Məpala ahəm aka gər gà ɓele
(Məmà aka məpala ahəm 15:12-18)
21
1 I dəba ŋa ya, Mbulum a gwaɗa a Musa asa: « Araha na gà asiŋ məpala ahəm ŋgiɗ ana ki ɗe a ter a dər a gà Isərayel a:2 Na bəla wura aka səkəm ɓele i təv gà Ibəranikwa ya ka, say me ger megemir mive ndilik. Aà mive təsəla ŋana ka, ma dara i ahər ŋgar a, me ziwe gər ŋgar, ta mburuɗ mimbèrwìɗe tsa.
3 Na bəla a dara ka, à gər ŋgar a ka, ma da tekeɗe, à gər ŋgar mbaŋa asa. Kige tsa, bəla a dara ka, nda gà məkəs a ka, tə da akaba nda məkəs ŋgar sula məma. 4 Na bəla mala ga ŋgar a vəlar məkəs, dite bəla məkəs ata tekeɗe, aka war gà ɓəza gà asləka ŋa nda gà dəm ŋa ka, taŋa ka, gà məkəs ata nda gà ɓəza ŋgar ata tserdze ya ka, ti ne a biy mala ga ŋgar aaha, ŋgat ŋa ma da ba à gər ŋgar.
5 Ama bəla kinehe ka, ɓele aaha a gweɗe a, iye ka, mì waya mala ga mə̀r nda gà məkəs gà, nda gà ɓəza gà ka, mìi waya aà mezìwè gà gər mə̀r tsəka, 6 taŋa ka, mala ga ŋgar ata ma da à ŋgat aka miɗ iye, Batsah kurum ŋa, me hitse à ŋgat aà guva dukw mahə̀ndə̀kà a ga, kige tsa aà guva hərmaga ŋa. Taŋa ka, mala ga ŋgar aaha ma zla duwa, mà ndəfar dər zləm, me ne ɓele ŋgar aà biybiy.
7 Na bəla wura a kel a à dəm ŋgar aà mene ɓele ka, taŋa ka, ka da pə̀lum dər kamala gà ɓele ana ki pìlwim a à tar a ya tsa. 8 Na bəla a tsahən aà are wele ana a waya mazla ŋgat a tsəka, taŋa ka, mala ga ŋgar ata mi miyak à ŋgat, ta mburuɗ, tsəka, ma kal dər a gà mburma ana ika ahəɗ ŋgiɗ a, aɗaba na aka ger dukw ana ŋgwal ŋa tsiye tsa.
9 Na bəla a səkəm a kəla ŋgar asləka ŋa ka, say meger megemir ka, kamala gà ɓəza gà dəm a mbaŋa.
10 Na bəla aka zla daala ŋgiɗ pam ka, ma da nìkìɗer à dukw mezime, nda gà petek, dite nda gà mendze i təv ŋgar tsa. 11 Na bəla kàa ger gà dukw ata makər a tsəka, say məkəs ka, ma daba, me ziwe gà gər pəra, wura mə̀ mburuɗ mimbèrwìɗe tsa.
Məpala ahəm aka gər bakal ana biy mekìɗè dər mburma ŋa ya
12 I fata ya ka, na bəla wura aka lak a mburma, aka mət dər ka, ta kiɗ a ŋgat ŋa mbaŋa. 13 Na bəla aka ŋgasla kəla meŋgesle, a waya aà makə̀ɗà ŋa nda metsehe ŋgar tsəka, taŋa ka, iye Batsah kurum ŋa i yeher a təv ana a vele aɗəm a aà gà mburma ya. 14 Ama na bəla wura a yaha ahəm aà mala biy hərmaga ŋgar, aka kəɗ ŋgat nda wirwir ŋgar ka, taŋa gə̀sùm ŋgat, ku mege aka val a təv ana ta vilewiŋ aaka duwa ya tekeɗe, kəɗum ŋgat.
15 Ku mege weke na aka lak a dede ŋgar, kige tsa a mama ŋgar a ka, ta kiɗ a ŋgat.
16 Na bəla wura aka zla mburma nda akəl, ku mege aɗaba à makàlà à ŋgat, ku mege a tike aba a ma ŋgar a tekeɗe, ta kiɗ a ŋgat.
17 Ku mege weke aka ndava a dede ŋgar, kige tsa a mama ŋgar a ka, ta kiɗ a ŋgat.
Məpala ahəm aka gər mege mbəlak nda malaka a mburma
18 Na bəla gà wura ta ge a maàga, i ŋgiɗ aaha aka laka a misle ŋgiɗ nda kur, bə̀lətsa nda ahər, aka ger mbəlak, ama na aka mət tsəka, say ma həna dər aka slə̀làh. 19 Na aka mbəl riŋ, à sìweye a nda gà zəva, a diyekw a dər ba ka, wele ana a lakar a ka, seriye ŋgar a riŋ tsa. Ama kəla ka, a piler a megemir ŋgar ana a ge a zləmana ya. A piler a dukw mimbile ŋgar ana a mbəl dər a mbaŋa.
