Mendizle 22

1 « Na bəla mala akəl aka da a ga a bəra wur ŋa nda həvəɗ, mburma ŋa aka le ahər, aka lakar, aka mət dər ka, bakal ŋa ika gər wur ata tsa. 2 Ama na bəla a le ahər ka, pat aka mbəzara na a lakar a ka, taŋa ka, bakal ŋgar. Say mala akəl ka, mə pəl na aka zla duwa nda akəl a. Na bəla dukw ŋgar a riŋ tsəka, ta kal à ŋgat ŋa, aɗaba ana ŋgat mala akəl a.

3 Na bəla tàa le aà mala akəl, aka zla duwa, ar ihər nda are ŋa, ku mege sla, ku mege hezweŋe, dite ku mege gà təmaŋ nda gà awak tekeɗe ka, say à me a dər ka, a viler a duwa aà mendzwil, a ge a sula.

Məpala ahəm aka gər manəsa à dukw mburma

4 Asa ka, na bəla wura à kiv a gà dukw gənaw ŋgar i huɗ guvah, nda gà i guvah ana tə dzavawa aɗəm gà dizl a, na aka kasla lele tsa, tàa zəm duwa i guvah mburma ka, say a pil aɗəm a ka, nda ŋgwal guvah ŋgar ana lele ya, bəla tsa nda guvah dizl manàhà duwa mbaŋa.

5 Na bəla wura a tike a akwa i guvah ŋgar, aka gəs kwizir, aka wànà daw ana mayaha gər ŋa ika vak mba ya, kige tsa a gà daw ana aà mbulum i guvah mba ya ka, say wele ana a tike akwa ata ya, a pil a daw ata fit dze.

6 Na bəla wura aka vəl duwa a mala biye hərmaga ŋgar, bəla a vəlar siŋgwe, kige tsa a vəlar ka, duwa aà metiker aba ya, dite i dəba ŋa ya ka, mala akəl a dara, a zla dukw ata i bəra wele aaha ya ka, say mala akəl aaha à me a à dukw ata ka, a viler a duwa aà mendzwil medzige sula, na bəla tàa le ahər a. 7 Na bəla kinehe ka, tàa lè aà mala akəl ŋa tsəka, say mala ga ata ma da hitse aka miɗ Mbulum, aɗaba aà masəra dər ikaba ya ka, wànà ŋgat a na a zla dukw damər ŋgar ata a tike aàba ya ya, tsəna, wànà wura ya.

8 Aɗaba ku mege ndeɗime na mazəma dukw ana kataya, wura a vəlak aà metìkè aba ya, bəla ku mege a vəlak sla, ku mege hezweŋe, ku mege gà təmaŋ nda gà awak, ku petek, kige tsa ku dukw ana a dzeyewa kataya tserdze ya, ku dukw ana mburma a gweɗe a naha ka, dukw ga ya, gà bazlam ata sula ya ka, tə dawa dərra aka miɗ Mbulum a. Wur ana Mbulum aka gwa, naha ka, bakal ŋgar a ka, say mə̀ màr à dukw mala hərmaga ŋgar ata ka, a tiker a duwa aà mendzwil medzige sula.

9 Na bəla wura aka vəl hezweŋe a mala hərmaga ŋgar, kige tsa sla nda gà bəla gà təmaŋ nda gà awak ndagàtsa zləma dukw gənaw wara asa ka, bəla a vəlar dukw gənaw ŋgiɗ, a gwaɗar, kesliŋ te, dite i dəba ŋa ya ka, bəla a mət, kige tsa a həɓ i sik a, nda gà bəla tə zla i dala ya, wura aka ŋgatar tsa. 10 Say taŋa ka, ta mbaɗa nda zləm BATSAH kwa ŋa ika magər tar ata sula ya məma. Aɗaba taŋa ka, aà masəra dər ikaba ya ka, wànà ŋgat na a zla dukw mala hərmaga ŋgar ata ya. Na bəla mala akəl ŋa a riŋ tsəka, mala duwa ibam, mà gəs gəzləŋ, wele aaha tekeɗe, mə pəlar tsa mbaŋa. 11 Ama na bəla tə zla ka, aà ŋgat ŋa ya ndzer ka, say mə pəlar dukw ŋgar a mala duwa mbaŋa. 12 Na bəla dukw dala na a kəɗ a ka, say ma zlara a ma ya, dite gà mburma tə sər dər ka, kaɗəŋ, taŋa ka, a pil a tsa.

