Mendizle 36

1 « Gà Bedzalel nda Wuhuliyabu nda gà asiŋ gà ana gà ɓəzla metsehe tserdze BATSAH kwa ŋa a vəl a tar masəra duwa a gəzləŋ tar a, say ta ge dukw tserdze ka, aà megemir i ga ata tsəɗaŋŋa ya, kamala ana BATSAH kwa ŋa a tsik a tar a.»

Dukw taf ana gà Isərayel tàa ndzəkara ya ka, a sle aà megemir ŋa tserdze

2 I dəba ŋa ya, Musa a zal a gà Bedzalel nda Wuhuliyabu, dite nda gà mburma ata gà ɓəzla metsehe BATSAH kwa ŋa a vəl a tar masəra duwa ya tserdze, ku mege weke na gəzləŋ ŋgar aka waya megemir ŋa, a gwaɗa a tar: « Dum a təv megemir, ki gwim megemir ŋa.» 3 Tə daha ka, ta ŋgat gà dukw megemir i təv Musa ya tserdze, aɗaba dukw taf gà Isərayel ana tə ndzəkara aà mege dər ŋgwal ga ata tsəɗaŋŋa ya. Ama kəla pat i mekwede, gà mburma tə dawaha à gà dukw taf tar ana ta vəl a, a təv Musa. 4 Gà na ti sle aà megemir ŋa ya, dite ta gewa gà megemir gà ŋgwal gà ga ata tsəɗaŋŋa ya tserdze, tə samata kataya ka, ta miyak à gà megemir tar ata təma, 5 tə dara a təv Musa ya, ta gwaɗar: « Gà mburma riŋ tì ndzikere a duwa ya ka, hinne, à zè a i gər a biy na ki gekwe a dər megemir a BATSAH kwa ŋa ya ana, meme?» 6 Musa a gwaɗa a tar: « Ta mayaha ahəm a gà mburma tserdze, ta gwaɗa a tar ka, ku mege asləka ŋa, kige tsa məkəs ŋa ka, ta miyak à mandzə̀kàra gà dukw taf tar aà mege dər ga BATSAH kwa ŋa ya asa tsa.» Kamala taŋa ya na ta pala ahəm a mburma ya. Daga aà pat ata ya, tə ndzəkara gà dukw ata ya asa tsa. 7 Ama dukw ana tàa ndzəkara ndeɗiŋa ya ka, a sle aà megemir tserdze, a beha hinne asa mbaŋa.

Mege mekiriwe ga petek ata ti kiriw aɗaba Mbulum a

8 Gà na ika magər mburma ata tə sər duwa hinne ya, ta ge mekiriwe ga petek ata ki kiriw aɗaba Mbulum a. Ta ŋgarawa gà ndura kurwa, biy gà slewize ana mewetse ŋa zlirmetinwe zlirmetinwe ya, naha nduzzwa, nda gà na a ndza ndizze ndeyndey a. Ta mbeye akaba nda slewize herrè ŋana asa mbaŋa. Ta ge aaka mendzikiɗe ba gà gawla Mbulum. 9 Ti live zubul ndura ŋgiɗ tsegwelek dzik səla gəra tsamakər. Zlàbàtum ŋa ka, tsegwelek faɗ. Ku mege ndura wara tekeɗe, tar kalkal ilik. 10 Tə ɗàmàkaya akaba gà ndura ə̀zləm a təv ilik ŋa. Tə ɗə̀mə̀k aba gà ndura ŋgiɗ ə̀zləm kataya asa mbaŋa. 11 Ta mbeyer petek ana a ndza zlirmetinwe zlirmetinwe ŋa ata ika ahəm ika ahəm a, aka tseke biy ŋgiɗ ana tə ɗamaka akaba ilik a. Ta ge à gà na a gaw aba i dəba ŋa ya ya kataya asa mbaŋa. 12 Ta paɗaya gà petek ata ka, dzik əzlə̀m aka ahəm ndura ŋgiɗ ilik. Ta paɗaya dzik ə̀zləm asa aka tsaka ŋana, tə gaw aba nda biy ŋgiɗ sula ya. Gà dukw ata ŋgelew ŋgelew ika ahəm ŋa ya ka, ta mbè akaba sirsir lele mbaŋa asa. 13 I dəba ŋa ya gà Bedzalel ta ge gà dukw magəsa aàba duwa nda gura dzik ə̀zləm nda gura asa, aà magawa aba gà ndura ata sula a təv ilik ŋa.

14 I dəba ŋa ya ka, ta ŋgar ndura nda ŋguz gà awak aà mege dər ga pat aka ga petek ata malahalah ŋana ya. Ta ge biy ndura kurwa gəra ilik. 15 Zùbəl ndura ŋa ka, tsegwelek dzik makər. Zlàbàtum ŋana tekeɗe, tsegwelek faɗ. Gà ndura ata tserdze ya ka, kalkal fit dze. 16 I dəba ŋa ya, tə ɗə̀mə̀k aàba gà ndura ə̀zləm meɗìmike. Ta geye à gà ndura ndilik ŋa aaha kataya asa mbaŋa. 17 Ta paɗaya slewize ata ŋgelewlew a dzik ə̀zləm aka guva ndura ana tə ɗə̀mak aàba ya ilik. Ta paɗaya dzik ə̀zləm ata təv maɗə̀mə̀kà aàba masula ŋana asa. 18 Ta geye gà dukw magəsa ŋa aba nda ndzemde məvəɗa kur siŋgwe dzik ə̀zləm, aà magàwà aàba gà petek ata a təv ilik ŋa.

