Gà dukw ana mehitse dər ŋa aka gər gà ɓəzla məbatsa duwa a Mbulum a
6–7
a) Aka gər dukw matawala fəla ana tə dulawa ya
6
1 BATSAH kwa ŋa a gwaɗa a Musa: 2 « Tsik gà məpala ahəm aaha a gà Haruna nda gà ɓəza ŋgar: ‹ Araha na gà dukw ana mehitse dər ŋa, aka gər dukw matawala fəla ana, tə dulawa ya: Dukw matawala fəla ata, a hinne ika akwa, ika gər təv madula aaka duwa a Mbulum tsikw a mekwede. Akwa mimbetereha tsa. 3 I dəba ŋa ya, mala məbatsa duwa a Mbulum a tike akaba petek leŋ, a tikehe a kwalisaŋ leŋ mbaŋa. A ndzike a bitekwe dukw matawala fəla ana tə dulawa ya, ika gər təv madula aaka dukw taf ata a Mbulum a. A tike a aà ba, a tsaka təv madula aaka duwa a Mbulum ata ya. 4 I dəba ŋa ya, a mbwirɗe a akaba a gà petek, a zle a bitekwe ata a de a dər izaɗ zaakwa aà təv mandzəba tar a, a təv ana dukw zlaŋgatsak iɗəm tsiye. 5 Akwa ana a gise a ika gər təv madula aaka duwa a Mbulum a ka, mimbete diydiy tsidze. Kə̀la mekwede ka, mala məbatsa duwa a Mbulum, a dzeyewe aakaha gà tsalaka. Aka gər tsalaka ata na a dze aakaha dukw gənaw biy matawala fəla ana tə dulawa ya. I dəba ŋa ya, a dwil a gà tseke gà təv məŋgəl gà dukw gənaw, matawala fəla magawuba. 6 Akwa ana ika gər təv madula aaka duwa a Mbulum a ka, mandza məvata ŋa hiywe mimbete tsidze ›.b) Aka gər dukw taf gà dukw mezime ana ta ge ara i dala ya
7 ‹ Araha na gà dukw ana mehitse dər ŋa, aka gər gà dukw taf gà dukw mezime ana ta ge ara i dala ya. Gà ɓəza Haruna na ta pete a à gà dukw taf ata a BATSAH kwa ŋa, ika miɗ təv madula aaka duwa ya. 8 Mala məbatsa duwa a Mbulum a, a ndzike a gufa ata kizlizizze magawa ŋa nda mal a, àha nda makərɗa dizl ana a ze hwaŋŋa ya fit a ahər, dəɗək ilik, a dwile a taŋa aka gər təv madula aaka duwa a Mbulum, taŋa ka, dukw taf məməbara a duwa a gər a. Dite meze hədzək ŋana hwaŋŋa ya ka, a tsahən aà BATSAH kwa ŋa. 9 Gà Haruna nda gà ɓəza ŋgar, ti zime a mezehe ŋana a zeha ihər a, ti zime a kə̀la ka, ti nde a aaka giɗe tsa, ika varavada ga petek mayahaba gər, təv ata ka, tsəɗaŋŋa. 10 Ti de a mezehe ŋa ata, kə̀la ka, giɗe mege ikəka tsa, aɗaba taŋa ka, bəŋa ana iye, i vəl a gà ɓəzla məbatsa duwa a Mbulum, ika gər gà dukw matawala fəla ana ta vakawa ya. Ar ka, tsəɗaŋŋa ndeyndey, kamala dukw matawala fəla məpəla à bakal a, kige tsa biy dukw matawala fəla məpəla gər dukw bakal a. 11 Say gà asləka gà mburma ana i gwala Haruna ya, na ti sle a aà mazəma dukw taf ata ta vaka ya. Nda ndzer ka, mezehe dukw taf ana tə zlaha a BATSAH kwa ŋa ya ka, a ne ka, bəŋa biy tar aà biybiy wa ahər kəla, wa ahər kəla. Zləməŋa dukw ana aka ləm aà dukw taf ata ya ka, aka ne tsəɗaŋŋa › . »ª
