Mendizle 12

Megirive Paska

1 I dəba ŋa ya, BATSAH kwa ŋa a fàfəl a gà Musa nda Haruna ika ahəɗ Ezipt, a gwaɗa a tar: 2 « Kiye aaha aà mbulum ka, me ne kiye maŋgayaba kurum. Me ne ka, malahalah gà kiye ana i huɗ mive fit dze ya. 3 Tsikwim bazlam gà ata a gà Isərayel fit dze. Gwaɗum a tar ka: ‘Mehinne kiye aaha aà mbulum a kurwa ka, ku weke tserdze ma zla vugul ilik kəla ga tserdze. 4 Na bəla gà mburma ana i ga tar a, ti sle a aà mazəma ŋa tsəka, ma zla, ta gaw ahər ba nda mala biye hərmaga ana bise nda ŋgat a, tits aà gà mburma ana tì ndìv a vugul ata ide ya. 5 Ama zlum kəla ka, vugul ana təv mendeve ihər tsa, yam ide pəra ya. Zlum ka, i liwiŋ gà təmaŋ a, kige tsa i liwiŋ gà awak a.

6 I dəba ŋa ya ka, say ki tikwim a a ga, a ndze a i ga haa mehinne kurwa gəra faɗ i huɗ kiye aaha ya. Gà mburma gà Isərayel ta bats gà vugul ata i magər gà hawa nda pat ana a dəɗ a. 7 I fata ya ka, tə zla məmbəz ŋa, ta gwatsakaya aà guva gà hərmaga sula məma. Ta gwatsakaya aà mezlembel ŋana mbaŋa. I fata ya ka, ku weke ti zim a ka, i gà ga i gà ga tserdze. 8 I huɗ həvəɗ ata ya ka, ta pèpiɗ a slu vugul ata məvàkà ŋa nda akwa ya, dite ti zim a ɗaf ana giɗe ikəka makwàsà ŋa tsiye mbaŋa. Tə zəm ka, nda ala ana ɗìwèkìke ya. 9 Ka ta papəɗum ka, nda are tsa, kige tsa ka dwim mede nda yam tsa asa mbaŋa. Ama ki vekwim a ka, miveke nda akwa, mege gər ŋa nda gà mendèkwiyek ŋa, nda gà dìnde ŋa, say ki vekwim a ka, nda akwa fit dze. 10 Ka ta zwim dərraha aà mèkwède tsa. Dukw ana aka zeha ya ka, wanum iɗəm a nda akwa ya. 11 Ama i təv ana ki zimwim a ya ka, dànayum dər gà petek kurum aka dəmkul, dzum tsapà aka sik kurum, gəsum gà zəva kurum ka, i ahər kurum mbaŋa asa. Zəmum ka, tsəma tsəma. Taŋa na a ne megirive Paska biy BATSAH kwa ŋa.

12 I huɗ magər həvəɗ aaha ya ka, i de a nda magər kwite Ezipt. I bets a gà malùkwara ana ika ahəɗ ata fit, ku mege gà mburma ana gà malùkwara ŋa ya, nda gà dukw gənaw ŋa dze. I ge a seriye aka gər fəla gà Ezipt fit tserdze, iye Batsah kurum ŋa. 13 Ama məmbəz ata ka, a ne ka, mendzikiɗe ba duwa na kàa gwim aà hərmaga gà ga ana kurum iɗəm a. Na Yàa ŋgatar a məmbəz ata aà ga kurum ka, i miyek à kurum ŋa. Mesewere are duwa a le aà kurum a tsa na akahər ana i bets a gà Ezipt ya. 14 Ki slwim a aà medzele aaka gà gər aka pat ata hiywe, ki nwim a dər ka, pat megirive aà biybiy, aɗaba Batsah kurum ŋa na a pat à ndzəɗa ŋgar a pat ata ya. Gəsum bazlam gà ata kamala məpala ahəm a, kurum nda gà hwelfe kurum tserdze.

