Mendizle 28

Petek gà ɓəzla mandəva kuɗa a Mbulum

(Mendizle 39:1-7)

1 I dəba ŋa ya, Mbulum a gwaɗa a Musa: « Musa, zal a damər yak Haruna nda gà ɓəza ŋgar, tə dara a təv yak a, ika magər gà Isərayel, aɗaba tar ta giŋ megemir gà kamala gà ɓəzla mandìvìŋ kuɗa ya: Gà Haruna nda gà Nadab, dite nda gà Abihuw, nda gà Aliyadzar, nda gà Itamar. 2 Ki mbe a petek ana a tsahən tsəɗaŋŋa lele ya, a damər yak Haruna. 3 fafəl a gà ɓəzla megemir ana i vəl a tar metsehe nda masəra duwa lele, ti sle a aà mege duwa ya. Gà tar ata na ta mbe a petek a Haruna a mandza à ŋgat tsəɗaŋŋa lele, dite megiŋ megemir mendìviŋ kuɗa gà ya. 4 Kamala naha ya, na petek ana ta mbe a ya: Kiywa ana ika gəzləŋ a, nda petek megemir, nda andiw, nda andiw ŋgiɗ pam asa ana ta ŋgar nda slewize herrè ŋana ya, nda petek mendiwiɗe gər nda petek madànà ba. Ta ge petek ŋgwal ŋana tsəɗaŋŋa ya, aɗaba damər yak Haruna nda gà ɓəza ŋgar, aɗaba ta giŋ megemir mendìviŋ kuɗa gà. 5 Gà ɓəzla mimbe ŋa ta mbe ka, nda gà slewize ana gà mewetse ŋa zlirmetinwe zlirmetinwe ya, naha nduzzwa, nda gà na a ndza ndizze ndeyndey a. Ta mbeye akaba nda slewìze herrè ŋana nda gà slewize gura asa mbaŋa.

Petek megemir ana kamala andiwsayaw a

6 Ta mbe petek megemir nda gà slewize ana gà mewetse ŋa zlirmetinwe zlirmetinwe ya, naha nduzzwa, nda gà na a ndza ndizze ndeyndey a. Ta mbeye akaba nda slewize herrè ŋana. Ti dèlele a nda slewìze gura asa mbaŋa. Taŋa ka, megemir gà ɓəzla maŋgara ŋa. 7 Təv gà dzàdzah ŋana sula ya, me ne ka, təv madzə̀và aba. Ti dzeve a dər aba ika guva ika guva ya tseke sula məma. 8 Dukw madànà ba ana aà petek megemir ata tì dèn a dər ba ya ka, ki ge kamala petek megemir ana ta ŋgar nda gà slewize ana mewetse ŋa zlirmetinwe zlirmetinwe ya, naha nduzzwa, nda gà na a ndza ndizze ndeyndey a. Ki mbeye akaba nda slewize herrè ŋa, dite ki dèlele a nda slewìze gura asa mbaŋa. 9 Taŋa ka, ndzək gà kur unikis sula, ka wetse aaka zləm gà ɓəza Isərayel tserdze. 10 Kur ŋgiɗ ilik ka, ki wetse aaka a zləm gà mburma ndilik, dite biy ŋgiɗ aaha tekeɗe, ki wetse aaka a zləm gà na ti zeha ya ndilik a asa. Ama ki wetse aaka a kəla ka, aà gà mewe tar ana ta wa tar a. 11 Taŋa ka, say ki wetse a zləm gà ɓəza Isərayel aka gà kur ata sula ya fit məma. Ki wetse a ka, say nda dukw ana a tim a lele ya. I fata ya ka, ki ler a mimbe à gura tits aà guva ya. 12 Ka tike kur ata aka petek megemir ana ika magər gà dzàdzah a. Kur ata a ne ka, kur madzala gà gər aka gà ɓəza Isərayel. I təv ana Haruna a de a a mekiriwe ga petek ata ya ka, a zlewe a zləm tar ata ndaka dzàdzah ŋgar, aɗaba aà mə̀màwarra a gər a ika miɗ gà, Batsah kurum ŋa ya. Aɗaba iye ka, ki metswimiŋ gər tsa.

13 Ge ahər təv meger biye ŋa ka, nda gura, 14 nda tsitsirɓe ŋana tekeɗe, biy gura ŋgwal ŋa lele sula, maslaslapà ŋa kamala liɓir a. Ki dèn a tsitsirɓe ŋa ata a biye petek ata ika liwiŋ gà dzàdzah a nda gura ya.»