13 Asa ka, na bəla wura aka zla dukw gənaw aà mala biye hərmaga ŋgar a, aka həɓ i sik a ndagàtsa a mət, bəla ŋgat ŋa a riŋ tsəka, say mə pəlar dukw ŋgar. 14 Na bəla kinehe ka, mala dukuməŋa a riŋ ka, tsuway wele ana a zla dukw ŋgar ata ya ka, a piler a asa tsa. Na bəla a zla ka, a piler a siŋgwe ŋa ka, mə pəlar siŋgwe ŋa pəra.»

Məpala ahəm mayahaba gər gà mburma

15 « Na bəla wura aka bana kəla dəm ana aà ga ma hinne tsiye ka, ku makasl ŋgar tsa asa ya, tàa həna nda ŋgat ka, mà dza dukw daala, ma zla dəm ata. 16 Na bəla tsir dəm aaha aka gwa ka, ma zla tsəka, say mə pəlar siŋgwe ŋa kamala limana ana ta vəlawa aka gà ɓəza gà dəm a.

17 Ka ta miyakum à məkəs ana màhəram ŋa ya, ma ndza aà bəra tsa.

18 Ku weke na tàa həna nda dukw gənaw ka, ta kəɗ ŋgat ŋa.

19 Na wura aka kəɗ duwa a fəla, kwets a BATSAH kwa ŋa na a kəɗar a tsəka, me dzeye kweleŋ.

20 Ka ta yahum ahəm aà slele ana a daha aka magər kurum a tsa, ka ta gwimer matawak tsa, aɗaba akahər ata kurum ika ahəɗ Ezipt ka, i slele mbaŋa. 21 Ka yahum ahəm aà gà madakwa gà məkəs tsa, ku mege gà ɓəza kəla megile tekeɗe mbaŋa. 22 Aɗaba na wura aka yàha aà tar ahəm, tàa tiwiŋera aba ya ka, iye Batsah tar ŋa, i tsereke a tuwa tar. 23 I fata ya ka, a tsìɓiŋ a hinne, i bets a kurum nda masalama, dite gà məkəs kurum ti ne a gà madakwa ŋa. Gà ɓəza kurum tekeɗe, ti ne a gà ɓəza kəla megile ŋa mbaŋa.

24 Na bəla kàa vəl siŋgwe gwèdèrè ŋa a mala matawak ilik i liwiŋ gà mburma gà ya ka, ka da ne dər kamala metsèkèle ya, ka vəlar nda yam ŋa tsa. 25 Asa ka, na bəla kàa gəs petek a mala biye hərmaga yak, a gwaɗak, tikiŋ aba ya, i dere a, i mbìrwìɗ a mba ka, màr dər, pat ma da dəɗ ahər tsa. 26 Aɗaba ŋgat ka, petek ŋgiɗ a riŋ tsa, taŋa na a ne petek metìkè akaba ŋgar a. Dite taŋa dzena, a hinne a nda dukùla asa ya? Taŋa na aka tiwiŋer a aba ya ka, i tsereke a tuwa ŋgar, aɗaba iye ka, Mbulum ana mburma a ndziŋ are tsehe ya.

27 Ka ta tsik dukw ana ŋgwala tsiye aka gər aà Mbulum tsa, ka ta ndava a Əbay ana i gwala yak a tsa.

28 Ka tə dzala aà miviliŋ duwa taf i huɗ daw yak ana kà ŋgat hinne ya, nda gà manàhà dukw dizl ɗaf yak, nda mal yak tsa. Viliŋ ka, malùkwara kəla yak ana asləka ŋa ya asa. 29 Kamala taŋa ya, na ki ge a gà sla yak nda gà təmaŋ nda gà awak yak mbaŋa ya. Me ge i təv məmər ŋa mehinne təsəla, aà mehinne matsamakər ŋana ka, ka zliŋar ɗa.

30 Nwim ka, gà biy ga tsireŋŋè, aɗaba iye. Kà papəɗum slu dukw gənaw ana gà dukw dala ta papəɗ ihər a iŋgəl a tsa, taŋa ka, vəlum a gà kəra.