12 BATSAH kwa ŋa a gwaɗa a Musa: 13 « Araha na dukw taf gà dukw mezime ana ta ge ara i dala ya, gà Haruna nda gà ɓəza ŋgar, ta vilewe a a BATSAH kwa ŋa, a pat ana ti dze a aka ter a à mal mandza tar a megemir a: Gufa kizlizizze ŋana kiliw makər, mezehe ŋa i mekwede, mezehe ŋa aaha i hawa kə̀la wur gà pat, 14 gufa ata ta hileɓe a nda mal lele, dite mahəlaɓa gufa ata ti de a ka, nda laŋ. I dəba ŋa ya, ti sese a ikaba gatuw ata ya, dite ti dwileha dukw taf gatuw ata a BATSAH kwa ŋa, meze hədzək ŋana hwaŋŋa ya ka, a tsahən aà BATSAH kwa ŋa. 15 Aka təv ana ilik ŋa aà gà ɓəza Haruna ya, tàa vəlar megemir, mene batsah mala məbatsa duwa a Mbulum a ka, a gewe a dər ka, kamala taŋa ya hiywe mbaŋa. Taŋa ka, dukw ana ti zezemewe a hiywe, ti dwileweha a BATSAH kwa ŋa fit kweleŋ, a ne bəŋa biy ŋgar a. 16 Kə̀la ka, na mala məbatsa duwa a Mbulum a vilewe a dukw taf gà dukw mezime ana ta ge ara i dala ya ka, a dwil a ka, fit kweleŋ, kwizikw a zeha biy mezime tsidze . »
ɓ) Aka gər matawala fəla məpəla à bakal
17 BATSAH kwa ŋa a gwaɗa a Musa: 18 « Ɗif a gà məpala ahəm aaha a gà Haruna nda gà ɓəza ŋgar, araha na məpala ahəm, aka gər matawala fəla məpəla à bakal a. Say ti sle a ɗa a dukw gənaw ata ka, ika miɗ BATSAH kwa ŋa, a təv ana tə zleyewar aɗəm ɗa, a gà dukw gənaw ana, tə dzawa aà matawala fəla ana tə dulawa ya. Dukw matawala fəla ata ka, tsəɗaŋŋa ndeyndey. 19 Mala məbatsa duwa a Mbulum ana a tewele a fəla ata ya ka, a sle a aà mezimiŋa, a zime a ka, i təv ana tsəɗaŋŋa ya, ika varavada ga petek mayahaba gər. 20 Na ku mege dukula na aka ləm aà slu dukw matawala fəla ata ka, aka ne tsəɗaŋŋa. Na bəla məmbəz ŋa aka ndzizle a aà petek ka, a bere a təv məmbəz ata a ge ahər a, i təv ana tsəɗaŋŋa pam ta barayawa aɗəm a. 21 Na bəla ti de slu ata ka, nda mesigire duɗwa ka, ta keɗe a à mesigire ata. Kige tsa bəla ti de ka, nda mesigire virzegene ka, ti tsekeɗe a ihər a, dite ti tsilwiɓe a dər a ŋgwal yam. 22 Gà asləka gà mburma ana i gwala gà ɓəzla məbatsa duwa a Mbulum a, na ti sle a aà mipepiɗe a slu ata ya, aɗaba ar ka, tsəɗaŋŋa ndeyndey. 23 Ama na bəla tàa da a məmbəz dukw gənaw ana ta vəl aà matawala fəla ya, a huɗ ga petek mayahaba gər, dite na tàa ge dər megemir i təv tsəɗaŋŋa ŋa ata aà məpəla à bakal a ka, slu dukw gənaw ata ka, ti sle a aà mipepiɗe a tsa, ti dwil a nda akwa . »