Sla gura ana ta ge ya
32
1 I dəba ŋa ya, gà mburma tə samata Musa aka ndze riŋ i kwite hinne, aka dara a təv tar a bise tsa ka, ti yahaba gər a təv Haruna. Ta gwaɗar: « Hitse, ki ge a mə̀r mbulum ana a ndze a mə̀r a aka miɗ a. Aɗaba Musa aaha ka, ŋgat na a ndzəkara kwa ika ahəɗ Ezipt ya ya. Araha kinehe ka, wura a sər dukw ana a ge riŋ ba a gər a tsa.»2 Haruna a gwaɗa a tar: « Ndzəkumara gà dasa gura ana i zləm gà məkəs kurum a nda biy gà ɓəza kurum nda biy gà dəm kurum a, kà ndzìkwimiŋara.» 3 Gà mburma ata tserdze ya, tə ndzəkaraha gà dasa i zləm tar a, tə da dərra a Haruna ya. 4 A gəs ihər tar a, a wulazl nda akwa, dite na a və̀ɗ sla gura ya. Aka ndəv ka, gà Isərayel ta gwa: « Naha na a ne mbulum ana a ndzəkara kwa ika ahəɗ Ezipt ya.»
5 I fata ya, Haruna a ŋgatar kamala taŋa ya ka, a ge təv məvəla aaka duwa aka miɗ ŋa a fata. I dəba ŋa ya ka, a zalawa a gà mburma: A gwaɗa a tar: « Ndidwe na megirive aɗaba BATSAH kwa ŋa ya.» 6 Ndidwe ŋa ata ka, ta wileyeha hedwe hedwe a fata, ta dul gà dukw ana ta dulawa ya, dite ta batsaya gà duwa aɗaba magàwà ba tar ata nda gà mbulum ata ya. Gà mburma ata tserdze ya tar riŋ mandzàyà ŋa, tar riŋ ti zim a dukw mezime, tar riŋ ti seye a gà dukw mese. Dite i dəba ŋa ya, ta hitse aà mbulum aà mege màhaw.
Musa a hama Mbulum aɗaba gà Isərayel
(Məmà aka məpala ahəm 9:12-14,25-29)
7 BATSAH kwa ŋa a gwaɗa a Musa: « Hitse aà mbulum, tar a bəɗ ika gər kwite ya. Aɗaba gà mburma aaha kà ndzəkara tar ika ahəɗ Ezipt ya ka, tàa nə̀s à ba tar, tàa ge bakal. 8 Kinehe tar tsəma tsəka, tàa ndaha ika vatwa gà ana i tsik a tar a. Aɗaba tàa ge ba sla gura. Tar riŋ ti dzer a gurmits a biye, tàa dular gà dukw ana a ze hwaŋŋa lele ya, ta gwaɗaba ika magər tar: Naha ka, mbulum kwa ana a ndzəkara kwa gà Isərayel ika ahəɗ Ezipt ya ya.»
9 BATSAH kwa ŋa ata a gwaɗa a Musa asa: « Yàa ŋgat a gà mburma ata, i sər tar lele, aɗaba tə tsala ba à segeme a gər a. 10 Kinehe ka, aka tsìɓeŋ. Viliŋ vatwa, i de a, i dzeye a à gà mburma ata. Ama aɗaba kər ka, i vilek a mawà ba, ki we a mayahaba gər gà mburma ŋa ŋgiɗ hinne asa.»
11 Ama Musa a hama a Mbulum Batsah ŋgar ŋa, a gwa: « ºbay, kər ka, Batsah gà ŋa. Kər na kà ndzəkara gà mburma yak ika ahəɗ Ezipt ya, kà zlak tar nda ahər yak ana ndzəɗa ŋa hinne ya. Aɗaba la na matsəɓatsəɓ a gik a hinne aka gər tar a? 12 Na ki ge a dukw kamala taŋa ya ka, gà Ezipt, ta gweɗe a ka, a ndzəkara tar ka, aà mesewere tar are, dite asa ka, aɗaba aà məbatsa tar aka gər kwite, aà medzeye à tar ika gər ahəɗ a ana, meme? Kər ka, miyak à matsəɓatsəɓ yak, dzala gà gər aà mimiyàk à mesewere are a gà mburma yak. 13 Dzala gà gər aka gà Abəraham nda Izak, dite nda gà Zakup, gà ɓəzla meslire yak. A tar ana kà mbaɗa a tar nda ahər yak a, kù gwaɗa a tar: I vile a kurum a mawà ba hinne kamala màwùsàwùs ana aà mbulum a. Aɗaba gà ahəɗ aaha tserdze ya, i tsik a kurum i sida ya, i vile a kurum ŋa, i vile a ka, a gà ɓəza kurum, a ne a biy tar aà biybiy.»
14 BATSAH kwa ŋa a tsaraka meheme Musa ata ka, a ma aka madzala mesewere are ana a tsik aka gər gà mburma ŋgar a.
Gà Isərayel ti sèwèr are agəra bakal tar ana ta ge ya
(Məmà aka məpala ahəm 9:15-21)
15 Musa a mbəɗ aba, a tarəra ika gər kwite ya. Nda gà beliŋ kur ata a ŋgat ihər sula. Gà beliŋ kur ata ka, mewetse ŋa ihər məpala ahəm Mbulum tseke sula məma. 16 Gà beliŋ ata ka, megemir Mbulum, mewetse dukw ana ika kur ata ya ka, biy Mbulum mbaŋa na a wetse ya.
