Matsamakər mesewere are heyew ana a ge ya
10
1 I dəba ŋa ya, BATSAH kwa ŋa a gwaɗa a Musa: « Da a təv Firawna, aɗaba Yàa tsalar à segeme a gər nda gà ɓəzla megemir ŋgar tserdze, aɗaba i waya ka, a mege dukw mene aà mburma gà aaha ika magər tar. 2 Kamala taŋa ya, ki ti tsik a gà ɓəza yak nda gà ɓəza tar ana ta we a ba ya, na bazlam dukw mene aà mburma gà aaha i ge ika magər gà Ezipt ya. Taŋa ki sirwim a dər ka, iye na a ne Bàtsah kurum ŋa ya.»3 I dəba ŋa ya, gà Musa nda Haruna tə da aka miɗ Firawna asa. Tə daha ka, ta gwaɗar: « Araha na dukw ana Batsah mə̀r ŋa, Mbulum gà Ibəranikwa a gwaɗak a. A gwa ka: ‘Ndeɗime dzeya, na ki hinne a à gər yak a bəɗ ika miɗ gà ya? Miyak à gà mburma gà, dite tə daha, ti di dziŋ a gurmits a bəɗ. 4 Aɗaba na kàa niw məpəla aà gà mburma gà ka, sər dər, ndidwe ka, i slerre a heyew aka kwiye ahəɗ yak a tserdze. 5 Heyew ata a kèhe a ahəɗ fit kweleŋ, wura a sle aà meŋgeter a kwizikw tsidze. A zim a dukw ana a zeha à aləndza ya. A zim a gà dizl ɗaf ana i gà guvah kurum a tserdze. 6 I dəba ŋa ya, à rèh a gà ma yak, nda gà ga gà ɓəzla meslire yak, dite nda gà ga kurum ana ika ahəɗ Ezipt ya tserdze. Dukw ata ka, gà tsir kurum, nda gà tsir gà dede kurum ata akahər ata ya, ta ŋgatar ilik kamala taŋa tsidze, na agər ana tə ndza ɗa ika ahəɗ aaha mbakum a.« « Musa a tsik aba kataya tsara ka, a dara i ga i bəra Firawna ya, a daba.
7 Gà ɓəzla meslire Firawna ta gwaɗar: « Wele aaha dzena, ndeɗime na a miyek a à mazla aka kwara mesewere are ya ya? Kər ka, miyak à gà Isərayel a ka, tə da aà mandza gurmits a bəɗ a Mbulum Batsah tar ŋa. Kər dzena, ka sər ka, gà Ezipt a riŋ ti dzeye ti ibam a?»
8 Tə ndzəkara gà Musa nda Haruna aka miɗ Firawna ya asa. A gwaɗa tar: « Dum a mandza gurmits a bəɗ a Mbulum Batsah kurum ŋa. Ama gà weke na ti de a ya?» 9 I fata ya tsara ka, Musa a gwaɗar: « Mìi de akaba a ka, nda gà ɓəza nda gà bàba mə̀r ŋa tserdze, dite nda gà ɓəza mə̀r gà asləka ŋa nda gà dəm ŋana nda dukw gənaw mə̀r nda gà sla mə̀r tserdze asa, aɗaba mìi de a, mìi gìrìv a aɗaba mazlə̀bà à Batsah mə̀r ŋa a fata.»
10 Firawna a tsik a tar sàmma, a gwaɗa a tar: « Batsah kurum ŋa ma ndza nda kurum. Yaw, dite i pil a kurum a nda gà məkəs kurum nda ga ɓəza kurum dze ye? Ama na ndzer ka, ka dzalum taŋa ka, ŋgwala tsa. 11 Ama kinehe ka, kataya tsa, say na ki dwim a ka, kurum gà asləka ŋana ɗekɗek, na ki de a medzwim a gurmits a bəɗ a Batsah kurum ŋa ya, kamala ana kà wayum a.» I fata ya tsara ka, tə dəgəz tar ika miɗ Firawna ya.
12 BATSAH kwa ŋa a gwaɗa a Musa: « Zla ahər yak aka ahəɗ gà Ezipt. Dite ka, heyew ma dara aka ahəɗ tar a, tə zəm dukw ana a sləl ika ahəɗ tar a tserdze ya, nda gà na a zeha aà aləndza ya tserdze asa mbaŋa.»
