Lewi 4

Matawala fəla məpəla à bakal

1 BATSAH kwa ŋa a gwaɗa a Musa: 2 « Tsik a gà Isərayel: ‹ Na wura aka ge bakal, i meweye ŋgar tsa, aka ɓəl aka məpala ahəm BATSAH kwa ŋa ilik, a ge dukw ana məpala ahər ahəm a ya ka, araha na dukw ana a ge ye.

3 Na batsah mala məbatsa duwa a Mbulum na a ge bakal a ka, nda bakal ŋgar ata ka, aka ne à mayahaba gər gà mburma fit ka, gà ɓəzla bakal mbaŋa. Say a tewele a fəla nda mbuluv sla ana metire ihər tsiye a BATSAH kwa ŋa, biy məpəla à bakal. 4 A giseha sla ata aka miɗ BATSAH kwa ŋa, aka biye hərmaga ga petek mayahaba gər, dite a tike a ahər a gər a mbuluv sla ata, dite a zlere ɗa a fata aka miɗ BATSAH kwa ŋa. 5 Batsah mala məbatsa duwa a Mbulum a tife a məmbəz sla ata zaakwa, a de a dər a huɗ ga petek mayahaba gər. 6 Mala məbatsa duwa a Mbulum a dzeke a kəla ahər ŋgar a məmbəz ata, a gwetsekeye a à məmbəz ata sik təsəla, ika miɗ BATSAH kwa ŋa, aà madana petek ata, i təv tsəɗaŋŋa ŋa ata ndeyndey ya, ndaka tseke təv ana are a ŋgatar ba tsara ya. 7 I dəba ŋa ya, mala məbatsa duwa a Mbulum a geye məmbəz aà gà mbukum ana ika təv madula aaka makərɗa dizl ana a ze hwaŋŋa ika miɗ BATSAH kwa ŋa ya, i huɗ ga petek mayahaba gər a. Dite a mbiɗe a à mezehe məmbəz sla ata fit, aà sik təv madula aaka gà dukw taf matawala fəla ana tə dulawa aaka a Mbulum ana a riŋ aà guva biye hərmaga mada a ga petek mayahaba gər a. 8 A seseye a gà tseke gà təv məŋgəl ana a slu mbuluv sla ata tə tawal dər fəla biy məpəla à bakal a, gà məŋgəl ana aà dukw huɗ a, 9 gà kur dəba sula nda məŋgəl ŋa, àha nda məŋgəl ana aà huɗ yam a, dite nda ŋgwal təv ana aà kivir a. Ti ndzike aka bere a təv ilik ŋa ya nda gà kur dəba ŋa ya dze. 10 Gà təvuməŋa ata ka, ilik na tə sasawa aà mbuluv sla ana ta vəl dukw taf ŋa, aà matawala fəla magawuba ya. Mala məbatsa duwa a Mbulum a dwile aka gər təv madula aaka gà dukw taf matawala fəla ana tə dulawa aaka a Mbulum a. 11 Ama a zle a bagwa mbuluv sla ata, slu ŋa fit, gər ŋa, gà mendekwiyek ŋa, gà dukw huɗ ŋa, nda za ŋa fit. 12 Kamala megweɗe ya ka, gà təv ana a zeyeha aà mbuluv sla ata fit a ka, a ndzikere a a bəra ya, a de a dər izaɗ zaakwa aà təv mandzəba tar a, ti dze a dər a təv ana dukw zlaŋgatsak iɗəm tsiye, a təv ana tə ndawa aɗəm a bitekwe mawulazla məŋgəl a, dite ti dwile a aka gər tsalaka ana akwa riŋ ihər a gise ya. A fata ŋa na ti dwile a fit a, aka gər təv mayaha gər bitekwe mawulazla məŋgəl.

