Mendizle 35

Məpala ahəm agəra pat mesifikaba

1 Musa a yaha gər a gà Isərayel tserdze, a gwaɗa a tar: « Araha na dukw ana BATSAH kwa ŋa a gwaɗa a kurum, gwim a: 2 Mehinne ndilik ka, ki gwim a megemir. Ama pat matəsəla ŋana ka, pat mesifikaba BATSAH kwa ŋa. Taŋa me ne biy ŋgar pam. Ku weke na aka ge megemir a pat ata ka, ta kiɗ a ŋgat. 3 Ka ta dzum akwa a bəɗ i ga i ma kurum tsidze na a pat mesifikaba ata ya.»

Dukw ana gà Isərayel ana ta vəl aà mege dər təv mendze a BATSAH kwa ŋa ya

4 I dəba ŋa ya asa ka, Musa a fàfəl a gà Isərayel tserdze. A gwaɗa a tar: « Araha na dukw ana BATSAH kwa ŋa a gwa, ki gwim a ya: 5 Ndzakumara gà dukw taf kurum a BATSAH kwa ŋa ya. Ku mege weke tserdze na gəzləŋ ŋgar aka ŋgaya ba aà məvəla dukw taf ata ya: Gura nda gà ndzemde məvəɗa kur siŋgwe ana herrè ya, nda ndzemde mavə̀ɗà kur siŋgwe, 6 nda gà slewize ana gà mewetse ŋa zlirmetinwe zlirmetinwe ya, naha nduzzwa, nda gà na a ndza ndizze ndeyndey a, dite nda slewize herrè ŋana, nda gà petek ŋgùz awak, 7 nda gà bagwa hàgwàlà təmaŋ ana ta bah ahər duwa nduzzwa ya, dite nda gà bagwa ana ndzəɗa iɗəm hinne ya, nda gà aram dizl davanah, 8 nda mal məvə̀tà lalampa, nda mal magwàtsakàyà aà duwa kige tsa aà mburma, nda mal wirdè ana tə dùlawa, a ze hwaŋŋa lele ya, 9 i dəba ŋa ya asa ka, gà kur kurnalin nda gà kur ŋgiɗ ana tsakala ŋa hinne, à sìkim a ba tsiye, tə dzawa aà petek megemir nda gà kìywa ika gəzləŋ mala mandəva kuɗa a Mbulum a.»

Kàzlàŋà mege ga ana tsəɗaŋŋa ya

10 « Gà mburma ana ika magər kurum tserdze tə sər megemir a ka, tə dara, ta ge dukw ana BATSAH kwa ŋa a gwa, gwim a: 11 Mekiriwe ga petek ata ti kiriw aɗaba Mbulum a ka, nda ga petek ŋa, nda petek metike aaka ŋa, dite nda təv magəsa ŋa aba, nda gà dizl ŋa, dite asa ka, nda gà dizl ana ta gəlaw aba ya, nda gà təv sik mendwiŋe magər, 12 asa ka, sahər ata nda gà zəva mazla dər ŋa ihər nda dukw mahə̀ndə̀kà ŋa ikəka nda petek ana metìkè ŋa i huɗ ga ya, 13 gà tabə̀l nda gà ɗaf ana ta vəlawa a Mbulum a, gà zəva ŋa, dite nda gà kàzlàŋa ŋa tserdze, 14 təv metìkè lalampa nda gà kàzlàŋà dze nda gà làlàmpà ŋa, dite nda gà mal ana ta mbìɗ a à lalampa aà mivète ya, 15 dukw madùl aɗəm dukw ata a ze hwaŋŋa ya nda gà zəva ŋa dze, nda gà mal makwàtsakàyà aà duwa, nda gà mal wirde ana tə dùlawa, a ze hwaŋŋa lele ya, dite nda gà petek ana ti tike a aka biye hərmaga mekiriwe ga petek ata ya, 16 təv məvàkà aaka duwa ka, ta gəlaw aba gà ndzemde na ti tike aaka ya, nda gà zəva mazla dər ŋa, dite nda kàzlàŋà ŋa tserdze, nda gà tùgùɗ, nda təv metìkè aaka ŋa, 17 gà petek ana ti ler tits i huɗ gà ga ata ya nda gà mendwiŋe, dite asa nda gà təv sik ana ti tike aà gà mendwiŋe ya, nda gà petek ana ika hərmaga ga ata tsara ya, 18 dukw madànà ga petek ata tsəɗaŋŋa ya, nda gà dukw madànà gà mendwiŋe ŋana nda gà liɓir ŋa tserdze aà mege dər megemir i mekiriwe ga petek ata ya, 19 nda petek ana tsəɗaŋŋa, aruwaŋ ihər tsiye, aɗaba Haruna ana ŋgat mala mandəva kuɗa a Mbulum a, nda gà petek gà ɓəza ŋgar ana ta ge a dər megemir mandəva kuɗa a Mbulum a.»