Pat megirive ɗaf ana gìɗe ikəka tsiye

15 I huɗ mehinne təsəla ya ka, ki zimwim a ɗaf aaha giɗe ikəka tsiye. I malahalah ŋana ilik a tsara ka, wura ma zəm ɗaf ana giɗe ikəka makwàsà ŋa tsiye asa tsa na i gà ma kurum a. Aɗaba na ku weke aka zəm ɗaf ata giɗe ikəka makwàsà ŋa ya ka, à gər pat ata malahalah ŋa haa tsìm aà mehinne təsəla ŋa ata ka, taŋa ka, kalkal nda na mesife ŋgar i təv gà Isərayel asa tsiye. 16 A pat malahalah ŋa ata ka, gwim mayahaba gər ana tsəɗaŋŋa, bakal iɗəm tsiye, ki gwim a a pat mehinne təsəla ŋana asa mbaŋa. A pat ata ka, ka ta gwim megemir tsidze. Aɗaba taŋa, say ku weke na a zim a dukw mezime ya, say ki zimwim a ka, dukw mezime ŋa ka, taŋa ki dwim a ya ɗekɗek pəra. 17 Gəsum pat megirive ɗaf ata giɗe ikəka, makwàsà ŋa tsiye ka, lele. Aɗaba a pat ata na i ndzəkara kurum i kwite Ezipt ya nda zay a. Kamala taŋa ya, say ki giswim a pat ata ika magər kurum nda gà hwife kurum ka, kamala məpala ahəm ana à ndìv a tsa aà biybiy a. 18 I huɗ malahalah kiye ata ya ka, mehinne kurwa gəra faɗ, nda hawa ŋana ka, say ku weke ika magər kurum a, a zim a ɗaf ata giɗe ikəka, makwàsà ŋa tsiye ka, haa a ndze a mehinne dzik səla gər a ilik nda hawa ŋana i huɗ kiye ata ya. 19 Kə̀la ka, wura me de le a aà ɗaf ata giɗe ikəka, makwàsà ŋana i ga i ma kurum tsa haa mehinne təsəla ŋa ata. Aɗaba na wura aka zəm ɗaf ata giɗe ikəka makwàsà ŋana ka, kalkal nda na mesife ŋgar a riŋ i təv gà Isərayel asa tsiye, ku mege mbəlakw, ku mege ta wa mburma ŋa ika ahəɗ ata tekeɗe ya. 20 Aɗaba taŋa ka, ma ta zəm ɗaf ana giɗe ikəka makwàsà ŋa ya tsa. Ama na i huɗ mendze kurum a fit ka, zəmum ka, ɗaf ana makwàsà ŋa tsiye tserdze.»

Mede ɗaf Paska

21 Musa a zal a gà bàba gà Isərayel tserdze, a gwaɗa a tar: « Dumaha, ndzəkum gà vugul ana i ga i ma kurum a. Ka batsum gà vugul ata, aɗaba megirive Paska. 22 I dəba ŋa ya ka, ki zlwim a aŋgaɓ ana a ndzàndzə̀ɗ lele ya mbaŋa. Ki ndwim a aŋgaɓ ata a məmbəz vugul ata i tasà ya. Kà bàhum aà mezlembel ga, nda guva hərmaga sula məma tserdze. Ama kurum ŋa kəla ka, wura ilik ma ta dara a bəra ya i ga i ma kurum a tsa, haa mbulum à dìviŋa. 23 BATSAH kwa ŋa a dere a, a de a ndaka ahəɗ gà Ezipt aà medzeye à tar. I təv ana aka dara, aka ŋgat a məmbəz məbàhà ŋa aà mezlembel ga, nda gà aà guva gà hərmaga sula məma ka, a vile a vatwa a mala məbatsa mburma, a de a a ga kurum aà məbatsa kurum asa tsa mbaŋa.

