7
1 BATSAH kwa ŋa a gwaɗa a Musa asa: « Araha iye na a ne à kər ika miɗ Firawna kamala Mbulum a ya. Dite damər yak Haruna na à mèwe a à bazlam yak a mburma ya. 2 Kər ki tsiker a dukw ana iye ihər i tsikik a ya fit dze. damər yak Haruna ka, à me a dər a Firawna, na dite ka, a vile a vatwa a gà Isərayel, ti de a ika ahəɗ ŋgar a ya. 3 Ama iye nda gər gà ŋa i viler a segeme a gər a Firawna hinne. Dite iye asa tekeɗe, i ge a gà dukw mene aà mburma pampam hinne ika ahəɗ ŋgar. 4 Ama ku mege kataya tekeɗe ka, Firawna à dze a zləm a dukw ana ki tsikwimer a ya tsa. Aɗaba taŋa, i ge a ter a seriye pampam. I vile a ter a gà mesewere are gà bàba ŋa nda ahər gà ŋa, na dite a vile a kurum a vatwa, a kurum gà mburma gà, gà Isərayel. Ku weke a de a ndaka vatwa ŋa lele, na ki ti dwimera ika ahəɗ Ezipt ya ya. 5 Kamala taŋa ya, gà mburma gà Ezipt ti sir a ndzer, iye na Batsah kurum ŋa ya ka, i təv ana i vile a ter a mesewere are nda ahər gà ya, na dite ka, i dzik a kurum gà mburma gà, gà Isərayel, i liwiŋ tar a ya.»
6 Gà Musa nda Haruna tə tsaraka kataya ka, ta ge kamala ana BATSAH kwa ŋa a tsik a tar a kalkal lele. 7 Akahər ana tə dawa a təv Firawna, ti tsikewar dukw ana Mbulum a tsik a tar a ka, Musa ŋgat mive ŋgar dzik tsamakər. Haruna tekeɗe, mive ŋgar dzik tsamakər gəra makər.
Zəva Haruna
8 I dəba ŋa ya, BATSAH kwa ŋa a fàfəl a gà Musa nda Haruna asa, a gwaɗa a tar: 9 « Na bəla Firawna aka gwaɗa a kurum, gwim dukw mene aà mburma kurum ata nda ndzer ŋa ka, taŋa Haruna ma zla zəva ata i vəl a kurum, mà yà a bəɗ aka miɗ Əbay ata. Tsam ka, a ne a mesiwiɗ.»
10 I fata ya ka, gà Musa nda Haruna ta mah ba, tə da a təv Firawna, tə daha, ta ge kamala ana BATSAH kwa ŋa a tsik a tar a. Haruna a zla zəva ata, a yà aka miɗ gà Əbay ata nda gà ɓəzla meslire ŋgar. Tsam ka, a ne mesiwiɗ kaɗəŋ. 11 Firawna a samata kataya ka, a zal a gà màhəram nda gà ɓəzla mege dukw ana nda ndzəɗa sitene ika ahəɗ Ezipt i fata ya. Tə daha, ta ge kamala ana gà Musa ta ge ya mbaŋa. 12 Tar tserdze, ku mege weke, a yà zəva ŋgar a bəɗ ka, ti neye gà mesiwiɗ zlàlaw zlàlaw. Ama ka, zəva Haruna aaha ndeɗiŋa ilik ŋa ya, a daha, a ndeye gà zəva tar ata fit.
13 Ku mege kataya tekeɗe, Firawna a tsalaba à segeme a gər ndeyndey seyiŋ ivaɗ, aka dza zləm aà dukw tar ata tsa, kamala ana BATSAH kwa ŋa a tsik a.
