Mbulum a gwaɗa a Musa, tə da
33
1 I dəba ŋa ya ka, BATSAH kwa ŋa a gwaɗa a Musa: « Hitse, miyakum à təv aaha, kà dum, kər nda gà mburma ana kà ndzəkara tar ika ahəɗ Ezipt ya tserdze. Dum aka ahəɗ ana i vəl a gà Abəraham nda Izak, nda gà Zakup i sida ya ya. Aɗaba Yàa mbàɗà, i gwaɗa a tar ka, i ta vile a a gà ɓəza tar. 2 Kamala taŋa ya, i slirekehe a gawla gà, a ndze a kurum a aka miɗ, aà mazlàkà kurum. I delewe a gà Kananiya, nda gà Amuriya, nda gà Hittiya, nda gà Perizziya, nda gà Hivviya, dite nda gà Yebusiya fit. 3 Ki slwim a aà mede aka ahəɗ ata ka, maràhà ŋa nda awah nda amum a. Ama iye kəla ka, ki tèkwe akaba a nda gà kurum aà vatwa ya tsa, aɗaba a ge a ka, i ti dzeye a kurum a ika vatwa ya kweleŋ taf masakəŋa, aɗaba ana segeme i gər kurum ka, hinne ya.»4 I dəba ana gà mburma ata tə tsaraka bazlam ata ŋgwal ŋa tsiye ka, tə dza ba aà tuwa hinne, tàa tike aba ŋgwal dukw ana matsahəna ŋa ya asa tsa. 5 Aɗaba BATSAH kwa ŋa aka mbər metsìkè a Musa, a gwaɗar: « Da, gwaɗa a gà Isərayel ka, kurum ka, gà mburma ana segeme i gər tar hinne ya. Na kà tàkwa akabara aà vatwa ya nda gà iye dze ka, a ndze a ka, hinne tsa, kamala mege mbitsèkw are ya na i dzeye a à kurum a ya. Kinehe ka, ndzəkum ikaba gà ŋgwal gà matsahəna gà dukw kurum a. Dite i dəba ŋa ya ka, i sir a dukw ana i ge a nda kurum a.»
6 I fata ya ka, gà Isərayel tə ndzək ikaba gà dukw tar a aà sik kwite Hureb a, tàa dza akaba gà dukw ata asa tsa.
Ga ana ti lime akaba aɗəm a fata ya
7 I dəba ŋa ya ka, tə dza ba aka tseke ŋgiɗ asa. A təv ana tə ndza aɗəm a ka, Musa a zla mekiriwe ga petek duwa, a tike tsakalak aà mayahaba gər gà mburma ata ya. Tə zalar ka, ga ana ti lìme akaba aɗəm a ya. Ku mege weke na a yehe a malə̀mà akaba nda gà BATSAH kwa ŋa ya ka, a dere a i kə̀sà ata ya, a de a a təv ga ata ya. 8 Ku mege ndeɗime na Musa aka dara, aka da a ga ata ya ka, gà mburma ta hitse a aà mbulum ika biye ga hərmaga ga tar. Ti sèmete a Musa ana a de a a ga ata ya.
9 Ku mege ndeɗime fit na Musa aka da a ga ata ka, magùdugùdu ana kamala mendwiŋe ya a tərra dzeŋ, a hitse a aka biye hərmaga ata, gà BATSAH kwa ŋa ta fàfəl nda Musa. 10 I fata ya, gà mburma tserdze ta ŋgat a magùdugùdu ana a riŋ mehìtsè ŋa ika biye hərmaga ata ya ka, tə dza gurmits a biye, ku mege weke tar ata tserdze ika biye hərmaga ŋgar. 11 Gà BATSAH kwa ŋa ta fàfəl aba nda Musa ya ka, kamala ana gà mburma ta fàfəlawa aba nda masla ŋgar a. I dəba ŋa ya, Musa a mbəɗ gər a kə̀sà tar ata. Ama mala meslire ŋgar Yesuwa kəla Nuna ka, aka da ika biye hərmaga ga ata ya tə tsa, a ndza riŋ i fata.
Musa a hama a Mbulum aɗaba gà mburma ŋgar
12 Musa a gwaɗa a BATSAH kwa ŋa: « Araha, kù gweɗiŋ ka, ndza aka miɗ a gà mburma aaha. Ama kàa ɗifiŋ dər ka, weke na kà slər ŋgat, mìi de a məma ya tsa. Kà sər iye lele, dite ka zla iye ka, aà megemir ŋa ata. I dəba ŋa ya ka, kàa giŋ ŋgwal ŋa. 13 Yawwà, na kàa waya iye kamala taŋa ya ka, ɗifiŋ à vatwa yak, dite i sir a kər te, kər tekeɗe ka, ki sìkèh a à megiŋ ŋgwal ŋa te. Fə̀r aà gà mburma aaha mayahaba gər ŋa ya, ta mətsak gər tsa, aɗaba tar ka, gà mburma yak.»
14 BATSAH kwa ŋa a gwaɗar: « Ki tème a nda iye ŋa məma, ka dzala duwa tsa, i vilek a mesifikaba.»
15 Musa a gwaɗar aaka: « Na ki tème a ka, məma kaɗəŋ tsəka, ka ta vəl a mə̀r vatwa aà mì da i faha ya zukw tsa! 16 Meme na ti sir a ka, kà waya mə̀r nda gà mburma yak tserdze ya? Ti sir a ndzer ka, say na kàa dəɗ aka mə̀r, kàa ndzək ikaba mə̀r pampam nda gà mburma ana ika gər ahəɗ tserdze ya ya.»
17 BATSAH kwa ŋa a gwaɗa a Musa: « I ge a kamala ana kà tsikiŋ a tserdze, aɗaba i zla kər, i sər kər nda zləm yak ŋa dze.»
18 Musa a hama a Mbulum, a gwaɗar: « I waya ka, pètiŋ à ndzəɗa yak ana a za ba duwa tserdze, i ŋgatar.»
19 BATSAH kwa ŋa a gwaɗar: « I dek a ndaka miɗ nda meɗifek à ŋgwal gà ana i ge a a mburma ya nda mazàlà zləm gà Batsah kurum ŋa aka miɗ yak. I ge a ŋgwal ŋa a wele ana i ger ŋgwal ŋa ya, dite mburma a ndziŋ a are tsehe na Yàa waya medziŋ a are tsehe.» 20 A gwaɗar aaka asa ka: « Ki sle aà meŋget a a miɗ gà tsa. Aɗaba wele ana aka ŋgat are gà ya ka, a sle a aà mendze aà bəra nda mesife tsa. 21 Araha, təv naha bise nda iye, hitse aka gər kuvəl a fata. 22 I təv ana i petek a à ndzəɗa gà ya ka, i kèhe a kər a liwiŋ gà kuvəl nda ahər gà, haa a təv ana Yàa da iɗəm a ya dzekwiŋ. 23 Dite i dəba ŋa ya kuɗa ka, i zlèk a ahər ika are ya, ki ŋget a dəba gà kuɗa. Ama ka, ki ŋget a are gà tsa!«