Meme na ta ge megemir ga ata ya
40
1 I dəba ŋa ya, BATSAH kwa ŋa a gwaɗa a Musa: 2 « I huɗ malahalah kiye aaha ya mehinne ilik ka, ki hitse a à mekiriwe ga petek ata aà mbulum. 3 Ka tike aɗəm sahər ata nda gà beliŋ kur ana mewetse ŋa ikəka məpala ahəm Mbulum a, kə kaha nda petek matəzla ikaba ga ya. 4 I dəba ŋa ya, ka tike aɗəm tabə̀l, kà dza aaka gà dukw ana ikəka ya. Ka tike aɗəm dukw metìkè aaka lalampa, kà dza aaka gà lalampa ŋa asa mbaŋa. 5 Ka tike dukw madula aaka dukw ata a ze hwaŋŋa lele ya, biy gura aka miɗ sahər masəra ba gà Mbulum ata nda gà mburma ya. Tike petek ata aka hərmaga mada a mekiriwe ga petek ata. 6 Tike təv məvəla aaka duwa a Mbulum aka miɗ hərmaga mekiriwe ga petek ata. 7 Tike tùgùɗ aka magər gà ga Mbulum nda təv məvəla aaka duwa a Mbulum ata. Kà dza aɗəm yam. 8 Hitse à gà mendwiŋa ana ti ler aà guva ga ya tserdze, ka tike petek aka hərmaga ga ŋa.9 I dəba ŋa ya, zla mal magwàtsakàyà aà duwa, ki ge a aà mekiriwe ga petek nda gà dukw ana i huɗ ŋa ya tserdze. Gà dukw ata tserdze ti ne ka, tsəɗaŋŋa, aɗaba Mbulum. Daga aà kinehe ya, mà ndza tsəɗaŋŋa. 10 Ge mal aà təv məvàlà aaka duwa a Mbulum nda gà dukw ana ikəka ya tserdze. Təv məvəla aaka dukw ata ka, me ne tsəɗaŋŋa ndeyndey lele. 11 Ge mal aà tùgùɗ ata nda gà dukw metike aaka ŋa dze, ma ndza tsəɗaŋŋa.
12 Kàa gwim kamala taŋa ya ka, gà Haruna nda gà ɓəza ŋgar tì sirikara aka hərmaga ga petek maləma akaba gà Mbulum ata nda gà mburma ya. Tə daha ka, bara tar nda yam. 13 I dəba ŋa ya, tike petek ana tsəɗaŋŋa ya aka Haruna, ki ge ahər mal ata mbaŋa. Ne à ŋgat ka, mala megemir mendìvìŋ kuɗa. 14 Gà ɓəza ŋgar tekeɗe, tì sìrèkara asa mbaŋa, dza aka tar petek. 15 Ge aà tar mal kamala ana kì ge aà tsir tar a mbaŋa, aà ti ne gà ɓəzla mendìvìŋ kuɗa. Mal ana ta ge aà ter a aɗaba megemir mandəva kuɗa a Mbulum a ka, ti ne gà ɓəzla megemir ŋa ika màgər tar, wa ahər kəla wa ahər kəla .»
Ga ata a da aà mbulum
16 Ama Musa a ge gà megemir ata tserdze kamala ana BATSAH kwa ŋa a tsiker a. 17 I huɗ mehinne ilik, i malahalah kiye ana a ge mive ilik i dəba na tə dara ika ahəɗ Ezipt ya, na mekiriwe ga petek ata a da aà mbulum a. 18 Musa na a hitse dər a. A dzaya gà sik ŋa ata a biye, a hitse à gà aram ŋana, a dza aaka magə̀làwà ŋana asa, dite a hitse à gà mendwiŋe ŋana. 19 Dite i dəba ŋa ya ka, a làmbaɗa aaka à petek ata aka gər ŋa. A tike aaka duwa ika gər a asa, kamala ana BATSAH kwa ŋa a tsiker a.
