Gà Musa nda malpa ŋgar Yetiru
18
1 Akahər ata, Yetiru mala mandəva kuɗa a Mbulum ana i Madiyan a, dite ŋgat malpa Musa ka, a tsaraka dukw ana Mbulum a ge nda Musa tserdze ya. Ti tsikar asa ka, meme na BATSAH kwa ŋana a ndzəkara gà Isərayel ika ahəɗ Ezipt ya mbaŋa ya. 2 I fata ya ka, Yetiru a zlar dərraha Dzifura məkəs Musa ata a màr dərraha a ma aà mandza i təv ŋgar təma ya. 3 A ndzək dərraha gà ɓəza Dzifura sula məma asa mbaŋa. Aɗaba Musa a gwa piŋŋe ka: « Iye ka, i slele na ika ahəɗ aaha ya.» Aɗaba taŋa na a zal a malahalah kəla ŋgar ka, Gersun a. 4 A gwa asa ka: « Mbulum gà tsir gà ana tə dzawar gurmits a bəɗ a, na a zlak iye, a mbəl à iye i ahər Firawna ya ya.» Aɗaba taŋa na a zal a masula kəla ŋgar ka, Eliyezer a.5 Yetiru malpa Musa ata tə da akabara nda gà ɓəza nda gà məkəs Musa a dala ya, a təv ana tə dza aɗəm ba aà mege ga bise aà sik kwite Mbulum a. 6 A slər mburma aà magwàɗà a Musa ka: « Iye Yetiru malpa yak na a dara a təv yak ka, mə̀r nda gà məkəs yak, dite nda gà ɓəza yak sula asa na mì dara dze ya.»
7 Musa a tsaraka kataya ka, a dara, tə lə̀ma nda gà malpa ŋgar ata. A dzar gurmits a biye aka miɗ ŋgar, a gəs aàba ŋgat. Ta wiz aàba mandza zayzay tar, dite ta patsa akaba a ga mekiriwe petek tar ata. 8 Musa a ɗama dukw ana BATSAH kwa ŋa a ge a gà Firawna nda gà mburma ana ika ahəɗ Ezipt aɗaba gà Isərayel tserdze ya asa, aɗaba mesewere are ana a le aà tar ika vatwa ya, nda gà na BATSAH kwa ŋa a mbə̀l iɗəm à tar a mbaŋa.
9 Yetiru a ŋgayaba aɗaba mandza zayzay ana BATSAH kwa ŋa a ge a gà Isərayel a, nda gà na a mbəl à tar i ahər gà Ezipt ya. 10 A gwa: « Mezlibe mege ka, biy BATSAH kwa ŋana ŋgat a mbəl à kurum i ahər gà Ezipt nda gà i ahər Firawna ya mbaŋa. 11 Kinehe ana i sər ka, BATSAH kwa ŋa a za gà dukw ana gà mburma ti ne dər kamala mbulum tar tserdze ya. Aɗaba gà Ezipt ka, tàa ge dukw ana ŋgwala tsiye a gà Isərayel nda masə̀ŋgə̀rà à gər tar, ama BATSAH kwa ŋa aka mbəl à gà mburma ŋgar nda ahər ŋgar.» 12 I fata ya ka, Yetiru a kə̀ɗar duwa a Mbulum. Tə dùl aà meze ahər huŋŋa gà asiŋ aaha asa ka, gà Haruna nda gà bàba gà Isərayel tserdze tə dara aà mazəma dukw mezime ŋa ya nda gà malpa Musa ata ya ika miɗ Mbulum.
Musa a ndzək gà ɓəzla mege seriye
(Məmà aka məpala ahəm 1:9-17)
13 Ndidwe ŋana ka, Musa a dzàba aà masasa ikaba bazlam a gà mburma ana ta gewa aba dukw ana ŋgwal ŋa tsiye ika magər tar a. Gà mburma ata ta hitse aka miɗ Musa ka, aà gər mèkwède ya haa tsikw a hawa. 14 Malpa Musa a ŋgat a dukw ana a ge a a gà mburma ata ya ka, a wiz aà ŋgat: « Dukùla na ki ge a a gà mburma aaha kataya ya? Aɗaba la na kà ndza aà gər yak, dite gà mburma ata ta hitse aka miɗ yak ndeɗiŋa nda mèkwède ka, haa tsikw a hawa ya?»
