Mendizle 37

Sahər masəra ba gà Mbulum nda mburma

1 I dəba ŋa ya, Bedzalel a ge sahər masəra ba gà Mbulum nda mburma ata ka, nda dizl ɓile. Ti live zubul ŋa ka, tsegwelek sula nda mezehe ŋa. Zlàbàtum ŋa tekeɗe, tsegwelek ilik nda mezehe ŋa. Dzəgəɗaf ŋana tekeɗe, tsegwelek nda mezehe ŋa asa mbaŋa. 2 A mbe nda gura lele nda huɗ ŋa, dite nda bəra ŋana asa dze. A ler nda mewetse gura ika ahəm ŋa tits mbaŋa. 3 A vaɗar gà dasa gura aka guva aka guva tseke faɗ dze. A dzar gà dasa sula aka tseke ŋgiɗ ilik, a dzar sula aka tseke ŋgiɗ aaha kamala taŋa ya asa. 4 A papəza gà zəva dizl davanah sula, a mbe ahər gura aà dəba ya. 5 A slalaya à gà zəva ata i dasa ana aà guva sahər ata ya, ti zlewe a dər. 6 A ge aaka dukw mehìndìkè ŋa nda gura lele. Zùbəl ŋa ka, tsegwelek sula nda mezehe ŋa. Zlàbàtum ŋa tekeɗe, tsegwelek ilik nda mezehe ŋa mbaŋa asa. 7 A və̀ɗ mendzikiɗe ba gà gawla Mbulum nda gà gwezleviyek aà tar sula. A ge aka gà ahəm dukw mehìndìke aaka ŋa ata sula məma. Ta və̀ɗ ka, nda gura ɗekɗek. 8 Gawla Mbulum ata ka, ilik a ndze a aka tseke ŋgiɗ, dite i ŋgiɗ aaha asa ka, a ndze a aka tseke ŋgiɗ aaha asa mbaŋa. Gà mendzikiɗe ba gà gawla Mbulum ata ta gaw ba nda dukw mahə̀ndə̀kà ŋa ata i təv ilik ŋa tserdze. 9 Gà gawla Mbulum ata tə ndzək gà gwezleviyek tar ndàra a mbulum aà mege dər sìsiye aka dukw mehìndìkè a sahər ata. Gà ŋguz gwezleviyek tar ata a ləma akaba, ta mbəɗ aàba gà yemere tar serser, ta fir a aka gər dukw mehìndìke aka sahər ata.

Tabəl ana tə dzawa aaka ɗaf a Mbulum a

10 I dəba ŋa ya, Bedzalel a ge tabə̀l nda dizl davanah. A ge zubul ŋa ka, tsegwelek sula. Zlàbàtum ŋa tekeɗe, tsegwelek ide. Dzəgəɗaf ŋa ibam, tsegwelek nda mezehe ŋa mbaŋa. 11 A mbe ahər gura i bəɗ a simbikw lele, dite ti ler à mewetse ŋana nda gura tits aà dəba ya asa. 12 A ge ahər duwa aà guva ya, aà mə vəlar ndzəɗa. Zlàbàtum ŋa ka, slerre ide, dite a wetse nda gura aà guva ya tits lele asa. 13 A geyer gà dasa gura faɗ, a dzàyar aka ahəm aka ahəm ŋa, serser aka gà sik ŋa ata faɗ a asa mbaŋa. 14-15 A ge gà dasa ata ka, bise nda təv ata ika gər ŋa ya. A dzàkaya aɗəm zəva, aà mazlàwà dər tàbəl ata. Zəva ata ka, biy dizl davanah, a ge ahər gura à dəba ya, ti zlewe a dər.

16 A geye gà asiŋ gà dukw ŋgiɗ ana a ndze aka gər tabə̀l ata ya asa: Gà kwataramà nda gà tasa, dite nda gà duwa aà medzè aɗəm dukw ata makwàsà ŋa ya, nda gà kivit masà dər ŋa tserdze, aà megèwa dər megemir biy dukw ana ta vəl biy taf aɗaba Mbulum a. A ge gà dukw ata tserdze ya ka, nda gura ŋgwal ŋana lele ya.

Təv metìkè aaka lalampa

17 I dəba ŋa ya ka, Bedzalel a ge təv metìkè aaka lalampa nda gura ŋgwal ŋa lele mbaŋa. Gà sik ŋa nda magər ba ŋa ka, a və̀ɗ mivìɗe. Ama magər ba ŋa ka, a duwaya dər nda dukuməŋa a riŋ a ndzikiɗ ba mibìzè duwa ya nda dukw magəsa ŋa ya. A ge gà dukw ata tserdze ya ka, i təv ilik ŋa. 18 A dzàyar gà ahər ndilik, tə slaya dər i magər ba ŋa ata ya. Ika tseke ŋgiɗ ka, a dzar ahər makər, aka tseke naha ka, ahər makər hiywe mbaŋa asa. 19 Aà ahər ata tserdze ya ka, a ge ahər dukuməŋa ata makər a mbaŋa. Gà dukw ata ti ndzikiɗ ba mibìzè dukw nda dukw magəsa ŋa. 20 Aà magər ba ŋa ata tekeɗe, a ge ahər dukuməŋa faɗ. 21 Dukuməŋa ata ilik a ka, a ge aà huɗ gà ahər ata sula. Biy ŋgiɗ tèkeɗe, a ge aà huɗ gà ahər ŋgiɗ asa mbaŋa. Dite naha ibam, aà huɗ gà ahər ata ka, i bəɗ ŋana sula asa mbaŋa. 22 Gà ahər ŋa ata nda gà dukuməŋa ikəka ya, a və̀ɗ ka, nda gura ŋgwal ŋa lele. Ama gà dukw ata tserdze ya ka, a ge i təv ilik ŋa.

23 A ge gà lalampa ŋa təsəla nda gà gà dukw masasa liɓir ŋa ata nda gà dukw mimbete dər ŋa ka, nda gura ana ŋgwal ŋa lele ya asa mbaŋa. 24 A ge megemir gà dukw ata tserdze ya ka, nda gura ana ŋgwal ŋa lele ya, kiliw dzik makər.

Təv madula aaka dukw ata a ze hwaŋŋa lele ya

25 I dəba ŋa ya, Bedzalel a ge təv madula aaka dukw ata a ze hwaŋŋa lele ya nda dizl davanah zubul ŋa ka, tsegwelek ide. Nda zlàbàtum ŋa tekeɗe, tsegwelek ide asa, kamala megweɗe ya ka, gà guva faɗ ŋa ata ka, kalkal dze. Dzəgəɗaf ŋa a mbulum tekeɗe, tsegwelek sula. Mege ŋa ka, kalkal akaba ilik nda gà mbukum ŋa dze. 26 A bàha ahər gura aà dəba ya sifèh, ku mege dambazla ŋana ndaka tsaka, dite nda mbukum ŋa dze. A ge ahər dukw matsahəna ŋa aà dəba ya tits nda gura. 27 A və̀ɗar gà dasa gura aà dəba ya tseke sula məma sula sula a huɗ dukw ata a ger matsahəna ŋa ya. A ger ndaka tseke sula məma. Mege megemir ata a ge ya ka, aà mazla ŋa dər. 28 A pàpə̀z dizl davanah sula, a mbe ahər gura aà dəba ya sifèh.

29 Bedzalel a ge mal gà dukw ata tsəɗaŋŋa lele ya, aà magwatsaya à gà duwa nda aà metike dər mburma a megemir asa mbaŋa. I dəba ŋa ya, a ge wirde ana a ze hwaŋŋa lele, tə dulawa a Mbulum a asa.