Madzəba 3

1 I dəba ŋa ya, gà dukw dala ana Əbay Mbulum a geye tar tserdze ya ka, mesiwiɗ ilik a za tar nda wirwir fit. A daha, a gwaɗa a məkəs: « Kaɗəŋ a na Mbulum a gwa ka, kata zəmum gà mawà gà dizl gà dukw ana i huɗ dzidzel tserdze ya tsiye?»[1] 2 Məkəs aaha a gwaɗar aaka: « Mìi zim a gà mawà gà dizl gà dukw ana i dzidzel a tserdze. 3 Ama say mawà dizl dukw ana ika màgər dzidzel a, na Mbulum a gwa: « Ka zəmum taŋa tsa, kà ləmum ahər tsa, aɗaba kàa zəmum ka, ki metwimiŋa.» 4 Mesiwiɗ ata a gwaɗa a məkəs ata: « Pàrsa, ki metwim a tsa. 5 Ama Mbulum a sər, na kàa zəmum dukw ata ka, kurum i ahər ŋgar asa tsa, ki gwim a Əbay kamala ŋgat a, ki sirwim a ikaba à gà dukw ana ŋgwal ŋa ya, nda na ŋgwala tsiye ya.» 6 I dəba ŋa ya, məkəs aaha a samata mawà dukw ata ka, a tsahən lele biy mezime. A ŋgayar ba, a tsahən ahər hinne, aɗaba ana a viler a metsehe ya. A daha, a ŋgəl mawà dukw ata, a zəm. Dite i dəba ŋa ya, a vəl a zal ŋgar, ŋgat tekeɗe, a zəm mbaŋa.[2] 7 I fata ya tsara ka, tar i ahər Mbulum asa tsa. Tə sər kinehe, mə̀r ka, sagurɗumɗum, hwarwa a ge ter a kuɗa. Aɗaba taŋa na ta ge slàmbah kàvəra, tə làmbaɗa, dite tə dànaya aka dəmkul a. 8 Aləka hawa a ge ka, tə tsaraka miɓìzle Əbay Mbulum ana à sìweye a i dzidzel a. Tsam ka, gà wele aaha nda məkəs ŋgar a, ta kaha ba ika miɗ a Əbay Mbulum a, aka màgər gà dizl gà dukw ana i dzidzel a. 9 Mbulum a zal a wele ata. A gwaɗar: « Kər ana, i ŋga dze ya?» 10 Wele ata a gwaɗar aaka: « Yàa ̀tsaraka miɓìzle yak i dzidzel ibam, ama magəɗa a giŋ agər ana iye ka, duwa aà iye tsa sàgùrɗùmma ya. Aɗaba taŋa na i kaha ba ya.» 11 Mbulum a gwaɗar: « Weke na a ɗifek dər, a gwaɗak ka, kər sàgùrɗùmma duwa aà kər tsiye?» Wànà kàa zəm mawà dizl dukw ata i palak ahər ahəm aà mazəmà ŋa ya ya?» 12 Wele ata a gwaɗar aaka: « Məkəs aaha kù gwa màzlàk iye ya, na a viliŋ mawà dukw ata, dite i zəm a.» 13 I dəba ŋa ya, Əbay Mbulum a tsam aà məkəs aaha. A gwaɗar: « Kì ge dzena, la?» Məkəs aaha a gwaɗar aaka: « Mesiwiɗ na a beziŋ za ya, na dite i zəm dukw ata ya.»[3] Seriye Mbulum ana a ge a tar a 14 Əbay Mbulum a gwaɗa a mesiwiɗ: « Kər ka, Yàa vəlak mezelme i liwiŋ gà dukw gənaw, nda gà dukw dala ya tserdze, aɗaba ana kì ge kataya ya.» Ama kər kinehe dawa ka, nda huɗ fùhhwa, ki zimewe a ka, ahəɗ, haa a pat ana ki mite a ya. 15 Daga aà kinehe ya ki gwim a guvəl ika màgər kurum nda məkəs, dite gà ɓəza yak nda gà ɓəza ŋgar tekeɗe, ta ge a guvəl ika màgər tar mbaŋa asa. Gà ɓəza ŋgar ti ta bebeslewe a gər yak, dite kər tekeɗe, ki ti dzer a a dìdìgil sik ŋgar mbaŋa asa. 16 I dəba ŋa ya, Mbulum a gwaɗa a məkəs: « Ki ti sèwèr a are hinne, na i təv ana ki we a kəla ya. Dite ki weye a mandza nda zal yak hinne, ŋgat tekeɗe a ge a Əbay aka gər yak.» 17 Aləka i dəba ŋa ya, Mbulum a gwaɗa a wele ata tə zalar Adama ya: « Kər ka, kà dza zləm a bazlam məkəs yak, kà zəm mawà dizl dukw ata i palak ahər ahəm, i gwaɗak ka, ka ta zəm tsiye. Aɗaba taŋa, i vile a mezelme a gər ahəɗ agəra kər. Daga aà kinehe ya, ki zimewe a dukw mezime ka, nda mawùràba ŋa haa a pat ana ki mite a ya. 18 Gà adak nda gà tsitsìv ti sliliŋa, ki zimewe a ka, slàmbah dukw ana a dzəm tsa i guvah a.[4] 19 ələk ki ti zim a duwa ka, kige a aba àvùkw a dzekwiŋ, haa a təv ana ba yak aka ne ahəɗ a, mə mətsak gər tsa, aɗaba i ndə̀ɗ ka, dwaɗwa na i ge dər kər a. Kər ka, ahəɗ, dite ki ti ne a ahəɗ mbaŋa asa . » 20 I dəba ŋa ya, wele ata a ɗe zləm a məkəs ŋgar, a zalar Hawa, aɗaba ŋgat a ne mesife, ŋgat məmər gà ɓəza tserdze. 21 Dite Əbay Mbulum a ge tar bagwa a gà Adama nda məkəs ŋgar kamala petek a, a dza aka tar. Medelewe ana tə dalawa gà Adama nda Hawa i təv ŋgwal ŋa ata ya 22 Mbulum a gwa asa: « Araha, mburma aka sər metsehe, aka ne kamala kwa ya, kà sər ikaba à gà dukw ana ŋgwal ŋa ya, nda na ŋgwala tsiye ya. Ama i waya asa tsa na a ŋgil a mawà yàwuf mesife, a zim a ka, a ndze a dər aà bəra aà biybiy a.»[5] 23 Aɗaba taŋa na Əbay Mbulum a dəgə̀zàra tar i təv ŋgwal ŋa ata tə zalar Adine ya, dite ta fətawa ahəɗ ana a ndə̀ɗ ikəka dwaɗwa ŋa a ge dər tar a. 24 A dəgə̀zàra iɗəm tar a ka, a dza aɗəm gà gawla ŋgar a dəgənats Adine ata ndaka tseke are pat ana à mbizere a ya. Tar ka, nda gà masalama ana à div a kamala arah akwa ya i ahər tar, aɗaba ta kèsle a dər vatwa dizl yàwuf mesife ata aà mburma ya. [1] Sunwa Yuhana 12:9; 20:2 [2] 2 Kurintiya 11:3; Timute 2:13-14 [3] Ti tsik taŋa ka, aà Yesuw Kiristi ana a ta be a aà Əbay sitene ya. Samata Sunwa Yuhana 12:17 [4] Ibəranikwa 6:8 [5] Sunwa Yuhana 22:14