Madzəba aà duwa
Gà dukw ana Mbulum a geye akahər ata tserdze ya
1
1 Malahalah ŋa ka, Mbulum a ge gà gəza mbulum nda gər ahəɗ. 2 Ama gər ahəɗ ka, fetfet duwa ilik ikəka zukw tsa, luvuŋ a riŋ hinne tìtìktìkka, dite Mezite Mesife Mbulum a riŋ à sìweye a ka, ika gər yam.3 Mbulum a gwa: « Dzaydzay me ge ba.» A tsik kataya tsara ka, a ge ba.ª 4 I dəba ŋa ya, Mbulum a samata dukw ana a ge ba ya ka, a tsahən lele. I fata ya tsara ka, a kə̀rə̀zl ikaba à gà dzaydzay nda luvuŋ a. 5 A zal a dzaydzay ka, həpat. Luvuŋ ibam ka, həvəɗ. Həvəɗ a ge, dite mbulum a dəv ka, taŋa ka, pat malahalah ŋana.
6 I dəba ŋa ya Mbulum a gwa: « Gà yam ana i bəɗ a nda na i gəza mbulum a ka, mà tə̀rə̀ts ba ikaba ya.» A tsik kataya tsara ka, a ge ba kaɗəŋ. 7 Ama ka, Mbulum a ge kataya, a zla ikaba gà yam ana i bəɗ a nda na i gəza mbulum a. 8 Mbulum a zal a dukw ata a zla ikaba ya ka, gəza mbulum. Aləka i dəba ŋa ya, həvəɗ a ge, dite mbulum a dəv asa ka, taŋa mehinne ma sula ŋana.ª
9 Aləka i dəba ŋa ya asa, Mbulum a gwa: « Yam ana ika ahəɗ a, ma yahaba gər a təv ilik ŋa, dite ahəɗ ma kula.» A tsik kataya tsara ka, a ge ba. 10 Mbulum a zal a təv ana makula ŋa ya ka, ahəɗ, mayahaba gər yam tekeɗe, a zalar duluv. Taŋa Mbulum a samata, gà duluv ata ta ge ba ya ka, a tsahən lele.
11 I fata ya tsara ka, a gwa: « Ahəɗ ma sləl gà kwizir, nda gà medzibe gà dukw ana wur ŋa lele ya, dite nda gà dizl gà dukw ana ta we a ya. Ku mege dukùla tserdze ka, nda hwife ŋgar.» A tsik kataya tsara ka, a ge ba kaɗəŋ. 12 Dite i dəba ŋa ya ka, ahəɗ a sləl gà kwizir nda gà medzibe gà dukw ana wur ŋa lele ya. Ku mege dukùla tserdze nda hwife ŋgar. Mbulum a samata gà dukw ata te ge ba kataya ya ka, a tsahən lele asa. 13 Həvəɗ a ge, dite mbulum a dəv asa ka, taŋa pat məmakər ŋa.
14 I dəba ŋa ya Mbulum a gwa asa: « Dzaydzay me ge ba aà gəza mbulum, aɗaba masəra dər ikaba à gà həpat nda həvəɗ a. Me ge ba, aɗaba aà masəra ikaba à gà maɗàmà kiye nda gà pat mehinne mive ana à ndìv a ya.» 15 Dzaydzay ata me ge aà gəza mbulum, aɗaba me gerra dzaydzay a gər ahəɗ a. A tsik kataya tsara asa ka, a ge ba. 16 Mbulum a ge gà bàba gà dukw ana te ge a dzaydzay a sula. Batsah ŋana ka, pat, taŋa a ge a dzaydzay ndaapat, dite kəla ŋana ibam ka, kìye, a ge a dzaydzay ndaavəɗ, dite a ge gà mawusawus tserdze mbaŋa. 17 A dzaya gà dukw ata aà gəza mbulum ka, aɗaba me ge dzaydzay a gər ahəɗ. 18 Dite ta ge dzaydzay ndaapat ndaavəɗ, aà masəra dər ikaba gà dzaydzay nda luvuŋ a asa mbaŋa. Mbulum a samata dukw ana a ge ba ya ka, a tsahən lele. 19 Həvəɗ a ge, dite mbulum a dəv asa ka, taŋa pat məfaɗ ŋana.
