Mendizle 39

Petek gà ɓəzla mandəva kuɗa a Mbulum

(Mendizle 28:1-14)

1 I dəba ŋa ya ka, ta mbe petek gà ɓəzla mandəva kuɗa a Mbulum ana i ga ata tsəɗaŋŋa ya ka, nda slewize ana mewetse ŋa zlirmetinwe zlirmetinwe ya, naha nduzzwa, nda gà na a ndza ndizze ndeyndey a. Ta ge petek tsəɗaŋŋa a Haruna ka, kamala na BATSAH kwa ŋa a gwaɗa a Musa, gwim a asa. 2 Ama ta mbe petek megemir ka, nda slewize ana gà mewetse ŋa zlirmetinwe zlirmetinwe ya, naha nduzzwa, nda gà na a ndza ndizze ndeyndey a. Ta mbeye akaba nda slewize herrè ŋana nda gà slewize gura asa mbaŋa. 3 Ta və̀ɗ gura, ta ge slewize ŋa, aà maɗə̀mə̀kà aàba gà petek ata mewetse ŋa zlirmetinwe zlirmetinwe ya, naha nduzzwa, nda gà na a ndza ndizze ndeyndey a, nda gà herrè ŋa dze. 4 Ta ge ahər gà təv dzàdzah aà madzə̀và aba. Ti dzeve a dər aba ika guva ika guva ya tseke sula məma. 5 Dukw madànà ba ana aà petek megemir ata tì dèn a dər ba ya ka, ta ge kamala petek megemir ana ta ŋgar nda gà slewize ana mewetse ŋa zlirmetinwe zlirmetinwe ya, naha nduzzwa, nda gà na a ndza ndizze ndeyndey a. Ta mbeye akaba nda slewize herrè ŋa, dite ti dàlala nda slewìze gura asa mbaŋa, kamala ana BATSAH kwa ŋa a tsik a Musa ya. 6 Tə làmbaɗa gà kur unikis sula, ti ler à gura aà guva ya tits. Mala megemir mewetse duwa a wetse aaka zləm gà ɓəza Isərayel kurwa gəra sula tserdze. A ne kamala lamba ya. 7 Tə dza gà kur ata aà petek megemir aka dzahdzah, aà məmawarra gà ɓəza Isərayel ana kurwa gəra sula a gər a. Ta ge kamala ana BATSAH kwa ŋa a tsik a Musa ya.

Kìywa ana ika gəzləŋ a

(Mendizle 28:15-30)

8 I dəba ŋa ya, ta ge ahər kìywa ana ika gəzləŋ a ka, kamala petek megemir ana ta ge ya, nda gà slewize ana mewetse ŋa zlirmetinwe zlirmetinwe ya, naha nduzzwa, nda gà na a ndza ndizze ndeyndey a. Ta mbeye akaba nda slewize herrè ŋana. Tə dàlala nda slewìze gura asa mbaŋa. 9 Ta ge kìywa ata ka, tseke faɗ, a pəts a huɗ ŋa tsa. Təv zubul ŋana, kapakà ide. Təv zlàbatum ŋana tekeɗe, kapakà ide mbaŋa asa. 10 Tə dap ahər gà kur ana tsakala ŋa hinne, à sìkim a ba tsiye, tə ndər ahər are faɗ. Are malahalah ŋana ka, rubin, tupas, imiradi. 11 Are masula ŋana ka, girenaɗ, safira, diyaman. 12 Are məmakər ŋana ka, yakintus, akat, ametis. 13 Are məfaɗ ŋana asa ka, kirisulit, kurnalin, yaspa. Taŋa tserdze ka, ti ler à gura aà guva ŋa ya tits. 14 Gà kur ata ka, kurwa gəra sula tits aà zləm gà ɓəza Isərayel, kamala ana ta wetse masasa ŋa ikaba ya ya. Ta wetse zləm tar ka, nda dukw ana a təm lele ya. Ku mege kur awara fit ka, nda zləm ŋgar ikəka fit kurwa gəra sula kamala gà gwala tar a.

