Mbulum a vəl dukw mezime a mburma ŋgar i dala
16
1 Gà mayahaba gər gà Isərayel ta hitsera i Ilim a ka, ti ndze a dala Sin ika magər gà Ilim nda Sinay. Taŋa ka, nda mehinne kiye kurwa gəra əzləm ŋa i huɗ kiye sula ya na i dəba ana tə dara i kwite Ezipt ya. 2 Tar ata tserdze ya ka, tə dza bazlam aka gà Musa nda Haruna ndzùh i dala ata. 3 Ta gwaɗa a tar: « ŋgulum na Batsah mə̀r ŋa mə bats mə̀r ika ahəɗ Ezipt ya tsiye na naha ya? Aɗaba i fata ka, mì zəmawa ɗaf lele, mì ndzawa ka, nda gà mesigire slu tazlzlà ika akwa, mìi pèpìɗ a ka, a sle a mə̀r ŋa. Ama kurum kà ndzəkumara mə̀r a huɗ dala aaha ya ana, araha gà mburma fit ta mete a à may ɗa i faha kuɗa ana, meme?»4 I fata ya kuɗa ka, BATSAH kwa ŋa a gwaɗa a Musa: « Araha, i ti ɗe a kurumaha à dukw mezime i mbulum a kamala yam a. Say gà mburma tə dawara ka, a bəra ya pat ilik, ti yehe a gər a dukw mezime ka, biy pat ilik ŋa ata mbaŋa. Kamala taŋa ya ka, i dzik a à kurum ŋa. Bəla ki zezemwim a dukw gà ana i ɗe a kurum a dər a, kige tsa bəla ki zezemwim a tsa asa mbaŋa ya. 5 I huɗ mehinne ndilik a ka, i təv ana ki dwim a dukw ana kà yahawumar gà gər a pat ata ya ka, ki ŋgetwime a madzànàpà ŋa sik sula na à gà pat ŋgiɗ a.»
6 Gà Musa nda Haruna ta gwaɗa a gà Isərayel tserdze: « I hawa aaha ki sirwim a dər ka, BATSAH kwa ŋa na a ndzəkara kurum ika ahəɗ Ezipt ya ya. 7 Dite i mèkwède ndidwe asa ka, ki ŋgetwime a ndzəɗa BATSAH kwa ŋa. Aɗaba aka tsaraka bazlam kurum ana huwwa kà tsikwim aka gər ŋgar a. Na ka mum à bakal ka, a ŋgat, tsəka, a mə̀r tsa. Aɗaba mə̀r ana gà weke na ki ti gwim a bazlam huwwa ka, aka gər mə̀r a.» 8 Musa a gwaɗa a tar asa: « Araha, na dukw ana ki sirwim a dər ka, kaɗəŋ a. I hawa aaha ka, BATSAH kwa ŋa a vile a kurum a slu. I mèkwède mbaŋa ka, a vile a kurum a medzibe ɗaf ŋgiɗ pam, a sleye a kurum ŋa. Aɗaba BATSAH kwa ŋa aka tsaraka bazlam kurum ana kà dzum akaba ŋgùrà ŋgùrà aka gər ŋgar a. Aɗaba mə̀r ana gà weke ti ya, na ki dzwim akaba a bazlam aka gər mə̀r a? Bazlam kurum ata ka, a gər a mə̀r tsa, ama ka, aka gər Mbulum Batsah kurum ŋa.»
9 Musa a gwaɗa a Haruna: « Gwaɗa a mayahaba gər gà Isərayel tserdze ka, tə dara, ta hitse aka miɗ BATSAH kwa ŋa, aɗaba aka tsaraka bazlam tar ana ŋgùrà ŋgùrà ya.» 10 I təv ana Haruna a fèfil a a gà mayahaba gər gà Isərayel mba ya ka, ta mbəɗ aba ndàra a dala. I fata ya tsara ka, ndzəɗa BATSAH kwa ŋa a pàt aba i huɗ magùdugùdu ata ya. 11 BATSAH kwa ŋa a gwaɗa a Musa: 12 « Yàa tsaraka bazlam gà Isərayel ana ŋgùrà ŋgùrà ya. Gwaɗa a tar ka, ‘I hawa aaha ka, ki pèpìɗwim a slu, a sle a kurumiŋa. I mèkwède ŋana tekeɗe asa ka, ki zimwim a ɗaf, a sle a kurumiŋa mbaŋa. I fata ya kuɗa na ki sirwim a dər, iye na i ne Mbulum Batsah kurum ŋa ya.«« 13 Aləka hawa a ge ka, gà takurah tə daha, rəbakkəka tə ndzaya a bəɗ a lìwìŋ gà mekiriwe ga tar ata. Aləka mekwede a ge asa ka, aà guva gà ga tar ata tserdze ya ka, mə̀ràh a riŋ. 14 I təv ana mə̀rah a dza tsara ya ka, dukuməŋa a riŋ i bəɗ kamala wur duwa ya, a ndza herrè hìrèf hìrèf kamala awilem ana a mə̀r tsiye na ika ahəɗ a. 15 Gà Isərayel ta ŋgatar ka, ta wizeye aba, ta gwa: « Naha ana, dukùla?» Aɗaba tə sər tsa. Musa a gwaɗa a tar: « Naha ka, ɗaf ana BATSAH kwa ŋa a vəl a kurum aà mezime ya.» 16 A gwaɗa a tar: « Araha na dukw ana BATSAH kwa ŋa a gwa, gwim a. Ku weke à dzik a tits biy na a sle a ter a nda gà ma ŋgar a, kurum ilik ilik tserdze ka, mipène mipène. Ndzəkum ka, ku weke a ɗeme a tits aà gà mburma ana i ga mekiriwe ga petek tar ata ya.»
