2
1 Kamala taŋa ya na Mbulum a ndəv à mege gà gəza mbulum nda gər ahəɗ, dite nda gà dukw ana iɗəm tserdze ya. 2 A ta megeha a pat matəsəla ŋana ka, megemir aka ndəv, a sifik ba a pat ata.[1] 3 Mbulum a pise ahəm aà pat matəsəla ŋa ata, a ne dər tsəɗaŋŋa lele kuɗa, aɗaba ana a sifik ba a pat ata i huɗ gà megemir ŋgar ana a geye tserdze ya ya. 4 Taŋa ka, bazlam ana Mbulum a ge dər gà gəza mbulum nda gər ahəɗ akahər ata ya. Mbulum a tike mburma a təv ŋgwal ŋa, a təv ana tə zalar Adine ya. 5 Akahər ata Əbay Mbulum a geye gà mbulum ana i gər ŋa ya, nda gər ahəɗ a ka, gà slàmbah gà dukw ana i dala ya, tàa sləlaya aka ahəɗ zukw tsa, aɗaba ana Mbulum aka dzara yam aka gər ahəɗ zukw tsiye. Ku mege mburma aà məfə̀tà ahəɗ ata tekeɗe, tar riŋ zukw tsa asa mbaŋa. 6 Ama mə̀rah a tsəlawara i ahəɗ a, dite ahəɗ a həlaɓ ba. 7 D ìte i dəba ŋa ya, Əbay Mbulum a ndə̀ɗ metìrfèneh ahəɗ ata, a ge dər mburma, a vizler mesife a hìter. Kamala taŋa ya na mburma a ne nda gà mesife ya.[2] 8 I dəba ŋa ya, Əbay Mbulum a làmbaɗa təv ŋgwal ŋa ika ahəɗ Adine ata, ndaka tseke pat ana a mbizere a ya. A tike mburma ŋgar ata a ge ya a fata. 9 I dəba ŋa ya, gà dizl gà dukw ŋgiɗ pampam tə sləlaya aka ahəɗ, biy na a tsahən hinne ya, nda na a tsahən lele biy mezime ya mbaŋa. A ge ibam, dizl yàwuf ana a vile a mesife a mburma ya aka màgər dzidzel ata, dite nda gà yàwuf ana a vile a masəra duwa a mburma, a sir a dər ikaba à gà dukw ana ŋgwal ŋa ya, nda na ŋgwal ŋa tsiye ya mbaŋa.[3] 10 Dula a riŋ a dara ika ahəɗ ana tə zalar Adine ya, aɗaba à tìf a yam aà dzidzel ata. Daga i fata ya ka, gà dula tə tayara iɗəm ba ya faɗ. 11 Zləm dula malahalah ŋana ka, Pisum, taŋa a lawara ahəɗ Hawila, ahəɗ ana gura iɗəm a. 12 Gura ana ika ahəɗ ata ya ka, ŋgwal ŋa, à sìkim a ba tsa. Dite i fata ka, atwa ana a ze hwaŋŋa lele ya a riŋ mbaŋa, nda gà kur ana tə zalar Unikis a mbaŋa asa. 13 Zləm dula ma sula ŋana ka, Gihum, taŋa a lawara ahəɗ Kus. 14 Dite zləm dula məmakər ŋana asa ka, Hidekel, taŋa ŋgat a zlele a aka ahəɗ Asura ndaka tseke pat ana à mbizere a ya. Dula məfaɗ ŋana ka, tə zalar Efrat. 15 I dəba ŋa ya ka, Əbay Mbulum a zla mburma, a tike ŋgat aka ahəɗ ŋgwal ŋa ata tə zalar dəgənats Adine ya, dite mə̀ fət, ma kasla mbaŋa. 16 I dəba ŋa ya asa ka, Əbay Mbulum a gwaɗa a mburma: « Gà dizl gà dukw ana i huɗ dzidzel aaha tserdze ya ka, ki zimewe a kamala na gəzləŋ yak a waya ya. 17 Ama dizl dukw ana a ɗifek a à masəra dər ikaba à gà dukw ana ŋgwal ŋa ya, nda na ŋgwal ŋa tsiye ka, ka ta zəm tsa. Aɗaba na kàa zəm ka, a pat ata tsara na ki mite a məməta ana mawùràba ŋa ya.» 18 Aləka i dəba ŋa ya, Əbay Mbulum a gwa: « Lele tsa na mburma a ndze a à gər ŋgar a. A sèsiŋ i gere a mala mazlàkà ŋgat ana a ndzikiɗ a ba ŋgat a. 19 Aɗaba taŋa, Əbay Mbulum a ge gà dukw dala nda gà ɗiyeŋ tserdze ka, nda metìrfèneh ahəɗ. Dite a da à tar a təv mburma aà mə̀fə̀rà ahər ka, meme na mburma a ɗeye ter a gà zləm tar a. Ku mege hinne tsa meme tekeɗe ka, a zeleye a ter a ilik ilik tserdze, a ne gà zləm tar. 20 I dəba ŋa ya, mburma a zal a gà dukw gənaw nda gà dukw dala tserdze. Ama ka, aka ŋgat a mala mazlàkà ŋgat ana a tsahən ahər a tsa. 21 I dəba ŋa ya asa, Əbay Mbulum a vəlar mendze are vissik, a də̀k aaka hinne. Tsam ka, Mbulum a zla mìbìyè gəzləŋ ilik aà mburma ya, dite a hə̀ndə̀k a tə̀vəməŋa nda slu ba, a pàha aɗəm. 22 Dite Əbay Mbulum a ge məkəs nda mìbìyè gəzləŋ ata, a daha à ŋgat a wele ata kuɗa. 23 Wele ata a gwa: « Yweh, yweh, ŋgat ka, kamala iye ya. Naha ka, slu ba gà, zləm ŋgar ka, məkəs, aɗaba ana tə zlara i ba asləka ya ya.» 24 Aɗaba taŋa na asləka a miyak a à gà tsir ŋgar nda mama ŋgar, dite ti ndze a nda məkəs ŋgar a. Tar ata sula ya ka, ti ne a ba ilik.[4] 25 Gà wele ata sula məma nda məkəs ŋgar ka, petek aà tar tsa. Ama ka, hwarwa a ge a tar ɓav tsa. Gà mburma ana Mbulum a lah mege tar a, ta gəs ahəm aà Mbulum tsa [1] Ibəranikwa 4:4,10 [2] 1 Kurintiya 15:45 [3] Sunwa Yuhana 2:7; 22:2,14 [4] Mata 19:5; Markus 10:7-8; 1 Kurintiya 6:16; Efesiya 5:31