19 Ti tike bagwa hàgwàlà təmaŋ ata ta bah ahər duwa nduzzwa ya, aka gər ga petek ata. Aka gər ŋa ata ka, ti tike aaka bagwa ana ndzəɗa iɗəm hinne ya mbaŋa asa.

20 I dəba ŋa ya, gà Bedzalel ta papaz dizl davanah kamala slə̀làh a, aà mehìtsè dər aà mà gəs mekiriwe ga petek ata ti kiriw aɗaba Mbulum a. 21 Zùbəl dizl ata ka, tsegwelek kurwa. Zlàbàtum ŋa tekeɗe, tsegwelek ilik nda mezehe ŋa. 22 Dizl ilik ka, ta ge ahər təv sik sula sula aà mehitse dər ŋa a biye. Kamala taŋa ya na ta geye aà gà dizl ata aà mehitse dər mekiriwe ga petek ata tserdze ya. 23 Tə dza dizl dzik səla ndaka tseke gular. 24 Ta ge sik aà gà dizl ata dzik faɗ nda ndzemde məvəɗa kur siŋgwe herrè ŋana. Dizl ilik ka, sik ihər sula ndaka dukw magəsa ŋa ata. 25 Ta ge dizl dzik səla ndaka tseke yam mekiriwe ga petek ata, 26 nda gà sik ŋa ihər dzik faɗ biy ndzemde məvəɗa kur siŋgwe herrè ŋa, sula kəla dizl ilik tserdze asa mbaŋa. 27 Ta geye gà dizl ndilik ndaka dəba mekiriwe ga petek ata a mbe ndàra aka tseke pat ana à dìɗ a ya. 28 Tə səkah à gà dizl sula nda aà guva nda aà guva ndaka dəba mekiriwe ga petek ata ya asa. 29 I fata ya ka, gà dukw magəsa aàba rèhhe ŋana ka, a mbe ndàra a bəɗ ŋana. Gà dukw magəsa ŋa ata rèhhe ya ka, a riŋ ndaka dala gər ŋa nda təv matsərəɗ duwa. Kamala taŋa ya na ta ge gà dizl ata tseke sula məma ya. 30 Gà dizl duwa tar riŋ tsamakər nda gà sik ŋa biy ndzemde məvəɗa kur siŋgwe herrè ŋa ata. Ta ge gà sik ŋa kurwa gər a ndilik, aɗaba tə dza sik sula aà dizl tserdze.

31 I dəba ŋa ya, gà Bedzalel ta làmbaɗa gà sla aram dizl davanah ə̀zləm a gəlaw aba gà dizl ata tserdze ya, ndaka tseke ŋgiɗ ilik. 32 Magə̀làwà dizl ə̀zləm ndaka tseke aaha asa ka, ta gəlaw aba gà dizl ə̀zləm ndaka tseke ana nda dəba mekiriwe ga petek ata a mbe a ndara aka tseke pat ana à dìɗ a ya asa mbaŋa. 33 Ta gəlaw aram ana ika magər a, haa a ndze aà dizl ana ika tseke ŋgiɗ a. 34 Ta mbe sla aram ata nda gura. Ta və̀ɗ dasa gura aà təv magəsa sla aram ata asa mbaŋa.

Petek matəzla ikaba ga ata tsəɗaŋŋa ya

35 Gà Bedzalel ta ge petek matəzla ikaba ga ata nda gà slewize ana gà mewetse ŋa zlirmetinwe zlirmetinwe ya, naha nduzzwa, nda gà na a ndza ndizze ndeyndey a. Ta mbeye akaba nda slewize herrè ŋana asa. Na a ge ka, gà ɓəzla masəra maŋgara petek. Ta ge aaka mendzikiɗe ba gà gawla Mbulum. 36 I dəba ŋa ya, ta ge gà mendwiŋe faɗ nda dizl davanah. Ta mbe ahər gura aà dəba ya. Təv metìkè ŋa ahər tekeɗe ka, biy gura. Ta geye a ahər gà təv sik faɗ nda ndzemde məvəɗa kur siŋgwe herrè ŋana.

37 Naha aka ndəv ka, gà Bedzalel ta ge petek aà mahə̀ndə̀kà dər a hərmaga ga petek ata ya. Ta ge ka, nda gà slewize ana gà mewetse ŋa zlirmetinwe zlirmetinwe ya, naha nduzzwa, nda gà na a ndza ndizze ndeyndey a. Ta mbeye akaba nda slewize herrè ŋana. Taŋa ka, mewetse ŋa. Maŋgara ŋa tekeɗe, lele mbaŋa. 38 I dəba ŋa ya ta geye gà mendwiŋe ŋa ə̀zləm, aà metike ahər petek ata ya, nda gà dukw metìkè aaka ŋa dze, ta gəlaw aba nda gura. Gà təv sik ŋa ə̀zləm, ta ge nda ndzemde məvəɗa kur siŋgwe.