13 I dəba ŋa ya, Musa a zla zəva ŋgar ata a mbulum aka gər ahəɗ gà Ezipt kaɗəŋ. BATSAH kwa ŋa a zlara himbiɗ ana ika tseke pat ana a mbəzawara ya aka ahəɗ ata ya, i huɗ miveke ata ya haa tsikw a həvəɗ. Aləka mbulum a dəv ka, himbiɗ ata aka zlara heyew a kaɗəŋ. 14 Heyew ata a dara aka ahəɗ Ezipt ya, tsam ka, rə̀bbàk tə ndza aka ahəɗ tar ata tserdze ya. Tar mayahaba gər ŋa ka, rə̀vrə̀v hinne. Gà heyew kamala taŋa ya ka, aka ge ba diydiy ilik tsa, dite gà biy ŋgiɗ kamala taŋa ya tekeɗe ka, a ta ge a ba ilik tsa asa mbaŋa. 15 Tiɓits ta kaha ahəɗ fit kweleŋ, sirikw sirikw ahəɗ a ndza. Tə zəm dukw ana a sləl i bəɗ a nda gà mawà duwa, zləma gà dukw ana a zeha aà aləndza ya. Ku slàmbah ana aà dizl ɗaf a, nda gà dukw ana a sləl i guvah ku mege i ŋga ika ahəɗ Ezipt ya, aka zeha kwizikw tsidze.
16 I fata ya tsara ka, Firawna a zal a Musa nda Haruna, a gwaɗa a tar: « Yàa ge bakal aka gər Mbulum Batsah kurum ŋa, dite aka gər kurum asa mbaŋa. 17 Ama kinehe ka, pìlwimiŋ à bakal ga mbakum ilik, tsam pəra ka, aka sle ide. Dite asa ka, ka hamum a Mbulum Batsah kurum ŋa, mà zla aà iye batsah mesewere are aaha ya.»
18 Musa a dara i təv Firawna ya, a hama BATSAH kwa ŋa. 19 I dəba ŋa ya, BATSAH kwa ŋa ata nda ndzəɗa ŋgar ana hinne ya, a zlara himbiɗ ndaka tseke pat ana a dawa aɗəm a. A hala heyew ata a dala, himbiɗ ata a da dər a duluv Awasl. I fata ya ka, heyew ŋgiɗ ilik aka zeha ika ahəɗ Ezipt asa tsidze. 20 Ama ku mege kataya tekeɗe, BATSAH kwa ŋa a tsala à segeme a gər a Firawna hinne asa, aka pəl aà gà mburma Isərayel ɓav tsa.
Metswìɗ mesewere are luvuŋ
21 I dəba ŋa ya asa ka, BATSAH kwa ŋa a gwaɗa a Musa: « Zla ahər yak aà mbulum, dite luvuŋ ma dara aka ahəɗ Ezipt ya, biy na wura a sle aà meŋget a mezite ŋgar tsiye.» 22 Musa a zla ahər ŋgar aà mbulum kaɗəŋ ka, luvuŋ a dara aka ahəɗ Ezipt ya ziŋziŋ hinne mehinne makər. 23 I huɗ mehinne ata makər a ka, ti sle aà maŋgataba tsa, wura a sle a aà medere i ga i ma ŋgar a tsa asa mbaŋa. Ama i təv gà Isərayel ka, dzaydzay a riŋ hiywe dukw tar ana i təv mendze tar a.
24 Firawna a zal a Musa, a gwaɗar: « Dum a mandza gurmits a a Batsah kurum ŋa. Gà məkəs kurum nda gà ɓəza kurum ka, tə da akaba nda gà kurum ŋa dze. Ama kəla ka, gà dukw gənaw kurum nda gà sla kurum ka, ti ze a dəba.»
25 Musa a gwaɗar aaka: « A ge a ba tsa, say ki dze a mə̀r a gà dukw gənaw aà mìi bets a, aà mìi veke a aɗaba Mbulum Batsah mə̀r ŋa mbaŋa. 26 Aɗaba taŋa, mə̀r ka, mìi de akaba a nda gà dukw mə̀r ka, fit tserdze. Tsəka, ku mege tərpak dukw mə̀r kwizikw mà za a dəba ilik tsidze. Aɗaba mìi zle a ka, aà gà dukw ata ya, na mìi vile a a Mbulum Batsah mə̀r ŋa ya. Aɗaba mə̀r ka, mì sər nda dukùla na mìi ti dze a gurmits a bəɗ a Batsah mə̀r ŋa ya ya ka, mì sər tsa. Say na maa ndze ya dzekwiŋ.»
27 Ama i fata ya ka, BATSAH kwa ŋa tekeɗe, a tsala à segeme a gər a Firawna asa mbaŋa, a mimìyèkè à tar, tə da tsa. 28 I dəba ŋa ya, Firawna a gwaɗa a Musa: « Da i təv ga ya, ge metsehe, ka ta ŋgetiŋ ilik asa tsa. Aɗaba pat ana kàa ŋgetiŋ asa ya ka, ki mìtiŋa.»
29 Musa a gwaɗar aaka: « Kamala ana kà tsik a kaɗəŋ, i ta ŋgeteke a diydiy asa tsidze.»