4
1 Gà Kayinu nda damər ŋgat Abel 4 Aləka i dəba ŋa ya ka, gà Adama ta həna nda məkəs ŋgar Hawa, dite Hawa a ŋgat kəla. A wa kəla ata ka, a zalar Kayinu. A gwa: « Mbulum aka viliŋ kəla asləka ŋa.» 2 I dəba ŋa ya asa ka, a wa Abel damər Kayinu. Abel ka, ŋgat a ne mala makəva gà dukw gənaw. Kayinu ibam, ŋgat mala mifìte. 3 A pat duwa, Kayinu a zlara dukw maya ba ŋgar ana a fə̀tara i guvah a ya, a vəl a Mbulum taf masakəŋa. 4 Abel tekeɗe, a zlara biy ŋgar a ka, kəla təmaŋ maləkwara ŋana i liwiŋ gà dukw gənaw ŋgar ana à kiv a ya, a kəɗ, a vəl təv məŋgəl ŋana a Mbulum. Abel ka, Mbulum a waya ŋgat nda dukw ŋgar ana vəlar masakəŋa ya lele. 5 Ama Kayinu nda dukw ŋgar ana a vəl masakəŋa ya ka, a tsahən aà Mbulum tsa. I fata ya tsara ka, Kayinu a ge arəv hinne, a hə̀rdəsa yam are hə̀rdəs hə̀rdəs.[1] 6 Mbulum a tsam aà ŋgat, a gwaɗar: « Aàmala ki ge a arəv, kà hə̀rdəsa yam are ya?» 7 Na mege kàa ge dukw ana ŋgwal ŋa ya ka, ana ki ŋgeye a ba. Ama na kàa ge dukw ana ŋgwal ŋa tsiye ka, taŋa bakal a riŋ a veve a kər aà guva biye hərmaga yak ìzitte kamala azil a, a waya magəsa kər a. Ama ka, kər kwara ŋgat ivaɗ. Wànà kataya tsiye?» 8 I dəba ŋa ya, Kayinu a gwaɗa a damər ŋgar Abel: « Tàma a dala.» Ta mah ba, tə da. I təv ana ti ndzeha a dala ya ka, Kayinu slìz a hitse aà damər ŋgar Abel, a kəɗ.[2] 9 Aləka Əbay Mbulum a tsam aà Kayinu, a gwaɗar: « damər yak Abel ana, i ŋga?» A gwaɗar aaka: « I sər tsa, iye ana mala makaslà damər gà ya?» 10 Əbay Mbulum a gwaɗar: « Kì ge ana, dukùla dze ya? Tsaraka, məmbəz damər yak ana kə̀ kəɗ a ka, aka tiwiŋaha aà ba daga ika gər ahəɗ a.[3] 11 Ama daga aà kinehe ya, Yàa vəlak mezelme, ki ti sèwèr a are hinne, gà mburma ti delewe a kər ika ahəɗ aaha ya, aɗaba ana kà dza à məmbəz damər yak a bəɗ a. 12 Ku mege kà fət guvah tekeɗe, a vilek a dukw mayaba yak ɓav tsa. Ki siweye a ika gər ahəɗ hinne, ama ki ŋget a təv mendze tsa.» 13 Kayinu a gwaɗa a Əbay Mbulum: « Seriye aaha ka, mawùràba ŋa, a biŋaha.» 14 Araha və̀ɗəna ka, kàa dalawa iye ika ahəɗ aaha ya. I kèh a ba ika miɗ yak a, i sìweye a bə̀ba təv ana dze ya. I ŋget a təv mendze ika gər ahəɗ tsa. Ku mege weke aka le aà iye ka, à kiɗ a ba a iye.» 15 I dəba ŋa ya, Əbay Mbulum a gwaɗar: « Awaŋ kataya tsa. Aɗaba wur ana aka kəɗ kər a ka, i leker aɗəm a medzige təsəla.» Əbay Mbulum a ge lambà aà Kayinu, dite bəla wura aka le ahər ka, ma ta kəɗ ŋgat asa tsiye. 16 Kayinu a mah ba, a daba i təv Əbay Mbulum a, a ta mendze ba aka ahəɗ ana tə zalar Nudi ya, diriŋ aà Adine ya, ndaka tseke are pat ana a mbəzawara ya. Gà ɓəza Kayinu 17 Akahər ata gà Kayinu ta həna nda məkəs ŋgar, dite məkəs ata a ŋgat kəla. Ta wa kəla ata, tə zalar Hanukw. Kayinu na a ne madzàha batsah kə̀sà ata ya. Aɗaba taŋa na a zal a kə̀sà ata Hanukw, kamala zləm kəla ŋgar a. 18 I dəba ŋa ya, Hanukw a wa Iraɗ. Dite Iraɗ ata a wa Mehuyel. Mehuyel ibam, a wa Metusayel. Dite Metusayel a wa Lamek. 19 Lamek ka, a ndzək gà məkəs sula, zləm biy ŋgiɗ Ada, dite biy ŋgiɗ aaha ibam, Dzila. 20 Ada a wa Yabal, ŋgat a ne tsir gà mburma ana tə ndzawa i mekiriwe ga petek a, nda gà na ta kə̀vawa gà duwa ya. 21 damər ŋgar ka, Yabal, ŋgat a ne tsir gà mburma ana ti dzewe a à gandzavəl a, nda gà na ta vatawa làkità ya tserdze. 22 Dzila tekeɗe, a wa kəla ŋgar, a zalar Tubalkayina, ŋgat a ne mala mbəzla, a vaɗawa gà ara ana nduzza ya, nda gà lìviŋ lìviŋ ŋana mbaŋa. damər ŋgar dəm ŋa ka, tə zalar Naama. 23 I dəba ŋa ya, Lamek a gwaɗa a gà məkəs ŋgar, a gà Ada nda Dzila: « Tsarakum, dzum zləm a bazlam gà ana i tsik a kurum a ya. Yàa kəɗ mburma aɗaba ana a giŋ mbəlak a. Ku mege ŋgat gawla ŋa tekeɗe ka, Yàa kəɗ ŋgat. 24 Aɗaba akahər ata Mbulum a gwaɗa a Kayinu: « Na wura aka kəɗ kər ka, i leker aɗəm a sik təsəla. Ama iye ihər i gweɗe a kurum ŋa: « Na wura aka kəɗ iye agəra wele ata i kəɗ a ka, ti leker aɗəm a medzige dzik təsəla gəra təsəla.»[4] Gà Setu nda Enus 25 Aləka i dəba ŋa ya ka, gà Adama ta həna nda məkəs ŋgar, ta ŋgat kəla, ta wa kəla ata asləka ŋa asa. Ta wa ka, məkəs ŋgar ata a zalar Setu. Aɗaba taŋa, a gwa: « Mbulum aka viliŋ aɗəm kəla avukw Abel kəla gà ana Kayinu a kəɗ a.» 26 I dəba ŋa ya, Setu ibam, a wa kəla asləka ŋa, a zalar Enus. Daga aà gər taŋa ya na gà mburma tə dza ba aà mazala a zləm Mbulum nda meheme ya. [1] Ibəranikwa 11:4; 12:24 [2] Mata 23:35; Luka 11:51; Yuhana 3:12 [3] Ibəranikwa 12:24 [4] Mata 18:22