Mendizle 8

1 I dəba ŋa ya, BATSAH kwa ŋa a gwaɗa a Musa asa: « Daha, gwaɗa a Haruna ka, ma daha, ma zla zəva ŋgar, mà zìkweye dər a gà dula nda gà duluv, nda gà təv ana yam a ŋgəzawara iɗəm a ya fit dze. Dite ka, makwàmbaɗùkw ma wa ba aka ahəɗ Ezipt hinne.» 2 Haruna a tsaraka kataya ka, a zla zəva ŋgar ata, a zìkweye dər a gà yam ana ika ahəɗ Ezipt ya kaɗəŋ. Tsam ka, gà makwàmbaɗùkw tə tsalara i dula ya hinne, tə rah aka ahəɗ kwite ata. 3 Ama gà màhəram ana ika ahəɗ Ezipt i fata ya, tar tekeɗe, tə daha, ta ge kamala taŋa ya mbaŋa. Gà makwàmbaɗùkw tə tsalara i dula ya hinne, a rah aka ahəɗ Ezipt mbaŋa.

4 I dəba ŋa ya, Firawna a zal a gà Musa nda Haruna, a gwaɗa a tar: « Hamum a Batsah kurum ŋa, dite ka, ma dalawa aà mə̀r gà makwàmbaɗùkw aaha ya nda gà mburma gà ya tserdze te, dite i dəba ŋa ya ka, i vile a kurum a vatwa nda gà mburma kurum, ki dwim a, ki ta betswim a duwa a Batsah kurum ŋa ata kuɗa.»

5 Musa a tsaraka kataya ka, a gwaɗar: « Tsikiŋ kwaŋ, a tsahən aà kər ana, ndeɗime na i heme a a Batsah mə̀r ŋa aɗaba kurum nda gà ɓəzla meslire yak, kige tsa nda gà mburma yak tserdze ya, na dite ka, a delewere a aà kurum gà makwàmbaɗùkw i ga ya ya, a zehe a ka, i dula Nil ɗekɗek a?» 6 Firawna a gwaɗar aaka: « I waya, ki hemer a ka, ndidwe.» Musa a gwaɗar: « Haya, kamala ana kà tsik a. Na Yàa hamar ka, ki sir a dər, wura a riŋ ilik tì ndzikiɗ a ba nda Mbulum Batsah mə̀r ŋa tsa. 7 A delewere a aà kurum makwàmbaɗùkw i gà ga kurum a nda gà mburma ana i ga i ma yak a, nda gà ɓəzla meslire yak tserdze. A zehe a ka, i dula Nil ɗekɗek pəra.»

8 I fata ya ka, gà Musa nda Haruna tə dara i ga i bəra Firawna ya. Musa a dza ba aà mahàmà a BATSAH kwa ŋa agəra makwàmbaɗùkw ata a zlara aka Firawna ya ya. 9 BATSAH kwa ŋa a tsaraka meheme ŋgar ata ka, kəɗats makwàmbaɗùkw ata a matayarra i gà ga ya, nda gà na ika biye hərmaga ya, dite nda gà i gà guvah a fit tsara. 10 Gà mburma gà Ezipt ti yahar gər serre, tsam ka, ahəɗ ata a ze hinne sìwìkìke.

11 Aləka, Firawna a samata, aka ŋgat zayyà zaakwa ka, a tsalaba à segeme a gər hinne asa, a gəs ahəm aà gà Musa nda Haruna tsa, kamala ana BATSAH kwa ŋa a tsik a tar a kaɗəŋ.

Məmakər mesewere are amime

12 I dəba ŋa ya asa ka, BATSAH kwa ŋa a gwaɗa a Musa: « Daha, gwaɗa a Haruna ka, ma zla zəva ŋgar, ma lak dər a metìrfèneh ahəɗ Ezipt, tsam ka, amime a dere a hinne, a dzeye a a gà mburma ana iɗəm a.» 13 I fata ya tsara ka, Haruna a daha, a zla zəva ŋgar ata, a lak dər a ahəɗ Ezipt kamala ana Mbulum a tsik a tar a. Tsam ka, amime a dara hinne, a dzeye a a gà mburma nda gà dukw gənaw ŋa dze. Kamala taŋa ya, ahəɗ Ezipt fit ka, amime a beha hinne.

14 Gà màhəram ana ika ahəɗ Ezipt ya tekeɗe, tə daha, ta ge dukw mahəram tar kamala taŋa ya mbaŋa, ta waya tì dìgìz a amime ata zləmana. Ama ka, ta mba ahər tsa. Tsam ka, amime a dara aka mburma ya nda ndzəɗa hinne asa ivaɗ, a dzeye a ter a nda gà dukw gənaw ŋa dze. 15 I dəba ŋa ya ka, gà ɓəzla meslire Firawna tə daha a təv ŋgar, ta gwaɗar: « Na a ge a dukw aaha kataya ka, Mbulum nda ahər ŋgar ŋa.» Ama Firawna ka, a tsalaba à segeme a gər hinne seyiŋ ivaɗ asa, aka dza zləm a dukw ana gà Musa nda Haruna ti tsiker a tsa, kamala ana BATSAH kwa ŋa a gwa ka, à gis a tsiye.