15 Ta geye gà tsitsirɓe gura sula ŋgwal ŋa lele aà kìywa ana ika gəzləŋ a, maslaslapa ŋa kamala liɓir a. 16 Ta geye gà təv meger biye aà petek megemir ana ndaka miɗ a nda gura, dite gà matsərəɗ gura sula asa mbaŋa. Tə dza gà matsərəɗ aka guva kìywa ata aà maadwa ya sula məma fit. 17 Tə dàn akaba gà tsirtsirɓe gura ana tə lama aba ya sula aà gà matsərəɗ ana aà guva kìywa ana ika gəzləŋ a. 18 Gà ahəm liɓir ata tə lama akaba ya ka, tə dànaya aà dukw magəsa ŋa ata. Taŋa ka, tə dza aka dzàdzàh petek megemir ata ndaka miɗ ŋana. 19 Ta vaɗa gà matsərəɗ gura ŋgiɗ pam sula asa, tə dza aka ahəm kìywa ata ika gəzləŋ a sula, dite tə lap dər aà petek megemir ata nda huɗ ŋa kuɗa. 20 Ta vaɗa gà dasa gura asa, tə dzara ika dzàdzah a ndaka miɗ a haa tsìm aka təv mendisle andiw ana i bəɗ a. Tə slə̀far aba ahəm ika təv madànà aba ana ti dèn a aba petek megemir a. 21 Tə dan kìywa ata aà gəzləŋ petek megemir ata ka, nda liɓir ana a ndza zlirmetinwe zlirmetinwe ya, na ta gasa dər akaba gà dasa ata ya, kamala ana BATSAH kwa ŋa a tsik a Musa ya.

Petek gà ɓəzla mandəva kuɗa a Mbulum

(Mendizle 39:22-32)

22 Ta mbe andiw nda petek ana a ndza zlirmetinwe zlirmetinwe ya, a huɗ petek megemir ata asa. 23 Tə təm biye ɗa ŋa ka, aka magər ŋa, kamala biye ɗa petek guvəl a. Ti tiker petek aà ɗa ŋa ata dàɗdàɗaɗɗa aà màkwìyaɗa tsa. 24 Ta paɗayar gà slewize aka ahəm ŋana kamala ɓəza mawà dizl ɗaf nda gà slewize ana mewetse ŋa zlirmetinwe zlirmetinwe ya, naha nduzzwa, nda gà na a ndza ndizze ndeyndey a. Ta mbeye akaba nda slewize herrè ŋana. 25 Ta vaɗa gà meendeliŋ nda gura ana lele aruwaŋ iɗəm tsiye. Tə dzaya gà meendeliŋ ata aka magər gà məpàɗà dukw ata kamala mawà dizl a, aka guva andiw ata tits aka ahəm ŋana fit. 26 Gà meendeliŋ nda məpàɗà slewize ata kamala mawà dizl ɗaf a, tits aka guva ahəm andiw ata tilèw a ler i bəɗ a tserdze, ta gewa dər megemir mandəva kuɗa a Mbulum kamala ana BATSAH kwa ŋa a tsikar a Musa ya.

27 I dəba ŋa ya, gà ɓəzla maɗàmàkà petek ta mbeye gà andiw a gà Haruna nda gà ɓəza ŋgar. Ama ta ge ka, nda slewize herrè ŋana 28 Ta mbeye petek mendìwìɗè gər herrè ŋa asa mbaŋa, nda gà mendìwìɗè gər ana zubul ŋa ya dze aà metsehine, nda gà wandàŋ slewize herrè ŋana. 29 Dukw madànà ba ŋa ta ge ka, nda gà slewize ana mewetse ŋa zlirmetinwe zlirmetinwe ya, naha nduzzwa, nda gà na a ndza ndizze ndeyndey a. Ta mbeye akaba slewize herrè ŋana, kamala ana BATSAH kwa ŋa a tsik a Musa ya.

