Mendizle 25

Məvəla dukw taf aɗaba Mbulum

(Mendizle 35:4-9)

1 BATSAH kwa ŋa a gwaɗa a Musa: 2 « Gwaɗa a gà Isərayel ka, ta viliŋ dukw taf. Tə̀ ndzəkara dukw taf ana ku weke a dzala aà miviliŋ a, kamala ana gəzləŋ ŋgar a waya ya. 3 Araha na gà dukw taf ana ta viliŋ a, ki gis a i təv tar a: Gura nda gà ndzemde məvəɗa kur siŋgwe ana herrè ya, dite nda gà ndzemde məvəɗa kur siŋgwe, 4 nda gà slewize ana gà mewetse ŋa zlirmetinwe zlirmetinwe ya, naha nduzzwa, nda gà na a ndza ndizze ndeyndey a, dite nda gà slewize herrè ŋana, nda gà petek ŋguz awak, 5 nda gà bagwa hàgwàlà təmaŋ ana ta bah ahər duwa nduzzwa ya, dite nda gà bagwa ana ndzəɗa iɗəm hinne ya, nda gà aram davanah asa mbaŋa, 6 nda mal məvə̀tà lalampa, nda mal magwàtsakàyà aà duwa kige tsa aà mburma, dite nda mal wirdè ana tə dùlawa, a ze hwaŋŋa lele ya, 7 nda kur kurnalin nda gà kur ŋgiɗ ana tsakala ŋa hinne, à sìkim a ba tsiye, tə dzawa aà petek megemir batsah mala mendìvìŋ kuɗa ata nda gà kiywa ika gəzləŋ. 8 Say ta giŋ a təv mendze ŋgwal ŋa tsəɗaŋŋa lele, na dite i ndze a aka magər tar a. 9 Gwim mekiriwe ga petek, dite nda gà kàzlàŋa ata fit dze ya, kamala ana i ɗifek dər a.»

Sahər masəra ba gà Mbulum nda gà mburma

(Mendizle 37:1-9)

10 « Say ta ge sahər masəra ba gà iye nda mburma ata ka, nda dizl davanah. Ti live zubul ŋa ka, tsegwelek sula nda mezehe ŋa. Zlàbàtum ŋana tekeɗe, me ge ka, tsegwelek nda mezehe ŋa mbaŋa. Dzəgəɗaf ŋana tekeɗe, tsegwelek nda mezehe ŋa asa mbaŋa. 11 Mbe ka, nda gura lele nda huɗ ŋa, dite nda bəra ŋana asa dze. Ki lwìmer a nda mewetse gura ika ahəm ŋa tits mbaŋa. 12 Kà vaɗar gà dasa gura aka guva aka guva tseke faɗ dze. Ki dzer a ka, gà dasa sula aka tseke ŋgiɗ ilik, ki dzer a sula aka tseke ŋgiɗ aaha kamala taŋa ya asa. 13 Papə̀zar gà zəva dizl davanah ata sula asa. Mbe ahər gura aà dəba ŋa ya. 14 Slalayar à gà zəva ata i dasa ana aà guva sahər ata aà mazla ŋa dər. 15 Gà zəva ata ki slele a dər i gà dasa ata faɗ a ka, wura ma ta zla ihər diydiy tsa kəla. 16 Gà beliŋ kur aaha sula i dzak a tekeɗe ka, ki dze a ka, a huɗ sahər ata mbaŋa.

17 Dite asa ka, ki ge aaka a dukw mehìndìkè ŋa nda gura lele asa. Zùbəl ŋa ka, tsegwelek sula nda mezehe ŋa. Zlàbàtum ŋa tekeɗe, tsegwelek ilik nda mezehe ŋa mbaŋa asa. 18 Və̀ɗ mendzikiɗe ba gà gawla Mbulum nda gà gwezleviyek aà tar sula. Ta ge ka, aka gà ahəm dukw mehìndìkè aaka ŋa ata sula məma. Ama ta vìɗ a ka, nda gura ɗekɗek. 19 Ge gà gawla Mbulum ata ka, ilik a ndze a aka tseke ŋgiɗ, dite i ŋgiɗ aaha asa ka, a ndze a aka tseke ŋgiɗ aaha asa mbaŋa. Gà mendzikiɗe ba gà gawla Mbulum ata ta gaw ba nda dukw mahə̀ndə̀kà ŋa ata i təv ilik ŋa tserdze. 20 Gà gawla Mbulum ata tì dzik a gà gwezleviyek tar ndàra a mbulum aà mege a dər sìsiye aka dukw mehìndìkè a sahər ata. Gà ŋguz gwezleviyek tar ata, a lime akabiŋa, ta mbəɗ aàba gà yemere tar serser, ta fir a aka gər dukw mehìndìke aka sahər ata.

