Mendizle 34

Awiya beliŋ masula ŋa

(Məmà aka məpala ahəm 10:1-5; 7:1-5; 7:25-26)

1 BATSAH kwa ŋa a gwaɗa a Musa: « Papaza gà beliŋ kur sula kamala ana malahalah ŋa ya. I ta wetse aaka a gà bazlam ana ika malahalah ŋa ata kà bats a. 2 Hadzal ba ndidwe i mèkwède ka, ka tsəlaha aka gər kwite Sinay, ki ndze a riŋ i təv ga ika gər kwite ata. 3 Ka da tsalum akabaha nda wura aka gər kwite ata tsa, wura ilik ma tike sik aka ahəɗ kwite tsa asa. Ku mege gà təmaŋ nda gà awak, nda gà sla tekeɗe, ta kə̀v tar ndàra aà sik kwite ata tsa asa mbaŋa.»

4 I fata ya ka, Musa a papaza gà beliŋ kur ata sula ya kamala ana malahalah ŋa ya. Ndidwe ŋana i mèkwède hedwe ka, a wile aka gər kwite Sinay ata kamala ana BATSAH kwa ŋa a tsiker a. A ndzək dər gà beliŋ kur ata sula ya a ahər. 5 I fata ya tsam ka, BATSAH kwa ŋa a tarəra nda magùdugùdu ya aka gər kwite ata ya, tə ndza akaba nda ŋgat. Musa a zal a zləm BATSAH kwa ŋa i fata. 6 BATSAH kwa ŋa a dar ndaka miɗ, a gwaɗar: « Iye ka, Batsah kurum ŋa. Iye asa ka, Mbulum ana i ge a ŋgwal ŋa a gà mburma, ti ndziŋ a are tsehe ya. I ge a matsəɓatsəɓ aka gər mburma bise tsa. I ge a ŋgwal ka, hinne, nda mege dukw ana ndzer a. 7 I ge a ŋgwal ŋa a gà mburma ka, hinne wa ahər kəla wa ahər kəla haa dəbuw. I gis a gəzləŋ aɗaba bakal, nda gà dukw ana gà mburma ta ge a ŋgwal ŋa tsa tserdze ya, agər ana ta gəs aà iye ahəm tsiye. Ama kəla ka, i ge a seriye asa mbaŋa. Na wura a fər aà iye kamala za ya ka, i ge a seriye bakal ŋgar nda gà ɓəza ŋgar ŋa, haa wa ahər kəla wa ahər kəla makər kige tsa faɗ.»

8 I fata ya tsara ka, Musa a ye ba aka ahəɗ, aà mazlə̀bà à Batsah ŋgar ŋa. 9 I dəba ŋa ya a gwa: « Batsah gà ŋa, na kàa giŋ ŋgwal ŋa ka, kamkam, dara, kà ndzàma a tar aka miɗ. I sər, segeme i gər tar ka, hinne. Ama ku mege kataya tekeɗe ka, pəl a mə̀r a bakal dukw ana mege ŋgwal ŋa tsiye, dite kà ne à mə̀r kamala gà mburma yak a.»

Məma aka masəra ba

10 BATSAH kwa ŋa a gwaɗa a Musa: « I waya ka, i gis a masəra ba nda gà kurum ika təv are gà mburma yak tserdze. I ta ge a gà dukw mene aà mburma ana aka ge ba, wura aka ŋgatar ika gər ahəɗ nda gà ika magər gà mburma ana pampam a ilik tsidze ya. Gà mburma ana kurum mandza ŋa nda gà kər a, ta ŋget a a megemir gà ana i ge a ya. Dukw ana i ta ge a nda kurum a ka, ta giŋ a magəɗa hinne. 11 Gəsum ahəm à dukw ana i tsik a kurum a mbakum a. Araha, i dìgìz a gà Amuriya nda gà Kananiya, dite nda gà Hittiya, nda gà Perizziya, nda gà Hivviya nda gà Yebusiya fit ika miɗ kurum a. 12 Ama kəla ka, gwim metsehe, ka ta dzum akaba ahəm nda gà mburma ana ika ahəɗ ata ki dwim a aɗəm a ya tsa kəla, aɗaba ti ti ne a kurum a dukw mendife sik. 13 Ama ka, mbazlum à gà təv ana ta batsawa aaka duwa a fəla tar a. Kà haɓum à gà kur tar ana ti ne dər mbulum tar a, haɓum à gà mendwiŋe tar ana tə dzawa aaka gà fùtu gà fəla tar a.

14 Ka ta dzum gurmits a bəɗ a fəla gà misle ŋgiɗ tsa, aɗaba iye Batsah kurum ŋa ana zləm gà mala səlak a. Iye ka, Mbulum ana i yehe a mawàyà ba ka, nda kurum a ɗekɗek. 15 Gwim metsehe, ka ta dzum akaba ahəm nda gà mburma ana ika ahəɗ ata ya tsa. Na bəla ti zezem a matawala fəla tar ata, na bəla ta viler a dukw taf ana ta kə̀ɗawa a mbulum tar a, dite bəla ti zel a kurum a aà mazəma dukw fəla tar ata, ti ne dər mbulum tar a ka, ti dzeye à kurum a ika vatwa gà ya. 16 Na bəla ki ndzìkwim a gà dəm tar a gà ɓəza kurum gà asləka ŋana, gà məkəs ata ka, ta bene a gà ɓəza kurum gà asləka ŋana aà mege aà iye ɗaf, ti dze a gurmits a bəɗ a fəla tar ata.

