Gà məpala ahəm Mbulum kurwa
(Məmà aka məpala ahəm 5:1-33)
20
1 I dəba ŋa ya ka, Mbulum a tsikeye gà bazlam ata tserdze ya, a gà Isərayel. A gwaɗa a tar: 2 « Iye, i ne Mbulum Batsah yak ŋa. Iye na a zlara kər i mesewere are ika ahəɗ Ezipt ya i təv ana kər i ɓele ya. 3 Ka ta tàwàl fəla gà misle ŋgiɗ aka miɗ gà tsa, say iye ilik.4 Ka ta ge fəla agəra ba yak tsidze. Ku mege mendzikiɗe ba gà dukw ana i gəza mbulum a, kige tsa, na ɗa ika gər ahəɗ a, nda gà na i huɗ yam i biye ya tserdze.
5 Ka ta dzar gurmits a biye tsa, kà zlə̀b dər tsa. Aɗaba iye Mbulum Batsah kurum ŋa, iye riŋ i yehe a mawàyà ba nda kurum tserdze. Na wura aka miyak à iye ka, i ger a seriye, haa a gà ɓəza ŋgar, ku mege a gà tsir tar haa a gà na gà maslala akaba tar a mbaŋa. 6 Ama a gà na ta waya iye, ta gəs məpala ahəm gà ya ka, i ge a ter a ŋgwala ka, a gwala tar ana tserdze dəbuw a.
7 Ka ta zal a zləm Mbulum Batsah yak ŋa məfàrà ŋa tsa. Aɗaba seriye ika gər wur ana a zel a a zləm ŋgar məfàrà ŋa taf a.
8 Dzala pat mesifikaba, aɗaba pat ata ka, biy gà. 9 I huɗ mehinne ndilik a ka, ge megemir yak tserdze. 10 Ama i mehinne matəsəla ŋana ya ka, a ne pat mesifikaba aɗaba Mbulum Batsah yak ŋa. I huɗ mehinne ata ya ka, ka ta ge megemir kwizikw tsidze. Ku mege kər, ku mege kəla yak asləka ŋa, ku mege kəla yak dəm ŋa, ku mege ɓele yak, ku mege ɓele yak məkəs ŋa, ku mege dukw gənaw yak, ku mege gà slele ana tar riŋ i huɗ kwite yak a. 11 Aɗaba i huɗ mehinne ndilik a ka, iye Batsah kurum ŋa a ge mbulum nda gər ahəɗ, nda gà duluv, dite nda gà dukw ana a riŋ i huɗ ŋa ya tserdze. I sifik ba nda mehinne təsəla ŋa. Kamala taŋa na iye Batsah kurum ŋa a pise ahəm aka pat mesifikaba ata ya. I waya ka, pat ata ma ne ka, biy gà.
12 Zàmbaɗa à gà dede yak nda mama yak, aɗaba mendze yak ana ɗa ika gər ahəɗ Mbulum Batsah yak ŋa a vəlak a ka, mà səkah.
13 Ka ta kəɗ mburma tsa.
14 Ka ta ge muva tsa.
15 Ka ta ge akəl tsa.
16 Ka ta sasa pàrsa aà mala biye hərmaga yak tsa.
17 Ka ta ge are aka mala biye hərmaga yak tsa, ku mege ga ŋgar, ku məkəs, ku ɓele ŋgar asləka ŋana nda ɓele ŋgar məkəs ŋana, ku sla ŋgar, dite nda gà hezweŋe tekeɗe, ka ta ge aaka are tsidze.»
Musa ka, wele ana mandza ŋa ika magər gà Mbulum nda gà Isərayel
18 Gà Isərayel tserdze tə tsaraka malaka mbulum ana nda məvata mezleliŋ a ɗe huwwa ya, nda gà mewìtiɗe mbulum ana a riŋ ika gər kwite i huɗ hədzək a ziŋziŋ ata ya, i təv ana ta ŋgatar a ka, tə dzadzar nda mege magəɗa, ta hitse diriŋ i fata ya. 19 Ta gwaɗa a Musa: « Ama kər ka, fàfəl a mə̀r, mìi tserekiŋa, tsəka, Mbulum mə̀ fàfəl a mə̀r ser tsara tsa, mìi de metiŋa.»
20 Musa a gwaɗa a gà mburma ata: « Ka ta gwim magəɗa tsa. Mbulum a sə̀rə̀kara bise a təv kurum a ka, aà medzike à kurum, dite ka gwimer magəɗa. A waya ka, kà sərum ndzəɗa ŋgar, na dite ka, ki gwim bakal asa tsiye mbaŋa.»
21 I fata ya ka, gà mburma ata ta mbəɗ gər aka mehitse diriŋ hiywe pəra dukw tar. Musa ka, à gər ŋgar ilik na bise nda luvuŋ ata Mbulum iɗəm a.
Məpala ahəm agəra təv məvəla aaka duwa a Mbulum
22 BATSAH kwa ŋa a gwaɗa a Musa: « Araha, na ki gweɗe a gà Isərayel a: Kàa ŋgetwimiŋ, na i fàfəl a kurumara i mbulum a. 23 Ka ta gwim fəla kur siŋgwe nda gura aɗaba gər kurum tsa. Ka ta gawum aàba mə̀r nda gà dukw ata aà madzàr gurmits a biye tsidze. 24 Gwimiŋ təv ana ki vilwimiŋ aaka duwa ya nda ahəɗ, ka batsum aaka gà dukw kurum, dite ka dwileywim aaka gà dukw kurum aà meziŋaha hwaŋŋa. Tsam ka, ki betswimiŋ gà təmaŋ nda gà awak, dite nda gà sla kurum aà magawa ba nda gà iye asa mbaŋa. Ama iye ka, ku mege i təv ana iye mandza ŋa iɗəm a, i dere a, i pise a kurum a ahəm.
25 Na bəla ki gwimiŋ a təv ana ki vilwimiŋ aaka duwa nda kur ka, ka ta gwim nda kur ana mipepize ŋa mipepize ya tsa. Aɗaba na kàa tikwim ahər a kur ana mipepize ŋa ya ka, taŋa ki gwim ahər ka, dukw zlaŋgatsak ŋgwal ŋa tsa asa. 26 Na ki gwimiŋ a təv mivekiŋ aaka duwa ka, kà ta gwim ahər təv metsìle tsa, aɗaba mburma a tsìl aaka a metsìle ka, i waya tsa na gà mburma ta ŋget a mendzwil ŋgar a bəra ya.»