20 I dəba ŋa ya Mbulum a gwa: « Yam mà rah aka gà dukw ana i dula ya, gà ɗiyeŋ ibam, ta beye nda gəza mbulum. A tsik kataya tsara ka, a ge ba. 21 I dəba ŋa ya, Mbulum a geye gà dukw gà bàba ŋa, nda gà dukw ana ti sìweye a pampam tserdze i huɗ yam a, dite nda gà medzibe gà ɗiyeŋ ŋgiɗ pampam asa mbaŋa. Mbulum a samata, gà dukw ata a ge ba tserdze ya ka, a tsahən lele. 22 A pise aaka ahəm, a gwa: « Ta wa ba a duluv hinne, ta rah aɗəm. Gà ɗiyeŋ tekeɗe, ta wa ba aka gər ahəɗ hinne asa mbaŋa.» 23 Həvəɗ a ge, dite mbulum a dəv asa ka, taŋa pat miìzləm ŋa.
24 I dəba taŋa ya ka, Mbulum a gwa asa: « Gà dukw ana nda gà mesife iɗəm a pampam ta wara ba aka gər ahəɗ a vìrɗìɗe hinne: gà dukw gənaw, nda gà dukw ana tə dawa nda huɗ a, dite nda gà dukw dala tserdze, nda gà slàla aà slàla.» A tsik aba ya kataya ka, a ge ba kaɗəŋ. 25 A ge gà dukw gənaw nda gà dukw dala, nda gà dukw ana tə dawa nda huɗ a tserdze, nda gà slàla tar. A samata ka, a tsahən lele.
26 I dəba ŋa ya ka, Mbulum a gwa asa: « A sesiŋ ka, gekwa mburma kamala mendzikiɗe ba kwa ya, dite ti ta kwere a gà dukw ana nda gà mesife iɗəm tserdze ya, gà kilif, nda gà ɗiyeŋ, nda gà dukw gənaw, nda gà dukw dala, dite nda gà dukw ana tə dawa nda huɗ ika ahəɗ tserdze ya.ª« 27 I dəba ŋa ya asa ka, Mbulum a ge mburma kuɗa, a ndzikiɗ ba kamala ŋgat a. A ge tar ka, gà asləka, nda məkəs.ª 28 Dite a pise tar ahəm, a gwaɗa a tar: « Wum gà ɓəza hinne, dite gà ɓəza kurum ta wa ba, tə̀ rah aka gər ahəɗ, ta kwara gà dukw ana tserdze ya, gà kilif nda gà ɗiyeŋ, nda gà dukw ana pampam i huɗ yam a, dite nda gà dukw ana ti sìweye a ika gər ahəɗ tserdze ya.»
29 I dəba ŋa ya ka, Mbulum a gwaɗa a tar asa: « Araha, Yàa vəl a kurum gà wur gà dukw ana ti slile a, ta ge a ba ika gər ahəɗ tserdze ya, dite nda gà dizl gà dukw ana ta we a ya ka, ti ne a gà dukw mezime kurum a. 30 Gà dukw dala ana ika gər ahəɗ a, nda gà ɗiyeŋ, nda gà dukw ana ti sìweye a ika ahəɗ a tserdze nda gà mesife iɗəm a, i vəl a kurum taŋa ka, kamala ala slàmbah dukw ana dzìn ŋa ya, aɗaba me ne dukw mezime kurum.» 31 I dəba ŋa ya, Mbulum a samata gà dukw ana a geye tserdze ya ka, ŋgwal ŋa lele, a tsahən ahər hinne. Həvəɗ a ge, dite mbulum a dəv i mèkwède asa ka, taŋa pat mendilik ŋa kuɗa.