Yam ana a dara i kuvəl a
(Maɗama ba 20:2-13)
17
1 I dəba ŋa ya ka, mayahaba gər gà Isərayel ata tserdze ya ka, ta hitse i dala Sin a, tə zazam vatwa i gà ga tar ata ya kamala ana BATSAH kwa ŋa a tsik a. Tə da mege ga a Refidem asa. Ama i fata ka, yam a riŋ na gà mburma ti se a ya tsa. 2 Ta hitse aà Musa, ta gwaɗar: « Vəl a mə̀r yam, mìi siŋa.» Musa a wiz aà tar, a gwaɗa a tar: « Aàla na kurum ki gwim a iye a maàga ya? Aàla na kà wayum medzìkè à BATSAH kwa ŋa kataya ya?» 3 Ama gà mburma ata tserdze ya ka, yam aka bats tar i fata, ta waya masà yam. Tə dza bazlam aka Musa ŋgùrà ŋgùrà asa. Ta gwaɗar: « Dze ana, aɗaba la na kà ndzəkumara mə̀r i kwite Ezipt aà məbatsa mə̀r nda gà ɓəza mə̀r, nda gà dukw gənaw tserdze ka, yam a bets a mə̀r a?»4 Musa a hama aà BATSAH kwa ŋa, a wiz ahər, a gwaɗar: « I ge a ana, meme na a gà mburma aaha ya? A zeha ka, hinne tsa na ta kelewa a iye nda kur a.» 5 BATSAH kwa ŋa a gwaɗa a Musa: « Da ndaka miɗ gà mburma, kà ndzək dər gà asiŋ gà bàba gà Isərayel aà mendzwil yak. Zəva yak ana kà lakawa dər a yam i duluv ya ka, zla dər aà ahər, ka da. 6 Ika gər batsah kuvəl i fata ka, i hitse a aka miɗ yak, i batsah kwite Hureb a. Say ki leke a à batsah kuvəl ata, aà yam ma dara iɗəm a, gà mburma tə sa.» Musa a ge kamala ana BATSAH kwa ŋa a tsiker a, aka miɗ gà bàba gà Isərayel ata. 7 A zal a tə̀vəməŋa ka, Massa nda Miriba, aɗaba maàga gà Isərayel ana ta ge aà Musa ya, nda medzìkè ana ti dzik à BATSAH kwa ŋa ya, ta gwa: « BATSAH kwa ŋa dzena, a riŋ a ndze a nda kwa ya, tsəna a ndze a nda kwa tsiye ya?»
Mege guvəl nda gà Elimelek
8 I təv ana gà Isərayel mandza ŋa i Refidem a ka, gà Elimelek tə daha aà mege aà tar guvəl. 9 Musa a gwaɗa a Yesuwa: « Palakwa gà asləka gà mburma aà tə da a mege guvəl nda gà Elimelek ndidwe. Iye mbaŋa ka, i de hitse a aka təv diyes ana zubul ŋa ya, nda gà zəva Mbulum i ahər gà.»
10 Yesuwa tekeɗe, a ge kamala ana Musa a tsiker a, ta ge maàga nda gà Elimelek a. I fata ya ka, gà Musa nda Haruna nda gà Hura tekeɗe, tə tsala aka diyes zubul ŋa ata. 11 I təv ana Musa aka zla ahər ŋgar a mbulum a ka, gà Isərayel ta mba aà tar. Ama na aka mà à ahər ŋgar a bəɗ ka, gà Elimelek ta mbàwa aà tar. 12 I təv ana ahər Musa aka ye ba aà mazla a mbulum a ka, tə zla kur, ti tike a bəɗ, a ndza aaka. Gà Haruna nda Hura tə zlawa ahər ŋgar ata aà mbulum, misle ŋgiɗ ndaka tseke aaka, misle ŋgiɗ aaha ndaka tseke aaha. Kamala taŋa ya, na ahər ŋgar a ndza aà mbulum wurwas haa pat a dəɗ ahər a. 13 Yesuwa a mba aà gà ɓəzla guvəl gà Elimelek nda matasla masalama ana a zəm tseke sula məma ya fit kweleŋ.
14 Tsam ka, BATSAH kwa ŋa a gwaɗa a Musa: « Wetse bazlam aaha a huɗ wakita, aɗaba aà medzele aaka gà gər. Ama ka tsik a Yesuwa mbaŋa. Aɗaba i dzeye a à gà Elimelek fit aà bəra ya, wura a ti dzelewe a gà gər aka tar asa tsa.» 15 I fata ya ka, Musa a zlazl təv mezle ɗa a duwa. A zal a təv ata ka, « BATSAH kwa ŋa na a ne ndzəɗa ga i təv mege guvəl a.» 16 A gwa asa: « Ndzəɗa ihər BATSAH kwa ŋa. Aɗaba na gà Elimelek tàa ge hwarwa aà mege ahər guvəl tsəka, BATSAH kwa ŋa tekeɗe, a ge ahər a guvəl ka, wa ahər kəla wa ahər kəla hiywe.»