Ta vəl megemir mandəva kuɗa a Mbulum a gà Haruna nda gà ɓəza ŋgar
(Lewi 8:1-36)
29
1 « Na ki dze a gà Haruna aà megemir mendìvìŋ kuɗa nda gà ɓəza ŋgar ka, zla sla ana yam ide ya, nda gà hàgwàlà təmaŋ sula, gà na bakal aà tar tsidze ya, 2 nda gà ɗaf ana giɗe ikəka makwàsà ŋa tsiye, nda gà dukw ana giɗe ikəka tsa, ta bàhawar ahər mal a, dite asa ka, nda gùfa ana ta hileɓ a ka, giɗe ikəka tsa, ti de a ka, nda mal a. Ki ge a gà dukw ata tserdze ya ka, nda gùfa dukw ana kamala daw a malə̀gə̀rà ŋa lele ya. 3 I dəba ŋa ya ka, sla aaha nda hàgwàlà gà təmaŋ aaha sula ya, dite gà dukw ata tserdze ya ka, gewiŋ akaba a kwatama ŋa ilik na ki diŋ a dərra a təv tsəɗaŋŋa ŋa ata ya. 4 Gà Haruna nda gà ɓəza ŋgar tə ndza bise aà guva hərmaga, dite ka bara tar nda yam. 5 Ndzək gà petek tar, gà andiw ata herrè ŋa nda na zlirmetinwe zlirmetinwe ya, dite nda petek megemir, dite asa ka, nda gà kìywa ana ika gəzləŋ a. Kà dza aka Haruna, kà dàn aàba gà kiywa nda dukw medène ana ika dəmkul andiw a. 6 Tì ndìwìɗer petek mendìwìɗè gər a gər ŋgar, ka wetse petek mendìwìɗè ŋgar ata nda gà dukw ana ŋgwal ŋa lele biy Batsah kurum ŋa ya. 7 Zla mal magwàtsakàyà aà duwa, kà mbə̀ɗar aka gər ŋgar aà mene aà ŋgat tsəɗaŋŋa.8 Gà ɓəza ŋgar tə daha bise mbaŋa, kà dza aka tar gà andiw. 9 Kà dàna tar nda dukw madànà ba, dite kà dza tar mendiwiɗe gər zubul ŋa a gər mbaŋa asa. Tar ka, ti ne gà ɓəzla mendìviŋ kuɗa aà biybiy. Kamala taŋa ya na ki dze a tar aà megemir a.
10 I dəba ŋa ya, zlara sla ana ndeɗiŋa yam ide ya, aà guva hərmaga ga petek ata ya asa. Gà Haruna nda gà ɓəza ŋgar tə dza aakahər aka gər ŋa. 11 Zler ɗa a sla ata aka miɗ təv mivìlìŋ aaka duwa a iye Mbulum aà guva hərmaga ga petek ata a fata. 12 Zla məmbəz sla ata, geye a gà mbukum ana ika təv mivìlìŋ aaka duwa a iye Mbulum a nda kəla ahər, dite na aka zehe ya ka, mbəɗ aà huɗ təv mivìlìŋ aaka duwa a iye Mbulum ata. 13 Zla məŋgəl ana a kaha dìnde ya, nda na aà kìvir a, nda gà kur dəba sula, dite nda gà ŋgwal məŋgəl ana lele ya dze. Ge dukw ata tserdze ya ka, say ki dwel a aka gər təv məvəla dukw taf ata. 14 Ama kəla ka, slu sla ata nda bagwa ŋa nda siwiŋa ya ka, say ki dwil a nda akwa a təv ilik ŋa tsakàlàk aà ga ya. Taŋa na a ne mezle ɗa a duwa, aɗaba məpəla à bakal kurum gà ɓəzla mendìviŋ kuɗa a iye Mbulum ata.
15 I dəba ŋa ya ka, zla hàgwàlà təmaŋ malahalah ŋa ata. Gà Haruna nda gà ɓəza ŋgar tə tə dza aakahər aka gər ŋa. 16 Ki zler ɗa a təmaŋ ata, ka zla məmbəz ŋa. Kù gwatsakaya aà təv mivìlìŋ aaka dukw ata ya, aka tseke ŋa ata faɗ a fit dze. 17 Ka tsala ikaba təmaŋ ata ya. Ka bara gà dìnde ŋa nda gà sik ŋana. Taŋa ka, dza akaba a təv ilik ŋa nda gà gər ŋana dze. Kà tike dər aka gər təv mivìlìŋ aaka dukw ata ya. 18 Naha dze ya ka, ka dùl aka gər təv mivìlìŋ aaka duwa ya. Kamala taŋa ya na məvəla duwa aɗaba iye, Batsah kurum ŋa ya. Gà təv gà ŋgwal ŋa ata akwa a mba ahər tsiye na a zè a ŋgwal ŋa lele hwaŋŋa, aɗaba iye Batsah kurum ŋa ya ya.
