Masəra ba gà Mbulum nda gà Isərayel
24
1 I dəba ŋa ya, Mbulum a gwaɗa a Musa: « Tsəlara aka gər kwite a təv ga Batsah yak ŋa ya, kurum nda Haruna, dite nda gà Nadab, nda gà Abihuw, dite nda gà mburma dzik təsəla ika magər gà bàba gà Isərayel a. Ki dzwimiŋ a gurmits a bəɗ ka, i təv ana kurum diriŋ nda gà iye ya. 2 Kər Musa à gər yak na ki dere a bise a təv gà Batsah yak ŋa ya ya, ama gà mburma aaha ka, tə dara bise tsa. Gà mayahaba gər gà mburma aaha tekeɗe, ka tsalum akabara nda gà tar a tsa.»3 Lewi a dara, a tsik məpala ahəm ata nda dukw ana ŋgwal ŋa BATSAH kwa ŋa ata a tsik a gà mburma tserdze ya. Gà mburma ata tserdze ya ka, bazlam tar ilik, ta gwa: « Dukw ana BATSAH kwa ŋa a tsik tserdze ya ka, mìi giŋa.»
4 Musa a wetse məpala ahəm BATSAH kwa ŋa ata tserdze ya. A wilera i ga ya, i mèkwède hedwe, aà mazlazla təv liwit mivile aaka duwa a Mbulum a sik kwite. A hitseha aà gà kur kurwa gər sula a fata, tits aà gà gwala gà Isərayel ana kurwa gəra sula ya. 5 I fata ya ka, a slər gà ɓəza gà gawla ŋgiɗ ika magər gà Isərayel a madula duwa a BATSAH kwa ŋa. Ta kəɗar sla ana yam ide ya asa, aɗaba aà magawuba nda gà ŋgat. 6 Musa a zla mezehe à məmbəz, a dzaya a gà tasa. Mezehe ŋa biy ŋgiɗ ka, a mbəɗ aka gər liwit ata ta vəlawa aaka duwa a Mbulum a.
7 A zla wakita masəra ba gà BATSAH kwa ŋa nda mburma, a dzeŋge ika miɗ gà mburma ata tserdze parakka. Ta gwaɗar: « Dukw ana Batsah mə̀r ŋa aka tsik tserdze ya ka, mìi giŋa. Mìi gis a ahəm ŋgar.» 8 I fata ya ka, Musa a zla məmbəz ata i tasa ya, a gwatsakaya dər aà gà mburma. A gwa: « Məmbəz aaha ka, biy masəra ba gà BATSAH kwa ŋa nda gà mburma ana a gəs nda kurum a tserdze, aɗaba gà məpala ahəm ŋgar ana a vəl a kurum tserdze asa mbaŋa.»
9 I fata ya ka, gà Musa nda Haruna dite nda gà Nadab da gà Abihuw nda gà bàba gà Isərayel ata dzik təsəla ya, tə tsala aka gər kwite ata. 10 Tə daha a fata ka, ta ŋgat a Mbulum gà Isərayel ana tə dzawar gurmits a bəɗ a. Huɗ sik ŋgar a ndza ka, kamala kur ana tə zalar safira ya, à wìtiɗe a à are twiytwiy kamala gəza mbulum a. 11 Ama Mbulum aka lah duwa a bàba gà Isərayel aaha tsa. Tar ka, tàa ŋgat a Mbulum nda are tar, dite tə zəm dukw mezime, tə sa yam asa.
Musa ika gər kwite Sinay
12 I dəba ŋa ya, BATSAH kwa ŋa a gwaɗa a Musa: « Tsəlara aka gər kwite a təv ga ya. Kàa ndzera ka, i dzeke a gà beliŋ kur sula mewetse ŋa ikəka gà məpala ahəm gà tserdze i fata, dukw ata i wetse ya ka, aà meɗife a kurum dər.»
13 Gà Musa ta hitse aà mbulum nda mala meslire ŋgar Yesuwa, tə tsala aka gər kwite Mbulum ata. 14 A gwaɗa a gà bàba gà Isərayel ata: « Ndzum a faha, mìi mère a a təv kurum a. Araha gà Haruna nda gà Hura riŋ tə ndza nda gà kurum tə̀ma. Na bəla wura aka zlara bazlam a ka, say a de a dərra ka, a təv tar a.»
15 Gà Musa tə tsala aka gər kwite. I təv ana ti de a ya ka, magùdugùdu a kaha kwite ata tits. 16 I fata ya ka, ndzəɗa BATSAH kwa ŋa a dara aka gər kwite Sinay ya. Magùdugùdu ata a kaha kwite ata ya ka, a ndza ika gər kwite ata mehinne ndilik. Aà mehinne təsəla ŋana ka, BATSAH kwa ŋa a zal a Musa i huɗ magùdugùdu ata ya. 17 Tsam ka, gà Isərayel ta ŋgat a ndzəɗa BATSAH kwa ŋana a pàt aba ika gər kwite ata ŋgaŋŋa kamala akwa ya. 18 Musa tekeɗe, aka tsəl a gər kwite, aka ge riŋ i magər gà magùdugùdu ata ka, həpat dzik faɗ, həvəɗ tekeɗe, dzik faɗ asa mbaŋa.