30 Ta və̀ɗ gura slerre ana ŋgwal ŋa ya, aà madànà aka yemere. Ta wetse aaka duwa kamala ana ta ge ahər lambà ya. Ta wetse ka, tsəɗaŋŋa aɗaba BATSAH kwa ŋa. 31 Tə dàn ahər nda liɓir petek ana a ndza zlirmetinwe zlirmetinwe ya, na dite ti dèn a dər aà mendìwìɗè gər, kamala ana BATSAH kwa ŋa a tsik a Musa ya.

Mege megemir ga Mbulum ata a ndəv

32 Kamala taŋa ya na megemir mekiriwe ga petek ata ti kiriw aɗaba Mbulum a tserdze a ndəv a. Na a ge gà megemir ata tserdze ya ka, gà Isərayel kamala ana BATSAH kwa ŋa a tsik a Musa ya. 33 Tə zlara gà dukw tserdze a təv Musa ya: Ga petek ata nda gà kàzlàŋà ya dze nda gà dukw ana ta gasa dər aba ya, nda gà aram ŋa, nda aram ana ta gəlaw aba ya, nda gà mendwiŋe, nda gà sik ŋgar ŋa, 34 nda bagwa təmaŋ ata ta bah ahər duwa nduzzwa ya, nda bagwa ata ndzəɗa ŋa hinne ya, dite nda petek ata ta sasawa dər ikaba gà ga ya ya asa, 35 nda gà sahər ata tə dza aɗəm gà beliŋ kur ana ta wetse ahər məpala ahəm a, nda gà zəva ŋa, dite nda gà dukw mahə̀ndə̀kà dər aaka ŋa, 36 nda tabə̀l nda gà kàzlàŋa ŋa dze nda gà ɗaf ana ti tikewe aaka ya, aɗaba BATSAH kwa ŋa ya, 37 nda dukw metìkè aaka lalampa ŋana nda gura ŋgwal ŋa lele nda gà asiŋ gà dukw mege dər megemir ŋa dze, nda gà mal məvata ŋa dze, 38 ta ge dukw madùlà aaka dukw ata hwaŋŋa biy gura, nda gà mal magwàtsakàyà aà duwa nda gà mal wirde ata tə dùlawa, a ze hwaŋŋa lele ya, nda petek ana ti tike aka biye ga ata ya, 39 nda təv mavə̀là aaka dukw ata biy ndzemde məvəɗa kur siŋgwe ya, maslaslàpà ŋana ka, nda ndzemde nduzzwa ŋana nda gà zəva ŋana dite nda gà kàzlàŋà tserdze, gà tùgùɗ nda dukw metìkè aaka ŋa, 40 gà petek ana i huɗ ga ya nda gà mendwiŋe ŋa, nda gà sik ŋa, gà petek ana ika biye hərmaga nda bəra ya, nda liɓir ŋa, nda gà dukw na ti ndwaŋ a bəra ya, nda gà asiŋ gà dukw megemir ata i mekiriwe ga petek a tserdze, 41 nda petek megemir ana i ga ŋgwal ŋa ata ya, nda petek ana tsəɗaŋŋa agəra Haruna ana ŋgat mala mandəva kuɗa a Mbulum a, nda gà petek gà ɓəza ŋgar ana ta ge a dər megemir mandəva kuɗa a Mbulum a tserdze.

42 Gà Isərayel ta ge duwa tserdze ka, kamala ana BATSAH kwa ŋa a tsik a Musa ya. 43 Musa a samata gà duwa tserdze ka, a ŋgatar ta ge dukw ata ka, kamala ana BATSAH kwa ŋa a tsiker a. I dəba ŋa ya, Musa a pise aaka tar ahəm.