Dimis gà Musa nda gà Isərayel
15
1 Akahər ata ka, gà Musa nda gà Isərayel tə zlə̀b à BATSAH kwa ŋa nda dimis. Ta gwa:« I zlibe a à BATSAH kwa ŋa, aɗaba ŋgat ka, mala ndzəɗa hinne, a mba aà duwa tserdze.
A dzeye à gà piris, nda gà sliwdze ana ikəka ya fit a duluv.
2 Na a ne ndzəɗa gà, dite zlile dimis gà ana i lèh a ya ka, Batsah ga ŋa ata. ŋgat na a mbəl à iye ya.
Aɗaba ŋgat ka, Mbulum Batsah ŋana i zlibe a dər a. ŋgat ka, Mbulum tsir gà. I waya i zembeɗe a à ŋgat.
3 Batsah ga ŋa a ne ka, mala slagama,
aɗaba zləm ŋgar ka, Batsah ga ŋana a mbəl à iye ya.
4 A ləm a gà muta piris Firawna nda gà ɓəzla guvəl ŋgar tserdze a duluv.
Gà sliwdze ŋgar ana a pala tar a, tə dza a duluv Awasl.
5 Gà mburma ata tserdze ya ka, yam aka bats tar ndə̀ɓàk,
tàa dza a huɗ yam, kamala gà kur a.
6 A kər Batsah ga ŋa, ahər mezime yak ka, a be ndzəɗa ahər hinne.
Nda ahər yak asa na kà bats gà ɓəzla guvəl a.
7 Kər ilik na batsah ŋa ya.
Kər na kà dzeye à gà ɓəzla guvəl yak tserdze ya.
Aɗaba na duwa aka tsə̀ɓak ndzer ka, tar ta wene a kamala kwizir a.
8 Yam a sàs ba ika ba ya ka,
aɗaba mesife ana kà sifera i hìter yak a.
Yam a hitse tseke sula dziŋ dziŋ kamala zlagam a.
Batsah duluv yam ata a tsele akaba a nda ndzəɗa i duluv ata ya, aka se sìfek sìfek dze.
9 Gà ɓəzla guvəl tə dzala ka, ta gwa: ‘Mìi zezem a tar, mìi le aà teriŋa. Mì dzeyekwe a gà kàzlàŋà tar, dukw ana mì waya ya ka, a sle a mə̀r a i təv tar a kuɗa.
Mìi ndzèhera a gà masalama mə̀r a, tsam pəra ka,
mìi dzeye a tar iɗəm a nda ahər mə̀r a fit.«
10 Ama kər Batsah mə̀r ŋa, kà vizl a yam nda mesife yak asa ka,
yam ata a bats tar ndə̀ɓàk,
tə dza a batsah yam tsə̀ràp kamala ara ya.
11 Batsah mə̀r ŋa, weke na i liwiŋ gà dukw ana tì tèwel a tserdze ka, a za kər a?
Na a ndzikiɗ ba kər nda ndzəɗa, dite nda tsəɗaŋŋa asa ya, dite weke asa ya na a sle aà mege batsah dukw mene aà mburma ana ki ge ya, na dite ka, ta ger magəɗa, tì zlibe a à ŋgat a?
12 Araha kà zla ahər mezime yak a mbulum pəra ka, ahəɗ a ndeye à gà ɓəzla mene à are yak.
13 Nda mendzè are tsehe ana mburma a ndzek hinne ya na ki gis a ahər a gà mburma yak ana kà pə̀lara à tar a ya.
Nda ndzəɗa yak asa na ki de a à tar a təv mendze yak ana tsəɗaŋŋa ya.
14 Mayahaba gər gà mburma ata tar gà Isərayel tsiye, tə tsaraka labara dukw ana Mbulum a ge nda gà mburma ŋgar a ka,
tə dza ba aà medzedzere hinne.
Magəɗa a dza ba aà mege a gà Filistiya ya.
