Gà Isərayel aà sik kwite Sinay
19
1-2 I dəba ŋa ya ka, gà Isərayel ta hitse i Refidem a, ta mah ba, tə da. Kamala taŋa ya, mehinne ilik i huɗ kiye məmakər ŋa ya, i dəba gà Isərayel ana tə dara ika ahəɗ Ezipt ya, pat ŋa ka, taŋa na ti ndze a dala Sinay ya. Tə daha, tə dza ba aà guva kwite Sinay.3 Lewi a tsəl aka gər kwite ata aà tə ləmaha nda Mbulum. BATSAH kwa ŋa a zalaraha aka gər kwite ata, a gwaɗar: « Musa, gwaɗa a gà gwala Zakup, a gà Isərayel: 4 Kàa ŋgatum a dukw ana i ge a gà Ezipt ya, dite asa ka, meme na i ndzəkara kurum aà huɗ a kamala zləra ana a dzik a gà ɓəza ŋgar aka gwezleviyek ŋgar a. I ndzəkara kurum a ka, a təv ga ya. 5 Kinehe ka, na kàa tsarakum dukw ana i tsik a kurum a ya, kàa gəsum ahəm aà masəra ba gà ka, taŋa ka, ki nwim a gà mburma gà gà ŋgwal ŋa ika magər gà asiŋ gà mburma ŋgiɗ ana ika gər ahəɗ tserdze ya. Taŋa kaɗəŋ ndzer, gər ahəɗ tserdze ka, gà biy ga. 6 Ama kurum ka, ki nwimiŋ a gà ɓəzla megemir gà kamala gà ɓəzla məma à guma ga ya, nda gà mburma gà ana ti ndze a tsireŋŋè aɗaba iye ya. Kamala taŋa ya na ki gweɗe a a gà Isərayel a.»
7 Musa a dara, a zal a gà bàba gà mburma, a tsik a tar dukw ana BATSAH kwa ŋa a tsiker fit tserdze ya. 8 Gà mburma tserdze ta gwaɗar: « Dukw ana BATSAH kwa ŋa a tsikik tserdze ya ka, mìi ge a kamala taŋa ya.» Musa a màraha à mifefile ŋa a BATSAH kwa ŋa. 9 BATSAH kwa ŋa a gwaɗa a Musa: « Araha, i dehe a a təv yak makàhà ŋa i magùdugùdu ana ziŋziŋ a, dite ka, aà gà mburma tə tsaraka bazlam ana ki fèfileme a nda kər a, aà ta gəs nda gəzləŋ tar aà biybiy.» Musa a màraha mifefile ana gà Isərayel ti tsiker a Mbulum BATSAH kwa ŋa asa.
10 BATSAH kwa ŋa a gwaɗa a Musa: « Daha a təv gà mburma, gwaɗa a tar ka: Tə lə̀mbaɗaba mbakum haa tsikw aà ndidwe, ta miyak à dukw ana a nìs a ba tar ika miɗ Mbulum a, ta bara aà gà petek tar a mbaŋa. 11 Tə tsə̀nə̀h ba a bəɗ aà mendze ndidwe ilik, aɗaba mendze ndidwe ilik ŋa ata ka, iye Batsah kurum ŋa i terehe a təv are gà mburma tserdze aka gər kwite Sinay. 12 Ki ge aɗəm a kwiye a magər gà mburma ana ti ler tits a tserdze, ki gweɗe a a ter a ka, ta ge metsehe, tə da tsala aka gər kwite tsidze, tə ta lə̀ma aà sik ŋana tsa asa mbaŋa. Ku weke na aka ləm aà kwite ka, ta kiɗ a ŋgat. 13 Ahər ma ta ləm ahər tsa, ta kalawa ŋgat ka, nda kur, kige tsa nda simer, ku mege dukw gənaw, ku mege mburma tekeɗe, a ndze aà bəra asa tsa. Na gà mburma tàa tsaraka miɓizle məvata mezleliŋ ka, gà na i pala tar a, ti sle a aà metsìle aka gər kwite kuɗa.»
14 Musa a tarəra ika gər kwite ya ka, a gwaɗa a gà mburma: « Làmbaɗayum gà ba kurum tsireŋŋè tsireŋŋè, barayum aà gà petek kurum a mbaŋa. 15 A gwaɗa a tar: « Tsə̀hənum aà ba kurum aà mendze ndidwe ilik, kà lə̀mum aà gà məkəs tsa mbaŋa.»
Mbulum a dara aka gər kwite Sinay ya
16 I huɗ mehinne məmakər ŋana mbulum a dəv a ka, gà mewìtiɗe nda malàkàya mbulum, dite nda magùdugùdu hinne ika gər kwite nda gà məvata gà mezleliŋ huwwa hinne nda ndzəɗa. Gà mburma ana i təv gà ga tar ata ya ta ge magəɗa hinne nda medzedzere. 17 Musa a ndzəkara tar i gà ga tar ata ya, aɗaba aà melime nda Mbulum. Tə da, ta hitse aà sik kwite.
18 I fata ya ka, kwite Sinay ata aka kaha ba nda hədzək fit kweleŋ, aɗaba BATSAH kwa ŋa a tarəra aka gər kwite ata nda akwa ya. Hədzək ŋa a da a gəza mbulum kamala hədzək gərwa ya. Kwite ata tserdze ya a ɓazla hinne. 19 Miɓizle məvata mezleliŋ aaha tekeɗe ya, à sìkèh a hinne asa mbaŋa. Musa a fàfəl, Mbulum a fàfəlar aakara lele nda malaka mbulum a parakka.
20 BATSAH kwa ŋa a dara aka gər kwite Sinay ya. A dara aka gər kwite ata ya ka, a zal a Musa aà ma tsəl aka gər kwite ata. Ama Musa a tsəl kaɗəŋ. 21 BATSAH kwa ŋa a gwaɗar: « Mbəɗ gər, ka daha, ka be ɗaf aà gà mburma aka, tə da tàwàɗara ika kwiye BATSAH kwa ŋa ya, aà meŋgeter tsa, aɗaba bagwal ŋa na ta mete a ya. 22 Ku mege gà ɓəzla məma à guma gà ana tar bise nda iye ya tekeɗe mbaŋa, tə làmbaɗa ba tar lele, aɗaba na tàa lambaɗa ba tar tsəka, ti dzeye a mbaŋa.»
23 Musa a gwaɗa a BATSAH kwa ŋa: « Ndzer kaɗəŋ, gà mburma tə tsalara aka gər kwite Sinay ya tsa, aɗaba kàa peliŋ ahəm, kù gwa ka: « Ge kwiye aka magər gà kwite, dite gà mburma tə ndza ihər tsakalak asa mbaŋa.» 24 BATSAH kwa ŋa a gwaɗar asa: « Daha, dite kà tsalumara nda Haruna ya məma. Ama kə̀la ka, gà ɓəzla mandəva kuɗa a Mbulum nda gà asiŋ gà mburma ka, tə da tàwàɗara ika ga ya tsa, aɗaba na tàa dara ka, i dzeye à teriŋa mbaŋa.»
25 I dəba ŋa ya, Musa a tarəra a təv gà mburma ya, a mà a tar à dukw ata ti tsikerra ya kamala taŋa ya asa.