Mendizle 14

Gà Firawna ta waya məmàra à gà Isərayel aà vatwa ya

1 I fata ya ka, BATSAH kwa ŋa a gwaɗa a Musa: 2 « Gwaɗa a gà Isərayel ka, ta mbəɗara gər a, ti te kiriweye ga aka miɗ gà Pi-Hakirut aka magər gà duluv nda Magidul. Kiriweywim ga a fata aà guva duluv aka miɗ Baal-Dzifun. 3 Firawna a dzele a, a gweɗe a ka, gà Isərayel ka, tàa dzeye i kusak, aɗaba tar riŋ ti sìweye a ka, i kusak i dala. Kusak a le a tar tits, ti sle aà mibeye a tsa. 4 I tsele a à segeme a gər a Firawna aà mazazama kurum. I peter a à ndzəɗa gà, a tar nda gà ɓəzla guvəl ŋgar tserdze, aà gà Ezipt tə sər dər ka, iye na Mbulum Batsah kurum ŋa ya.» Ama gà Isərayel ka, ta ge kamala taŋa ya.

5 Ta gwaɗa a Əbay Ezipt ka: « Gà Isərayel tàa təz.» Tsam ka, madzala gà gər Firawna nda gà ɓəzla megemir ŋgar aka mbəɗ aba aka gər gà mburma aaha. Ta gwa: « Ki gekwe a ana, meme, na kà pə̀lakwa à gà Isərayel aaha, ta gekwe a megemir a asa tsiye?»

6 I fata ya ka, Firawna a dza gà piris aà muta ŋgar, a zal a gà mburma ŋgar tserdze, a yaha a tar gər, tə da. 7 A daha, a pala gà muta piris gà ŋgwal ŋana dərməka ndilik, dite nda muta piris ŋgiɗ ana i Ezipt ya tserdze, gà ŋgwal gà sliwdzè ika gà muta piris ata tserdze ya mbaŋa. 8 Taŋa BATSAH kwa ŋa a tsala à segeme a gər a Firawna Əbay gà Ezipt, aà mə̀màra à gà Isərayel aà vatwa ya. Ama tə dara i kwite Ezipt ya ka, nda mekesle Mbulum zay lele. 9 Gà mburma gà Ezipt ta waya mimèra aà tar aà vatwa ya, gà piris nda muta piris Firawna tserdze nda gà na ika piris ti ne gà ɓəzla guvəl ŋgar a tserdze. Tàa le aà tar, i təv ana ta kiriweye ga petek aà guva duluv Pi- Hakirut ɗegirgir nda Baal-Dzifun a.

10 I təv ana gà Isərayel ta ŋgat a gà Ezipt ana ti zezem a tar, Firawna a sìrìkaha bise a təv tar a ka, ta ge magəɗa hinne. Tə zal aà ba a BATSAH kwa ŋa. 11 Ta gwaɗa a Musa: « Kà ndzəkara mə̀r i Ezipt ya dzena, təv melè mburma a riŋ ika ahəɗ ata tsiye? Aɗaba la na ki ge à mə̀r a kataya, kà ndzəkara mə̀r i Ezipt ya ya, dite araha mìi mete a i dala i faha ya? 12 Kamala taŋa ya tsiye na mì gwaɗak i Ezipt ya? Maa gwaɗak ka, miyak à mə̀r, mìi ge a megemir a gà Ezipt pəra ya. Naha ana, ŋgulum na mi ge megemir a gà Ezipt ya tsiye na naha, mìi mete a i dala ya?»

13 Musa a gwaɗa a gà mburma ata: « Ki gwim magəɗa tsa. Kurum ka, hitswim lele, kà samatum dukw ana BATSAH kwa ŋa a ge a nda mesife kwa mbakum a. Aɗaba gà Ezipt aaha kə̀ ŋgatum a tar a ka, ki ŋgetwime a ter a asa tsa aà biybiy. 14 BATSAH kwa ŋa na a ge a guvəl ŋa ya. Ndzum tìytìy, kurum ka, gəsum gəzləŋ dzekwiŋ.»

Gà Isərayel tə tsala i dula Maliya

15 I fata ya tsara ka, BATSAH kwa ŋa a gwaɗa a Musa: « Aɗaba la na kà tiwiŋ aàba ya? Gwaɗa a gà Isərayel ka, ta hitse aà mbulum, tə dza ba aà mede. 16 Ama kər ka, zla zəva yak, ka zla ahər yak aà mbulum, dite duluv mà sàs ba ikaba ya, gà Isərayel tə tsala iɗəm a sifek sifek lele. 17 Aɗaba iye ka, i vile a segeme a gər a gà Ezipt, aà tə zazam kurum. Iye ka, i pet a à ndzəɗa gà a gà Firawna nda gà ɓəzla guvəl ŋgar aaha tserdze ya, dite a gà muta piris ŋgar nda gà sliwdzè ŋgar ana ɗa ya tserdze asa mbaŋa. 18 Na Yàa mba aà gà Ezipt kamala taŋa ya ka, ti sir a dər, iye ka, i ne Batsah kurum ŋa kaɗəŋ.»

