Lewi 9

Mandzəba aà matawala fəla gà Haruna nda gà ɓəza ŋgar

1 I dəba gà mehinne məvəla megemir a gà Haruna nda gà ɓəza ŋgar a, aà mehinne matsamakər ŋana ka, Musa a zal a gà Haruna nda gà ɓəza ŋgar nda gà bàba ŋana i Isərayel a. 2 A gwaɗa a Haruna: « Zla kəla sla, kà vəl aà matawala fəla məpəla à bakal. Ki zle a hagwala, ki vile a aà matawala fəla ana tə dulawa ya. Gà dukw gənaw ata sula ya ka, gà dukw metire mege aà tar tsa. Ki de a dər aka miɗ BATSAH kwa ŋa. 3 I dəba ŋa ya, ki tsik a məpala ahəm aaha a gà Isərayel: ‹ Zlum vugul, kà vəlum aà matawala fəla məpəla à bakal kurum. Ndzəkum gà kəla sla nda kəla hagwala ana mive ilik ilik a, gà dukw metire mege aà tar tsiye, aà dukw matawala fəla ana tə dulawa ya, 4 ki ndzikwime a mbuluv sla ilik, nda hagwala ilik asa. Ki dzume a à BATSAH kwa ŋa aà matawala fəla magawuba, dite nda dukw taf gufa ana mahəlaɓa ŋa nda mal a. Aɗaba mbakum na BATSAH kwa ŋa a pete a a kurum a aba ya › . »

5 Dukw ana Musa a tsik a tar a ka, tə ndzakaha aka miɗ ga petek mayahaba gər a. Gà mayahaba gər gà mburma tserdze tə sərəkaha ta hitse aka miɗ BATSAH kwa ŋa. 6 Musa a gwaɗa a tar: « Araha na dukw ana BATSAH kwa ŋa a gwaɗa a kurum gwim, dite ana a pete a a kurum a à mezlibe ŋgar a . » 7 I fata ya ka, Musa a gwaɗa a Haruna: « Sərək a təv madula aaka duwa a Mbulum. Vəl dukw taf matawala fəla məpəla à bakal yak, dite kà vəl dukw matawala fəla ana tə dulawa ya. Ki geye gà dukw ana ta geyewa dər a, aà məpəla à bakal yak, nda biy məpəla à bakal gà mayahaba gər gà mburma. I dəba ŋa ya, ki vile a dukw taf matawala fəla mayahaba gər gà mburma, ki geye gà dukw ana ta geyewa, biy məpəla à bakal a, aka gər gà mburma ata, kamala ana BATSAH kwa ŋa a gwa ya . »

8 Haruna a sərək a təv madula aaka duwa a Mbulum, dite a zle ɗa a kəla sla ata, a vəl aà matawala fəla məpəla à bakal ŋgar a. 9 Gà ɓəza Haruna, ta patar à məmbəz dukw gənaw ata. Haruna a dzak aɗəm kəla ahər ŋgar, dite a geye aà gà mbukum ana ika gà tseke təv madula aaka duwa a Mbulum a. I dəba ŋa ya, a dza à mezehe məmbəz aaha aà sik təv madula aaka duwa a Mbulum ata. 10 A dul gà tseke gà təv məŋgəl, gà kur dəba nda ŋgwal təv ana aà kivir a, aka təv madula aaka duwa a Mbulum biy dukw taf matawala fəla məpəla à bakal, kamala ana BATSAH kwa ŋa a gwaɗa a Musa ya. 11 Gà slu ŋana, nda bagwa ŋana ka, a da wànà a bəra izaɗ aà təv mandzəba tar a.

12 Haruna a zle ɗa a hagwala ana ta vəl aà matawala fəla ana tə dulawa ya. Gà ɓəza ŋgar tə daraha à məmbəz dukw gənaw ata. A gwatsakaya à məmbəz ŋa, aka gà tseke təv madula aaka duwa a Mbulum tiwlik tits. 13 Tə dzar gà slu dukw taf matawala fəla ana tə dulawa, tə tsala ikaba ya ya, àha gər ŋa. A dul gà dukw ata aka gər təv madula aaka duwa a Mbulum. 14 A bara gà dukw huɗ ŋa, nda gà mendekwiyek ŋa fit, dite a dul a aakaha aka gər dukw matawala fəla ana tə dulawa ya, ika gər təv madula aaka duwa a Mbulum a.

15 I dəba ŋa ya, Haruna a pataha aà dukw taf matawala fəla gà mayahaba gər gà mburma a BATSAH kwa ŋa. A zla vugul ana gà mayahaba gər gà mburma ta vəl aà matawala fəla biy məpəla à bakal tar a. A zler ɗa, a vəl dukw matawala fəla məpəla à bakal, kamala ana a ge aà kəla sla ŋgar ata a vəl a. 16 A vəl dukw matawala fəla ana tə dulawa ya, kamala ana məpala ahəm a tsik a. 17 A vəl dukw taf gà dukw mezime ana ta ge ara i dala ya, a ndzək ikəka ya dəɗək, a dul aka təv madula aaka duwa a Mbulum, a səkah dər aakaha dukw matawala fəla ana tə dulawa kə̀la a mekwede ya. 18 A zleye ɗa a gà mbuluv sla, nda hagwala ata gà mayahaba gər gà mburma tə dza aà dukw matawala fəla magawuba ya, gà ɓəza ŋgar tə ndzakaraha gà məmbəz gà dukw gənaw ata, a gwatsakaya dər aka gər gà tseke təv madula aaka duwa a Mbulum tiwlik tits. 19 Tə ndzakaraha gà tseke gà təv məŋgəl mbuluv sla, nda biy hagwala ata asa mbaŋa, gà dzimir ŋa, nda gà məŋgəl ana aà dukw huɗ a, gà kur dəba, nda gà ŋgwal təv ana aà kivir a. 20 Tə dza gà məŋgəl ata aka gər gà dzegeɗik gəzləŋ gà dukw gənaw ata sula ya. I dəba ŋa ya, Haruna a dul aka gər təv madula aaka duwa a Mbulum. 21 Haruna a dza gà dzegeɗik gəzləŋ nda gus ahər mezime a BATSAH kwa ŋa, nda mege dər gà dukw ana ta pàtawa dər a, kamala ana Musa a gwaɗar a.

22 I təv ana Haruna a ndəv aba à məvəla gà dukw matawala fəla məpəla à bakal a, nda gà dukw matawala fəla ana tə dulawa ya, nda gà dukw matawala fəla magawuba ya ka, a ndzək ahər ŋgar a mbulum aka gər gà mayahaba gər gà mburma, a pise aka tar ahəm. Tsam ka, a tarəra ika təv madula aaka duwa a Mbulum a. 23 Gà Musa nda Haruna, tə da a huɗ ga petek mayahaba gər. I dəba ana tə dara i ga ata ya ka, tə dzəba aà mipise ahəm aka gər gà mayahaba gər gà mburma. I fata ya kuɗa ka, BATSAH kwa ŋa a pat aà mezlibe ŋgar a gà mayahaba gər gà mburma fit. 24 I fata ya asa ka, akwa a vataraba ika miɗ BATSAH kwa ŋa ya, əndzup a wànà gà dukw matawala fəla ana tə dulawa ya, nda gà təv məŋgəl ana ika təv madula aaka duwa a Mbulum a. Gà Isərayel fit tserdze tàa ŋgat a a dukw ata. Ta Mewideye nda maŋgayaba, dite tə dza gurmits a biye luz yemere aka ahəɗ.