Malahalah mesewere are yam ana a ne məmbəz a
14 I dəba ŋa ya, BATSAH kwa ŋa a gwaɗa a Musa: « Firawna ka, segeme i gər ŋgar hinne. A niw mivile vatwa a gà mburma gà, aà tə da. 15 Ama kinehe ka, ki wile a a təv ŋgar i mèkwède hedwe, i təv ana aka dara i ga ya, a ter a aà guva dula Nil a. Aka daha ka, hitse aka miɗ ŋgar aà guva dula a fata. Ki de a ka, zla dər zəva yak ata a newa mesiwiɗ a aà ahər. 16 Gwaɗar ka: ‘Batsah mə̀r ŋa, Mbulum gà Ibəranikwa na a slərra iye a təv yak a ya. A gwaɗak ka, vəl vatwa a gà mburma gà, dite tə da a dala a kusak diriŋ, ti ti dziŋ a gurmits a bəɗ a fata. Ama kəla ka, haa kinehe kər ka, kàa dza zləm a bazlam mə̀r tsa. 17 Aɗaba taŋa, Batsah mə̀r ŋa a gwaɗak ka: Ki ti sir a dər, iye ka, Mbulum Batsah kurum ŋa kaɗəŋ a ka, nda dukw ana i ge a ya. Gwaɗar: Fə̀r aà iye kwaŋ, iye Musa, i lek a a yam ana i dula ya nda zəva gà aaha i ahər a ka, a ne a məmbəz kweleŋ. 18 Gà kilif ana iɗəm a fit, ta metiŋa. Zləməŋa yam ana i dula ya fit ka, a ze a sìwìkìke, gà mburma gà Ezipt ti sle a aà masà ŋa asa tsa.««
19 Taŋa BATSAH kwa ŋa a gwaɗa a Musa asa: « Gwaɗa a Haruna ka, ma zla dər zəva, ka dum məma, ma lakaya dər a gà yam ana duluv ŋa ika ahəɗ Ezipt ya, ku mege i gà dula, nda gà na i lilik a tserdze, me neye məmbəz. Yam me ne məmbəz ika ahəɗ Ezipt, ku mege i ŋga i ŋga i gà gah a tekeɗe, nda gà na i gà dzagwaya ya fit dze.»
20 Gà Musa nda Haruna tə tsaraka kataya ka, ta mah ba, tə da. Tə daha, ta ge kamala ana BATSAH kwa ŋa a tsik a tar a. Haruna a zla zəva ŋgar a ahər, a lak dər a yam ika miɗ Firawna nda gà ɓəzla megemir ŋgar i fata. Tsam ka, gà yam ana i gà dula ya fit, ti neye məmbəz. 21 Gà kilif ta mataya aɗəm fit, tsam ka, gà dula tə dzàba aà mezeye hə̀vva hinne. I fata ya ka, gà mburma gà Ezipt ti sle aà masà yam asa tsa. Aɗaba məmbəz ata aka nə̀s à yam ana ika ahəɗ ata ya fit.
22 I dəba ŋa ya, gà màhəram ana a riŋ ika ahəɗ Ezipt ya, tə daha, ta ge dukw gà màhəram tar ata kamala ana gà Musa ta ge ya mbaŋa. Ama Firawna ka, a tsalaba à segeme a gər hinne ndeyndey ivaɗ, aka dza zləm a dukw ana gà Musa nda Haruna ta ge a ya kamala ana BATSAH kwa ŋa a tsik a tsa. 23 I fata ya ka, Firawna a mbəɗ a tar dəba, a mah ba, a daba a ma. Aka ge metsehe a dukw mene aà mburma gà Musa ata ta ge ya tsidze. 24 I dəba ŋa ya, gà mburma gà Ezipt tserdze tə dzàba aà meleye yam aà gà guva dula Nil, na dite ta ŋget a yam aà mese ya. Aɗaba ana ti sle a aà màsa yam ana i dula ya tsiye.
Masula mesewere are biy makwàmbaɗùkw
25 Aləka i dəba ana BATSAH kwa ŋa a nə̀s à yam i dula Nil a, a ge mehinne təsəla ka, 26 Mbulum a gwaɗa a Musa asa: « Daha a təv Firawna, gwaɗar ka, ‘Batsah mə̀r ŋa a gwaɗak ka, vəl vatwa a gà mburma gà, dite tə daha, ti ti dziŋ a gurmits a bəɗ. 27 Na bəla gər yak aà mivile a tar vatwa tsəka, i dzewe a aka kurumara à gà makwàmbaɗùkw aka ahəɗ yak a tserdze. 28 A rèh a a gà dula Nil hinne, dite ti tselere a iɗəm a, ti de a a ma yak, ta petse a aka kər aha a ga, a gà təv ana kà hənawa iɗəm a. Ti tsele a aka təv mehinne yak, nda gà ti de a a ga a bəra gà ɓəzla meslire yak, nda gà zləməŋa a liwiŋ gà mburma yak tserdze. Ku mege a liwit a dukw gùfa a təv ana ti dewekara iɗəm ɗaf a ya tekeɗe, ti de aɗəmiŋa. 29 Gà makwàmbaɗùkw ta gereve aka kurum a nda gà mburma ana i ga i ma yak a, nda gà ɓəzla meslire yak tserdze.»