17 Yesuwa a tsaraka gà mburma tar riŋ ta ŋgelek a duwa, tar riŋ ta ŋgeye a ba ka, a gwaɗa a Musa: « I tsarakara Mewideye duwa i təv mayahaba gər kwa ya ka, biy gà ɓəzla guvəl.»
18 Musa a gwaɗar aaka: « Kataya tsa. I tsarakara ka, miɓèzle Mewideye gà ɓəzla guvəl ana ta mba à gà wura ya tsa, ndagàtsa, biy gà na ti tize a à gà ɓəzla guvəl tsa asa mbaŋa. I tsaraka ka, dimis gà ɓəzla megirive.»
19 I təv ana ti ndzera bise nda təv mayahaba gər tar ata ya ka, Musa a ŋgataha a sla gura ata. A samata ka, gà mayahaba gər gà mburma ana tar ihər ta gìrìv a ya. I fata ya ka, a tsəɓ a Musa, à yè a aba beliŋ kur ata a bəɗ a. A bats beliŋ kur ata ɓirefiffe aà sik kwite. 20 A zla sla gura tar ata ta ge ya, a wulazl nda akwa, a lə̀gər dukw ata tìrèfìffe kamala gùfa ya. A vavaya dukw ata aka gər yam, a vəl a gà Isərayel, tə saya tserdze.
21 I dəba ŋa ya, Musa a wiz a Haruna: « Dukùla na naha gà mburma aaha ta gik a, na ka zlarra batsah bakal ŋa aaha aka gər tar a ya?» 22 Haruna a gwa: « Kamkam, Əbay gà, ma ta tsə̀ɓak tsa. Aɗaba kər kà sər na sik ndaw gà mburma aaha ta gewa bakal a. 23 Ta gweɗiŋ ka: ‘Ge a mə̀r mbulum ana a ndze a mə̀r a aka miɗ a. Aɗaba Musa aaha ka, wele ana a ndzəkara kwa ika ahəɗ Ezipt ya, kà sərakwa dukw ana a ger a riŋ ba a gər a tsa.« 24 Dite i gwaɗa a tar ka, ku weke na gura ŋgar a riŋ ka, me zliŋara. I fata ya ka, ti ndzìkiŋera gà dasa tar a. Dite i dəba ŋa ya, i dza a akwa, na i və̀ɗ sla ŋa ya.»
25 Musa a samata ka, Haruna na a miyak à gà mayahaba gər gà mburma ata aà mege dukw ana gəzləŋ tar a waya ya. Kamala taŋa ya, na a vəl vatwa a gà ɓəzla mene are tar, aà masawla aà tar a. 26 Musa a daha, a hitse aà guva hərmaga mayahaba gər tar ata ŋa, a gwa: « Wele ana a waya mazazama BATSAH kwa ŋa ya tserdze ka, ma dara a təv ga ya.» Tə tsaraka kàtaya ka, gà gwala Levi tserdze ti yaha ba gər, tə dara a təv ŋgar a. 27 A gwaɗa a tar: « Araha na dukw ana BATSAH kwa ŋa Mbulum gà Isərayel a gwa ya. Ku mege weke me tike akaba masalama ŋgar. Sùwayum dər ika magər mayahaba gər kurum aà hərmaga aà hərmaga, kà mbə̀ɗumara gər a. Ku mege weke tekeɗe, mà kəɗ damər ŋgar nda masla ŋgar, dite ndagàtsa biye mala hərmaga ŋgar.»
28 Gà gwala Levi ata ta ge dukw ana Musa a tsik a tar a. A pat ŋa ata ka, gà asləka gà mburma ti sle a dəbuw makər na ta bats a. 29 Kamala taŋa ya, Musa a gwaɗa a gà gwala Levi ata: « Mbakum na ki dzwim a ba aà megemir aɗaba BATSAH kwa ŋa ya, aɗaba ku weke na aka ge magəɗa tsa, aà məbatsa gà ɓəza kurum nda damər kurum a. Aɗaba taŋa, BATSAH kwa ŋa na a ta pise a kurum a ahəm mbakum a.»
30 Ndidwe ŋana ka, Musa a gwaɗa a gà mayahaba gər gà mburma ata: « Kàa gwim bakal hinne. Aɗaba taŋa i tsil a a təv BATSAH kwa ŋa kinehe, bəla i ŋgèle a kurumara məpəla à bakal kurum a.»
31 I fata ya ka, Musa a mbəɗ gər a təv BATSAH kwa ŋa, a daha, a gwaɗar: « Hey, Batsah gà ŋa, aɗaba gà mburma aaha ka, tàa ge bakal ka, hinne, batsah ŋa ndeyndey. Aɗaba tàa ge ba mbulum ŋgiɗ nda gura. 32 Ama kinehe ka, pəl a tar à bakal tar kamkam. Na kataya tsəka, mbete à zləm gà i huɗ wakita yak ana kà wetse aɗəm a.»
33 BATSAH kwa ŋa a gwaɗa a Musa: « Awaŋ, gà na ta ge bakal aka gər gà ya tserdze na i mbeteye a à gà zləm tar i huɗ wakita ga ya ya. 34 Da kinehe, ka ta ndzək gà mburma, ka da à tar aka ahəɗ ana i gwaɗak a. Sər dər ka, gawla gà a riŋ na a ndzek a aka miɗ a. Ama kəla ka, a pat ana mege seriye ga aka ndze aɗəm a ka, i ge a ter a seriye agəra gà bakal tar ana ta ge ya.»
35 I fata ya ka, BATSAH kwa ŋa aka vəl mesewere are a gà mburma hinne, aɗaba mazlə̀bà à sla gura ata Haruna a ge ya.