Lewi 8

Məvəla megemir a gà Haruna nda gà ɓəza ŋgar

1 BATSAH kwa ŋa a gwaɗa a Musa: 2 « Zal a gà Haruna nda gà ɓəza ŋgar, aka biye hərmaga mada a ga petek mayahaba gər. Tə ndzəkara gà petek gà ɓəzla məbatsa duwa a Mbulum a, nda mal metike mburma a megemir a, ta gəsara mbuluv sla a, aà matawala fəla məpəla à bakal a, gà hagwala sula, àha nda kiteh ana gà peŋ iɗəm giɗe ikəka tsiye. 3 I dəba ŋa ya, kà yaha gər, a gà Isərayel fit tserdze a fata . »

4 Musa a gəs ahəm aà BATSAH kwa ŋa, gà mayahaba gər gà mburma ti yahaba gər, aka biye hərmaga ga petek mayahaba gər. 5 Tsam ka, Musa a gwaɗa a gà mayahaba gər gà mburma: « Araha na dukw ana BATSAH kwa ŋa a gwa, ki gikwe a ya . » 6 Musa a sərəkaha a gà Haruna nda gà ɓəza ŋgar, a baraya tar. 7 A tike andiw aka Haruna, a danar slarapa petek aka dəmkul, a tiker aakaha geeri, dite efud, a danar maŋgara slarapa ŋa aka dəmkul. 8 A tike aaka kiwa gəzləŋ, a dzar aɗəm gà Urim nda Tummim^*. 9 Musa a ndiwiɗer mendiwiɗe gər a gər. A tike ahər dukw metsehine megeŋa nda gura a ndzikiɗ ba mibize duwa, aka miɗ ŋa. Taŋa ka, dukw ana a ɗif a dər ka, tàa tike aakahər a. A geye gà dukw ata fit ka, kərga na BATSAH kwa ŋa a gwaɗar ge ya.

10 I fata ya ka, Musa a zla mal metike mburma a megemir, a ge aà ga petek, nda gà dukw ana iɗəm a fit tserdze. Kamala taŋa ya na a dza tar pam biy BATSAH kwa ŋa ya. 11 A gwatsakaya aà mal ata aà təv madula aaka duwa a Mbulum, sik təsəla, dite a ge mal aà təv madula aaka duwa a Mbulum nda gà kazlaŋa megemir ŋa dze, gà tugwaɗ, nda gà dukw metike akəŋa, kamala taŋa ya na a ne a tar pam biy BATSAH kwa ŋa ya. 12 I dəba ŋa ya, a dza mal metike mburma a megemir ata a gər a Haruna, a ge ahər mal ata ka, aà mene a ŋgat pam biy BATSAH kwa ŋa. 13 I dəba ŋa ya ka, Musa a sərəkaha aà gà ɓəza Haruna. A dza aka tar gà andiw, a danaya tar slarapa petek aka dəmkul, a ndeweɗeye tar gər, kamala ana BATSAH kwa ŋa a gwaɗa a Musa ya.

14 I dəba ŋa ya asa ka, Musa a gəsara mbuluv sla a, aà matawala fəla məpəla à bakal a, gà Haruna nda gà ɓəza ŋgar, tə dza ahər tar aka gər mbuluv sla ata. 15 Musa a zler ɗa a mbuluv sla ata, a təf məmbəz ŋa, a geye aà gà mbukum ana ika təv madula aaka duwa a Mbulum a nda kəla ahər, aà məbara ihər dukw zlaŋgatsak a. A mbəɗ à mezehe məmbəz aaha, aà sik təv madula aaka duwa a Mbulum ata. Kamala taŋa ya na, a ne dər pam biy BATSAH kwa ŋa ya, aà ka, mege megemir matawala fəla məpəla à bakal. 16 I dəba ŋa ya, Musa a sasa gà təv məŋgəl ana a kaha dukw huɗ a fit, nda ŋgwal təv ana aà kivir a, gà kur dəba sula nda məŋgəl ŋa dze. A dul aka gər təv madula aaka duwa a Mbulum fit. 17 Ama a ndzək mezehe slu mbuluv sla ata, bagwa ŋa, slu ŋa, nda za ŋa fit dze, a da medwile a bər a, əzaɗ zaakwa, aà təv mandzəba tar a, kamala ana BATSAH kwa ŋa a gwaɗa a Musa ya.

18 I dəba ŋa ya asa ka, Musa a gəsara hagwala ya, aà matawala fəla ana tə dulawa ya. Gà Haruna nda gà ɓəza ŋgar tə dza ahər tar aka gər hagwala ata. 19 Musa a zler ɗa, a gwatsakaya a məmbəz ŋa, aka gà tseke gà guva təv madula aaka dukw a Mbulum. 20 I fata ya ka, Musa a tsala ikaba hagwala ata ya, dite a dul akaba nda gà gər ŋa, nda gà tseke gà təv məŋgəl ŋa. 21 A bara gà dukw huɗ nda gà mendekwiyek ŋa, a dul hagwala ata fit aka gər təv madula aaka duwa a Mbulum. Taŋa ka, dukw matawala fəla ana tə dulawa ya, dite meze hədzək ŋana hwaŋŋa ya ka, a tsahən aà BATSAH kwa ŋa. Taŋa ka, dukw matawala fəla ana ta vakawa ya, kamala ana BATSAH kwa ŋa a gwaɗa a Musa ya.

