5
1 Biy tsa, na wura aka ne mala sida dukw ana a ŋgatar a, kige tsa a tsaraka ya, tə zalar aà mege sida dukw ana a sər a. Aka niw mada metsik a dukw ana a sər ndzer a ka, taŋa ka bakal, dite bakal ŋa ika gər ŋgar.
2 Dukw ŋgiɗ naha pam asa: Na bəla wura, aka sər a aba tsa, aka ləm a dukw ana dukw zlaŋgatsak a, bəla tsa dukw dala kige tsa dukw gənaw ana dukw zlaŋgatsak ŋa, aka mət a, kige tsa bəla məməta gà ɓəza gà dukw ana tə dawa nda huɗ a. Wele ata aka ne dukw zlaŋgatsak, dite bakal ŋa ika gər ŋgar.
3 Dukw ŋgiɗ naha pam asa: Na bəla wura aka ləm aà zləməŋa dukw zlaŋgatsak wara ana a dara i ba mburma ya, aka sər aba tsa tekeɗe ka, i təv ana aka da mesire aba ya ka, aka ne mala bakal.
4 Dukw ŋgiɗ naha pam asa: Na wura aka dzala tsa, aka zəm mimbeɗe. Mimbeɗe ata a mbaɗa ya ka, a ge a dukw ana ŋgwal ŋa tsiye, kige tsa ŋgwal ŋa ya, a gà misle ŋgiɗ. Ama i təv ana wele ata aka da mesire aba ya ka, aka ne mala bakal.
5 Na wele ata aka ne mala bakal, nda təv gà dukw ata a tsik ahər ba ya ka, say a ɗife a à bakal ŋgar ata a ge ya. 6 Biy məpəla à bakal ŋgar ata a ge ya ka, say a gisere a dəm təmaŋ a, kige tsa dəm awak a. A vile a dukw taf ŋa, a BATSAH kwa ŋa aà matawala fəla məpəla à bakal ŋgar. I fata ya ka, mala məbatsa duwa a Mbulum, a geya gà dukw ana ta geyewa agəra wele ata. 7 Na wele ata a sle a à meŋgete a təmaŋ kige tsa awak aà məpəla gər dukw bakal ŋgar ata a ge ya tsəka, a sle a aà megesere a gà maadagwar a sula, kige tsa gà huɗgum a sula aka miɗ BATSAH kwa ŋa ya. Ta vile ɗiyeŋ ŋgiɗ ilik aà matawala fəla məpəla à bakal, dite biy ŋgiɗ aaha ka, ta vile a aà matawala fəla ana tə dulawa ya. 8 Wele ata a dze a à ahər a mala məbatsa duwa a Mbulum. Mala məbatsa duwa a Mbulum a peteha aà malahalah ɗiyeŋ ata ta vəl aà məpəla à bakal, a BATSAH kwa ŋa ya. A zlere ɗa nda dəba nda gehir, ama a sese a ikəka gər a tsa. 9 A tekweye a à məmbəz ŋa əŋgal aà guva təv madula aaka duwa a Mbulum. Dite a mbiɗe a à mezehe ŋa aaha aà sik təv madula aaka duwa a Mbulum ata. Taŋa ka, dukw taf matawala fəla məpəla à bakal. 10 I dəba ŋa ya, mala məbatsa duwa a Mbulum, a vile a masula ɗiyeŋ aaha, aà dukw taf matawala fəla ana tə dulawa ya, kamala məpala ahəm ana ta hitse dər a. Kərga taŋa ya, na a geye a gà dukw ana ta geyewa biy məpəla à bakal, agəra wele ata ya, dite na Mbulum a pilere a a bakal ŋgar a.