17 Gà Isərayel ta ge kamala ana a tsik a tar a. Ti yahar gər, gà misle ŋgiɗ ka, hinne, gà biy ŋgiɗ ibam, hinne tsa. 18 Ama ti liveye nda mipène ka, wur ana aka yahar gər hinne ya ka, ta ger a dər hinne ɓav tsa. Wur ana aka yahar gər hinne tsiye ka, tì nikiɗ a dər ɓav tsa asa. Ti yahar gər ka, ku weke tits aà mezime ŋgar ana i ma ŋgar a tserdze.
19 Musa a gwaɗa a tar asa: « Wura ma ta ze dərraha aà mèkwède tsa.» 20 Ama tàa tsaraka dukw ana Musa a tsik a tar a tsa. Gà misle ŋgiɗ ta kàhaya aà mèkwède ŋana asa. Ama gà metinwe ta wa aɗəm, a dza ba aà meze. I fata ya ka, Musa a ge matsəɓatsəɓ aka gər medzibe gà mburma ata hinne.
21 Daga a gər pat ata ya ka, ti yahawar gər ka, ku mege weke kəla biy mezime ŋgar. Ama na pat ihər a wir a hinne ka, a weniŋa.
Mbulum a ge metsehe agəra pat mesifikaba
22 I huɗ mehinne ndilik ŋa ata ya ka, ti yaha gər a dukw mezime madzànàpa sula sula tar ata ilik ilik tserdze ya. I fata ya ka, gà bàba ŋana ika magər gà mayahaba gər tar ata ya, tə dara, ti tsik a Musa. 23 A gwaɗa a tar: « Taŋa ka, dukw ana BATSAH kwa ŋa a gwa ya. Ndidwe ka, pat mesifikaba. Pat mesifikaba ata ka, ki keslwim a i gər kurum lele, aɗaba BATSAH kwa ŋa. Deyum dukw ana a sàs a kurum aà mede ya. Na aka zeha aà kurum a ka, tikwim aba ya haa a mèkwède.»
24 I fata ya ka, ta kaha aà mèkwède kamala ana Musa a tsik a tar a ka, aka ze tsa, dite metinwe aka wa aɗəm ɓav tsa asa. 25 Musa a gwaɗa a tar: « Zəmum mbakum aaha, aɗaba mbakum ka, a ne pat mesifikaba agəra BATSAH kwa ŋa. Aɗaba mbakum asa ka, ki lwim ahər a tsa na i dala ya. 26 Ama kurum ka, yahumar gər i huɗ mehinne mendilik ŋana ya. Aɗaba mehinne matəsəla ŋana ka, pat mesifikaba, aɗaba a pat ata ka, ki lekwe ahər a tsa asa.»
27 Ku mege kataya tekeɗe, nda mehinne təsəla ŋana ka, gà misle ŋgiɗ tə da a mayahar gər ka, tàa le aà duwa tsidze. 28 BATSAH kwa ŋa a gwaɗa a Musa ka: « Aà tsìm a ŋga, na ki giswim a məpala ahəm gà, nda bazlam ga ana i tsik a kurum ŋgwal ŋa ndzer ika magər kurum a tsiye? 29 Tsarakum, iye Batsah kurum ŋa, i vəl a kurum pat mesifikaba. Aɗaba taŋa na i vəlawa a kurum dukw mezime sik sula i huɗ mehinne ndilik a. Ndzum ka, ku mege weke i təv mendze ŋgar. Wura ma ta dara a bəra ya tsa, na aà mehinne matəsəla ŋana ya.»
30 Kamala taŋa ya na gà mburma ti sifik a ba nda mehinne təsəla ŋa ya.
31 Gà Isərayel tə zal a dukw mezime ata ka, mana. Dukuməŋa a ndzikiɗ ba ka, wur dukw duwa herrè, dukw ata ka, a dzəm kamala gùfa ana ta həlaɓ akaba nda amum a.
32 Musa a gwa: « Araha na dukw ana BATSAH kwa ŋa a gwa ya. Ràhum dər a duwa, kə kwàhum, aɗaba gà gwala kurum ana ika miɗ mba ya, aɗaba tar ta ŋgat a dukw mezime ana i vəl a kurum ɗa i dala akahər ana i ndzəkara kurum i kwite Ezipt ya ya.» 33 I dəba ŋa ya, Musa a gwaɗa a Haruna: « Zla dzuwa, ka dza aɗəm mana biy na à rèh a a mipène ya. Kaha aba aka miɗ BATSAH kwa ŋa ya, aɗaba gà gwala kwa ana ika miɗ a.» 34 Haruna aka ge kamala ana BATSAH kwa ŋa a tsik a Musa ya kaɗəŋ. A tike aàba dukw ata ya aka miɗ sahər masəra ba gà Isərayel nda Mbulum a, aà dite dukw ata medzeye tsa.