19 Ama gawla Mbulum ana ndeɗiŋa a lah a gà mayahaba gər gà Isərayel aka miɗ a ka, a hitse a tar a dəba. Dite magùdugùdu ana a ndzikiɗ ba mendwiŋe , a hitse a tar aka miɗ ndeɗiŋa ya tekeɗe, a hitse a tar i dəba ya asa mbaŋa. 20 I dəba ŋa ya ka, a dara aka magər gà mayahaba gər gà mburma gà Ezipt, nda gà mayahaba gər gà Isərayel a. Ika tseke ŋgiɗ ka, magùdugùdu a riŋ ziŋziŋ hinne, ika tseke ŋgiɗ mbaŋa ka, a riŋ à div a ŋgaŋŋa ndaavəɗ ata. Kamala taŋa ya, i huɗ həvəɗ ata ya tserdze ka, gà Ezipt tàa sìrìkaha a təv tar bise tsidze.

21 I dəba ŋa ya ka, Musa a zla ahər ŋgar aà mbulum ika gər gìgìze duluv ata. I huɗ həvəɗ ata ya ka, BATSAH kwa ŋa a sàs ikaba yam ata nda himbiɗ batsah ŋana a dawara ika tseke pat ana a mbəzawara ya. A sàs ikaba yam ana i duluv ata ya fit. Duluv ŋa tekeɗe, a kula seh seh lele. 22 Dite i dəba ŋa ya, gà Isərayel tə tsala i duluv ata ya sifek sifek lele, duwa aka ləm aà tar tsidze kuɗa. Aɗaba yam ana i duluv ata ya, a ŋgeba kamala zlagam a, a sàs ba ikaba ya naha ndaka tseke ahər mezime, naha ndaka tseke ahər gula mbaŋa. 23 I dəba ŋa ya ka, gà Ezipt tə samata ka, fèɗehhè vatwa a riŋ ka, tə zazamaha tar i dəba ya. Ti ndze a magər duluv ka, gà piris Firawna nda gà muta ŋgar, dite nda gà mburma ana ika piris aaha ya fit tserdze ika magər duluv kuɗa. 24 Aka mbulum ana aka à medìve ya ka, BATSAH kwa ŋana mandza ŋa ika magər gà magùdugùdu ata nda mendwiŋe duwa dzèŋŋe kamala akwa ya, a samata gà ɓəzla gùvə̀l gà Ezipt ata tserdze ya. Tsam ka, a wise a tar aà gər hinne, tə sər dukw ana ta ge a ya tsa. 25 I fata ya ka, a gəs sik gà muta tar, ti sle aà mede lele asa tsa. Tsam ka, gà Ezipt ta gwa: « Tə̀ zakwa aà gà Isərayel a, aɗaba Batsah tar ŋa na a ge a guvəl nda kwa ya.»

26 I dəba ŋa ya tsara ka, Mbulum a gwaɗa a Musa: « Zla ahər yak aka gər duluv aaha, yam ma dara aka gər gà Ezipt aaha ya, nda gà piris muta tar a, dite nda gà mburma ana ikəka ya, ti dzeye akaba tserdze.» 27 Musa a zla ahər a mbulum aka gər duluv ata kaɗəŋ. ºlə̀k mbulum a dəv ka, duluv ata ka, kamala ana ndeɗiŋa ya dukw ŋgar. Gà Ezipt ana tì tìz a ndeɗiŋa tə lə̀ma gà gər nda gà yam ata tiɓits aka tar ata tserdze ya. BATSAH kwa ŋa a dzeye à tar aka magər gà duluv ata. 28 Yam aaha ibam, wègèdìhara aka gər gà muta piris tar aaha ya, nda gà mburma ana ikəka ya tserdze, gà mayahaba gər gà ɓəzla guvəl Firawna fit nda gà na tə dara i dəba tar tserdze ya, ku mege ilik tekeɗe, aka zeha tsa. 29 Ama gà Isərayel ka, tə tsalaba i duluv ata ya ka, sifek sifek duwa aka ləm aà tar tsidze. Yam a hitse tar i vatwa ya dziŋ aka tseke ahər mezime, nda tseke ahər gula ya məma kamala zlagam a.

30 Kamala taŋa ya, na BATSAH kwa ŋa a mbala à gà Isərayel i ahər gà Ezipt ya i dala ya. I fata ya ka, gà Isərayel ta ŋgat a məməta gà Ezipt ata ɓàràmakkà nda are tar tserdze aà guva duluv ata. 31 Ta ŋgat a megemir BATSAH kwa ŋana a ge batsah ŋa nda tar aɗaba gà Ezipt ya ka, ta ger magəɗa, ta gəs ŋgat nda gəzləŋ tar, dite ta gəs ahəm aà Musa mala meslire ŋgar mbaŋa.