Mendizle 30

Təv məvàkà dukw ana hwaŋŋa a Mbulum a

(Mendizle 37:25-28)

1 Mbulum a gwaɗa a Musa asa: « Ge təv məvàkà dukw ana ta vekiŋ aaka wirdè, a ze aà iye hwaŋŋa lele ya. Nda dizl davanah na ki ge a ya. 2 Təv zubul ŋana ka, ndisl aka tsegwelek ahər, nda təv zlàbatum ŋana asa mbaŋa ka, ndisl aka tsegwelek asa. Tseke guva ŋa me ge ihər ka, təv faɗ. Təv zubul ŋa a mbulum ka, tsegwelek ahər sula. Ki ge akaba a ka, a təv ilik ŋa, nda gà mbukum ŋa ata dze. 3 Mbe nda gura i bəɗ a lele, mbe dala gər ŋana nda gà tseke guva ŋa ata tserdze ya, nda gà na aà mbulum a fit nda gura matsahən lele. 4 Ge ahər gà matsərəɗ gura sula sula a təv gura matsahəna ŋa ata a bəɗ ŋana. Kà dzar ika tsaka ika tsaka ya sula, dite a mandza aɗəm gà aram a fata, aɗaba ti zlewe a dər. 5 Ge ga aram ata ka, nda dizl davanah. Kà mbe ahər gura aà dəba ya.

6 Tike təv məvàkà dukw ata, aka miɗ dzə̀ɓar ga ata tə tə̀zl ikaba ya nda petek a, a təv sahər masəra ba gà iye ŋa ata nda mburma ya, aka miɗ ŋa, i təv ana i paslak aɗəm sahər a. 7 I dəba ŋa ya ka, Haruna a dwìlewe aaka a dukw ana a ze hwaŋŋa lele ya kəla mekwede fit dze, aka təv ana à lèmbeɗe a lalampa ya. 8 Kamala taŋa ya ka, i təv ana Haruna a tike a akwa aà lalampa i hawa ya ka, say a tike a akwa aà dukw ata a ze hwaŋŋa ya mbaŋa. Me ne taŋa ka, dukw taf ana a ze hwaŋŋa ika miɗ gà, iye Batsah kurum ŋa ya kəla pat, aà mazlə̀bà dər aà iye.

9 Ka da zlum aakara dukw ana a ze pam a, nda gà dukw ana nda akwa ya, kige tsa dukw mezime ŋgiɗ pam tsa asa. Ka ta dzàyum aaka aà dukw makwasa ŋa, aka gər taŋa tsa mbaŋa asa. 10 I huɗ mive ya ka, sik ilik na Haruna a berewe a gà mbukum ata ika gər təv məvàkà duwa ya, nda məmbəz ana ti zlewe a ɗa a duwa aɗaba məpəla à bakal a. Kəla mive ka, sik ilik na a gewa megemir ata kataya. Dukw ata me ne i təv tar ka, məpala ahəm, aɗaba tar nda gà ɓəza tar ana ti te weye a aka miɗ mba tserdze ya. Təv məvàkà aaka dukw ata me ge ka, tsəɗaŋŋa ndeyndey aɗaba iye Batsah kurum ŋa.»

Siŋgwe məmbùrùɗà ba

11 BATSAH kwa ŋa a gwaɗa a Musa: 12 « Na bəla ki ɗeme a gà Isərayel kamala ana tə ɗamawa ba tar a ka, ku mege weke tserdze mə vəl dukw ana à mbìrwìɗ a dər mesife ŋgar à iye Batsah kurum ŋa ya, aɗaba dukw məməta ma ta daha ka, ti ze meɗeme ba tar tsa. 13 Araha na dukw ana ta vile a ya: Ku mege na aka da a maɗàmà ba tar a ka, a vile a mezehe kur siŋgwe nda dukw melìvè dukw ŋgwal ŋana tsəɗaŋŋa lele. Siŋgwe ata a ne a ka, dukw taf, aɗaba iye Batsah kurum ŋa. 14 Ku mege weke na aka da a maɗàmà ba tar a tserdze, ku wur ana mive ŋgar aka ge dzik səla ya ndagàtsa, a za taŋa ya tekeɗe, a vile a dukw taf ata a iye Batsah kurum ŋa. 15 I fata ya ka, ku mege mala limana tekeɗe, a za dər i gər taŋa ya tsa. Ku mege mala matawak tekeɗe, kataya asa mbaŋa. Na akahər ana ki vilwim a dukw taf ata a iye Batsah kurum ŋa, aɗaba məmbùrùɗà mesife kurum a. 16 Gwaɗar, zla siŋgwe məmbùrùɗà ba i təv gà Isərayel a, dite ki ge dər megemir i ga gà ata ta ge nda petek a. Kamala taŋa ya, i dzelewe a gà gər aka gà Isərayel ana ika miɗ gà iye Batsah kurum ŋa ya, aɗaba dukw məmbùrùɗà mesife kurum a.»