13 Biy tsa mayahaba gər gà Isərayel fit na ta ge bakal i meweye tar tsiye, dite tàa sər aba tsa, ta ɓəl aka məpala ahəm BATSAH kwa ŋa ilik, nda mege dukw ana məpala ahər ahəm a ya, taŋa ka, gà Isərayel tàa ne gà ɓəzla bakal. 14 I təv ana tàa sər aà mege bakal tar ata ta ge ya ka, say ta vile a mbuluv sla aà matawala fəla biy məpəla à bakal i təv Mbulum a. Ta giseha mbuluv sla ata aka miɗ ga petek mayahaba gər. 15 Gà bàba ŋana ika miɗ gà mayahaba gər tar a, ti dze a ahər tar aka gər mbuluv sla ata, dite ilik ŋa ika magər tar a, a zlere a ɗa a fata aka miɗ BATSAH kwa ŋa. 16 Batsah mala məbatsa duwa a Mbulum a tife a məmbəz sla ata zaakwa, a de a dər a huɗ ga petek mayahaba gər. 17 A dzeke a kəla ahər ŋgar a məmbəz ata, a gwetsekeye dər sik təsəla, ika miɗ BATSAH kwa ŋa aà madana petek ana i təv ata tsəɗaŋŋa ndeyndey ya, ndaka tseke təv ana are a ŋgatar ba tsara ya. 18 I dəba ŋa ya, a geye a məmbəz aà gà mbukum ana ika təv madula aaka gà dukw taf ana ika miɗ BATSAH kwa ŋa, i huɗ ga petek mayahaba gər a. Dite a mbiɗe a à mezehe məmbəz ata fit a, aà sik təv madula aaka gà dukw taf matawala fəla ana tə dulawa aaka a Mbulum ana a riŋ aà guva biye hərmaga mada a ga petek mayahaba gər a. 19 A sese a gà tseke gà təv məŋgəl ana aà mbuluv sla ata ya fit, dite a dwil a aka gər təv madula aaka duwa a Mbulum. 20 Nda mbuluv sla ata ka, a ge a dər kalkal kamala ana a ge dər nda mbuluv sla ana tə tawal dər fəla biy məpəla à bakal a. Kərga taŋa ya, na batsah mala məbatsa duwa a Mbulum a geye gà dukw ana ta gewa biy məpəla à bakal a, dite na Mbulum a pile a ter a à bakal a gà mayahaba gər gà mburma ata ya. 21 I dəba ŋa ya, a ndziker a mezehe slu ata a bəra ya fit, izaɗ zaakwa aà təv madzəba tar a. A dwil a kamala ana a dul mbuluv sla ana a vəl biy məpəla à bakal ŋgar a. Kərga taŋa na, matawala fəla ana biy məpəla à bakal gà mayahaba gər gà Isərayel a.

22 Biy tsa, əbay ana a kwere a gà mayahaba gər gà mburma ya, na a ge bakal i meweye ŋgar tsiye ka, a ɓəl aka məpala ahəm BATSAH kwa ŋa, Mbulum ŋgar ilik, nda mege dukw ana məpala ahər ahəm ŋa ya ka, aka ne mala bakal. 23 I təv ana aka sər aà bakal ŋgar ata a ge ya ka, say a vile a dukw taf vugul ana dukw metire ihər tsiye. 24 A tike a ahər aka gər vugul ata, dite a zlere a ɗa a fata aka miɗ BATSAH kwa ŋa, a təv ata ti zleyewar aɗəm ɗa a gà dukw gənaw ana tə dzawa biy matawala fəla ana tə dulawa ya. Taŋa ka, matawala fəla biy məpəla à bakal. 25 Mala məbatsa duwa a Mbulum a dzeke a kəla ahər ŋgar a məmbəz dukw gənaw ata ta vəl biy məpəla à bakal a, a geye aà gà mbukum ana ika gà guva təv madula aaka gà dukw taf ana tə dulawa ya. I dəba ŋa ya, a mbiɗe a à məmbəz ŋa aaha a zeha ya, aà sik təv madula aaka gà dukw taf matawala fəla ana tə dulawa aaka a Mbulum. 26 A dwil a gà tseke gà təv gà məŋgəl aka təv madula aaka duwa a Mbulum fit, kamala ana ta gewa à dukw gənaw ana ta vəl aà matawala fəla magawuba ya. Kərga taŋa ya na mala məbatsa duwa a Mbulum a geye a gà dukw ana ta gewa biy məpəla à bakal, aka gər əbay ata ya, dite Mbulum a piler a a bakal ŋgar a.

