d) Aka gər matawala fəla məpəla gər dukw bakal
7
1 « Araha na dukw ana ta hitse dər aka gər matawala fəla məpəla gər dukw bakal a. Dukw taf ata ar ka, tsəɗaŋŋa ndeyndey. 2 Say ti zle a ɗa a dukw gənaw matawala fəla məpəla gər dukw bakal ata ka, a təv ana ti zleyewar aɗəm ɗa a gà dukw gənaw ana tə dzawa, aà dukw matawala fəla ana tə dulawa ya. I dəba ŋa ya, mala məbatsa duwa a Mbulum, a gwetsekeye a à məmbəz ŋa, aka gà tseke gà guva təv madula aaka duwa a Mbulum. 3 A pete a dəraha a BATSAH kwa ŋa ka, gà tseke gà təv məŋgəl: dzimir ŋa, gà məŋgəl ana a kaha dukw huɗ a, 4 gà kur dəba sula nda məŋgəl ŋa, àha nda məŋgəl ana aà huɗ yam a, dite nda ŋgwal təv ana aà kivir a. Ti ndzike a aka bara a təv ilik ŋa ya nda gà kur dəba ŋa ya dze. 5 I dəba ŋa ya, mala məbatsa duwa a Mbulum a dwil a gà dukw ata tserdze ya, aka gər təv madula aaka duwa a Mbulum. Taŋa ka, dukw matawala fəla ana ta vakawa a BATSAH kwa ŋa biy məpəla gər dukw bakal a. 6 Zləməŋa wele ana asləka ŋa i gwala gà ɓəzla məbatsa duwa a Mbulum a, na a sle a aà mipepiɗe a slu ata ya. A pepiɗe a ka, i təv ana tsəɗaŋŋa ndeyndey ya. Dukw taf ata ka, tsəɗaŋŋa ndeyndey. 7 Gà dukw ana ta hitse dər agəra matawala fəla məpəla gər dukw bakal a ka, tar ka, ilik nda dukw matawala fəla ana ta vəl a Mbulum biy məpəla à bakal a. Slu dukw gənaw ata ta vəl a ka, biy mala məbatsa duwa a Mbulum ana, a tawal fəla məpəla à bakal a . »ɗ) Bəŋa biy gà ɓəzla məbatsa duwa a Mbulum
8 « Mala məbatsa duwa a Mbulum ana a peteha a dukw taf, wele ana a vəl biy matawala fəla ana tə dulawa ya, bagwa dukw gənaw ata ka, biy mala məbatsa duwa a Mbulum ana a tawal fəla ata ya. 9 Gà dukw taf gà dukw mezime ana ta ge ara i dala ya, ta guvut meguvite, ti de nda kəla laŋ a, kige tsa nda laŋ a ka, a ne bəŋa biy mala məbatsa duwa a Mbulum ana a pàt dəraha a Mbulum a. 10 Ama kə̀la ka, gà dukw taf gà dukw mezime ana ta ge ara i dala ya, ta həlaɓ nda mal, kige tsa, mal ikəka tsiye ka, a ne bəŋa biy gà ɓəza Haruna, ti dzeyewube a ika magər tar kalkal fit tserdze . »
e) Aka gər matawala fəla magawuba
11 « Araha na dukw ana ta hitse dər, aka gər dukw matawala fəla magawuba ana ta vile a a BATSAH kwa ŋa ya. 12 Na wura vile a duwa aà matawala fəla magawuba, biy mege kə kàaha ka, a ndzikekera aka gər dukw gənaw ata ya, gà gatuw ana ti de nda mal giɗe ikəka tsiye, gà gatuw ana slapatpat ti de ta bah a ahər mal giɗe ikəka tsiye, gà gatuw ana ta həlaɓ gufa ŋa nda mal a. 13 A ndzike a dər ahərra asa ka, dukw taf peŋ ana ti de giɗe ikəka ya, aka gər dukw matawala fəla magawuba nda biy mege kəkàaha ŋgar. 14 A zleye a ika gà dukw taf gà gatuw ata ya, ilik, ilik, dite a pete a dərraha a BATSAH kwa ŋa. Gà gatuw ata ka, a ne bəŋa biy mala məbatsa duwa a Mbulum ana a gwatsakaya à məmbəz dukw gənaw ata ta vəl aà matawala fəla magawuba aka gà tseke gà guva təv madula aaka duwa a Mbulum a. 15 Ama slu dukw taf gənaw ata ta vəl biy matawala fəla magawuba nda mege kə kàaha ya ka, say ta pepiɗe a ka, a pat ŋa ata tə tawal fəla ata ya, tsəka mezehe aà ndidwe ŋana tsa.