Kìywa ana ika gəzləŋ a

(Mendizle 39:8-21)

15 « Ge ahər kìywa aka gəzləŋ aɗaba mege dər tsetse, aà ki tsemwim a aà iye dukw ana i waya ya. Taŋa ka, gà ɓəzla maŋgara ŋa ta ŋgarak aà petek ata kamala petek megemir a. Ta ge ka, biy gà slewize ana gà mewetse ŋa zlirmetinwe zlirmetinwe ya, naha nduzzwa, nda gà na a ndza ndizze ndeyndey a. Ta mbeye akaba nda slewize herrè ŋana. Ti dèlele a nda slewìze gura asa mbaŋa. 16 Kìywa ata me ge ka, tseke faɗ, mə̀ pəts a huɗ ŋa tsa. Təv zubul ŋana ka, kapakà ide. Təv zlàbatum ŋana tekeɗe, kapakà ide mbaŋa asa.

17 Dap ahər ka, gà kur ana tsakala ŋa hinne, à sìkim a ba tsiye. Ka ndər ahər are faɗ. Are malahalah ŋana ka, rubin, tupas, imiradi. 18 Are masula ŋana ka, girenaɗ, safira, diyaman. 19 Are məmakər ŋana ka, yakintus, akat, ametis. 20 Aka are məfaɗ ŋana tekeɗe, kirisulit, kurnalin, yaspa. Ka ler à gura aà guva ŋa ya tits. 21 Gà kur ata ka, kurwa gəra sula tits aà zləm gà ɓəza Isərayel, kamala ana ta wetse masasa ŋa ikaba ya ya. Say ki wetse a zləm tar ka, nda dukw ana a tim a lele ya. Ku mege kur awara fit ka, nda zləm ŋgar ikəka fit kurwa gəra sula kamala gà gwala tar a.

22 Ge aà kìywa gəzləŋ ata ka, tsitsirɓe biy gura ŋgwal ŋa lele ŋana sula, maslaslapa ŋa kamala liɓir a. 23 Aà kìywa ana ika gəzləŋ a ka, ge ahər gà matsərəɗ gura sula. Dza gà matsərəɗ ata aka guva kìywa ata aà maadwa ya sula məma fit. 24 Dànaya gà tsitsirɓe gura ata maslaslapà ŋa ya, aà gà matsərəɗ ata ika guva gà kìywa ata ika gəzləŋ sula ya məma. 25 Gà tsirtsirɓe ana ika tseke guva ŋgiɗ a ka, dànaya aà gà təv meger biye aà petek megemir ana ndaka miɗ a. 26 Vaɗa gà matsərəɗ gura ŋgiɗ pam sula asa, ka dza gà matsərəɗ ata aka gà tseke kìywa gəzləŋ ŋana nda bəɗ a. Guva ŋana me ge ka, aà andiw ata nda huɗ ŋa ya. 27 Ki veɗe a gà matsərəɗ ŋgiɗ sula asa, dza gà taŋa ka, aà petek megemir ndaka tseke ana ndaka miɗ i bəɗ ŋana zaakwa ya. Gà təv madànà ŋa ka, a lìme akaba a nda na ika dəmkul petek megemir a. 28 Tì dèn akaba a gà matsərəɗ na aà kìywa gəzləŋ a nda biy na aà andiw a. Ti dèn akaba ka, a tə̀vum ŋa ilik na nda liɓir petek ata mewetse ŋa zlirmetinwe zlirmetinwe ya, aɗaba kìywa ata ma ndza ka, ika gər dəmkul petek megemir ata, tə ta dza aba ya pampam nda petek megemir ata ya tsa.

29 Kamala taŋa ya, i təv ana Haruna a de a a ga ata ya ka, gà zləm gà gwala gà Isərayel mewetse ŋa aà kìywa petek ata ika gəzləŋ ŋgar a. Taŋa me ne aka iye, Batsah kurum ŋa, kamala ana ta mìŋ a dər a gər a, kəla mede ŋgar ana a de a a ga ŋgwal ŋa ata tsəɗaŋŋa ya ya. 30 A kər Musa, dza gà dukw ata a kìywa. Gà dukw ata ka, tə zal a zləm ŋa ka, urima nda tumima. Tə̀ dzawa gà dukw ata a kìywa ka, aɗaba aà masəra dər ikaba à gà dukw ana iye Batsah kurum ŋa i waya ya nda na i waya tsiye. Kamala taŋa ya, tə̀ dzawa gà dukw ata ka, aka gəzləŋ a Haruna na i təv ana a de a aka miɗ iye, Batsah kurum ŋa ya. Haruna ma zlawa gà dukw ata aka gəzləŋ ŋgar kəla pat na a de a aka miɗ gà iye Batsah kurum ŋa ya.»

