Mendizle 11

Mandəvandəv mesewere are məməta gà malùkwara ana ta mete a ya

1 I dəba ŋa ya ka, BATSAH kwa ŋa a gwaɗa a Musa: « A zeha ka, mesewere are ilik pəra na i ge a aka gər gà Firawna nda gà Ezipt ya, dite na ta pìl à kurum a ya. Ta pìl à kurum a ka, mipìle pəra tsa, ti delewe a kurum ka, medelewe i faha ya fit dze. 2 Tsik a gà mburma tserdze, ku weke ma yaha dukw məvəɗa ŋa nda kur siŋgwe, kige tsa nda gà gura i təv gà ɓəzla hərmaga tar a, ku weke gà məkəs tekeɗe, i təv gà kwasa tar ana i bəra ya mbaŋa.» 3 Ama BATSAH kwa ŋa a ge ŋgwal a gà mburma ŋgar gà Isərayel nda təv gà Ezipt, aà ta vəl a tar duwa ya. Musa nda gər ŋgar tekeɗe ka, batsah mburma hinne na ika ahəɗ Ezipt ya mbaŋa, ku mege ika magər gà ɓəzla megemir Firawna nda gà mburma fit tekeɗe, ŋgat batsah ŋa. 4 ºlək Musa aka da i təv Firawna zukw tsiye ka, a gwaɗar: « Araha, Batsah mə̀r ŋa a gwa ka: ‘I huɗ magər həvəɗ aaha ya ka, i de a nda magər kwite Ezipt. 5 Gà malùkwara ana ika ahəɗ yak a tserdze ka, ta metiŋa, ku mege malùkwara yak ana a de a, a zle a təv mendze yak a tekeɗe, haa tsìm aà malùkwara gà məkəs ana gà ɓele ŋa i ma yak tə ləgərawak a tekeɗe, ku mege malùkwara gà dukw gənaw fit dze mbaŋa. 6 I dəba ŋa ya ka, ti ti tiwe a hinne ika ahəɗ Ezipt, wura aka tuwa kamala taŋa ya ilik tsa, dite wura a ti tiwe a kamala taŋa ya dìydiy tsa asa mbaŋa. 7 Ama i təv gà Isərayel fit dze ka, ku mege kəra tekeɗe, a bebew a aà gà mburma nda gà dukw gənaw tsa. « Aɗaba taŋa ka, aà kurum gà Ezipt ki sirwim a dər ka, BATSAH kwa ŋa aka ndzək ikaba gà Ezipt nda gà Isərayel a. 8 Kamala taŋa ya, gà ɓəzla megemir yak aaha ka, ti dere a a təv ga ya, tì dziŋ a gurmits a bəɗ aka miɗ gà, ta gweɗe a ka: « Dum, a kər nda gà mburma yak aaha ti zezem a kər a fit. « Dite na mìi de a ya.» I fata ya ka, Musa a dara i ga i bəra Firawna ya ka, nda gà matsəɓatsəɓ a hinne.

9 BATSAH kwa ŋa aka tsik a Musa asa, a gwaɗar ka: « Firawna a tsereke a bazlam yak ana ki tsiker a ya tsəka, aɗaba dukw mene aà mburma ana i ge ya aà mege ika ahəɗ Ezipt hinne.» 10 Aɗaba gà Musa nda Haruna tàa geya gà dukw mene aà mburma ata aka miɗ Firawna hinne. Ama ku mege kataya tekeɗe, Mbulum a tsalar à segeme à gər a Firawna hinne, a waya məpəla à gà Isərayel aà tə da ika ahəɗ ŋgar a tsa.