16 Na wura a vəl dukw taf matawala fəla magawuba, nda meziwe gər ŋgar, kige tsa biy maraha à dukw ana a tsik i sida ya, taŋa ta pepiɗe a dukw fəla ata ihər a əŋgal a pat ata a vəl dukw taf ata ya, dite naha a zeha ya ka, ti sle a aà mipepiɗe a ndidwe ŋana. 17 Ama na slu matawala fəla ata aka zeha aà mehinne məmakər ŋana asa ka, say ta weniŋa. 18 Na bəla wura aka papəɗ slu dukw matawala fəla magawuba ŋgar ata nda mehinne məmakər ŋana ŋa ka, Mbulum a gise a dukw taf ŋgar ata tsa. Matawala fəla ŋgar ata aka ne ka taf masakəŋa. Aɗaba slu ata ka, aka ne dukw zlaŋgatsak, matawala dukw ata a ge a ŋgulum asa tsa. Ku weke aka papəɗ slu ata ka, aka ne mala bakal. 19 Dite asa ka, na slu ata aka ləm a dukw ana dukw zlaŋgatsak a ka, wura a sle a à mipepiɗe a asa tsa, ti ndze a dər ka, a akwa.
Ku mege weke na ŋgat i dukw zlaŋgatsak tsəka, a sle a aà mipepiɗe slu dukw fəla ata. 20 Ama na bəla mburma ŋa, i dukw zlaŋgatsak, aka papəɗ slu matawala fəla magawuba ana ta vəl a BATSAH kwa ŋa ya ka, ti deleweª a ŋgat ika magər gà mayahaba gər gà mburma ŋgar a. 21 Dite ar ka, kamala taŋa ya mbaŋa, na bəla wura aka ləm aà dukw zlaŋgatsak, zləməŋa dukw zlaŋgatsak wara na a dara i ba mburma ya ya, ku mege dukw gənaw ana dukw zlaŋgatsak a, zləməŋa gà dukw ana ti sife a, tar gà dukw zlaŋgatsak ndeyndey a, dite aka papəɗ slu dukw taf matawala fəla magawuba ana ta vəl a BATSAH kwa ŋa ya ka, ti delewe a ŋgat ika magər gà mayahaba gər gà mburma ŋgar a . »
Gà dukw ana mehitse dər ŋa agəra mayahaba gər gà mburma ya
22 BATSAH kwa ŋa a gwaɗa a Musa: 23 « Tsik a gà mayahaba gər gà Isərayel: ‹ Ka da papəɗum gà tseke gà təv məŋgəl gà dukw gənaw, sla, təmaŋ kige tsa awak tsidze. 24 Məŋgəl dukw gənaw ana a mət məməta ya, kige tsa gà dukw dala ta kəɗ a ka, ki gwim a dər gà asiŋ gà megemir ŋgiɗ pampam, ama ki pepiɗwime a tsidze. 25 Nda ndzer, na bəla wura aka papəɗ tseke təv məŋgəl slu dukw gənaw ana ta vaka a BATSAH kwa ŋa ya ka, ti delewe a ŋgat ika magər gà mayahaba gər gà mburma ŋgar a. 26 Ki zimwime a məmbəz gà ɗiyeŋ nda biy gà dukw gənaw tsidze, na i təv gà mendze kurum ana ki ndzwim a iɗəm a tserdze ya. 27 Na bəla wura ilik aka zəm ku mege məmbəz wara ka, ti delewe a ŋgat ika magər gà mayahaba gər gà mburma ŋgar a › . »
