Gà dukw taf gà dukw mezime ana ta ge ara i dala ya
2
1 ‹ Na wura a vile a, dukw taf gà dukw mezime ana ta ge ara i dala ya, a BATSAH kwa ŋa ka, say a ndzike a gufa ana kizlizizze ya, a mbiɗe a aaka gà mal, nda makərɗa dizl ana a ze hwaŋŋa ya. 2 I dəba ŋa ya, a de a dərra a təv gà ɓəzla məbatsa duwa a Mbulum, gà ɓəza Haruna ya. Ilik ŋa aà gà ɓəzla məbatsa duwa a Mbulum a, a ndzike a gufa ata kizlizizze magawa ŋa nda mal, nda makəɗa dizl ana a ze hwaŋŋa ya fit akaba, dəɗək ahər, a dwile a aka gər təv madula aaka duwa a Mbulum biy gà dukw taf ata. Tə zalar dukw məməbara a duwa a gər a. Taŋa ka, dukw taf matawala fəla ana ta vakawa nda akwa, dite meze hədzək ŋana hwaŋŋa ya, a tsahən aà BATSAH kwa ŋa. 3 Mezehe dukw taf ata a zeha ihər a ka, biy gà Haruna nda gà ɓəza ŋgar. Taŋa ka, tsəɗaŋŋa ndeyndey, aɗaba a dara ka, i dukw taf ana ta vakawa nda akwa a BATSAH kwa ŋa ya.4 Na ki vile a dukw taf gà dukw mezime ana ta ge ara i dala ya, ta guvut meguvite ya ka, mahəlaɓa gufa ata kizlizizze ya, mege ka, giɗe ikəka tsa. Ki ndzikwimere a kuɗa ka, gà gatuw ana mahəlaɓa ŋa nda mal a, kige tsa gà gatuw ana slapatpat ti de giɗe ikəka tsa, tə dzaya ahər aà mal a. 5 Na ki vile a dukw taf gà dukw mezime ana ta ge ara i dala ya, ti sewlere a ika laŋ a ka, say mege ka, gatuw ana giɗe ikəka tsiye, nda gufa ana kizlizizze mahəlaɓa ŋa nda mal a. 6 Wele ana a zleha dukw taf ata ya, a sese a ikaba ya zaakwa zaakwa, dite a ɓeɓetse a aaka à mal asa. Kamala taŋa ya, na ti dewa dukw taf gà dukw mezime ana ta ge ara i dala ya ya. 7 Na bəla dukw taf ŋa, ti de nda kəla laŋ ka, say ta hileɓe akaba gufa ana kizlizizze ya nda mal.
8 Wele ata a zleha dukw taf gà dukw mezime ana ta ge ara i dala ya, medeŋa kamala taŋa ya, a BATSAH kwa ŋa, dite a vile a dukw taf ata a mala məbatsa duwa a Mbulum, a de a dər aka təv madula aaka duwa a Mbulum. 9 Mala məbatsa duwa a Mbulum, a ndzike a ika dukw taf gà dukw mezime ana ta ge ara i dala ya, taŋa ka, dukw ana tə zalar dukw məməbara à duwa a gər a, dite a dwil aka təv madula aaka duwa a Mbulum. Taŋa ka, dukw taf ana tə dulawa ya, ta vakawa nda akwa, meze hədzək ŋana hwaŋŋa ya, a tsahən a BATSAH kwa ŋa. 10 Mezehe dukw taf ata, a zeha ihər a ka, biy gà Haruna nda gà ɓəza ŋgar. Taŋa ka, tsəɗaŋŋa ndeyndey, aɗaba a dara ka, i dukw taf ana, ta vakawa nda akwa a BATSAH kwa ŋa ya.
11 Gà dukw taf gà dukw mezime ana ta ge ara i dala ya fit tserdze ti dze a a BATSAH kwa ŋa ya ka, giɗe mege ikəka tsidze, aɗaba gà giɗe nda amum ka, ki gewim a akaba nda gà dukw taf kurum a ana ta vakawa nda akwa a BATSAH kwa ŋa tsidze. 12 Ki slwim a aà mendzikwimera gà dukw ata ya ka, akahər ana ki ndzikwimera gà malahalah gà dukw mezime kurum ana kə gwimara i dala, kamala dukw taf a, à BATSAH kwa ŋa ya. Ama ki slwim a aà medwile a aka gər təv madula aaka duwa a Mbulum, kamala gà dukw taf ana meze hədzək ŋa hwaŋŋa ya tsa.
13 Kə̀la aà məvəla dukw taf gà dukw mezime kurum ana kə gwimara i dala ya ka, say ki ndwim a aaka sləwal. Məməsak a kurum a gər diydiy tsidze na manda sləwal aka gà dukw taf kurum a. Aɗaba sləwal a pat ka, aà magəsa masla ana Mbulum a gəs nda kurum a. Aɗaba taŋa na məvəla dukw taf kurum ana ki vilwim a ya ka, hiywe ki ndwim a aaka sləwal a.
14 Aka təv ana ki ndzekwimere a gà dukw taf gà malahalah gà dukw kurum ana kə gwimara i dala ya a BATSAH kwa ŋa ya ka, ki lehwimehire a ka, aà məvaka gà wur gà duwa ya, dite ki ngeslwim a ble ata, na akahər ana ki dwim a dərra ya. 15 Ki mbiɗwim a aaka mal, dite ki ndwim a aaka makərɗa dizl ana a ze hwaŋŋa ya, aka gər ŋa, taŋa ka, dukw taf gà dukw mezime ana kə gwimara i dala ya. 16 I dəba ŋa ya, mala məbatsa duwa a Mbulum a dwil a dukw taf məməbara a duwa a gər a, kamala megweɗe ya ka, a ndiɗe a maŋgasla ble, ana tə dza aaka à mal a zaakwa, nda makərɗa dizl ana a ze hwaŋŋa lele ya fit. Taŋa ka, dukw taf ana ta vakawa a BATSAH kwa ŋa ya ›.