: « Iye na Batsah kurum ŋa ya. Dukw ana i tsikik a kinehe tserdze ya ka, daha, tsik a Əbay Ezipt fit dze. Kà həmbər tsa.» 30 Ama Musa a gwaɗar aaka: « Araha, iye ka, i mba aà mifèfilera ika arah a tsəna, meme na mìi dze akaba a bazlam ŋa dziye? Kwets Firawna à dziŋ aaka a zləm tsidze ya.»