24 Say gəsum taŋa ka, kamala məpala ahəm a, aka gər kurum nda gà ɓəza kurum tserdze aà biybiy. 25 I təv ana kàa dum aka ahəɗ ana BATSAH kwa ŋa a vəl a kwa ya ka, say ki gwim a dukw ana a tsik a, gwim megemir aaha ku mege ndeɗime tekeɗe ya. 26 Na bəla gà ɓəza kurum tàa wiz aà kurum ka, bə̀lətsa ta gwaɗa a kurum kinehe ka, megemir aaha ki gwim a dzena, a ne ana, dukùla na i təv kurum a ka, 27 gwaɗum a tar: ‘Naha mìi ge a megirive aaha ka, aɗaba məbatsa duwa a BATSAH kwa ŋa. Akahər ata ka, BATSAH kwa ŋa a dara, a miyak à ga gà Isərayel, a da a məbatsa gà Ezipt ka, a mbəl aà kwa.« « I dəba ŋa ya ka, gà Isərayel tə dza gurmits a biye aka miɗ a BATSAH kwa ŋa, tə zambaɗar. 28 I dəba ŋa asa ka, tə da, ta ge dukw ana BATSAH kwa ŋa a tsik a gà Musa nda Haruna ya.

Makurwa mesewere are məməta gà malùkwara kuɗa

29 I huɗ magər həvəɗ a ka, BATSAH kwa ŋa a dara, a bats gà malùkwara ana ika ahəɗ Ezipt ya. A lah ka, aà malùkwara Firawna ana a tə zla təv mendze mekwere ŋgar a, haa tsìm aà gà malùkwara gà ana i ga daŋgay a. Ku mege malùkwara gà dukw gənaw tekeɗe, a mata tserdze. 30 I dəba ŋa ya ka, Firawna a hitse aà mbulum nda magər həvəɗ ata, ŋgat nda gà ɓəzla megemir ŋgar, nda gà mburma ana ika ahəɗ Ezipt ya tserdze. Gà Ezipt tə dza ba aà tuwa hinne, aɗaba ga a riŋ gà məməta iɗəm tsəka, a riŋ tsa na ika ahəɗ Ezipt ya.

31 I fata ya tsara ka, Firawna a zal a gà Musa nda Haruna ndaavəɗ ata tsara, a gwaɗa a tar: « Hitswim, ka dum. Miyak à gà mburma gà, kurum nda gà Isərayel tserdze, dum, ka ta dzum gurmits a bəɗ a Batsah kurum ŋa, kamala ana kə̀ gwaɗum a. 32 Ndzəkum dər gà dukw megemir kurum, nda gà sla kurum mbaŋa, kamala ana kə̀ gwaɗum a. Dum, ama kəla ka, ka wizwim aà Batsah kurum ŋa, mi pìsìŋ ahəm mbaŋa te.» 33 Gà Ezipt ta kwara akaba gà mburma ata tsəma tsəma, tə da ika ahəɗ tar a. Gà Ezipt tə dzala ka, ta gwa: « A ge a ka, ki metekwe a fit tserdze.»

34 Aɗaba taŋa, gà mburma ata tə ndzək dər gà ɗaf tar ana giɗe ikəka, makwàsà ŋa tsiye, nda gà mahə̀làɓà gà gùfa tar ana məpaɗaya ŋa i gà petek tar a. Ama tə ndzək ndaka dzàdzah tar. 35 Gà Isərayel ta ge dukw ana Musa a tsik a tar piŋŋe ya, ti yaha dər gà kur siŋgwe, nda gà gura, dite nda gà tə̀mbùlum i təv gà Ezipt ya. 36 I fata ya tekeɗe, BATSAH kwa ŋa a ge ŋgwal a gà Isərayel nda təv gà Ezipt aà ta vəl a tar dukw ana ta waya ya tserdze. Kamala taŋa ya na gà Isərayel tə zə̀mara gà Ezipt ya.