Petek ŋgiɗ biy batsah mala mandəva kuɗa a Mbulum

(Mendizle 39:22-32)

31 « Mbe andiw a huɗ petek megemir. Petek ata ka, ki mbe a ya ka, zlirmetinwe zlirmetinwe fit. 32 Təmar biye ɗa aka magər. Aà guva ya ka, tiker petek dàɗdàɗə̀ɗɗa lele, kamala dukw madànà ba mada a guvəl a, aɗaba ma da kwìyeɗa tsa. 33 Aka guva andiw ata ka, paɗaya gà slewize ana gà mewetse ŋa zlirmetinwe zlirmetinwe ya, naha nduzzwa, nda gà na a ndza ndizze ndeyndey a. Ki ler a dər ika ahəm a tits lele fit kamala mawà duwa ya. Dite asa ka, gà meèndeliŋ gura me ge ika magər ŋa ilik ilik asa mbaŋa. 34 Gà meèndeliŋ gura nda dukw ata kamala mawà duwa ya, ta ge ika ahəm andiw ata tilèw, me ler ika guva ya. Meèndeliŋ ilik dukw ata kamala mawà duwa ya ilik hiywe kataya pəra. 35 Haruna, batsah mala mandìvìŋ kuɗa, me tike akaba. Aɗaba gà mburma tə tsaraka miɓizle ŋgar na akahər ana a de a a ga ata tsəɗaŋŋa aka miɗ iye, Batsah kurum ŋa ya, nda gà na a dere a iɗəm a bəra ya tserdze. Aɗaba taŋa na aka ge dər kataya ka, ma ta mət tsa.

36 Aɗaba taŋa asa mbaŋa, ge ahər təv biye ŋa ka, nda gura ŋgwal ŋa lele. Wetse ahər nda dukw ana a tim a ŋgwal ŋa lele ya. Wetse ka, tsəɗaŋŋa biy BATSAH kwa ŋa. 37 Dàn ahər nda liɓir petek ana zlirmetinwe zlirmetinwe ya. Ki dèn a ka, aka miɗ petek mendìwìɗè gər. 38 Dukw ata ma ndza ka, ika yemere Haruna hiywe i təv ana a dere a a ga ga ya. Na bəla gà Isərayel tàa ge bakal ika dukw ana ta viliŋ dukw taf a iye, Batsah kurum ŋa ya ka, taŋa Haruna ma dara aka miɗ gà ya nda dukw ata, dite i pil a ter a à bakal tar.

39 Biy Haruna ka, ta mber andiw ŋgiɗ pam asa nda slewize herrè ŋana. Ki ger a mendìwìɗè gər biy petek ana herrè ŋa ya asa mbaŋa. I dəba ŋa ya asa ka, ki ger a petek, aɗaba madànà ba, ta ŋgar nda slewize mewetse ŋa mbaŋa asa.

Petek gà asiŋ gà ɓəzla mandəva kuɗa a Mbulum

40 Biy gà ɓəza Haruna tekeɗe ka, ki mbèye a ter a gà andiw nda gà petek madànà ba nda mendìwèɗè gər ana ŋgwal ŋa lele matsahəna ŋa zubə̀l ŋaya. 41 A kər Musa, dza gà Haruna damər yak a megemir nda gà ɓəza ŋgar tserdze, kà dza aka tar petek, dite kà mbəɗ a tar mal a gər, na dite ti ne a gà ɓəzla mendiviŋ kuɗa ya. 42 Mbeye tar wàndaŋ nda slewize herrè ŋana, aɗaba aà makàhà dər ba tar ika dəmkul a tsim aka gwas. 43 Gà Haruna nda gà ɓəza ŋgar tə̀ dza akaba hiywe i təv ana ti dere a a ga gà ya, kige tsa a sàs a tar mivilinŋ duwa ya. Kamala taŋa ya, bakal ma ta məma tar aka gər, tə ta mata tsa. Taŋa ka, a ne məpala ahəm aà biybiy, aɗaba Haruna nda gà gwala ŋgar ana i dəba ŋgar a tserdze.»