Batsah tùgùɗ aà məbara ba

17 I dəba ŋa ya, BATSAH kwa ŋa a gwaɗa a Musa: 18 « Zla batsah tùgùɗ ana ta ge nda ndzemde məvəɗa kur siŋgwe ya. Ge təv ana ti tike aaka ya ka, nda ndzemde məvəɗa kur siŋgwe asa mbaŋa. Ka tike aà ba ya, aɗaba məbàra ba. Ki tike a ka, aka magər ga petek ata nda təv mezle ɗa duwa ya, kà dza aɗəm yam. 19 Aɗaba gà Haruna nda gà ɓəza ŋgar ta berewe a aɗəm a ahər, nda sik tar aɗəm a fata. 20 Aɗaba i təv ana ti de a a ga petek ata ya ka, say ta barawa aɗəm kamala taŋa ya. Taŋa i ge dər kataya ka, aɗaba tə ta mata tsa. Kamala taŋa ya mbaŋa asa na ti de a təv məvàkà dukw ana ta vakawa aaka duwa aɗaba iye Batsah kurum ŋa ya ka, 21 say ta barawa gà ahər nda gà sik tar. Taŋa ka, aɗaba tə ta mata tsa. Dukw ata me ne i təv tar ka, məpala ahəm, aɗaba tar nda gà ɓəza tar ana ti te weye a aka miɗ mba tserdze ya aà biybiy.»

Mal ana a ze hwaŋŋa lele ya

22 Mbulum a gwaɗa a Musa: 23 « Zla wirdè dukw ana a ze hwaŋŋa lele, zləm ŋa mira, kamala megweɗe ya, gà atwa dizl dukw ana ta wene a ka, a ze a lele ya, agwada tsamakər, nda wirdè dukw duwa a riŋ a ze lele asa, zləm ŋa sinamum, agwada faɗ, dite dukuməŋa a riŋ zləm ŋa kanel, agwada faɗ asa mbaŋa, 24 nda atwa dizl dukuməŋa tə zalar kasiya, agwada tsamakər, nda gà gà mal uliviye litìr ndilik. 25 Ge mal gà dukw ata ŋgwal ŋa lele tsəɗaŋŋa, kə gawaya akaba gà wirdè ata kamala mala medè wirdè ana a gawuwa akaba ya. Mal ata ka, me ge tsəɗaŋŋa lele aà metike dər mburma a megemir.

26 Kə̀ gwatsakaya dər à gà ga petek ata nda gà sahər masəra ba gà Mbulum nda gà mburma ya, 27 nda gà tabə̀l, dite nda təv metìkè aaka lalampa, nda gà kàzlàŋà dze fit asa mbaŋa, dite asa ka, nda gà təv məvàkà aaka gà wirdè, 28 nda gà təv mezle ɗa a duwa nda gà asiŋ gà dukw megemir ŋa tserdze, nda gà batsah tùgùɗ nda təv metìkè aaka ŋa fit dze asa. 29 Na kataya ka, gà dukw ata ti ndze a tsəɗaŋŋa kuɗa, a ne a gà dukw megemir gà. Na wur ana megemir ŋgar i fata tsiye aka daha, aka ləm a təv ata tsəɗaŋŋa ndeyndey a ka, matsəɓatsəɓ gà ika gər ŋgar.

30 Gwatsakaya mal ata aà gà Haruna nda gà ɓəza ŋgar asa mbaŋa, tə ndza tsəɗaŋŋa, dite ti ne gà ɓəzla megemir gà kamala gà ɓəzla mandìvìŋ kuɗa ya. 31 Kamala taŋa ya na ki gweɗe a a gà Isərayel a: Araha mal aaha ka, biy mandza dər mburma a megemir nda gà dukw megemir ana i huɗ ga Batsah kurum ata ya ka, ma ndza tsəɗaŋŋa hiywe pəra. 32 Ka da mbùɗum aka ba mburma tsa. Ka da gawum aba gà dukw ŋgiɗ kamala naha ya asa tsa, aɗaba dukw ata ka, tsəɗaŋŋa. Kà pə̀rùm aà dukw ata kamala ana tsəɗaŋŋa ya mbaŋa asa. 33 Na wura aka gawa akaba gà duwa kamala taŋa ya, aka vəl a wur ana ŋgat gà slele ya ka, wele ata me dzeye i liwiŋ gà gwala ŋgar a.»

34 BATSAH kwa ŋa a gwaɗa a Musa asa: « Zla dukw ana a ze hwaŋŋa lele ya, kamala atwa sədake ya nda gà kwizir unika, nda galbanum, dite mal ana a ze ŋgwal ŋa lele ya. Ki live a ka, kalkal ilik na a tsahən a. 35 Ki ge a dər wirdè na a ze hwaŋŋa lele ya. Kə gawaya akaba nda slùwul kamala mala mege wirdè ŋa ya, nda dite a ne ŋgwal ŋa lele tsəɗaŋŋa ya. 36 Ndzək ihər a zaakwa, ka lə̀gər tìrèfìffe lele. Kà vaka dukw ata aka miɗ sahər masəra ba gà iye nda gà mburma i huɗ ga ata ta ge nda petek a, i təv melime ana ki lìmekwe akaba nda gà kurum a. Say kurum tekeɗe ka, sərum dukw ata ka, tsəɗaŋŋa lele. 37 Wirdè ata ki ge a ka, na a ze hwaŋŋa lele ya. Ka ta gwim kamala taŋa ya aɗaba gər kurum tsa. Taŋa me ne i təv kurum ka, dukw ana a ndza tsəɗaŋŋa aɗaba iye Batsah kurum ŋa ya. 38 Aɗaba na ku weke aka ge medzibe wirdè ata aà mezè dər à ba ŋgar ka, me dzeye i gwala kurum a.»