Gà Isərayel ana tə dara i Ezipt ya

37 I fata ya ka, gà Isərayel ata ta hitse i kwite Ramses a, tə da aka ahəɗ Sukut. I təv ana tə da ya ka, gà asləka gà mburma dəbuw dərməka ndilik (600«000) Taŋa ka, gà məkəs nda gà ɓəza, dite nda gà mandawal ka, tàa ɗama tar tsa. 38 I təv ana ti de a ya ka, gà mburma ŋgiɗ pampam tə da akaba dze nda gà tar, nda gà sla tar, dite nda gà dukw gənaw tar hinne mbaŋa asa. 39 Ti ndzeha a fata ka, ti deye gà gùfa tar aaha tə da dər akabaha i Ezipt ya ya. Ti deye ɗaf ŋa lele, tàa nda aɗəm giɗe a ɗaf ata tsa, aɗaba ana tə dalawaha tar i Ezipt ya ka, medelewe ya. Agəra taŋa na ti sle a aà mayaha gər a gà dukw tar aà medzeye a gà kìywa tar aà mede dər ika vatwa ya tsiye mbaŋa.

40 Akahər ana piŋŋe gà Isərayel tə ndzawa ika ahəɗ Ezipt ya ka, a sle a mive dərməka faɗ nda dzik makər (430). 41 I dəba mive dərməka faɗ nda dzik makər a a ndəv ka, a pat ata na gà mayahaba gər gà mburma BATSAH kwa ŋa ata tə dara i kwite Ezipt ya nda zay a. 42 Taŋa a ne ka, pat ŋa ata nda həvəɗ na BATSAH kwa ŋa a kasla tar, a ndzəkara tar i kwite Ezipt ya ya. Həvəɗ ata a pat ata ya ka, biy BATSAH kwa ŋa nda gà Isərayel. Aɗaba a pat ata ka, ti rèrèzle a tserdze, ti ndze a are tsa wa ahər kəla wa ahər kəla .

43 BATSAH kwa ŋa a gwaɗa a gà Musa nda Haruna: « Araha na dukw ana ki gwim a aɗaba məpala ahəm megirive Paska ya. Gà slele ka, tə zəm dukw megirive Paska ata tsa. 44 Ama na bəla wura aka səkəm ɓele ŋgar nda siŋgwe ŋgar ka, say mà sàs ŋgat. Taŋa ka, à zim a dukw megirive Paska ata kuɗa. 45 Ama gà mburma ana gà mbəlakw ŋa nda gà wur ana a ge a megemir biy siŋgwe ya ka, tə zəm dukw megirive ata tsa. 46 Tə zəm ka, i ga ilik ŋa. I təv ana ki zimwim a ya ka, ka dumara à slu ŋa a bəra ya tsa. Na ki zimwim a ka, ka ta haɓum ikaba à atasl ŋa ya tsa. 47 Gà mayahaba gər gà Isərayel tserdze ta ge megirive ŋa. 48 Na bəla ɓele aka ndə̀zlaha, a waya mege megirive Paska ata aɗaba BATSAH kwa ŋa ka, say gà mburma ana i ga i ma ŋgar a, tə dara, tə sàsa ba tar. Taŋa ka, a dere a, a ge a megirive Paska kuɗa, a ne a kalkal kəla kwite mbaŋa. Ama gà na tàa sasa ba tar tsiye ka, ti zim a dukw megirive ata tsa. 49 Taŋa na a ne məpala ahəm aka gər kurum gà ɓəzla kwite nda gà ɓele ana ika magər kurum a asa mbaŋa.»

50 Gà Isərayel tserdze ta ge kamala ana BATSAH kwa ŋa a tsik a gà Musa nda Haruna ya. 51 A pat ata kaɗəŋ na BATSAH kwa ŋa a ndzəkara gà Isərayel ika ahəɗ Ezipt ya nda zay a.