Mendizle 13

Ta pàt à gà malùkwara a Mbulum

1 I dəba ŋa ya ka, BATSAH kwa ŋa a gwaɗa a Musa: 2 « Petwimiŋ à gà malùkwara tserdze ka, tə ndza tsireŋŋè aɗaba iye. Gà dukw ana tə lah mewe i təv gà Isərayel tserdze ya, ku mege gà mburma nda gà dukw gənaw fit ka, gà biy gà.»

Megirive ɗaf ana gìɗe ikəka tsiye

3 I dəba ŋa ya ka, Musa a gwaɗa a gà Isərayel: « Dzalawum aka pat ana kà dumara i ɓele i kwite Ezipt ya kəla mive. BATSAH kwa ŋa a ndzəkara kurum i kwite ata ya ka, nda ahər ŋgar ana ndzəɗa ŋa hinne ya. I təv ana ki tikirwim a à pat ata ya ka, ki ti zimwim a ɗaf ana gìɗe i kəka makwàsà ŋa ya tsa. 4 Ka dumara i fata ya ka, mbakum nda kiye aaha tə zalar Abiba ya. 5 BATSAH kwa ŋa a mbaɗa a gà tsir kwa ana akahər ata piŋŋe ya, a gwaɗa a tar ka: ‘I vile a kurum a ahəɗ gà Kananiya, nda gà Hittiya, nda gà Amuriya, nda gà Hivviya, dite nda gà Yebusiya, aɗaba na ika ahəɗ ata ka, gà awah nda amum. « Ama BATSAH kwa ŋa a dza kurum a fata ka, say ki ta gwim a megemir aaha i huɗ kiye aaha kinehe aà mbulum a kəla. 6 I huɗ mehinne təsəla ŋa ata ya ka, ki ti zimwim a ɗaf ana gìɗe ikəka makwàsà ŋa tsiye. Pat mandəvandəv megirive ata ka, a ne megirive aɗaba mazàmbàɗà à BATSAH kwa ŋa. 7 Kurum ka, i huɗ mehinne təsəla ŋa ata ya ka, ki zimwim a ka, ɗaf ana gìɗe ikəka tsiye, tsəka, wura ma ta le aà ɗaf ana gìɗe ikəka ya a təv kurum tsa. Ku mege gìɗe ŋa ata agəra ŋgar tekeɗe ka, wura ma ta le ahər tsa na ika magər kurum tserdze ya.

8 A pat megirive ata ka, ku weke me ɗe dər a kəla ŋgar, ma gwaɗar ka: ‘Pat aaha ki tikirekwe a ya ka, à dukw ana BATSAH kwa ŋa a ge a kwa akahər ana a ndzəkara kwa i kwite Ezipt ya ya.« 9 Aɗaba gà dukw ata tserdze ya ka, me ne aka kurum kamala lamba ya. Wetswim aka gà ahər kurum nda gà yemere kurum asa mbaŋa, mə̀ məts a kurum gər tsa, aɗaba na dukw ata à kurum i gər ka, taŋa ka, ki zezemwim a məpala ahəm BATSAH kwa ŋana a tsik a kurum a kaɗəŋ. Aɗaba BATSAH kwa ŋa a ndzəkara kurum ika ahəɗ Ezipt ya ka, nda ahər ŋgar ana ndzəɗa ŋa hinne ya. 10 Gəsum dukw ana məpala ahəm aaha a ɗe a kurum dər a ka, aà mive aà mive hiywe kəla, a pat məpaslà ahər ata a tike ya.»