19 I dəba ŋa ya ka, ka zla hàgwàlà təmaŋ masula ŋa ata asa. Gà Haruna nda gà ɓəza ŋgar tə dza aakahər tar aka gər ŋa asa mbaŋa. 20 Dite ki zler ɗa a hàgwàlà təmaŋ ata asa, ka zla məmbəz ŋa, ka ge a təv mandə̀fà zləm ahər mezime a Haruna nda gà ɓəza ŋgar tserdze. Kamala taŋa ya asa mbaŋa na ki geye aà gà màndàgum ahər mezime tar nda mandàgum sik ahər mezime tar asa mbaŋa. Məmbəz ana a zehe ya ka, gwatsakaya aà gà təv ana ta vilewiŋ aaka duwa ya tseke faɗ ŋa ata tserdze. 21 Zla məmbəz ana ika təv ata ta vilewiŋ aaka duwa ya, nda mal magwàtsakàyà aà mburma. Kà gwatsakaya aà gər a Haruna nda gà petek ŋgar ŋa dze, dite kà gwatsakaya aà gà ɓəza ŋgar nda gà petek tar ŋa dze mbaŋa. Kamala taŋa ya, ŋgat nda gà ɓəza ŋgar ti ne a gà tsəɗaŋŋa nda gà petek ana aà tar dze ya.
22 Zla məŋgəl hàgwàlà təmaŋ ata nda dzimir ŋa nda gà məŋgəl ana a kaha dìnde ya, dite məŋgəl ana ika gər kìvir a, nda məŋgəl kur dəba sula məma tserdze, nda gà ŋgwal gà məŋgəl ana dze ya, dite asa ka, nda gwas ahər mezime, aɗaba təmaŋ ata a ne ka, biy metìkè mburma aà megemir. 23 Ka zla ahər ɗaf ana giɗe ikəka makwàsà ŋa tsiye ilik mbaŋa, nda gà dukw ata giɗe ikəka tsa, ta bàhawa ahər mal a ilik, dite nda gùfa ana giɗe ikəka tsa, ti de a ka, nda mal a ilik ara i kwatama ɗaf ata kà dza aka miɗ gà, Batsah kurum ŋa ya. 24 Kà dzaya akahər gà Haruna nda gà ɓəza ŋgar, tə zla aà mbulum, tə̀ dza aka miɗ gà Mbulum Batsah kurum ŋa. 25 I dəba ŋa ya ka, kà ndzək ika ahər tar a asa, ka dùl a təv mivìlìŋ aaka duwa ya. Taŋa a ne ka, mezè dukw ana ŋgwal ŋa, a ze aà iye Batsah kurum ŋa, a waya hwaŋŋa lele ya. Taŋa a ne ka, məvəla duwa aɗaba iye Batsah kurum ŋa.
26 Zla gəzləŋ hàgwàlà təmaŋ ata kə̀ kəɗ aɗaba metìkè dər Haruna a megemir ŋgar a. Zla aà mbulum, kà pàt dər aka miɗ gà. Taŋa me ne biy yak. 27 Kamala taŋa ya, gà gəzləŋ a, nda gwas ŋa ata ka, ta pat dər aka miɗ gà, Batsah kurum ŋa dzekwiŋ. Taŋa ka, me zeha ŋa ŋgwal ŋa tsəɗaŋŋa ya. 28 Aɗaba taŋa ku mege ndeɗime i təv ana gà Isərayel ta viliŋ a duwa ya ka, ti ndzìkewe a aɗəm gà taŋa ya a gà Haruna nda gà gwala ŋgar.
29 Petek Haruna ata tsəɗaŋŋa ya ka, a ne a mba ka, biy gà ɓəza ŋgar ana i dəba ŋgar a, aɗaba mandza dər tar a megemir. 30 I təv ana Haruna aka mət a ka, kəla ŋgar ana a ne mala mandəva kuɗa a Mbulum a ka, a tikewe akaba a petek ata i huɗ mehinne təsəla ya, na bəla a de a a ga ata ta kiriw nda petek a, aɗaba aà megemir i huɗ ga ata tsəɗaŋŋa ya ya.
