Mendizle 38

Təv məvəla aaka duwa a Mbulum

1 I dəba ŋa ya, Bedzalel a ge təv ana ta vəlawa aaka duwa a Mbulum a, nda dizl davanah. Təv zubul ŋa ka, tsegwelek ə̀zləm. Zlàbàtum ŋana tekeɗe, tsegwelek ə̀zləm mbaŋa asa. Təv məvəla aaka duwa a Mbulum ka, tsiwir tseke faɗ ihər tserdze. Zùbəl ŋana ndàra a mbulum a ka, tsegwelek makər. 2 A ger gà medzibe gà mbukum ŋgiɗ aka tseke ata faɗ a tserdze, a slalayarra i təv məvəla aaka duwa a Mbulum ata ya. Ama gà dukw ata tserdze ya ka, a mbeye nda ndzemde məvəɗa kur siŋgwe. 3 A ge kazlaŋa biy təv ata ta vəlawa aaka duwa a Mbulum a tserdze: Mesigire aà mandza aɗəm avir, dite gà kuŋgwah məfàɗà bitekwe ana i təv məvàkà slu ya, nda gà səra dukw magwatsaya dər mal aà duwa nda gà dzərakidzərak biy mandzə̀rà slu ika akwa ya, nda gà dukw mede duwa. A mbeye gà dukw ata tserdze ya ka, nda ndzemde məvəɗa kur siŋgwe.

4 A gəlaw aaka ndzemde məvəɗa kur siŋgwe kamala biy məvàkà slu ya. A ndze aka guva aka guva tseke faɗ ŋa ata dze. 5 A geye gà dasa faɗ biy ndzemde məvəɗa kur siŋgwe ata mbaŋa asa. A dza gà dukw ata a təv ana ta vəlawa aaka duwa a Mbulum a, aà guva ya, aà mandza aɗəm gà zəva. 6 A ge gà zəva dizl davanah aɗaba təv məvəla aaka duwa a Mbulum, dite a mbe ahər ndzemde məvə̀ɗa kur siŋgwe aà dəba ya. 7 A dzayar gà zəva ata ka, a biye gà dasa aaha, aà guva təv məvəla aaka duwa a Mbulum ika tseke sula ya. Taŋa ka, aɗaba mazla dər ŋa. A ge dukw məvəla aaka duwa a Mbulum ata ka, nda dizl. A ndza katsawalla. Huɗ ŋa a ndza kataya məfàrà ŋa.

Tùgùɗ məbara aɗəm ba

8 Bedzalel a ge tùgùɗ nda ndzemde məvəɗa kur siŋgwe, a ge təv ana ti tike aaka ya nda ndzemde məvəɗa kur siŋgwe asa mbaŋa. A ge dukw ata ka, nda kwatarama gà məkəs ana ta ge dər meslire ika biye hərmaga ga malə̀mà akaba gà Mbulum nda gà mburma ata ya.

Varavada mekiriwe ga petek ana ti kiriw aɗaba Mbulum a

9 I dəba ŋa ya, Bedzalel a ge mekiriwe ga petek ata ka, vàràvàda a riŋ, malawaraŋa tits nda petek herrè ŋana. Aka tseke gular na a ge dzəɓar ŋa biy matəzla ikaba ya nda petek slewize herrè ŋana ya. Tseke ata ilik a ka, tsegwelek dərməka, 10 nda gà mendwiŋe dzik səla nda gà sik ŋa dzik səla biy ndzemde məvəɗa kur siŋgwe. Gà masamasa nda dukw metike aà mendwiŋe ŋana ka, a ge nda ndzemde məvəɗa kur siŋgwe ata herrè ŋa ya. 11 Ndaka tseke yam tekeɗe, a ge dər kamala taŋa ya mbaŋa. Tseke zubul ŋa ata ka, tsegwelek dərməka kalkal ilik. 12 Tseke pat ana à dìɗ a ya, a ge petek masasa ikaba ya ka, tsegwelek dzik ə̀zləm, nda gà mendwiŋe kurwa, nda gà sik ŋa asa ka, kurwa mbaŋa. 13 Kamala taŋa ya mbaŋa na təv zlàbàtum ŋana ndaka tseke ahər pat ana à mbizere a ya ka, a ge tsegwelek dzik ə̀zləm. 14 Nda tseke ŋgiɗ a ge petek ŋa ka, tsegwelek kurwa gəra ə̀zləm, gà mendwiŋe ŋa tekeɗe, makər nda gà sik ŋa makər asa mbaŋa. 15 Nda tseke ŋgiɗ aaha tekeɗe, a ge petek ŋa ka, tsegwelek kurwa gəra ə̀zləm. Gà mendwiŋe ŋa tekeɗe, makər nda gà sik ŋa makər mbaŋa. 16 Gà petek ana nda huɗ ga ya fit ka, maŋgara ŋa nda slewize herrè ŋana daɗdaɗəɗɗa. 17 Gà sik mendwiŋe ata tserdze ya ka, a ge nda ndzemde məvəɗa kur siŋgwe. Ama gà aram ana ti dze a aka gər ŋa ya nda dukw magəsa ŋana ka, ta ge biy ndzemde məvəɗa kur siŋgwe ana herrè ya. Gà gər mendwiŋe ata tserdze ya ka, a mbe nda ndzemde məvəɗa kur siŋgwe herrè ŋana asa mbaŋa.