11 Musa a gwaɗa a tar asa: « I təv ana BATSAH kwa ŋa aka da à kurum aka ahəɗ gà Kananiya kamala ana a tsik a gà tsir kurum nda gà kurum ŋa asa i sida ya, a gwa, i ta vile a kurum a ka, 12 say ki betswim malahalah gà gənaw ana a lah meweye ya, aɗaba BATSAH kwa ŋa. Gà vugul gà dukw gənaw kurum ana malahalah ŋa tserdze ya ka, gà biy BATSAH kwa ŋa. 13 Mbùrùɗum gà malùkwara gà hezweŋe kurum tserdze nda gà vugul təmaŋ, kige tsa vugul awak. Na kàa wayum tsəka, say ki mbiɗwimer a à ɗa mimbirwiɗe. Mbùrùɗum gà ɓəza kurum gà asləka ŋana mbaŋa.

14 Na bəla gà ɓəza kurum tàa wiz aà kurum, ti ta gweɗe a kurum a, dukula na naha ya ka, say ki gweɗe a ter aaka a ka: ‘BATSAH kwa ŋa nda ahər ŋgar ana ndzəɗa ŋa hinne ya na a ndzəkara kwa i Ezipt ya akahər ana kwa gà ɓele i fata ya. 15 Akahər ana Firawna a tsalaba à segeme a gər, a waya mipìle kwa tsidze ya ka, BATSAH kwa ŋa a bats gà malùkwara tserdze ika ahəɗ Ezipt ya. A bats ka, ku mege gà malùkwara gà mburma nda biy gà dukw gənaw tserdze. Aɗaba taŋa na ki bets a kwe a gà malùkwara gà dukw ana gà vugul ŋa tə lah meweye tserdze a Mbulum a. Asa ka, ki mbiriɗekwe a gà malùkwara ana gà asləka ŋa ya mbaŋa.« 16 Aɗaba taŋa me ne aka kurum kamala lamba ya, wetswim aka gà ahər kurum nda gà yemere kurum asa mbaŋa. Mə̀ məts a kurum gər tsa, dzalum aaka gà gər i ga kurum lele, aɗaba BATSAH kwa ŋa a ndzəkara kwa ika ahəɗ Ezipt ya ka, nda ndzəɗa ahər ŋgar ana a riŋ hinne ya.»

Magùdugùdu ana a ndzikìɗ ba mendwiŋe ya

17 I təv ana Firawna a pəl à gà mburma ata ya ka, Mbulum aka ɗif a tar à vatwa ana a da ndaka ahəɗ gà Filistiya ya tsa, na ku mege vatwa ata bise tekeɗe ya. Aɗaba Mbulum a gwa ka: « Gà mburma ata tàa ŋgat a guvəl ka, ti dzele a gà gər ka, aka məmbə̀ɗà gər ndàra a Ezipt asa.« 18 Aɗaba taŋa na a da à tar ndaka vatwa ana mekilimeɗe ŋa nda dala aà guva duluv Awasl ya. Aɗaba gà Isərayel tə dara i kwite Ezipt ya ka, nda zay lele. 19 Musa ka, a ndzək dər atasl Yasufa aà ahər. Aɗaba ŋgat ka, aka tsik a gà ɓəza ŋgar gà Isərayel piŋŋe, a gwaɗa a tar: ‘Mbeɗwimiŋ, Mbulum mà zlak kurum ndzer, dite i təv ana ki dwim a ya ka, kà ndzəkum dər atasl gà aà ahər kurum mbaŋa.««

20 Ta hitse i kwite Sukut a ka, tə da à mekiriwe ga tar a kwite Itam, aà guva kusak bise. 21 I təv ana ti de a ya ka, BATSAH kwa ŋa a lah a tar aka miɗ, ndaapat ata nda magùdugùdu ana kamala mendwiŋe ya, aɗaba aà meɗife a tar à vatwa. Ndaavəɗ ŋana tekeɗe, magùdugùdu ata à pèt a dzaydzay kamala akwa ya mbaŋa, aà tə zazam vatwa kəla pat, ndaavəɗ tserdze. 22 Kəla pat magùdugùdu ata a riŋ ika miɗ gà mburma ata. Ndaavəɗ tekeɗe ka, mendwiŋe duwa a riŋ ika miɗ gà mburma ata dzèŋŋe kamala akwa ya mbaŋa.