31 Zla slu hàgwàlà ata masula ŋa a zeha ihər aà tìkè mburma a megemir a. Ka de slu ŋa i təv ŋgwal ŋa ata tsəɗaŋŋa ya. 32 Gà Haruna ta papəɗ slu ŋa nda gà ɓəza ŋgar nda gà ɗaf ana a zeha i kwatama ya, tə zəm ka, aà guva hərmaga ga ata ta kiriw nda petek a. 33 Tə zəm dukw ana ta kəɗ aɗaba məpala à bakal tar a, dite aɗaba ana tə dza dər tar a megemir ka, tə ndza tsəɗaŋŋa asa mbaŋa. Ama gà slele kəla ka, ti zim a tsa, aɗaba ana a ndza tsəɗaŋŋa ya. 34 Na bəla gà slu nda ɗaf ata tàa zeha aà mekwede ka, say ki wene a iɗəm nda akwa ya. Aɗaba taŋa ti zim a asa tsa, agəra ana ar ka, tsəɗaŋŋa ya.
35 Ge dukw ana i tsikik aɗaba gà Haruna nda gà ɓəza ŋgar tserdze ya. Ge megemir ŋa kalkal lele. Ama ki miyek à ter a a megemir ka, nda mehinne təsəla ŋa fit dze. 36 Kəla pat na ki kiɗewiŋ a sla ana yam ide ya, aɗaba məpəla à bakal. Ki lèmbeɗe a təv ata ta viliŋ aaka duwa ya ka, nda makə̀ɗà aaka sla. Mbəɗ aaka mal, aɗaba ana kà ne dər tsəɗaŋŋa ya. 37 I huɗ mehinne təsəla ya ka, ki kìɗiŋ a sla asa mbaŋa, aɗaba məpəla dər à bakal. Təv ata ta viliŋ aaka duwa ya ka, ma ndza tsəɗaŋŋa lele. Kamala taŋa na wura ana à lim a aà təv ata tserdze ya ka, a ndza tsəɗaŋŋa ndeyndey biy Mbulum a a.
Məbatsa duwa ana ta batsawa a Mbulum kəla pat a
(Maɗama ba 28:1-8)
38 « Dukw ana ki kiɗ a aka təv mivìlìŋ duwa ya ka, gà vugul ana mive ide ya, kəla pat sula sula. 39 Ki zliŋ a ɗa a vugul ilik i mèkwède, dite vugul masula ŋana ka, ki zler a ɗa i hawa. 40 Səkah à mipeni gùfa ana malə̀gərà ŋa lele ya, dite ka həlaɓ akaba nda mal uliviye ana ŋgwal ŋa lele ya, litìr ilik nda mezehe ŋa, dite dukw makwasa ŋa litir ilik nda mezehe ŋa mbaŋa asa, aɗaba à mede dər akaba dukw ata ta viliŋ biy taf a. Taŋa ti de akaba a ka, nda vugul ana malahalah ŋa ya. 41 Kìɗiŋ vugul ana masula ŋa ya ka, i hawa. Səkah aaka à dukw mezime ana ta viliŋ biy taf a nda na ta viliŋ aɗaba mede kamala ana nda mèkwède ya. Mezè dukw ata aka ze a iye hwaŋŋa ka, lele, a tsahən aà iye.
42 Dukw ata ki vekwim a aɗaba iye ya ka, mege ka, ika magər kurum tserdze ndidwe ndidwe, na ika biye hərmaga ga ata ta kiriw nda petek a. Ki vekwim a ka, ika miɗ gà iye, Batsah kurum ŋa, a təv məpasla ahər ana ki lèmekwe aɗəm a à mifefile akaba nda gà kurum a mbaŋa. 43 A fata na mìi lìmewe a aɗəm a nda gà Isərayel a. Ndzəɗa gà na tì zlibe a dər, à lèmbeɗe a təv ata tsəɗaŋŋa lele ya. 44 Ga ata ta kiriw nda petek a, a ndze a tsəɗaŋŋa nda gà təv ana ta vilewiŋ aaka duwa ya, a ge a tsəɗaŋŋa, i ge a à gà Haruna nda gà ɓəza ŋgar tsəɗaŋŋa mbaŋa asa, aɗaba ana tar ta ge a megemir gà kamala gà ɓəzla mendìviŋ kuɗa a iye Mbulum a.