27 Biy tsa, mburma ilik ika magər gà Isərayel a, na a ge bakal i meweye ŋgar a tsiye, a ɓəl aka məpala ahəm BATSAH kwa ŋa ilik, nda mege dukw ana məpala ahər ahəm a ya ka, aka ne mala bakal. 28 I təv ana aka sər a mege bakal ŋgar ata a ge ya ka, say a vile a dukw taf dəm awak ana dukw metire ihər tsiye, aà matawala fəla məpəla bakal ŋgar ana a ge ya. 29 A tike ahər ŋgar aka gər awak ata, a vəl aà məpəla à bakal a, dite a zlere a ɗa a fata, a təv ana ti zleyewar aɗəm ɗa a gà dukw gənaw ana tə dzawa dukw taf ŋa, biy matawala fəla ana tə dulawa ya. 30 Mala məbatsa duwa Mbulum a dzeke a kəla ahər a məmbəz awak ata, dite a geye a aà gà mbukum ana ika gà guva təv madula aaka gà dukw taf matawala fəla ana tə dulawa ya. I dəba ŋa ya, a mbiɗe a à məmbəz aaha a zeha ya fit, aà sik təv madula aaka gà dukw taf matawala fəla ana tə dulawa aaka a Mbulum a. 31 A sese a gà tseke gà təv məŋgəl ana aà awak ata ya fit, kamala na ta ge aà dukw taf matawala fəla magawuba ya. Mala məbatsa duwa a Mbulum a dwile aka gər təv madula aaka duwa a Mbulum, dite meze hədzək ŋana hwaŋŋa ya ka, a tsahən a BATSAH kwa ŋa. Kərga taŋa ya na batsah mala məbatsa duwa a Mbulum a geye gà dukw ana ta gewa biy məpəla à bakal a gər a wele ata ya, dite na Mbulum a piler a à bakal ŋgar a.

32 Na mala bakal ata, a vile a dukw taf təmaŋ aà matawala fəla biy məpəla à bakal a ka, say a gisere a dəm təmaŋ ana dukw metire ihər tsiye. 33 A tike a ahər ŋgar aka gər dukw gənaw ata, a vəl biy məpəla à bakal a, dite a zlere a ɗa a fata, a təv ana ti zleyewar aɗəm ɗa a gà dukw gənaw ana tə dzawa, biy matawala fəla ana tə dulawa ya. 34 Mala məbatsa duwa a Mbulum a ndzeke a kəla ahər ŋgar a məmbəz dukw gənaw ata, ta vəl biy məpəla à bakal a, dite a geye aà gà mbukum ana ika gà tseke təv madula aaka gà dukw taf matawala fəla ana tə dulawa ya, dite a mbiɗe a məmbəz aaha a zeha ya fit, aà sik təv madula aaka gà dukw taf matawala fəla ana tə dulawa aaka a Mbulum. 35 A sese a gà tseke gà təv məŋgəl ana aà təmaŋ ata ya fit, kamala na ta sasawa aà dukw taf matawala fəla magawuba ya. Mala məbatsa duwa a Mbulum a dwil a aka gər təv madula aaka duwa a Mbulum, akaba nda gà asiŋ gà dukw ana, tə vakawa a BATSAH kwa ŋa ya. Kərga taŋa ya, na mala məbatsa duwa a Mbulum a geye gà dukw ana ta geyewa dər biy məpəla à bakal, a gər a wele ata a ge bakal a, dite na Mbulum a piler a bakal à wele ata ya.