15 Musa a gwaɗa a malpa ŋgar: « Gà mburma tserdze tə dawara a təv ga ya aà mewìzè iye dukw ana Mbulum a waya i ge a ter a. 16 Na bəla bazlam a riŋ ika magər gà wura nda mala hərmaga ŋgar ka, tə dara a təv ga aà mesèse a tar ikaba bazlam ŋa ya. I ɗif a ter a à məpala ahəm nda dukw ana Mbulum a tsik a mbaŋa.»
17 Malpa ŋgar ata a gwaɗar: « Dukw aaha ki gewa a gər yak a ka, ŋgwala tsa. 18 Ki ye a ba ka, bise, kurum nda gà mburma ana i təv yak a tserdze. Mege megemir aaha ka, à zèk a ndzəɗa, ki sle aà megemir aaha kər à gər yak tsa. 19 Kinehe ka, gəs dukw ana i tsikik a ya. Mbulum tekeɗe ka, mà zlak kər. Kər ka, hitse aka miɗ Mbulum aɗaba gà mburma, ka mà à bazlam seriye dukw ana gà mburma aaha ta ge ŋgwal ŋa tsiye aka miɗ Mbulum. 20 Kər tekeɗe ka, ɗif a tar à məpala ahəm ŋgar nda dukw ana Mbulum a tsik a. ƒif a tar dər ka, meme na ti zezem a vatwa ŋgar, dite ka, meme asa ya na ta ge a megemir ŋgar mbaŋa ya. 21 Ama kinehe ka, ndzək gà asləka gà mburma, gà na tàa ndza akaba nda gà mburma ana ta ge a magəɗa a Mbulum a, gà na megemir tar a pat parakka lele ta waya məbànà duwa aà mburma ya biy taf a tsiye. Hitse aà gà mburma ata aka gər gà mburma kamala ana ti ne gà bàba ŋa ika magər gà mburma dəbuw nda gà batsah ŋa ika gər gà mburma dərmə̀rka, kige tsa ika magər gà mburma dzik ə̀zləm ndagàtsa ika gər gà mburma kurwa ya. 22 Gà mburma ata ka, ta gewa seriye aà gà mburma ka, kəla pat. Ama seriye ana batsah ŋa kuɗa ya ka, tə dawa dərra aka miɗ yak a. Bəla seriye ana kə̀la ŋa ya ka, ta gewa à gər tar. Nikiɗ aba à megemir a, dite kà zlakum ba aà mege ŋa nda gà kər dze. 23 I dəba ŋa ya, na kàa ge kamala taŋa ya, dite Mbulum a piser aaka ahəm a ka, ki ŋget a ndzəɗa lele kuɗa. Gà mayahaba gər gà mburma aaha tekeɗe, ti dewe a a təv gà mendze tar nda masəra ba zayzay lele kuɗa.»
24 Musa a tsaraka dukw ana malpa ŋgar ata a tsiker a ka, a ge dukw ata kataya kaɗəŋ. 25 A pala gà ɓəzla mege metsehe a duwa i liwiŋ gà Isərayel a tserdze, a ne à tar gà bàba ŋa aka gər gà mburma. Mìsle ŋgiɗ aka gər gà mburma dəbuw, nda gà misle ŋgiɗ ibam, aka gər gà mburma dərməka asa. Dite gà biy ŋgiɗ aka gər gà mburma dzik ə̀zləm. Dite biy ŋgiɗ mbaŋa, aka gər gà mburma kurwa. 26 Gà mburma ata ta gewa seriye a gà mburma kəla pat tserdze. Na seriye ŋa ka, kəla ŋa zaakwa pəra ka, ta ge a à gər tar. Ama na bəla seriye ŋa kuɗa ihər ka, tə da dər aka miɗ Musa.
27 I dəba ŋa ya, Musa a ge wusa a malpa ŋgar, tsam ka, ŋgat a daba aka ahəɗ ŋgar.