28 BATSAH kwa ŋa a gwaɗa a Musa: 29 « Tsik a gà Isərayel asa: ‹ I təv ana wura a vile a dukw taf biy matawala fəla magawuba a BATSAH kwa ŋa ya ka, say a zlere a bəŋa biy BATSAH kwa ŋa ya. 30 Say ŋgat ŋa nda gər ŋgar, mandzəkara a gà tseke gà təv məŋgəl, nda dzegeɗik gəzləŋ dukw gənaw ata ta vakawa a ne bəŋa biy BATSAH kwa ŋa ya. Say a vilere a dzegeɗik gəzləŋ ŋa ata a BATSAH kwa ŋa ka, nda mege dər gà dukw ana ta patawa dər a. 31 I fata ya ka, mala məbatsa duwa a Mbulum, a dwil a gà təv gà məŋgəl ata aka gər təv madula aaka duwa a Mbulum. Ama dzegeɗik gəzləŋ ŋana ka, a ne biy gà Haruna nda gà ɓəza ŋgar. 32 Ki zlwim a gus ahər mezime dukw taf matawala fəla magawuba ata, ki vilwim a a mala məbatsa duwa a Mbulum asa mbaŋa. 33 Gus ahər mezime ata ka, bəŋa biy kəla Haruna ana a da a məmbəz ŋa, nda gà tseke gà təv məŋgəl dukw gənaw ata, ta vəl aà matawala fəla magawuba ya, aka təv madula aaka duwa a Mbulum a. 34 Taŋa ka, gà dukw ana iye nda gər gà, ì wiz aà kurum gà Isərayel a, say ki ndzikwim a iɗəm, gà dzegeɗik gəzləŋ nda gus ahər mezime gà dukw gənaw ana ka dzum aà matawala fəla magawuba nda mege dər gà dukw ana ta patawa dər a. Ki dzwime a gà taŋa ka, a mala məbatsa duwa a Mbulum Haruna, dite a gà ɓəza ŋgar. Gà tseke ata ka, ti ne, bəŋa biy tar a biybiy. Taŋa ka, məpala ahəm ana ndze a aà biybiy ya › . »
35 Araha na gà tseke bəŋa biy gà Haruna nda gà ɓəza ŋgar, ana ti ndzike a, ika gà dukw matawala fəla ana ta vakawa a BATSAH kwa ŋa ya. Gà dukw ata ti ne bəŋa biy tar a ka, a gər pat ana, ti ne aà tar gà ɓəzla məbatsa duwa a Mbulum, aà megemir a BATSAH kwa ŋa ya. 36 Gà taŋa na BATSAH kwa ŋa a gwa ahər, gà Isərayel tə dzawa a tar a, a gər pat ana ta mbaɗa a tar mal, a gər biy məvəl a tar megemir a. Taŋa ka, məpala ahəm ana a ndze a aà biybiy, ta gise a ahər a ahəm wa ahər kəla, wa ahər kəla ya.
37 Taŋa ka, gà məpala ahəm ana aka gər məvəla dukw taf matawala fəla ana tə dulawa ya, nda gà dukw taf gà dukw mezime ana ta ge ara i dala ya ya, nda gà dukw matawala fəla məpəla à bakal, nda gà dukw matawala fəla məpəla gər dukw bakal, nda gà dukw matawala fəla məvəl a megemir a gà ɓəzla məbatsa duwa a Mbulum, dite nda məvəla dukw matawala fəla magawuba ya. 38 BATSAH kwa ŋa a dza gà məpala ahəm ata a Musa ka, i dala i kusak, ika gər kwite Sinay. A pat ŋa ata na a wiz a gà Isərayel, tə ndzakara gà dukw taf tar a ya.