Məfàɗ mesewere are gà masùlùŋ gà dzìwe ana ti dzeye a a mburma ya

16 I dəba ŋa ya asa, BATSAH kwa ŋa a gwaɗa a Musa: « Wile a bəra Firawna hedwe, kàa daha ka, ka hitse aka miɗ ŋgar, i təv ana a dara i ga ya, a de a ndàra a dula ya. Gwaɗar ka: « Batsah mə̀r ŋa a gwaɗak ka, vəl vatwa a gà mburma gà, dite tə daha, ti ti dziŋ a gurmits a bəɗ. 17 Na bəla ki vile a ter a vatwa tsa asa ka, i slir a aà kər a gà bàba gà màsùlùŋ ana ti dzeyewa a mburma ya, ti dzeye a kurum a nda gà mburma ana i ga yak a, nda gà ɓəzla meslire yak tserdze, ta petse a aka kurumaha a ga kurum. I gà ga ana ika ahəɗ Ezipt ya tserdze na gà bàba gà màsùlùŋ ata ti dzeyewa a mburma ya, tì rèh aɗəmiŋa. Ku mege i dala ŋana i gà guvah kurum tekeɗè, ta ge a riŋ kamala taŋa ya mbaŋa. 18 Ama a pat ata kəla ka, ika ahəɗ Gusen i təv ana gà mburma gà, gà Isərayel mandza ŋa iɗəm a ka, gà bàba gà màsùlùŋ ata ti dzeyewa a mburma ya ka, ta ge a riŋ i fata tsidze. Kamala taŋa ya, na dite ki sir a dər ka, iye Batsah tar ŋa na i kwere a gər ahəɗ a ya. 19 I tike aɗəm a kwiye aka magər gà mburma gà nda gà biy yak. Ndidwe na dukw mene aà mburma ata a ge a ba ya.««

20 Tsam ka, BATSAH kwa ŋa a ge kamala taŋa ya kaɗəŋ. Gà mayahaba gər gà bàba gà masùlùŋ ata ti dzeyewa a mburma ya, tə dayara aka gà Firawna nda gà ɓəzla meslire ŋgar a hinne, ta patsaya aka taraha a ga. Kamala taŋa ya, gà masùlùŋ ata tə nə̀s à ahəɗ Ezipt fit kweleŋ.

21 I dəba ŋa ya ka, Firawna a zal a gà Musa nda Haruna, a gwaɗa a tar: « Dumaha nda gà mburma kurum, ka batsayum gà duwa a Batsah kurum ŋa ata, ama ki betswimer a ka, ɗa ika ahəɗ aaha kəla.»

22 Musa a gwaɗar aaka: « Awaŋ, à tsehin a aà gà mburma gà Ezipt tsa, na mìi ge a kamala taŋa ya, aɗaba ta gweɗe a ka, awisl na taŋa ya. Na bəla mə̀r riŋ ihər mìi bets a dukw ata awisl aɗaba gà mburma gà Ezipt ya, ika miɗ tar kataya ana, ta kelewa a mə̀r nda kur tsiye? 23 Say mìi de a ka, a dala diriŋ, mìi ge a aà vatwa mehinne makər, na dite mìi ta bets a duwa a Mbulum Batsah mə̀r ŋa kamala ana a tsik a mə̀r a.»

24 Firawna a tsaraka taŋa ka, a gwaɗa a tar: « Kinehe ka, i vile a kurum a vatwa, dum a dala, ka ta batsayum dukw ata a Batsah kurum ŋa ata. Ama kəla ka, ka ta dum dər a təv a diriŋ tsa. Ka hamum a Mbulum aɗaba iye ŋa mbaŋa te kəla.»

25 Musa a gwaɗar: « I de a, i te heme a a Batsah mə̀r ŋa aɗaba kər kuɗa. Ndidwe ka, gà bàba gà màsùlùŋ aaha ti dzeyek a ya, ta miyek à kurum a nda gà mburma ana i ga yak a nda gà ɓəzla meslire yak, ta ge a riŋ asa tsa, Əbay gà. Ama aka miɗ mba kəla ka, ka ta ge à mə̀r nda wirwir, ka ta niw mivile vatwa a gà mburma mə̀r asa tsa, tə da, tə ta batsaya duwa a Mbulum kuɗa.»

26 I fata ya ka, Musa a dara i ga i bəra Firawna ya. A dara ka, a hama a BATSAH kwa ŋa. 27 BATSAH kwa ŋa a tsaraka meheme Musa ata ka, a ge kamala ana Musa a tsiker i huɗ meheme ŋgar ata ya. Tsam ka, gà bàba gà màsùlùŋ ata ti dzeyewa a mburma ya, tə da aà gà Firawna nda gà ɓəzla meslire ŋgar a, nda gà mburma ana i ma ŋgar a fit kuɗa, ku mege ilik tekeɗe, aka zeha tsidze.

28 Ama i fata ya tsara ka, Firawna a tsalaba à segeme a gər asa ivaɗ, a gəs mivile vatwa a gà Isərayel ata, tə da tsa.