Mendizle 26

Mekiriwe ga petek ana ti kiriw aɗaba Mbulum a

(Mendizle 36:8-38)

1 « Yawwa, ki kiriw a ga petek aɗaba Mbulum ka, nda gà ndura kurwa biy gà slewize ana gà mewetse ŋa zlirmetinwe zlirmetinwe ya, naha nduzzwa nda gà na a ndza ndizze ndeyndey a. Ki mbeye akaba a nda slewize herrè ŋana asa mbaŋa. Ama ki ge a ka, nda mendzikiɗe ba gà gawla Mbulum. Taŋa ka, megemir gà ɓəzla maŋgara duwa. 2 Zùbəl ndura ata me ge ka, tsegwelek dzik səla gəra tsamakər. Zlàbàtum ŋa ka, tsegwelek faɗ. Ku mege ndura wara tekeɗe, mege ka, kalkal ilik. 3 Ki ɗemekeye akaba a gà ndura ata ə̀zləm a a təv ilik ŋa, me ne ilik pəra. Ki dzik a gà biy ŋgiɗ ə̀zləm asa a təv ilik ŋa asa mbaŋa. 4 Ka mbeyer petek ana a ndza zlirmetinwe zlirmetinwe aka mandəvandəv ahəm ndura ata aka tseke biy ŋgiɗ ana kà ɗamaka akaba ilik a. Ki ge à gà na a gaw aba i dəba ŋa ya ya kataya asa mbaŋa. 5 Ki peɗeye a gà petek ata ka, dzik ə̀zləm aka ahəm ndura ŋgiɗ ilik. Ki peɗeye a dzik ə̀zləm asa aka tsaka ŋana, tə gaw aba nda biy ŋgiɗ sula ya. Gà dukw ata ŋgelew ŋgelew ika ahəm ŋa ya ka, ta mbè akaba ka, sirsir lele mbaŋa asa. 6 Ge gà dukw magəsa aàba duwa dzik ə̀zləm nda gura asa, aà magawa aba gà ndura ata sula a təv ilik ŋa. 7 « ŋgar ndura ata ka, nda ŋguz gà awak aà mege dər ga pat aka ga petek ata malahalah ŋana ya. Ndura kurwa gəra ilik na ki ŋgere a ya. 8 Ndura ata me ge nda zubul ka, tsegwelek dzik makər, dite zlàbàtum ŋa tekeɗe, me ge ka, tsegwelek faɗ. Gà ndura ata tserdze ya, ku mege ndura wara tekeɗe, me ge ka, kalkal ilik. 9 Gà ndura ata ə̀zləm a ka, ɗə̀mə̀k aàba. Ki geye a à gà ndura ndilik ŋa aaha kataya asa mbaŋa. Say ga ndura ana ndilik a ka, ki tike a aka ga petek ana ndaka miɗ a. 10 Geyer dukw ata ŋgelewlew a ka, dzik ə̀zləm aka tseke ndura ana mandəvandəv ŋa ana kà lah meɗìmìke a aba ilik a. Ki geye a akaba ahəm ŋana kà ɗə̀mə̀k masula ŋa dzik ə̀zləm asa ya mbaŋa. 11 Geye gà dukw magəsa ŋa aba nda ndzemde məvəɗa kur siŋgwe dzik ə̀zləm. Kə̀ gasa dər aàba petek ata ŋgelewlew a, dite ka, ga petek ata mà gàw ba a təv ilik ŋa. 12 Ka paɗayar mezehe ŋana a zeha à gà petek ata aà guva ŋa ya ya, na a zeha aà ndura ya zaakwa ya ka, ka paɗara taŋa nda à dəba mekiriwe ga petek ata ya. 13 Mezehe ŋa ka, tsegwelek ilik na ndàka tseke aaha ya. Ndaka tseke aaka tekeɗe, na a zeha à zlàbàtum ndura ga petek ata ya ka, ki peɗeye a gà tseke ata sula məma. Tseke aaha nda na aaka fit mà hə̀ndə̀k aaka ba lele.

14 Tike bagwa hàgwàlà təmaŋ ata ta bah ahər duwa nduzzwa ya, aka gər ga petek ata. Ika gər ŋa ata ka, ki tike aaka a bagwa ana ndzəɗa iɗəm hinne ya mbaŋa asa.