11 Na wele ata aka sle a aà maŋgata a gà huɗgum sula kige tsa gà maadagwar sula tsəka, a sle a aà mendzikere gufa ana kizlizizze ya kiliw makər, aà dukw taf məpəla à bakal ŋgar. Ama a mbiɗe a aaka gà mal nda makərɗa dizl ana a ze hwaŋŋa ya tsa, aɗaba taŋa ka, dukw taf ana ta vəlawa aà məpəla à bakal a. 12 Wele ata a zlere a gufa ata a mala məbatsa duwa a Mbulum a. I fata ya ka, mala məbatsa duwa a Mbulum a ndzike a gufa ata dəɗək ahər ilik. Taŋa ka, biy ana tə zalawar dukw taf məməbara a duwa a gər a. Dite a dwil a gufa ata aka gər təv madula aaka duwa a Mbulum. A gewe a aba nda gà asiŋ gà dukw taf ana tə vakawa a BATSAH kwa ŋa ya. Taŋa ka, dukw taf matawala fəla məpəla à bakal. 13 Kərga taŋa ya na mala məbatsa duwa a Mbulum a geye a gà dukw ana ta geyewa dər biy məpəla à bakal a agəra wele ata ya, dite na Mbulum a pilere a à bakal a ŋgar aª. Mala məbatsa duwa a Mbulum a ge a dər ka, kalkal, kamala ana ta gewa aà dukw taf gà dukw mezime ana ta ge ara i dala ya › . »
Matawala fəla məpəla gər dukw bakal
14 BATSAH kwa ŋa a gwaɗa a Musa: 15 « Gà biy ŋgiɗ tsa, na bəla wura aka ge bakal ana mawuraba ŋa hinne ya, nda təv dukw ana ta vəl pam à BATSAH kwa ŋa ya, i meweye ŋgar tsəka, say a gisere a hagwala ana dukw metire ihər tsiye, ika magər gà dukw gənaw ŋgar a, biy məpəla gər dukw bakal ŋgar. Gana ŋa mege kəla ka, tits aà dukw melive ndzemde kur siŋgwe məpəla gər dukw bakal ana a riŋ i ga tsəɗaŋŋa a ata ya. A vile a dukw gənaw ata ka, aà dukw matawala fəla məpəla gər dukw bakal ana a ge ya. 16 Wele ana a ge bakal nda təv gà dukw ana pam ta vəl a BATSAH kwa ŋa ya ka, a pile a dukw ata. Taŋa ɗekɗek tsa, a sikehe a dər aaka aà duwa ilik i huɗ dukw əzləm a, biy gana dukw ata. Dite a dze a gà dukw ata fit, a mala məbatsa duwa a Mbulum. Mala məbatsa duwa a Mbulum a zle ɗa a hagwala ata, ta vəl aà matawala fəla məpəla gər dukw bakal a, dite a ge a dər gà dukw ana ta gewa dər biy məpəla à bakal a, agəra wele ata, dite na Mbulum a pilere a a bakal ŋgar a.
17 Na wura a ge bakal i masəra aba ŋgar tsa, aka ɓəl aka məpala ahəm BATSAH kwa ŋa ilik, nda mege dukw ana məpala ahər ahəm a ya ka, aka ge bakal, bakal ata ika gər ŋgar. 18 Say a gisere a hagwala ana dukw metire ihər tsiye, i liwiŋ gà dukw gənaw ŋgar a, a mala məbatsa duwa a Mbulum a. Dukw gənaw ata gana ŋa mege kə̀la ka, ilik nda biy dukw gənaw ana, ta vəlawa aà məpəla gər dukw bakal a. Mala məbatsa duwa a Mbulum a geye gà dukw ana ta gewa biy məpəla à bakal a, agəra wele ata a ge bakal i masəra aba ŋgar a tsiye, dite na Mbulum a pilere a a bakal a wele ata ya. 19 Taŋa ka, matawala fəla məpəla gər dukw bakal, aɗaba nda ndzer wele ata ka, aka ge bakal, nda təv BATSAH kwa ŋa . »
20 BATSAH kwa ŋa a gwaɗa a Musa: 21 « Biy tsa, na wura a ge bakal ana mawuraba ŋa hinne ya, nda təv BATSAH kwa ŋa, nda mege dukw ana ŋgwal ŋa tsiye a wele ana gà Isərayel kamala ŋgat a, a sasa parsa aka gər dukw ana a vəlar a tike a aba ya ya, kige tsa, aka gər dukw ana a zla gwedere ŋa a mburma ya ya, kige tsa asa ka, aka gər dukw ana a zla nda akəl a, nda gà tsa aka gər dukw ana a kəzala nda ndzəɗa ya, 22 nda gà tsa asa ka, a sasa parsa aka gər dukw ana a dzeye, a ŋgat, dite a gwa ka, Yàa ŋgat tsiye, a zəm mimbeɗe aka gər parsa, aà makaha medzibe gà bakal ata, 23 wele ata ka, aka ge bakal, dite aka ne mala bakal. Say a me a à dukw ana a zla nda akəl a, kige tsa a dukw ana a kəzala a damər ŋgar nda ndzəɗa ya. Say a me a a dukw ana ta gwaɗar tike aba ya ya, kige tsa a dukw ana a ŋgat i bəɗ a meŋgete ya, 24 kige tsa a dukw ana a zəm aaka mimbeɗe nda parsa ya. A me a ka, à dukw ata ɗekɗek tsa, ama a pile a aaka gər asa. Duwa ilik i huɗ dukw əzləm a, biy dukw ata a me a dər a. A dze a a mala duwa, akahər ana aka sər a ba ka, aka ge bakal a. 25 I dəba ŋa ya ka, a gisere a hagwala ana dukw metire ihər tsiye, ika magər gà dukw gənaw ŋgar a, a mala məbatsa duwa a Mbulum a, aà matawala fəla məpəla gər dukw bakal a BATSAH kwa ŋa. Gana dukw gənaw ata mege kə̀la ka, tits aà gana dukw gənaw ana ta vəlawa aà məpəla gər dukw bakal a. 26 Kərga taŋa ya na, mala məbatsa duwa a Mbulum, a geye a gà dukw ana ta gewa biy məpəla à bakal a, agəra wele ata ika miɗ BATSAH kwa ŋa, dite na Mbulum a piler a à bakal ŋgar a . »