17 Kà və̀ɗum fəla ndzemde ana ta wulazlawa nda akwa ya, aɗaba kurum tsa.»

Megirive ana ta gə̀rə̀v kəla mìve ya

18 « I fata ya ka, gəsum megirive peŋ ana giɗe ikəka tsiye. I huɗ mehinne təsəla ya ka, ka zəmum ɗaf ana giɗe ikəka makwàsà ŋa ya tsa. Gwim kamala ana i tsikik a ahər a, məpaslà ahər ŋana a ge ahər a ba ya ka, aà kiye masasa adak (Abiba), aɗaba aà kiye ata na kà dumara ika ahəɗ Ezipt ya ya.

19 Gà mburma gà asləka ŋa ana tə lah mewe tserdze ya ka, gà biy ga. Kamala taŋa ya, ku mege gà malùkwara gà dukw gənaw kurum ana asləka ŋa ya, gà sla nda gà təmaŋ nda gà awak tserdze. 20 Malùkwara hezweŋe ka, mbùrùɗum nda vugul təmaŋ kige tsa vugul awak. Na kàa mbùrùɗum tsəka, muruɗum mimwirwiɗe. Ki mbìrìɗwim a malùkwara kəla ana asləka ŋa ya mbaŋa. Kamala taŋa ya, wura ma ta dara aka miɗ gà ya ka, ze duwa i ahər tsa.

21 Gwim megemir mehinne ndilik, ama aà mehinne təsəla ŋana ka, sìfìkwim ba, ku mege akahər mifìte nda gà akahər masasa ŋa tekeɗe mbaŋa.

22 Gwim megirive Pantakwasta akahər ana daw a da a bəra suput ŋa ya. Ama megirive məpala gà manàhà mawà gà dizl ka, a ta ge a ba ka, aka mandəvandəv mive. 23 Sik makər i huɗ mive ya na gà asləka ti dere a, ta petere a aba aka miɗ gà, Batsah kurum ŋa, iye ºbay Mbulum gà Isərayel a. 24 I ti delewe a gà slala ŋgiɗ ika miɗ kurum a, Yàa səkah a kurum à kwiye kurum asa mbaŋa. Wura a riŋ na a ta ge aà kurum guvəl a asa tsa, i təv ana ki dwimera a məpàtà aba aka miɗ gà Mbulum Batsah kurum ŋa ya ka, sik makər na i huɗ mive ya fit a.

25 Ka ta vilwimiŋ məmbəz dukw ana kì kìɗwimiŋ biy taf a akaba nda ɗaf ana giɗe ikəka makwàsà ŋa ya tsa. Dukw ana kə̀ kuɗum aà megirive Paska ya ka, ma həna haa a mèkwède tsa.

26 Ndzəkumara gà dukw kurum ana gà ŋgwal ŋa i huɗ gà dukw kurum ana kà palum i bəɗ a, a ga gà, Mbulum Batsah kurum ŋaya. Ka ta dwim vugul nda awah mama ŋgar tsa.»

Yemere Musa ana à div a ya

27 I dəba ŋa ya, BATSAH kwa ŋa a gwaɗa a Musa: « Wetse gà bazlam ata tserdze. Aɗaba i huɗ gà bazlam aaha ya na kə̀ gə̀sama masla nda kər, dite nda gà Isərayel tserdze ya.»

28 Gà Musa nda BATSAH kwa ŋa tə ndza riŋ ika gər kwite i fata miveke dzik faɗ, nda mehinne dzik faɗ asa. Aka zəm dukw mezime tsa, aka sa yam tsa asa mbaŋa. A wetseye gà bazlam masəra ba ata aka gà beliŋ kur ata. Taŋa gà bazlam məpala ahəm pampam kurwa.

29 Musa a tarəra ika gər kwite Sinay ya ka, nda gà beliŋ kur ata a wetse aaka məpala ahəm a sula aà ahər ŋgar. I fata ya ka, yemere ŋgar a dəv, aɗaba ana ta fàfəl nda Batsah ŋgar ŋa ya. Ama ŋgat à gər ŋgar ka, a sər ahər tsa. 30 Gà Haruna nda gà asiŋ gà Isərayel ta ŋgatar. I fata ya ka, yemere ŋgar aka mbəɗ aba, a dəv dzaydzay. Tsam ka, ta ge magəɗa aà mesirikaha a təv ŋgar. 31 I fata ya ka, Musa a zal a tar. Gà Haruna nda gà bàba gà mburma ana ika magər tar a tserdze, tə dara a təv ŋgar a. Musa a fàfəl a tar. 32 I dəba ŋa ya ka, gà Isərayel tserdze ti sìrìkaha a təv ŋgar. A tsik a tar dukw ana Batsah tar ŋa a tsikerra ika gər kwite Sinay ya tserdze.

33 I dəba ana gà Musa ta fàfəl aba ya, a ndəv a ka, a zla petek, a ndìwìɗ aka yemere ŋgar aaha. 34 Ku mege ndeɗime na Musa aka da aka miɗ Batsah ŋgar ŋa aà mifefile akaba ya ka, a təv ana a dere a bəɗ a ya ka, a zlawa dukw makàhà yemere ŋgar aaha ika are ya, na dite a dere a, à me a à dukw ana Mbulum a tsiker a, a gà Isərayel a. 35 I fata ya ka, gà Isərayel ta ŋget a a yemere ŋgar ana à div a ya. I dəba ŋa ya ka, a màwa à petek aka yemere ŋgar, dite à mbìɗ a gər a təv BATSAH kwa ŋa aà məfàfə̀là akaba asa.