Mendizle 27

Təv məvəla aaka duwa a Mbulum

(Mendizle 38:1-7)

1 « Yawwa, kinehe ki ge təv ana ta vilewiŋ aaka a duwa a iye ya nda dizl davanah. Təv zubul ŋa ka, tsegwelek ə̀zləm. Zlàbàtum ŋana tekeɗe, me ge ka, tsegwelek ə̀zləm mbaŋa. Təv məvəla aaka duwa a iye ka, tsiwir me ge ihər ka, tseke faɗ tserdze. Zùbəl ŋana ndàra a mbulum a, me ge ka, tsegwelek makər. 2 Geyer gà medzibe gà mbukum ŋgiɗ aka tseke ata faɗ a tserdze, ma slalayarra i təv məvəla aaka duwa a iye ya. Mbe təv məvəla aaka duwa ata nda ndzemde məvəɗa kur siŋgwe. 3 Ge kazlaŋa biy təv ata ta vəlawa aaka duwa a iye ya tserdze, mesigire aà mandza aɗəm avir, dite gà kuŋgwah məfàɗà bitekwe ana i təv məvàkà slu ya, nda gà səra dukw magwatsakaya dər mal aà duwa, nda gà dzərakidzərak biy mandzəkara slu ika akwa ya nda gà dukw medè duwa. Mbeye gà dukw ata tserdze ya ka, nda ndzemde məvəɗa kur siŋgwe.

4 Gəlaw aaka ndzemde məvəɗa kur siŋgwe kamala biy məvàkà slu ya. Mendze aka guva aka guva tseke faɗ ŋa ata dze. Geye gà dasa faɗ biy ndzemde məvəɗa kur siŋgwe ata mbaŋa asa. 5 Dza gà dukw ata a təv ana ta vilewiŋ aaka a duwa ya, aà guva ya, aà mandza aɗəm gà zəva. 6 Ge gà zəva dizl davanah aɗaba təv miviliŋ aaka duwa, dite kà mbe ahər ndzemde məvəɗa kur siŋgwe a dəba ya. 7 Ki dzèye a gà zəva ata ka, a biye dasa aaha aà guva təv miviliŋ aaka duwa ika tseke sula ya, taŋa ka, aɗaba mazla dər ŋa. 8 Ge dukw məvəla aaka duwa a Mbulum ata ka, nda dizl. Ma ndza kamtsaɗawwa. Huɗ ŋa ma ndza kataya məfàrà ŋa. Say ta ge a ka, kamala ana kə̀ ŋgatarəra ika gər kwite ya ya.»

Varavada mekiriwe ga petek ana ti kiriw aɗaba Mbulum a

(Mendizle 38:9-20)

9 « Ama mekiriwe ga petek ata ti kiriw aɗaba iye ka, varavada a riŋ, malawaraŋa tits nda petek herrè ŋana. Aka tseke gular na ki ge a gà dzə̀ɓər ŋa biy matəzla ŋa ikaba ya nda petek slewize herrè ŋana. Tseke ata ilik a ka, tsegwelek dərməka, 10 nda gà mendwiŋe dzik səla nda gà sik ŋa dzik səla biy ndzemde məvəɗa kur siŋgwe. Gà masamasa nda dukw metike aà mendwiŋe ŋana ka, mbe ahər ndzemde məvə̀ɗa kur siŋgwe ata herrè ŋa ya. 11 Ndaka tseke yam tekeɗe, ki ge a dər kamala taŋa ya mbaŋa. Tseke zubul ŋa ata tsegwelek dərməka me ge ka, kalkal ilik. 12 Təv zlàbàtum ŋana ndaka tseke ahər pat ana à dìɗ a ya, petek masasa ikaba ŋa ya me ge ka, tsegwelek dzik ə̀zləm nda gà mendwiŋe ŋa kurwa, nda gà sik ŋa asa ka, me ge kurwa mbaŋa.

13 Kamala taŋa ya mbaŋa na təv zlàbàtum ŋana ndaka tseke ahər pat ana à mbizere a ya ka, me ge ka, tsegwelek dzik ə̀zləm. 14 Tseke ŋgiɗ petek ŋa me ge ka, tsegwelek kurwa nda gəra ə̀zləm. Gà mendwiŋe ŋa tekeɗe, makər nda gà sik ŋa makər asa mbaŋa. 15 Nda tseke ŋgiɗ aaha tekeɗe, petek ŋa me ge ka, tsegwelek kurwa nda gəra ə̀zləm. Gà mendwiŋe ŋa tekeɗe, makər, dite gà sik ŋana makər mbaŋa. 16 Aɗaba ndaka biye hərmaga ka, petek ata me ge ka, tsegwelek dzik səla, biy gà slewize ana gà mewetse ŋa zlirmetinwe zlirmetinwe ya, naha nduzzwa, nda gà na a ndza ndizze ndeyndey a. Ta mbeye akaba nda slewize herrè ŋana asa mbaŋa. Mendwiŋe ŋana me ge ka, faɗ nda sik ŋa faɗ asa mbaŋa.

17 Gà sik mendwiŋe ata tserdze ya ka, ki ge nda ndzemde məvəɗa kur siŋgwe. Ama gà aram ana ti dze a aka gər ŋa ya nda dukw magəsa ŋana ka, biy ndzemde məvəɗa kur siŋgwe ana herrè ya. 18 Zùbəl varavada ŋana dziye ka, me ge ka, tsegwelek dərməka. Zlàbàtum ŋana tekeɗe, me ge ka, tsegwelek dzik ə̀zləm. Zùbəl ŋa ndàra a mbulum tekeɗe mbaŋa, me ge ka, tsegwelek ə̀zləm asa. Petek ŋa tserdze me ge ka, biy slewize herrè ŋana nda gà sik ŋana tserdze ya tekeɗe, me ge ka, biy ndzemde məvəɗa kur siŋgwe asa mbaŋa. 19 Mekiriwe ga petek ata tserdze ya ka, ti dzeve a ihər liɓir nda bəra nda ga asa, aà gà mendwiŋe ata tserdze ya ka, sula sula, madànà ŋa aà masamasa. Gà masamasa ata nda gà kàzlàŋa mekiriwe ga petek ata ya tserdze, mege ŋa ka, bìy ndzemde məvəɗa kur siŋgwe ata.»

Məpala ahəm aka gər lalampa

(Lewi 24:1-4)

20 « Ama kər Musa, gwaɗa a gà Isərayel ka, tə tafara mal uliviye ana ti ɗwitsewa ya, ŋgwal ŋa lele ya, aɗaba aà medze a lalampa, aà mivète dzaydzay ŋa kəla pat hiywe. 21 Gà Haruna nda gà ɓəza ŋgar ti tike làlampa ata a huɗ ga ata ika miɗ petek ana a kaha sahər masəra ba gà iye nda mburma ya. Làlampa ata ta vete a ka, aà gər hawa ya, haa nda mekwede. Taŋa ka, batsah məpala ahəm ana biybiy a na i təv gà Isərayel nda gà ɓəza tar ana ta we a ya tserdze.»