Gà mburma ana tə dza dukw taf a

20 I dəba ŋa ya, gà Isərayel tserdze ta miyak à Musa, tə da. 21 Ku mege weke na gəzləŋ ŋgar aka hitse aà məvəla ŋa ya, a sasar, a vile a nda maŋgayaba ya ka, ta mbəɗara gər a, tə ndzəkaraha dukw taf a BATSAH kwa ŋa, aà megèr dər təv ana a tsahən ahər a nda gà megemir ana i huɗ ŋa ya tserdze, ku mege agəra gà petek ana tsəɗaŋŋa pam a tekeɗe. 22 Gà asləka nda gà məkəs, ku mege weke na gəzləŋ ŋgar a waya məvəla dukw taf a, tə da akabara, tə ndzəkara gà matsərəɗ mandza a hìtir a, nda matsərəɗ ana ika ɓəza ahər a, nda gà dasa, nda gà tsitsirɓe, dite nda gà gura ya pampam hinne. Ku mege weke a vəl gura biy taf kamala ana a vəl aɗaba BATSAH kwa ŋa ya. 23 Ku mege weke na slewize ŋgar a riŋ ana mewetse ŋa zlirmetinwe zlirmetinwe ya, naha nduzzwa, nda gà na a ndza ndizze ndeyndey a, dite nda gà slewize herrè ŋana, nda gà petek ŋguz awak, ndagàtsa asa bagwa hàgwàlà təmaŋ ana ta bah ahər duwa nduzzwa ya, nda bagwa ana ndzəɗa iɗəm hinne ya tserdze, tə ndzəkara. 24 Ku mege weke na a sle a aà mivile ndzemde məvəɗa kur siŋgwe herrè ŋana, nda gà ndzemde məvəɗa kur siŋgwe aɗaba Batsah ŋgar ŋa ya ka, tə̀ ndzəkara. Ku weke na dizl ɓile ŋgar a riŋ aà gà megemir ŋgiɗ a pampam ka, tə ndzəkara. 25 Gà məkəs ana tə sər malàmà slewize ya tserdze, tə lamaya gà slewize ata nda ahər tar ŋa, tə ndzəkara gà slewize ata tə lamaya. Slewize ka, gà na mewetse ŋa zlirmetinwe zlirmetinwe ya, naha nduzzwa, nda gà na a ndza ndizze ndeyndey a, dite nda slewize herrè ŋana asa mbaŋa. 26 Gà məkəs ana tə sər malamaya ŋa, ta vəl ba tar a tserdze ya, tə lama ŋguz awak.

27 Gà na gà bàba ŋa ya ka, tə̀ ndzəkara gà kur kurnalin a nda gà kur ŋgiɗ ana tsakala ŋa hinne, à sìkim a ba tsiye aà mandza aà petek megemir mala mandəva kuɗa a Mbulum nda na aà kìywa ika gəzləŋ a, 28 nda gà mal məvə̀tà lalampa, nda gà mal magwàtsakàyà aà duwa, dite nda gà mal wirde ana tə dùlawa, a ze hwaŋŋa lele ya. 29 I fata ya ka, gà Isərayel gà asləka nda məkəs tserdze, ta vəl dukw taf məfàrà ŋa aɗaba BATSAH kwa ŋa. Aɗaba gəzləŋ tar a ŋgaya ba aà məvəla dukw ata ta vəl a BATSAH kwa ŋa ya kamala ana a tsik a Musa ya tserdze.

Tə zal a gà Bedzalel nda Wuhuliyabu aà megemir ŋa

30 I fata ya ka, Musa a gwaɗa a gà Isərayel: « Sərum dər ka, BATSAH kwa ŋa aka zla Bedzalel kəla Wuri, dite ŋgat kəla Huru ana i gwala Yuda ya, aà mege ga ata. 31 Aka ràhar à Mezite Mesife Mbulum a ba nda masəra duwa nda mege metsehe, dite nda masəra megemir, ku mege awara tekeɗe ya tserdze. 32 A liveye a gà duwa, a ge a megemir i gura nda ndzemde məvəɗa kur siŋgwe ana herrè ya nda gà ndzemde məvəɗa kur siŋgwe. 33 ŋgat ka, a sər məpàpə̀zà kur ana tsakala ŋa hinne ya, a geye ahər a gà mendzikiɗe ba gà duwa pampam aba aà kur ata ya. A pepìz a aram lele. ŋgat asa ka, à ndìv a à megemir ŋa, ku mege awara tserdze. 34 Tar nda Wuhuliyabu kəla Ahisamak ana i gwala Dan a. BATSAH kwa ŋa aka vəl a tar masəra duwa aka gər mesìnìkè à duwa a gà misle ŋgiɗ. 35 Aka vəl a tar masəra duwa ka, hinne. Aɗaba tar ata ta ge ku megemir məpàpə̀zà kur ata tsakala ŋa hinne ya, nda gà maŋgara ŋa, dite nda maɗə̀mə̀kà ŋa asa, nda gà slewize ana gà mewetse ŋa zlirmetinwe zlirmetinwe ya, naha nduzzwa, nda gà na a ndza ndizze ndeyndey a, dite asa ka, nda slewize herrè ŋana. Ti sle a aà mege ŋa nda gà malə̀mbaɗà gà dukw ata tserdze ya.»