Mendizle 23

Mege dukw ana ŋgwal ŋa ndzer a

1 Ka ta nwim gà ɓəzla mandza akaba gà mburma tsa. Kà lùmum akaba à ahər nda wele ana ŋgwala tsiye aà masasa pàrsa tsa. 2 Ka ta ge dukw ana ŋgwala tsiye i liwiŋ mayahaba gər gà mburma tsa. Na kàa tsik duwa ndaka vatwa ŋa ika miɗ seriye ka, kà tsik dukw ana a tsahən aà gà mburma bagwal ŋa aà makaha dukw ana nda ndzer a tsa. 3 Ka ta màraha aba a mala matawak ika miɗ seriye tsa.

4 Na bəla kàa le aà sla mala guvəl yak, kige tsa hezweŋe ŋgar a dzeye i dala i kusak ka, màr dərraha a ma dukw ŋgar. 5 Asa ka, na bəla kàa le aà hezweŋe mala mene are yak aka dəɗ akaba nda gà dukw ana a riŋ a zle a ya ka, ka ta miyak dər tsa, ama zlak ŋgat aà mehìtsè dər ŋa aà mbulum.

6 Na bəla mala matawak i liwiŋ kurum aka daha aà mege seriye ka, ka ta new meger seriye ŋgar nda ndzer ŋa tsa. 7 Miyak à bazlam pàrsa fit tserdze. Ka ta kəɗ wele ana mala ndzer, bakal ŋgar a riŋ tsiye tsa, aɗaba iye ka, i gweɗe a aà mala mege bakal ata ka, ndzer ŋgar tsa. 8 Ka ta zla dukw mayaba aà mburma ya biy taf masakəŋa tsa, aɗaba taŋa ka, ki sle aà meŋgete a dukw ana ndzer ŋa ya tsa, ki ne a mala guluf. I fata ya ka, ki gis a bazlam gà mburma ana tar gà ndzer ŋa ya tsa.

9 Ka ta gwim matawak a slele ana a daha aka magər kurum a tsa, aɗaba kurum nda gər kurum ka, sərum dər, meme na metìkè ba gà slele ya, aɗaba kurum akahər ana kurum ika ahəɗ Ezipt ya, kà nwim gà slele ŋa mbaŋa.

Gà mive təsəla nda mehinne təsəla

10 I huɗ mive ndilik a ka, ki sle a aà mege guvah yak, dite ki pele a duwa i bəɗ a asa. 11 Ama i huɗ mive təsəla ya ka, say ki sifik a iɗəm ba ya, ki miyak a dər tə̀ma, aɗaba gà ɓəzla matawak ana i gwala yak a, tə zəm iɗəm dukw mezime ya te. Ku mege dukw ana a zeha ya tekeɗe ka, gà dukw gənaw ana i dala ya, tə zəm mbaŋa. Kamala taŋa ya, na ki ge a nda guvah gà dizl ɗaf yak, kə ŋgəlawa ihər manàhà duwa ya ya mbaŋa asa.

12 I huɗ mehinne ndilik a ka, ki ge a megemir yak, ama aà mehinne təsəla ŋana ka, ki sifik a ba, aɗaba gà sla yak nda gà hezweŋe yak tekeɗe, tì sifik a ba, gà ɓəzla meslire nda gà slele yak ta ŋget a mesifikaba te.

13 Gwim metsehe a dukw ana i gwaɗa a kurum a tserdze, ka ta zalum a zləm mbulum gà misle ŋgiɗ tsa, taŋa ka, wura ma ta tsarakara i bazlam kurum a, kà ɗə̀vum a tar zləm tsa.

Gà megirive makər na aɗaba BATSAH kwa ŋa ya

14 I huɗ mive ya tserdze ka, ki girivwimiŋ a gà megirive ata makər a, aà mazlə̀bà dər iye. 15 Say ki giswim a malahalah megirive peŋ ana giɗe ikəka tsiye. I huɗ mehinne təsəla ya ka, ki zimwim a ka, ɗaf ana giɗe ikəka makwàsà ŋa tsiye, kamala taŋa ya na i tsik a kurum a. Mege dukw ata me ne ka, akahər ana zayya lele ya, nda kiye Abiba ŋa. Aɗaba nda kiye ŋa ata ŋa na i ndzəkara kurum ika ahəɗ Ezipt ya. Ka ta dumara aka miɗ gà ya ka, nda gà ahər taf masakəŋa tsa. 16 I dəba ŋa ya, ki girivwim a megirive i malahalah dukw ana kà sligwim i guvah kurum a mbaŋa. Ki gwim a məmakər megirive asa ka, biy məpala gà duwa i bəɗ a nda mandəvandəv mive ŋa, akahər ana ki yehwim a gər a gà dukw megemir ana i guvah kurum a mbaŋa. 17 I huɗ mive ya tserdze ka, gà asləka mburma ika magər kurum ti dere a aka miɗ gà ºbay Mbulum Batsah kurum ŋa ya ka, sik makər.