15 Gà Əbay gà Edum tekeɗe, tàa gwìɗitse nda medzedzere hinne, magəɗa a dza ba aà gà ɓəzla ndzəɗa ana i kwite Muwab a mbaŋa.
Gà Kanana tekeɗe, arəv a da aà tar a asa mbaŋa.
16 Mege magəɗa nda medzedzere hinne a dza ba aà tar. Aɗaba ndzəɗa yak ana hinne ya, na ti ndze a ɗikɗik kamala gà kur a, haa a təv ana gà mburma yak ti de a à tar a ya. Aɗaba mì ne gà mburma yak ana ka pala tar a.
17 Ki de a à tar, ki dze a tar ka, aka gər kwite ana a ne biy yak a. Ti ti ndze a a təv ana kì ge iɗəm təv mendze yak ana tsəɗaŋŋa kər kì ge nda ahər yak a.
18 Kər ka, Batsah ga ŋa. ºbay yak a ndze a ka, aà biybiy.»
Dimis Mariyam
19 Yaw, gà piris Firawna, nda gà muta piris ŋgar, dite nda gà sliwdze ŋgar tserdze na tə dza a yam a, BATSAH kwa ŋa a màra à yam a hinne aka gər tar. Ama gà Isərayel a ka, tə tsalara i yam ata ya sifek sifek yam iɗəm tsa. 20 I fata ya ka, Mariyam, mala məmà à bazlam Mbulum, damər Haruna, a zla mèdìyè a ahər ŋgar. Gà məkəs gà Isərayel tserdze tə dara, tə zazamara i dəba ya nda gà mèdìyè, nda gà megirive, dite nda gà malàhà dimis asa. 21 Mariyam ka, mala mazla a tar ɗa dimis ŋa, a gwa i huɗ dimis ŋgar ata: « Zlə̀bum à BATSAH kwa ŋa, aɗaba ŋgat ka, mala ndzəɗa. A dzeye a à gà Ezipt nda gà sliwdze ŋana ikəka ya tserdze a yam a duluv.»
Yam ɗìwèkìke ŋana i Mara ya
22 I təv ana Musa a hitsera à gà Isərayel i duluv Awasl ya ka, tə da a dala a Sura. Mehinne makər ta ge i dala ka, tàa le aà yam tsa. 23 I dəba ŋa ya, ti ndze a Mara, ama ti sle aà masà yam i fata ya tsa, aɗaba ana a ndza ɗìwèkìke ya. Aɗaba taŋa na tə zal a təv ata Mara ya.
24 I fata ya ka, gà mburma tə dza ba aà maàga ŋgùrà ŋgùrà aka gər Musa. Ta wiz ahər, ta gwaɗar: « Ki sekwe a là?» 25 Musa a tsaraka taŋa ka, a hama a BATSAH kwa ŋa. BATSAH kwa ŋa tekeɗe, a ɗifer à dizl duwa. Musa a zla dizl ata, a ye a yam ata ka, yam ata a ne ŋgwal ŋa lele kuɗa. I fata ya kuɗa ka, BATSAH kwa ŋa a vəl a tar məpala ahəm nda masàsa ikaba dukw ana ndaka vatwa ŋa ya, a dzik à tar mbaŋa te. 26 A gwaɗa a tar: « Iye na a ne Mbulum Batsah kurum ŋa ya. Na kàa gəsum aà iye ahəm, kàa gwim dukw ana a tsahən ŋgwal ŋa lele ika miɗ gà, kàa gəsum, kàa tsarakum məpala ahəm gà tserdze ka, taŋa ka, i dze a kurum a dukw məməta ana i ndəv dər gà Ezipt ya asa tsa. Aɗaba taŋa iye Batsah kurum ŋa na a ne dàkwtar ana a mbə̀l à kurum a.»
27 I fata ya tsam ka, ti ndze a Ilim. I fata ka, gà biye yam a riŋ kurwa gər a sula, nda gà dizl dukuməŋa a riŋ kamala təɓah a dzik təsəla. Tə dza ba a fata, aà guva yam.