18 Təv biye hərmaga ya ka, gà ɓəzla maɗə̀mə̀kà ŋa ta ge petek nda gà slewize ana gà mewetse ŋa zlirmetinwe zlirmetinwe ya, naha nduzzwa, nda gà na a ndza ndizze ndeyndey a. Ta mbeye a akaba nda slewize herrè ŋana. Ta ge petek ŋa ka, tsegwelek dzik səla, zubul ŋa tekeɗe, tsegwelek ə̀zləm, kamala biy gà asiŋ petek ŋgiɗ a asa mbaŋa. 19 Tə dza ahər gà mendwiŋe faɗ, nda gà sik ŋa faɗ asa mbaŋa, biy ndzemde məvəɗa kur siŋgwe, nda gà masamasa nda dukw metìkè ahər ŋa, nda aram ana ta gəlawa aaka ika gər ŋana ya ka, biy ndzemde məvəɗa kur siŋgwe ata herrè ya. 20 Gà liɓir madànà gà mekiriwe ga petek ata ti kiriw aɗaba Mbulum tserdze ya ka, gà Bedzalel ta ge nda ndzemde məvəɗa kur siŋgwe.

Melìve gà dukw ana ta ge dər megemir a

21 Araha na ti live mayaha gər dukw ta ge dər mekiriwe ga petek ata, gà beliŋ kur ana ta wetse ahər məpala ahəm Mbulum a mandza ŋa iɗəm i fata. Na a live ka, gà gwala Levi, nda ahər Itamar kəla mala mandəva kuɗa a Mbulum Haruna, kamala na Musa a tsik a tar a. 22 Ama Bedzalel kəla Wuri kəla Huru ana i gwala gà Yuda ya, a ge dukw BATSAH kwa ŋa a tsik a Musa, a gwaɗar, ge ya tserdze. 23 Na a zlak ahər ŋgat ka, Wuhuliyabu kəla Ahisamak ana i gwala Dan a. ŋgat ka, mala məpàpə̀zà dizl. ŋgat asa ka, mala mevìɗè, nda maɗə̀mə̀kà petek ana biy slewize mewetse ŋa zlirmetinwe zlirmetinwe ya, naha nduzzwa, nda gà na a ndza ndizze ndeyndey a, mimbeye akaba nda slewize herrè ŋa asa mbaŋa.

24 Mayaha gər gura ana gà Isərayel ti yahar gər aà mege ga ata tsəɗaŋŋa ya tserdze ka, kiliw 877 nda mezehe ŋa 300 kamala melive dukw ana li livewa biy ga Mbulum a. 25 Mayaha gər ndzemde məvəɗa kur siŋgwe ana herrè ya, ti yahar gər ka, i təv ana tə ɗamarra gà Isərayel a. Ndzemde ata ti yahar gər fit a ka, 3017 nda mezehe ŋa 750 kamala melive dukw ana ti livewa biy ga Mbulum a. 26 Ku mege weke tserdze a vəl ndzemde məvəɗa kur siŋgwe ata herrè ya ka, mezehe kamala na ti livewa i ga Mbulum ata tsəɗaŋŋa ya, ku weke na aka da a maɗama ba tar ata tserdze. Wur ana mive ŋgar dzik səla, kige tsa a za taŋa ya ka, a gaw ba gà asləka 603550. 27 Ama ndzemde ata ka, ta və̀ɗ dər gà sik mendwiŋe ga ata tsəɗaŋŋa ya, nda gà təv sik mendwe ŋa petek ata tə sàs dər ikaba ga ya, sik dərməka ilik, kamala megweɗe ya ka, sik ŋa ilik ka, kiliw 30. 28 Nda mezehe ndzemde ata ka, kiliw 17 nda mezehe ŋa 750 a ka, ta və̀ɗ dər gà masamasa nda gà dukw metike aaka ŋa ika gər a, nda aram ana ta gəlaw aaka ika gər ŋa ya.

29 Mayaha gər ndzemde məvəɗa kur siŋgwe ana gà Isərayel ti yahar gər aà mege ga ata tsəɗaŋŋa ya tserdze ka, kiliw 2124. 30 Ta və̀ɗ dər gà sik mendwiŋe ika biye hərmaga ga ata gà Mbulum nda gà mburma tə ləmawa akaba aɗəm a, nda gà təv madula aaka duwa, nda gà ndzemde magəlawa ŋa ata ikəka ya, dite nda gà kazlaŋa ŋa dze, 31 nda gà sik mendwiŋe ga, nda gà sik ga ana ika biye hərmaga ya, dite nda gà tə ndwaŋ dər mekiriwe ga petek ata ya, nda ga na aà ga ŋa ata tserdze ya.