20 I dəba ŋa ya, gà beliŋ ata ta wetse aaka məpala ahəm Mbulum a, a dza a sahər masəra ba gà Mbulum ata nda gà mburma ya. A dzar gà zəva aà guva ya, dite a tike aà dukw mehìndìke aaka ŋa. 21 I dəba ŋa ya, a tike sahər masəra ba gà Mbulum ata nda gà mburma ya, a mekiriwe ga petek ata, a kaha sahər ata nda petek matəzla ikaba ga ya, kamala ana BATSAH kwa ŋa a tsiker a. 22 I fata ya ka, a tike tabə̀l a ga petek ata ta kiriw mekiriwe ya, aka tseke metìkè təv mendzena a mbe aka yam a, aka miɗ petek ata tə sasawa dər ikaba ga ya. 23 I fata ya ka, a dzaya ɗaf aka tabə̀l ata ika miɗ Mbulum BATSAH kwa ŋa ata, kamala ana a tsiker mege ya. 24 A tike aba dukw metìkè aaka lalampa a mekiriwe ga petek ata serser akaba nda tabə̀l ata ika tseke gular a. 25 A vata aba akwa aka gà lalampa ata aka miɗ BATSAH kwa ŋa ya, kamala ana a tsiker a asa. 26 A tike dukw madùlà aaka dukw ana a ze hwaŋŋa lele ya, biy gura a ga Mbulum ata ta kiriw nda petek a, aka miɗ petek ata tə sàs dər ikaba ga ata ya. 27 I dəba ŋa ya, a dùl aaka dukw ata a ze hwaŋŋa lele ya, kamala ana a tsiker a kuɗa.
28 A tike petek matəzla ikaba huɗ ga ata aka hərmaga mekiriwe ga petek. 29 Asa ka, a tike təv məvəla aaka dukw ana a dùlà aaka duwa a Mbulum aka hərmaga mekiriwe ga petek ata. I fata ya ka, a dùl aaka dukw ana ta vəl a Mbulum a, nda gà dukw mezime ana ta vəlar biy taf a asa mbaŋa, kamala ana BATSAH kwa ŋa ata a tsiker a. 30 A tike batsah tùgùɗ duwa aka magər gà ga petek ata ta kiriw ŋgwal ŋa ya, nda təv məvəla aaka duwa a Mbulum. A dza aɗəm yam aà məbara dər ba. 31 Gà Musa nda Haruna nda gà ɓəza ŋgar ta bere a dər ahər nda gà sik a tùgùɗ ata. 32 Aka təv ana ti de a a ga Mbulum ŋgwal ŋa ata ya ka, tar tserdze ta bere a ba, na dite ti sìrìkehe a a təv dukw məvəla aaka dukw ata a BATSAH kwa ŋa, kamala ana BATSAH kwa ŋa ata a tsik a Musa ya.
33 I dəba ŋa ya, a ge ga aà dəba a mekiriwe ga petek ata nda təv məvəla aaka duwa a Mbulum a. Tilèw a ler dər aà dəba ya fit. A tike petek aka hərmaga ga ata. Kamala taŋa ya, Musa a ndəv à megemir ata fit a.
Mbulum BATSAH kwa ŋa a pat à ndzəɗa ŋgar aka gər ga ata nda magùdugùdù
34 I fata ya ka, magùdugùdu a kaha ga petek ata ta kiriw aɗaba Mbulum a. I dəba ŋa ya ka, ndzəɗa BATSAH kwa ŋa a rah a huɗ ga petek ata. 35 Akahər ata ka, Musa a sle aà mada a mekiriwe ga petek ata asa tsa, aɗaba magùdugùdu ana a həna aaka ya. Taŋa ndzəɗa meɓìzle BATSAH kwa ŋa a rah a ga ata.
36 I dəba ŋa ya ka, ku mege ndeɗime na magùdugùdu ata aka mà aà mbulum ka, gà Isərayel ta hitse aà mede aka miɗ tar tserdze. 37 Ama na magùdugùdu aka mah ba aà mbulum a zukw tsəka, ti sle aà mehitse aà mede aka miɗ tsa, say aka pat ana aka mà aà mbulum a dzekwiŋ. 38 Aɗaba BATSAH kwa ŋa a ne a à magùdugùdu ata ika ga Mbulum a ka, həpat. Ndaavəɗ tekeɗe ka, akwa i riŋ i ga ata ika miɗ gà Isərayel, dzaydzay na i təv mede tar a tserdze. I fata ya, Mbulum a pat aba a gà Isərayel aà tə sər dər ka, Mbulum a riŋ mandza ŋa nda gà tar.