22 I dəba ŋa ya asa ka, a gəsara masula hagwala ya. Hagwala ata ka, aà məvəla megemir a gà ɓəzla məbatsa duwa a Mbulum. Gà Haruna nda gà ɓəza ŋgar, tə dza ahər tar, aka gər hagwala ata. 23 Musa a zler ɗa, a təf məmbəz ŋa zaakwa. A ge məmbəz ata aà təv mandəfa zləm ahər mezime Haruna, dite a ger aka mandagwam ahər mezime ŋgar, nda mandagwam sik ahər mezime ŋgar. 24 I dəba ŋa ya, a sərəkara aà gà ɓəza Haruna, a geye məmbəz aà gà təv mandəfa zləm ahər mezime tar, nda gà aà gà mandagwam gà ahər mezime tar, dite nda gà mandagwam sik ahər mezime tar. I dəba ŋa ya, a gwatsakaya à mezehe məmbəz aka gà tseke gà guva təv madula aaka duwa a Mbulum ata tiwlik tits. 25 I fata ya ka, a ndzək gà tseke gà təv məŋgəl, dzimir ŋa, məŋgəl ana a kaha gà dukw huɗ a, ŋgwal təv ana aà kivir a, gà kur dəba sula nda məŋgəl ŋa dze, dite nda gus sik ahər mezime. 26 I kiteh peŋ ana giɗe ikəka tsiye, metike ŋa ika miɗ BATSAH kwa ŋa ya ka, a ndzəkara iɗəm, gà gatuw ana ti de giɗe ikəka tsiye ilik, gatuw ana ti de nda mal a ilik, nda gatuw ana slapatpat a ilik. A dza gà gatuw ata aka gər gà məŋgəl, nda gus ahər ŋa mezime ata. 27 I fata ya ka, a dza gà dukw ata fit akahər a Haruna, dite akahər a gà ɓəza ŋgar, ta pàt dər nda mege dər gà dukw ana ta pàtawa dər a, ika miɗ BATSAH kwa ŋa. 28 I dəba ŋa ya, Musa a ndzaka gà dukw ata ika ahər tar a, a dul aka gər təv madula aaka duwa a Mbulum, aha aka gər dukw matawala fəla ana tə dulawa ya. Taŋa ka, dukw matawala fəla aà məvəla megemir a gà ɓəzla məbatsa duwa a Mbulum ana ta vakawa, meze hədzək ŋana hwaŋŋa ya ka, a tsahən a BATSAH kwa ŋa. 29 Musa a zla dzegeɗik gəzləŋ hagwala məvəla megemir a gà ɓəzla məbatsa duwa a Mbulum ata, a pàt dər nda mege dər gà dukw ana ta pàtawa dər a. Dzegeɗik gəzləŋ hagwala ata a ne bəŋa biy Musa, kamala ana məpala ahəm BATSAH kwa ŋa a tsiker a.

30 I dəba ŋa ya, Musa a ndzək gà mal metike mburma a megemir nda məmbəz ana ika gər təv madula aaka duwa a Mbulum a, a gwatsaka dər aà gà Haruna nda gà ɓəza ŋgar, nda gà petek tar ŋa dze. Kamala taŋa ya, na a ne aà gà Haruna nda gà ɓəza ŋgar, nda gà petek tar ŋa dze, pam biy Mbulum a.

31 Musa a gwaɗa a gà Haruna nda gà ɓəza ŋgar: « Dwim slu hagwala masula ŋa aha, aka biye hərmaga, ga petek mayahaba gər. Kà papuɗum slu ata a fata a təv ilik ŋa, nda gà peŋ ana i kiteh, ti de aà məvəla megemir a gà ɓəzla məbatsa duwa a Mbulum a, kamala na i tsik a: ‹ Say gà Haruna nda gà ɓəza ŋgar na ta pepiɗe a ya ›. 32 Mezehe gà slu nda peŋ ata ti zeheye a ya ka, ki dzwim a dər ka, a akwa. 33 Ki ndzwim a ika biye hərmaga ga petek mayahaba gər, mehinne təsəla, say gà pat məvəla megemir a gà ɓəzla məbatsa duwa a Mbulum, a ndive a dzekwiŋ. Aɗaba gà pat ana ta vile a kurum a megemir a, a ndze a ka, mehinne təsəla. 34 Dukw ana ki gikwe a mbakum a ka, kamala na BATSAH kwa ŋa a gwa gwim a. Aà dite ka, kə ŋgatum məpəla à bakal. 35 Ki ndzwim a ika biye hərmaga ga petek mayahaba gər ata, gà həpat nda həvəɗ mehinne təsəla, nda mazazama məpala ahəm BATSAH kwa ŋa, na dite ki metwime a tsiye. Taŋa ka, dukw ana Mbulum a gweɗiŋ a . » 36 Gà Haruna nda gà ɓəza ŋgar, ta ge dukw ana BATSAH kwa ŋa a tsik a tar nda ahər Musa ya fit tserdze.