Matawala fəla magawuba
3
1 ‹ Na wura a vile a dukw taf gənaw aà matawala fəla magawuba ka, say a gisere a mbuluv sla a, kige tsa məmər sla ana dukw metire ihər tsiye aka miɗ BATSAH kwa ŋa ya. 2 A tike a ahər aka gər dukw taf gənaw ata dite a zlere a ɗa aka biye hərmaga ga petek mayahaba gər. I dəba ŋa ya kuɗa ka, gà ɓəzla məbatsa duwa a Mbulum, gà ɓəza Haruna, ta gwetsekeye a à məmbəz ŋa, aka gà tseke gà guva təv madula aaka duwa a Mbulum. 3 Araha na gà tseke dukw matawala fəla magawuba ata mala məbatsa duwa a Mbulum ilik a pete dərraha, dite a veke aha a BATSAH kwa ŋa ya: Gà məŋgəl ana a kaha dukw huɗ fit, 4 gà kur dəba sula nda məŋgəl ŋa, àha nda məŋgəl ana aà huɗ yam a, dite nda ŋgwal təv kivir. Ti ndzike a aka bera a təv ilik ŋa ya, nda gà kur dəba ŋa ya dze. 5 I dəba ŋa ya, gà ɓəza Haruna ti dwil a gà dukw ata tserdze ya, akaba nda gà dukw matawala fəla ana tə dulawa ya, aka gər tsalaka ana akwa ihər a gise a ika gər təv madula aaka duwa a Mbulum a. Taŋa ka, dukw matawala fəla ana, ta vakawa, meze hədzək ŋana hwaŋŋa, a tsahən a BATSAH kwa ŋa ya.6 Na wura a vile a dukw taf, təmaŋ kige tsa, awak biy matawala fəla magawuba, a BATSAH kwa ŋa ka, say a gisere a dukw gənaw ata ya ka, na dukw metire ihər tsiye. Vugul ŋa, kige tsa dəm ŋa. 7 Na kige bəla tsa dukw taf təmaŋ ka, ma da dər aka miɗ BATSAH kwa ŋa. 8 Ma tike ahər aka gər dukw taf gənaw ata dite ma zler ɗa aka miɗ ga petek mayahaba gər. I dəba ŋa ya kuɗa ka, gà ɓəza Haruna ta gwetsekeye a à məmbəz ŋa, aka gà tseke təv madula aaka duwa a Mbulum. 9 Araha na gà tseke dukw matawala fəla magawuba ata a pete dərraha dite a veke aaha a BATSAH kwa ŋa ya: Gà məŋgəl ŋa fit, dzimir ŋa kweleŋ, ti sesere a piriɗ aà dwiŋgwe dzimir a, gà məŋgəl ana akaha dukw huɗ a fit. 10 Gà kur dəba sula nda məŋgəl ŋa, àha nda məŋgəl ana aà huɗ yam a, dite nda ŋgwal təv kivir a. Ti ndzike a aka bere a təv ilik ŋa ya, nda gà kur dəba ŋa ya dze. 11 I dəba ŋa ya, mala məbatsa duwa a Mbulum, a dwil a gà dukw ata tserdze ya, aka təv madula aaka duwa a Mbulum. Taŋa ka, dukw mezime ana tə vakawa a BATSAH kwa ŋa ya.
12 Na wura a vile a dukw taf awak ka, a gisere a a pete a dər aka miɗ BATSAH kwa ŋa. 13 A tike a ahər aka gər dukw gənaw ata, dite a zlere a ɗa aka miɗ ga petek mayahaba gər. I dəba ŋa ya kuɗa ka, gà ɓəzla məbatsa duwa a Mbulum, gà ɓəza a Haruna, ta gwetsekeye a à məmbəz ŋa aka gà guva təv madula aaka duwa a Mbulum. 14 Araha, na gà tseke gà dukw taf, matawala fəla ata a petere a dərraha dite a vekeha a BATSAH kwa ŋa ya: Gà məŋgəl ana a kaha dukw huɗ a fit, 15 gà kur dəba sula nda məŋgəl ŋa, àha nda məŋgəl ana aà huɗ yam a, dite nda ŋgwal təv kivir. Ti ndzike a aka bere a a təv ilik ŋa ya nda gà kur dəba ŋa ya dze. 16 I dəba ŋa ya, mala məbatsa duwa a Mbulum, a dwil a gà dukw ata tserdze ya, aka təv madula aaka duwa a Mbulum. Taŋa ka, dukw mezime ana ta vakawa meze hədzək ŋana hwaŋŋa ya ka, a tsahən a BATSAH kwa ŋa.