Mendizle 9

miìzləm mesèwèrè are dukw məməta gà dukw gənaw

1 I dəba ŋa ya, Mbulum a gwaɗa a Musa: « Daha a təv Firawna, gwaɗar ka: « Batsah mə̀r ŋa, Mbulum gà Ibəranikwa a gwaɗak ka, vəl vatwa a gà mburma gà, dite tə daha, ti ti dziŋ a gurmits a bəɗ. 2 Aɗaba na bəla kàa niw mivile a tar vatwa, ki gis a tar i ahər hiywe pəra ka, 3 iye nda ahər gà ŋa i slirre a dukw məməta batsah ŋa ya hinne aka gà dukw gənaw kurum a, ta mete a fit kweleŋ. Gà piris nda gà hezweŋe, nda gà zlìgwèmè, nda gà sla, nda gà təmaŋ, dite nda gà awak a ta mete a kweleŋ. 4 Ama i tike aɗəm a kwiye aka magər gà dukw gənaw gà Isərayel nda biy gà Ezipt. I liwiŋ gà dukw gənaw gà Isərayel ana ta ŋgat tserdze ya ka, ku ilik à mite a tsidze. 5 Iye, Mbulum, Yàa mbər metike məpaslà ahər ŋa, i gwa, i ge a dukw ata ika ahəɗ aaha ka, ndidwe.««

6 Ndidwe ŋana ka, BATSAH kwa ŋa a ge dukw ana a tsik a kaɗəŋ. Gà dukw gənaw gà mburma gà Ezipt fit ta mata à dukw məməta ata, ama biy gà Isərayel ka, ku mege ilik tekeɗe, aka mət tsidze. 7 I fata ya ka, Firawna a slər mburma aà masamata gà dukw gənaw gà Isərayel. Tə daha, tə samata ka, ku mege ilik pəra aka mət tsa. Ama ku mege kataya tekeɗe ka, Firawna a tsalaba à segeme a gər hinne asa, aka vəl vatwa a gà Isərayel ata, tə da tsa.

Mendilik mesewere are meslèslèyè duwa

8 I dəba ŋa ya, BATSAH kwa ŋa a gwaɗa a gà Musa nda Haruna: « Ndzəkum bitekwe liwit, ràhayum dər akahər kurum serrè serrè lele. Dite Musa ma da dər, ma ta vàvaya aà gəza mbulum a duzzwà aka miɗ Firawna.» 9 Argwadwa ŋa a de a aka ahəɗ Ezipt fit tùtùkwtùkkwa, tsam ka, a ne a meslèslèyè duwa aka mburma, a geye a ter a gà mbəlak pampam hinne, nda gà gənaw ŋa dze.»

10 Gà Musa nda Haruna tə tsaraka kataya ka, tə ndzək bitekwe liwit ata, tə ta mehitse dər aka miɗ Firawna. Musa a vàvaya aà gəza mbulum a. Tsam ka, duwa a slesleye a gà mburma hinne kaɗəŋ, a geye a tar mbəlak pampam nda gà dukw gənaw tar ŋa dze. 11 Gà màhəram ana ta geyewa gà dukw gà mene aà mburma i fata ya tekeɗe, ti sle aà mesirikaha a təv Musa tsa, aɗaba duwa aka slesleye a tar kalkal kamala gà asiŋ gà mburma gà Ezipt ana tserdze ya mbaŋa. 12 Ama ka, BATSAH kwa ŋa a vəl segeme a gər a Firawna, aka tsaraka a tar dər tsa kaɗəŋ, kamala ana Mbulum a tsik a gà Musa nda Haruna ya.

Matəsəla mesewere are aləndza ana a nə̀s à duwa ya

13 I dəba ŋa ya ka, BATSAH kwa ŋa a gwaɗa a Musa: « Ndidwe i mèkwède hedwe ka, da a bəra Firawna, ki hitse a aka miɗ ŋgar, ki gweɗere a: ‘Batsah mə̀r ŋa, Mbulum gà Ibəranikwa a gwaɗak ka, vəl vatwa a gà mburma gà, dite tə daha, ti ti dziŋ a gurmits a bəɗ. 14 Aɗaba kinehe ka, i zle a kurumara gà mesewere are ya pampam nda gà mburma yak a, nda gà ɓəzla megemir yak a tserdze, na dite ka, ki sir a dər, wura a riŋ ika gər ahəɗ kamala iye ya ilik tsidze ya. 15 Na i zla ahər gà aà mbulum, dite dukw məməta à gis a kurum nda gà mburma yak tserdzena, i dzeye a dər kurum fit daga piŋŋe tsiye? 16 Ama ka, Yàa miyak à kər tə̀ma, na dite mba ka, i pètek a à ndzəɗa gà, dite gà mburma ti sir a zləm gà ika gər ahəɗ tserdze ya. 17 Ama kər ka, haa kinehe kər riŋ ki sìŋgìr a à gər yak aka gà mburma gà mba hiywe, ki vile a ter a vatwa, tə da tsəna, meme? 18 Aɗaba taŋa, araha ndidwe kərga naha ya ka, i dzewere a à gà bàba gà aləndza aà gəza mbulum a hinne. Medzìbe aləndza ata ka, aka dza ilik kataya tsa, aà gər ana ahəɗ Ezipt a ndza haa kinehe ya. 19 Kinehe ka, i bek a à ɗaf, na dite gà dukw gənaw yak, nda gà asiŋ gà dukw yak ana i bəra ya ti dzeye a tsiye. Aləndza ata ka, a bets a gà mburma nda gà dukw gənaw, nda gà asiŋ gà dukw kurum ana i bəra ya fit dze. zləməŋa dukw ana ar i ga tsiye pəra ka, aləndza a bets a fit.««