21 Ama ka, gà beliŋ aaha i dzak sula ya tekeɗe ka, dza a huɗ sahər masəra ba gà iye nda mburma aaha. I dəba ŋa ya ka, hə̀ndə̀k aka sahər ata. 22 I fata ya na ki lìmwim a nda iye ya, dite ika gər dukw mahə̀ndə̀kà aka sahər masəra ba iye nda gà mburma ata gà gawla Mbulum ikəka ya na i tsikik a məpala ahəm gà tserdze, aɗaba gà Isərayel a.»

Tabə̀l ana tə dzawa aaka ɗaf a Mbulum a

(Mendizle 37:10-16)

23 « Ge tabə̀l ŋa ka, nda dizl davanah. Zùbəl ŋa me ge ka, tsegwelek sula. Zlàbàtum ŋa tekeɗe, tsegwelek ide. Dzəgəɗaf ŋa ibam me ge ka, tsegwelek nda mezehe ŋa mbaŋa. 24 Mbe ahər gura i bəɗ a simbikw lele, dite ka ler à mewetse ŋana nda gura tits aà dəba ya asa. 25 Ki ge ahər duwa aà guva ya, aà mə vəlar ndzəɗa. Me ge ka, zlàbàtum ŋa slerre ide, dite ka wetse nda gura aà guva ya tits lele asa. 26 Geyer gà dasa gura faɗ, ka dzàyar aka ahəm aka ahəm ŋa, serser aka gà sik ŋa ata faɗ a asa mbaŋa. 27 Gà dasa ata me ge ka, bise nda təv ata ika gər ŋa ya. Tì dzèkeye aɗəm a zəva, aà mazlàwà dər tabə̀l ata. 28 Zəva ata me ge ka, biy dizl ɓile, ki ge ahər a gura à dəba ya, ti zlewe a dər.

29 Geye gà kwataramà nda gà tasa, dite nda gà duwa aà medzè aɗəm dukw ata makwàsà ŋa ya, nda gà kivit masà dər ŋa tserdze, aà megèwa dər megemir biy dukw ana ta vəl biy taf aɗaba Mbulum a. Ge gà dukw ata tserdze ya ka, nda gura ŋgwal ŋa lele. 30 I dəba ŋa ya, ɗaf ana ti de a dərra aka miɗ gà ya ka, ki tikwim aka tabə̀l ata ŋa na ki dwimera aka miɗ gà ya, a zewe a aɗəm a hiywe pərra.»

Təv metìkè aaka lalampa

(Mendizle 37:17-24)

31 « Yawwa, ge təv metìkè aaka lalampa, nda gura ŋgwal ŋa lele mbaŋa. Na me ge sik ŋa nda magər ba ŋa ka, gà ɓəzla mivìɗe. Ama magər ba ŋa ka, ki diweye a dər nda dukuməŋa a riŋ a ndzikiɗ ba mibìzè duwa ya nda dukw magəsa ŋa ya. Gà dukw ata tserdze ya ka, me ge ka, i təv ilik ŋa. 32 Ahər ndilik na ki dzeyer a ka, ma slaya dər i magər ba ŋa ata ya. Ika tseke ŋgiɗ ka, ki dzer a ahər makər, aka tseke naha ka, ahər makər hiywe mbaŋa asa. 33 Aà ahər ata tserdze ya ka, ki ge ahər a dukuməŋa ata makər a mbaŋa. Gà dukw ata tì ndzikiɗ a ba mibìzè dukw nda dukw magəsa ŋa. 34 Aà magər ba ŋa tekeɗe, ki ge ahər dukuməŋa faɗ. 35 Dukuməŋa ata ilik a ka, me ge aà huɗ gà ahər ata sula. Biy ŋgiɗ tèkeɗe, aà huɗ gà ahər ŋgiɗ asa mbaŋa. Dite naha ibam aà huɗ gà ahər ata ka, i bəɗ ŋana sula asa mbaŋa. 36 Gà ahər ŋa ata nda gà dukuməŋa ikəka ya ka, say ki vìɗ a ka, nda gura ŋgwal ŋa lele. Ama ki ge a gà dukw ata tserdze ya ka, i təv ilik ŋa.

37 Ge gà lalampa təsəla, ka dzàyar gà təv metike ŋa tserdze, dite mà dəv dzaydzay lele parakka. 38 Ge gà dukw masasa liɓir ŋa ata nda gà dukw mimbete dər ŋa ka, nda gura ana ŋgwal ŋa lele ya asa mbaŋa. 39 Ge gà dukw megemir ŋa tserdze ka, nda gura ana ŋgwal ŋa lele ya, kiliw dzik makər. 40 Ama kəla ka, ge metsehe, aɗaba ki ge a ka, aà mendzikiɗe ba ŋa ana kə̀ ŋgatarəra ika gər kwite ya.»