20 Na bəla wura aka lak a ɓele ŋgar asləka ŋa, kige tsa a ɓele ŋgar məkəs ŋa nda zəva, aka mət dər ka, taŋa a mət ka, ihər ŋgar, kamala megweɗe ya, ti tike ŋgat a mesewere are. 21 Na bəla gà ɓele ŋgar ata ka, tàa mata bise tsa haa mehinne sula dze ka, ti tike a ŋgat a mesewere are asa tsa, aɗaba ana ti ne gà limana ŋgar a.
22 Asa ka, na bəla gà wura ta ge a maàga, tàa lə̀ma à məkəs nda gà kəla i huɗ, aka babak kəla ata, i fata ya ka, na bəla dukw ŋgiɗ aka ge aɗəm ba asa tsəka, say wele ana a ləm aà məkəs ata ya, mə pəl a zal ŋgar nda siŋgwe pəra. A pil a kəla ka, ika miɗ gà ɓəzla sida.
23 Ama na dukw məməta ŋgiɗ aka da aɗəm ka, a pil a mesife ata ka, nda mesife ŋgiɗ asa mbaŋa. 24 Na bəla a ndzar aka are ka, ta pil a nda are ŋgar mbaŋa. Na bəla zlir tekeɗe ka, ta pil a nda zlir, na bəla akahər ka, ta pil a nda ahər asa mbaŋa, kige tsa aka sik ka, ta pil a nda sik ŋgar mbaŋa asa. 25 Na bəla kà wànà mburma nda akwa ka, ti ta wene a kər nda akwa mbaŋa. Na kà lak a mburma nda ahər ka, ti lekik aɗəm a nda ahər mbaŋa asa. Kige tsa, ki ger mbəlak, dite mbəlak ata aka təm ka, ta gek aɗəm a mbəlak pə̀làr mbaŋa te.
26 Na bəla wura aka nə̀s à are a ɓele ŋgar asləka ŋa, kige tsa, a ɓele ŋgar məkəs ŋa, aka nə̀s ka, a pil a dər, a ziwe a gər ŋgar, aɗaba are ŋgar ata. 27 Na bəla a ndzah zlir a ɓele ŋgar asləka ŋa, kige tsa biy ɓele ŋgar məkəs ŋana ka, say a pil a dər, a ziwe a gər ŋgar, aɗaba zlir ŋgar ata asa.» 28 « Na bəla sla wura aka kəɗ mburma asləka ŋa, kige tsa məkəs ŋa, aka mət dər ka, ama sla ata ka, ta kalawa nda kur, wura mə̀ papəɗ slu ŋa tsa kəla. Mala sla ka, bakal ŋgar a riŋ tsa.
29 Ama na bəla piŋŋe ka, a gewa tèrèŋgiz dukw ŋgar, ta gwaɗa a mala sla ka, dan, ama a dene a tsəka, i dəba ŋa ya sla ŋgar ata a kəɗ mburma, taŋa ta kalawa nda kur dukw ŋgar. Mala sla ata tekeɗe, ta kalawa nda kur mbaŋa. 30 I fata ya ka, bəla ta gwaɗar: « Mburuɗ ba yak ka, say mà gəs dukw ana ti tiker a mùmbùrùɗ ba ŋgar kamala dukw ana ti tsiker a tserdze.
31 Kige tsa bəla a kəɗ ka, kəla asləka ŋa, kige tsa dəm ŋa ka, sida ŋa ka, kalkal kataya asa mbaŋa. 32 Na bəla sla ŋa a kəɗ ka, ɓele asləka ŋa kige tsa məkəs ŋa ka, say mala sla mə pəl ɓele wele aaha nda kur siŋgwe dzik makər, dite sla aaha tekeɗe, ta kalawa nda kur asa mbaŋa.
33 Asa ka, na bəla wura a hə̀ndə̀k ika sùwàh a, kige tsa a le sùwah, aka hə̀ndə̀k aaka tsəka, na bəla sla, kige tsa hezweŋe aka dəɗ aɗəm ka, 34 say mala sùwàh ata mə pəl. A pil a ka, a mala dukw ata nda siŋgwe. Ama dukw ata a mət a kəla ka, biy ŋgar.
35 Asa ka, na bəla sla wura aka kəɗ sla mala hərmaga ŋgar a biye ka, say ma kal à sla aaha a riŋ nda are ya asa, dite tə̀ dzàba dukw ana tə səkəm dər sla ata ya məma nda wele aaha ta kəɗ sla ŋgar a. Dite tə dzàba slu sla aaha ta kəɗ a asa mbaŋa. 36 Ama na bəla tàa da mesire ka, sla ata ka, tèrèŋgiz ŋa piŋŋe ka, mala sla tekeɗe, aka dàn tsa mbaŋa ka, say a vile aaka sla aaha aɗaba sla ata sla ŋgar a kəɗ a. Ama məməta ŋa aaha ka, biy ŋgar kəla.
Məpala ahəm aka gər akəl gà dukw gənaw
37 Yawwa, na bəla wura a zla sla nda akəl, kige tsa təmaŋ nda gà bəla awak, a kəɗ, ndagàtsa a kal dər ka, say a dze a gà sla ə̀zləm, aɗaba sla aaha, ndagàtsa təmaŋ faɗ, kige tsa gà awak faɗ, a dzeɗe a a mala dukw gənaw ata kamala dukw məpə̀lar gər a.»