15 Papaza dizl davanah kamala slə̀làh a, aà mehitse dər aà mà gəs mekiriwe ga petek ata ti kiriw aɗaba Mbulum a. 16 Dizl ata me ge nda zubul ka, tsegwelek kurwa. Zlàbàtum ŋa tekeɗe, tsegwelek ilik nda mezehe ŋa. 17 Gà dizl ata kà papaza tserdze ya ka, ku mege dizl awara fit ka, ki ge ahər a təv sik sula sula aà mehitse dər ŋa a biye. Kamala taŋa ya na ki geye a aà gà dizl ata aà mehitse dər mekiriwe ga petek ata tserdze ya. 18 Gà dizl ana ki ge a dər aà dəba a mekiriwe ga petek ata ya ka, dizl dzik səla. Ki hitse a dər aka tseke gular. 19 Ki ge a sik aà gà dizl ata dzik faɗ ka, nda ndzemde məvəɗa kur siŋgwe herrè ŋana. Dizl ilik ka, sik ihər sula ndaka dukw magəsa ŋa ata, aà mehitse dər aɗəm a mbaŋa ya. 20 Kamala taŋa ya asa mbaŋa, gà dizl ata dzik səla ya, ki hitse a dər aka tseke mekiriwe ga petek ŋgiɗ, kamala megweɗe ya ka, aka tseke yam, 21 nda gà təv sik ŋa dzik faɗ biy ndzemde məvəɗa kur siŋgwe herrè ŋana mbaŋa. Gà biye təv sik ata sula ya ka, ki tike aɗəm a dizl ilik pəra. 22 Geye gà dizl ndilik ndaka dəba mekiriwe ga petek ata a mbe ndàra aka tseke pat ana à dìɗ a ya. 23 Səkah à gà dizl sula nda aà guva nda aà guva ndaka dəba mekiriwe ga petek ata ya asa. 24 Ama gà dukw magəsa aàba rèhhe ŋana ka, ki mbe a ndàra a bəɗ ŋana. Ki ge gà dukw magəsa ŋa ata rèhhe ya ka, ndaka dala gər ŋa nda təv matsərəɗ duwa. Kamala taŋa ya na ki ge a gà dizl ata tseke sula məma ya. 25 Kamala taŋa ya, gà dizl ata mege riŋ tsamakər nda gà sik ŋa biy ndzemde məvəɗa kur siŋgwe herrè ŋana. Ki ge gà sik ŋa kurwa gəra ndilik, aɗaba ki dze a sik sula aà dizl tserdze.

26 Làmbaɗa gà sla aram dizl davanah ə̀zləm aɗaba gà dizl ata tserdze ya. Gəlaw aba gà dizl ata, ku mege tseke wara tserdze. 27 Kamala taŋa ya, gà sla aram ə̀zləm ka, aɗaba tseke gular. Gà sla aram ə̀zləm aaha ka, aɗaba tseke yam, dite gà sla aram ə̀zləm ŋgiɗ asa ka, aɗaba tseke na ndaka dəba mekiriwe ga petek ata ya, gà taŋa ka, ndaka tseke pat ana à dìɗ a ya. 28 Sla aram ana i magər ŋa ya mege ka, kùslats ilik pəra na a slele a aka tseke guva ŋgiɗ a. 29 Sla aram ata ka, mbe nda gura. Vaɗa gà matsərəɗ gura aɗaba aà meslele a dər iɗəm a, gà sla aram ata i fata ya, gà sla aram ata mbaŋa ka, ki mbe ahər a gura asa.

30 Kamala taŋa ya, ge mekiriwe ga petek ata aɗaba iye ya ka, aka mendzikiɗe ba ŋa ana kə̀ ŋgatarəra ika gər kwite ya. 31 Ki ge a petek matəzla ikaba ga ata nda gà slewize ana gà mewetse ŋa zlirmetinwe zlirmetinwe ya, naha nduzzwa, nda gà na a ndza ndizze ndeyndey a. Ki mbeye akaba a nda slewize herrè ŋana asa mbaŋa. Ama ki ge a ka, nda medzìkìɗè gawla Mbulum. Na a ŋgere a ka, gà ɓəzla maŋgara duwa. 32 Ki tike a gà dukw ata ka, a gà mendwiŋe faɗ nda dizl davanah. Ki mbe ahər gura aà dəba ya. Təv metìkè ŋa ahər tekeɗe ka, biy gura. Ki geye ahər a gà təv sik faɗ nda ndzemde məvəɗa kur siŋgwe herrè ŋana. 33 I fata ya ka, tike petek ata a təv metike ŋa dukw ŋgar, tsam ka, ki tike sahər masəra ba gà Mbulum nda gà mburma aka dəba petek ata a huɗ ŋa. I fata ya asa ka, petek ata a sàs ikaba ga ata tsəɗaŋŋa nda təv ana tsəɗaŋŋa ndeyndey a. 34 Tike dukw mehìndìke ŋa aka sahər masəra ba gà Mbulum ata nda mburma ya, a huɗ ŋa a təv ana tsəɗaŋŋa ndeyndey a. 35 Tike tabə̀l aka miɗ petek ata, dite ka tike lalampa ser ser akaba nda tabə̀l ata asa mbaŋa, aka tseke mekiriwe ga petek ata a mbe ndàra a gular a. Tabə̀l ata tekeɗe, tike aka tseke ana a mbe aka yam a.

36 Ge petek aà mahə̀ndə̀kà dər a hərmaga ga petek ata ya. Ki ge a ka, biy gà slewize ana gà mewetse ŋa zlirmetinwe zlirmetinwe ya, naha nduzzwa, nda gà na a ndza ndizze ndeyndey a. Ki mbeye akaba a nda slewize herrè ŋana asa mbaŋa. Taŋa ka, megemir gà ɓəzla maŋgara ŋa dukw ŋgar. 37 Aà metike ahər petek ata ka, ge gà mendwiŋe ə̀zləm biy dizl davanah, kà bah nda gura, gà dukw metìkè aaka ŋana ka, biy gura mbaŋa asa. Geyer gà təv sik ŋa ə̀zləm biy ndzemde məvəɗa kur siŋgwe.»