Mendizle 31

Tə zal a gà Bedzalel nda Wuhuliyabu

1 I fata ya asa ka, BATSAH kwa ŋa a gwaɗa a Musa: 2 « Kinehe sər dər ka, Yàa zla Bedzalel, kəla Wuri, kəla Huru ana i gwala gà Yuda ya, aà mege ga tsəɗaŋŋa ya. 3 Aɗaba Yàa ràhar aba nda Mèzite Mesife gà, nda metsehe, dite nda gà masəra duwa, ku mege aka gər gà megemir ana tserdze ya. 4 Ŋgat ka, a ge a mendzikiɗe ba gà dukw ŋgiɗ pampam, a ge a megemir biy gura nda gà ndzemde məvəɗa kur siŋgwe ana herrè ya, dite nda gà ndzemde kur siŋgwe. 5 Ŋgat ka, a sər məpàpə̀zà kur ana tsakala ŋa hinne ya, a geye ahər a gà mendzikiɗe ba gà duwa pampam aba aà kur ata. A pepez a gà aram lele. ŋgat asa ka, à ndìv a à megemir ŋa, ku mege awara tserdze.

6 Tar ka, nda Wuhuliyabu kəla Ahisamak, ana i gwala Dan a. Wele ata à zlèk a ŋgat. Dite gà misle ŋgiɗ riŋ pàmpam asa mbaŋa. A gà tar ata tserdze ya i vəl a tar masəra duwa nda metsehe, aɗaba ti ta ge a dukw ana i tsikik a tserdze: 7 Ga petek ata ŋgwal ŋa ya nda sàhər masə̀ràba gà Mbulum ata nda gà mburma, biy metike aɗəm məpala ahəm aka gər gà ɓele, dite nda gà dukw mahə̀ndə̀kà ŋa ikəka. Asa ka, nda gà dukw ana i ga petek ata ya tserdze, 8 gà tabə̀l ana ti dzèwiŋ aaka ɗaf nda gà kàzlàŋa tserdze. Asa ka, gà təv metìkè aaka lalampa malàmbàɗàŋa nda gura nda gà kàzlàŋa dze mbaŋa, dite nda gà təv məvàkà aaka dukw ana a ze hwaŋŋa lele ya, 9 nda gà təv mezle aaka ɗa a duwa aɗaba iye ya, nda gà kàzlàŋa tserdze, dite nda gà tùgùɗ ana batsah ŋa ya nda gà təv metìkè aaka ŋa mbaŋa, 10 dite nda gà petek ata ta mbè ŋgwal ŋa lele tsəɗaŋŋa, aɗaba Haruna ana ŋgat mala mandìviŋ kuɗa ya, dite asa ka, nda petek gà ɓəza ŋgar ana ta ge a dər megemir kamala gà ɓəzla mandìviŋ kuɗa ya, 11 nda gà mal magwàtsakàyà aà mburma, nda gà mal wirdè ana a ze hwaŋŋa lele ya, aɗaba ga ata tsəɗaŋŋa ya ya. Ta ge gà duwa tserdze ka, kamala ana i tsikik a mbaŋa.»

Pat mesifikaba

12 I dəba ŋa ya, BATSAH kwa ŋa a gwaɗa a Musa: 13 « Gwaɗa a gà Isərayel ka, ta bàba mesifikaba gà, aɗaba aà mene kamala mendzikiɗe ba dukw ana ika magər mə̀r nda kurum a, nda gà ɓəza kurum tserdze, aɗaba aà ka sərum ka, iye Batsah kurum ŋa, na a ndzək kurum kamala gà ɓəzla megemir gà ya. 14 Gwim metsehe aɗaba pat mesifikaba. Aɗaba pat ata ka, ŋgwal pat tsəɗaŋŋa aɗaba kurum. Ku mege weke na aka ge dukw ana ŋgwal a tsiye a pat ata ka, ta kìɗiŋa. Ku mege weke asa ka, na aka ge megemir a pat ata ka, mesife ŋgar me dzeye i təv gà gwala ŋgar a. 15 I huɗ mehinne ndilik a ka, gwim megemir kurum, ama mehinne matəsəla ŋana ka, pat mesifikaba, aɗaba iye. A pat ata ka, ku mege weke na aka ge megemir ka, ta kìɗiŋa.

16 Say gà Isərayel ta ge metsehe a pat mesifikaba ata. Ta ge mesifikaba i gwala tar tserdze. Taŋa ka, masəra ba gà mə̀r nda tar aà biybiy. 17 Pat mesifikaba ka, a ne kamala mendzikiɗe ba dukw ana ika magər mə̀r nda gà tar aà biybiy. Aɗaba i huɗ mehinne ndilik ŋana ya ka, iye Batsah kurum ŋa, i ge gəza mbulum nda gər ahəɗ, ama a pat mehinne matəsəla ŋana ka, i sifik ba, aɗaba Yàa ge megemir gà.»

Mbulum a dza gà beliŋ kur ana məpala ahəm ŋgar ikəka ya a Musa

(Məmà aka məpala ahəm 9:9-11)

18 I dəba ŋa ya, na BATSAH kwa ŋa a ndəv à mifefile a Musa ara ika gər kwite Sinay ya ka, a dzàrra à gà beliŋ kur a sula. Ama ika gà beliŋ kur ata sula ya ka, məpala ahəm Mbulum ikəka. Na a wetse aaka ka, Mbulum nda ahər ŋgar ŋa.