18 Ka ta vilwimiŋ məmbəz dukw ana ka zlwimer ɗa magàwà ŋa nda ɗaf ana giɗe ikəka makwàsà ŋa ya tsa. Məŋgəl dukw gənaw ana ki zlwimer ɗa aɗaba megirive gà ya ka, ma həna haa aà mekwede tsa.

19 Ndzəkumara ka, gà dukw kurum ana gà ŋgwal ŋa lele ya, na a ga gà Mbulum Batsah kurum ŋa ya. Ka ta dwim kəla təmaŋ nda awah məmər ŋa tsa.

Gawla Mbulum a gəsara ahər a gà Isərayel a

20 Araha i slirehe a gawla gà aka miɗ kurum, a kesle a kurum ika vatwa ya, a leke a kurum a təv ana i làmbaɗa, i vəl a kurum a. 21 Gwimer metsehe, gəsum ahər ahəm, aɗaba dukw ana a tsik a kurum a ya, ka ta gwimer dukw ana a tsìɓer a ya tsa. ŋgat ka, à gis a kurum a aà dukw ana ki gwimer a ŋgwala tsiye tsa, aɗaba zləm gà na a riŋ mandza ŋa nda gà ŋgat a. 22 Ama na bəla kàa dzum zləm a dukw ana a tsik a kurum a ya, dite asa ka, na bəla kurum a riŋ ki gwimer a dukw ana i tsik a kurum a tserdze ya ka, taŋa ka, i dwiŋ a gà ɓəzla guvəl kurum, gà na ta ge a kurum a madzək a tekeɗe, i ge a ter a madzək mbaŋa.

23 Gawla gà a leh a à mburma aka miɗ, a ndze à kurum a aka ahəɗ gà Amuriya nda gà Hittiya, nda Perizziya, dite nda gà Kananiya nda Hivviya nda gà Yebusiya. Gà taŋa ka, i dzeye a ter a fit. 24 Ka ta dzum gurmits a bəɗ a fəla tar tsa, kà zlə̀bum dər tsa asa mbaŋa. Ka ta gwim kamala tar a tsa, ama ka, mbazlum à dukw tar ata fit, haɓum iɗəm à kur tar ata ta hitse dər kamala mbulum a fit. 25 Say dzum gurmits a biye ka, a iye Mbulum Batsah kurum ŋa. Taŋa ka, i pise a kurum a ahəm aka gà dukw mezime kurum nda yam kurum asa mbaŋa. I zle a dukw məməta ika màgər kurum a mbaŋa asa. 26 Məkəs ana a babakawa ya, nda məkəs ana idel ŋa a we a kəla tsa fetite kweleŋ a ka, a ta ge a riŋ ika ahəɗ kurum asa tsa. I sìkèh a à mandza aà bəra kurum.

27 Gà mburma ta giŋ a magəɗa hinne, aɗaba ana iye ika miɗ kurum a, gà mburma ana kàa ndzwim aà ma tar tserdze ya ka, ti dzedzeriŋa. I təv ana ki gwim a guvəl aà gà ɓəzla guvəl kurum a ka, ta mbeɗe a kurumara dəba ya, ti ti zè a kurum a. 28 I slirekehe a gà maŋgavavəl aka miɗ kurum, ti delewe a gà Hivviya nda gà Kananiya ya, dite nda gà Hittiya. 29 Ama kəla ka, i delewe a tar ika miɗ kurum a ka, mive ilik pəra tsa. Aɗaba ahəɗ tar ata ka, kamala kusak a, swalla tsa, aɗaba gà dukw dala tə ta wa ba ika miɗ kurum tsa. 30 I delewe a tar ika miɗ kurum a ka, nda zìye zìye, haa a pat ana kàa wum ba ya, na dite ahəɗ ata a ne a biy kurum a.

31 Kwiye ahəɗ ata ka, nda duluv Awasl, dite nda duluv batsah ŋa ata ika ahəɗ gà Filistiya, daga i dala Sinay i fata ya ka, haa a dula gà Efrat. I vile a kurum a gà mburma ata ika ahəɗ ata ya ahər a kurum, kà dalawum tar ika miɗ kurum a. 32 Ama kəla ka, ka ta gəsum masla nda gà tar, dite nda gà fəla tar tsa. 33 Tə ta ndza ika ahəɗ kurum aà məbànà kurum aà mege bakal aka gər gà tsa kəla. Na kàa dzum gurmits a bəɗ a fəla tar ka, ki dzwim a a peleme mege bakal ka, bise.»