20 I fata ya ka, wele ana i liwiŋ gà ɓəzla meslire Firawna ya, a ge magəɗa a bazlam ata BATSAH kwa ŋa a tsik a ka, a vəl vatwa a gà ɓele ŋgar nda gà dukw gənaw ŋgar, dite tə daya a gà ga. 21 Ama wele ana aka ge metsehe a bazlam ata Mbulum a tsik a tsəka, a miyak à gà ɓele ŋgar nda gà dukw gənaw ŋgar i bəra.

22 I dəba ŋa ya ka, BATSAH kwa ŋa a gwaɗa a Musa asa: « Zla ahər yak aà mbulum, dite aləndza mà dzara i mbulum a, aka gà mburma ana ika ahəɗ Ezipt ya, nda gà dukw gənaw tar, nda gà dukw tar ana ti sligeye a gà guvah tar a, aà məbatsa iɗəm a fit dze.» 23 Musa a tsaraka kataya ka, a zla zəva ŋgar aà gəza mbulum. Tsam ka, BATSAH kwa ŋa a slərra gà malaka mbulum a, nda gà mewìtiɗe ya twiytwiy, a lak a ahəɗ Ezipt. I fata ya, BATSAH kwa ŋa a dzawara à aləndza ya hinne. 24 Agər ana gà mburma gà Ezipt tə ndzawa riŋ ika ahəɗ tar ata ya ka, medzibe aləndza ata aka dza kataya ilik tsidze. I təv ana a riŋ à dzère a ya ka, mbulum a wìtiɗeye twiytwiy, tsam ka, a gawara ba nda gà bàba gà aləndza ya hinne. 25 Aləndza ata a bats gà dukw ana tàa da a ga tsa, tar i bəra ika ahəɗ Ezipt ya kweleŋ, gà mburma fit, nda gà dukw gənaw, dite gà dukw ana i guvah tar, tə sləl a fit a, nda gà dizl ɗaf ta haɓaya. 26 I fata ya ka, say ahəɗ Gusen ana gà Isərayel mandza ŋa iɗəm a ilik, na tuwa aka ndze a fata tsiye.

27 I dəba ŋa ya ka, Firawna a zal a gà Musa nda Haruna, a gwaɗa a tar: « Ama kinehe ka, Yàa ge bakal. Mər nda gà mburma gà tserdze ka, maa ge dukw ana ŋgwala tsiye. Ama Batsah kurum ŋa ka, ŋgat a ge a dukw ana ndzer a. 28 Kamkam, hamum a Batsah kurum ŋa aɗaba iye, na dite gà malaka mbulum ata nda aləndza ti ndele a ya. Aka ndala ka, i vile a kurum a vatwa, ka dum, i waya magəsa kurum i faha asa tsa.»

29 Musa gwaɗar aaka: « Na Yàa da i təv yak a ka, i de a, i te heme a a Batsah mə̀r ŋa aɗaba kər kuɗa. Gà malaka mbulum nda aləndza ti ndeliŋa, na dite ki sir a dər ka, gər ahəɗ tserdze ka, biy BATSAH kwa ŋa ya. 30 Ama i sər, kurum nda gà ɓəzla meslire kurum ata ka, kàa gwim magəɗa a Mbulum BATSAH kwa ŋa nda ndzer zukw tsa kəla.»

31 I təv gà aləndza na a dza aaka duwa ya ka, aka nə̀s à dukw ana a riŋ a bize a, a ge a wur bise ya. 32 Ama gà wur gà dukw ana tàa da a bəra bise tsiye ka, manəsa ŋa tsa, a neh a lele dukw ŋgar.

33 Kamala taŋa ya, gà Musa tàa da aba nda Firawna ya, a dara i kwite ŋgar a ka, a zla ahər ŋgar a mbulum, a hama a BATSAH kwa ŋa. I fata ya ka, gà malaka mbulum ata tə ndala, gà aləndza nda yam tekeɗe, tàa dzayara i mbulum a asa tsa, tə ndala. 34 Ama Firawna a samata, gà yam nda aləndza nda gà malaka mbulum tə ndalaya ka, a səkah à bakal ŋgar ana a ge ndeɗiŋa ya. Tar nda gà ɓəzla meslire ŋgar ata tserdze, tə tsalaba à segeme a gər hinne asa. 35 Aka geba kamala na BATSAH kwa ŋa a ɗif dər nda ahər Musa ya kaɗəŋ. Mbulum a vəl segeme a gər a Firawna, dite mə vəl vatwa a gà Isərayel ata, tə da tsa.